رواية فقيرة في جامعة الأغنياء الفصل الرابع 4 بقلم ماريه عبد الله السعود

رواية فقيرة في جامعة الأغنياء الفصل الرابع 4 بقلم ماريه عبد الله السعود

انا لسه مصدومة مكاشفي! مكاااااشفي!!!!مرسل لي كده مع انو مافي بينا اي معرفه غير كم مره شوفته فيه في 

الجامعة  أمكن انا بعرفو اكتر من انو هو يعرفني الافكاره كلها خلصت من راسي صليت وحاولت ادرس بس بالي مع مكاشفي وماعارفه اي شي عن مشاعري مشيت لي امي قعدت حكيت ليه اي حاجه امي قالت لي يامريم استخيري يابتي وانا معاك في اي قرار بتقولي من كلامك ليو  شايفه انو هو  شاب كويس ومامهم اذا عندو قروش او لا القروش مااهم شي الأخلاق هي المهمة وقلت اخلاقو كويسه و الأهم انو هو من اسره محترمه شديد حسب كلامك برضو شوفي يامريم  الزول  البخاف الله فيك ويحترمك ويقدرك ومابجي يوم ينزل من قدرك يكون ليك السند والكتف البتملي فيو في الدنيا دي دا نهاي ماتفرضي  فيو لانو انا وابوك مادايمين ليك ومصيرك بكرا تتزوج وتكوني بيت واسره والبتتزوجي دا بكون معاك لي اخر المشور ومعاك على الحلوه والمره  شوفي انا وابوك مع انو ابوك وضعو ماكويس بس انا يامريم سعيده شديد ومرتاحة  الحمد لله مامر يوم وهو مزعلني ودايمآ محترمني ومقدرني  صح كان بمر علينا ايام صعبه شديد وابوك ماكان عندو شغل سابت بس هو نهاي ماقصر كان بشتغل اي حاجه وبرجع من الشغل وهو مبتسم وكانو ماكان شغال وتعبان حتى لو مااشتغل وماجاب معاو حاجه الابتسامه بتكون في وشو من يدخل البيت ونهاي مابتزهج فيني ويفضي تعب الشغل فيني دايمآ بحاول يخلي كل مشاكل الشغل على عتبت الباب  ويدخل عشان كده يامريم لما تفكيري في الزواج اختاري البكون سندك وأمان ليك والكتف البتميل فيو لما الدنيا تضيق بيك وماتعاين نهاي لي القروش لانو القروش مادايمة ولا سبب السعادة  وهو قال ليك عايزك بي الحلال من كلامو يامريم شب كويس وقال ليك خطوبة يعني عندك فرصه تعرفيو اكتر واستخيري يامريم قلت ليك انشاء الله وسلمت عليه في رأسه قالت لي يامريم خلاص كبرتي وبقيت عروسة نهاي مابصدق مع ابتسامة كده ودعوه ضحكت على كلامه هههه

كلام امي طمني لانو كان في  شي شاغل تفكيري صح امي اتكلمت عنو بس ما اخدت باله وهي بتتكلم  ومن كلام امي شبه عرفت نفسي عايزه شنو  لبست وطلعت الجامعة من دخلت شوفته الشلة يعاينو فيني ويتكلمو مااشتغلت بيهم كملت اليوم طبعآ ماجبت السيره لي رهف ونون ماعارفه لي أمكن عشان مكاشفي مشهور شديد وماعايزه الكلام ينتشر في الجامعة وانا طالعة صادفت مكاشفي سلم علي قال لي مريم انا منظر ردك رفعت راسي عيوني جات في عيونو نزلت عيوني سريع قلت ليو انشاء الله خير واتحركت كنت متوتره شديد ماعارفه ارد بي شنو وصلت البيت والايام ماشه وانا بين الجامعة والبيت والامتحانات فاضل ليه اسبوع وانا قلت اركز على الامتحانات لانو موضوع مكاشفي من يوم رسل  لي انا بفكر فيو واسه لي اسبوع كامل تقريبآ وعرفتي نفسي عايزه شنو واسبوع كامل بتهرب من مكاشفي في الجامعه وحتى الشبكه مابفتحه

بعد كم يوم كده مكاشفي رسل لي السلام عليكم مريم اخبارك انشاء الله بخير انا فتحت الرساله واترددت في انو ارد رسل تاني مريم انا عايز اعرف ردك شنو؟ طوالي رديت وعليكم السلام تمام الحمدلله بخير وانت كيفك؟ قال دايمآ انشاء الله بخير وعافية

 انا بخير الحمد الله رسلتو ليو

انا فكرت واستخرت صح مابعرفك كتير وماعارفه عنك حاجه بس واثقة انو انت زول محترم وشديد واي بنت بتتمنا ترتبط بيك وصدقني بدعي من قلبي تلاقي البتسعدك بس انا مابقدر ارتبط بيك عندي أسبابي الخاصة بعتذر منك كتير كتييير والله يبعت ليك بنت الحلال يارب رسل لي انا محترم قرارك شديد لانو آنتي اظن فكرتي فيو لانو ردك كان بعد أسبوع بس انا عايز اعرف سبب رفضك ممكن؟ وبوعدك تاني ما اعترض طريقك وانا كمان بتمنا ليك ولد الحلال البسعدك بس انا ماشايف بنت حلال غيرك يامريم ومهتم اعرف السبب مممكن؟

قلت ليو بعتذر والله مابقدر اقول أسبابي واسفه من قلبي والله 

عمل اعجاب على الكلام ومارد وانا طوالي حظرتو

مكاشفي موكا💫💥

انا حياتي كلها مافكرت في بنت كنت مشغول شديد وحياتي كلها مركزه على أمي وخصوصا بعد ظهر ليه السرطان وانا ممتحن الشهادة امي كانت دكتورة ناجحة شديد وعندها مستشفى كبير ومشهوره وكانت مركزه حياته عشان المستشفي مع انو مستشفى كبير بس كانت الرسوم فيو بسيطة شديد امي قلبها رحيم شديد وعاطفية لي ابعد حد المستشفي دا اي قرش فيو بمشي على المنظمات والناس المحتاجه والعمليات والعلاجات الناس الوضعة تعبان واي زول بدخل باب المستشفي مستحيل يطلع قلبو مكسور عشان ماقادر يوفر حق العلاج والرسوم ولما عرفت بي مرضه وانو عندها سرطان في الحلق طوالي جات قعدت معاي واول مره اشوف امي مكسوره كده وضعيفة دايمآ كانت قوية وايمانه بي ربها قوي شديد قالت لي مكاشفي عارفه حلمك انو تدخل الكلية الحربيه وانا كنت بتمنا تحقق حلمك بس انا عايزاك تدرس طب واول مره امي تبكي وتكون ضعفة كده واصلت كلامة عارفة المستشفي دا يامكاشفي بتساعد ناس كتيره محتاجة وبتقف مع اي زول مادي يدو لي المساعدة وانا اسه ما خايفه الا لما تحصل لي حاجة وما في زول يقدر يديره او يتصرف في  القروش البتطلع من المستشفي وتمشي المكان المناسب مكاشفي ممكن تهتم بي المستشفي والناس المعتمد عليو بعد الله طوالي من غير ترددد قلت لي ابشري ي

يامي بعد عمر طويل انشاء الله وانا عارف انو انتي قوية وبكرا انشاء الله ترجعي احسن من الاول وتمسكي المستشفي وانا بوعدك انو ما اقصر من اي زول بضرب باب المستشفي وطالب المساعده ومن الليه انا حلمك حلمي وسلمت على في راسه ا انهرت خلاص بعد ما كنت متماسك ونزلت دموعي من عيوني لما شافتني كده  وحاولت تحنسني او تطمني وقالت لي فترة محدده وبرجع امسكة وانت تمشي تشوف حلمك بي وين ضحكت على كلامة وهي ضحكت وحضنتني  من اليوم داك انا وابوي واقفين مع امي انا بمشي معاها المستشفي وماسك كل منظماته الخيرية واي قرش من المستشفي انا بتصرف فيو زي ماقالت لي ومعاها في رحلة العلاج والحمد لله ماشه تتحسن امتحنت ودخلت طوالي كلية الطب ماكان في شي شغال بالي من دخلت الجامعة غير  الدرسه و المستشفي والمنظمات اسه  لي في الجامعة ٤ سنوات مابعرف غير   اصحابي عمار وياسر واحمد والطلاب الفي الجامعة علاقتي معهم كويسة شديد وأم  الجنس التاني دا مابعاين ليو لانو خاتي فهم في راسي اي حاجه بتبدا بي الحرام بتكون نهاية حرام والله ما ببارك ليك فيه  وقلبي دا لو في يوم  دق  لي وحده طوالي بتقدم ليه وبتزوجه عايزه تكون أول حب واخر حب ونهايتو حلال و لو رب العالمين رزقني بي بنات يبارك لي فيهم لانو عارفه كما تدين تدان مع انو الحوالي بنات أشكال وأنواع بس وحده فيهم قدرت تحرك قلبي او عقلي مافي غير مريم وانا داخل على الجامعة عيوني وقعت فيها سبحان الخالق عيوني عسلية زي عيون الغزال ولون اسمر زي القهوة تَعثرتُ بعينيكِ  فَسقط قلبِي ألم أقل لكِ ... إن كُل 

العيُون مَرت مرُور الكرَام  إلا عينيكِ ... أنتِ🤎 عاينت فيه سريع ونزلت عيوني بس قلبي اتحرك حاسي بدقه قوية شديد دخلت الجامعة بس خليت قلبي على باب الجامعة عند مريم وتاني لما شوفتها كانت  بريئه شديد وهي داخله الكفتريا عيونه في الأرض فيه خجل كده ماطبيعي رفعت عيوني عليه وهي رفعت عيونه مع انو عارفه نظرته كانت بريئة ماكانت بتقصد حاجه بس لما رفعت عيونة قلبي دق شديد  وبطريقة غريبه عيونه العسلية ولونه الاسمر ماقادر اوصف جمالة والبساطة ألفيه ولفت الطرحة والعباية اي حاجه فيه بتجذبني  ليه شديد لما دخلت المكتبة وانا كنت واقف وهي ضغطة الشاشه واتحركت اليد الالية هي  انخلعت وصرخت منظرة كان طفولي ماقدرت مااضحك وهي اظن حست بي طوالي انسحبت ولا لما دخلت الكفتريا وانا المره دي سرحت فيه وماكنت مركز لما لكزني صاحبي عمار وضحك علي وقالي مكاشفي وانا ضحكت معاو ولا يوم صالة وضحكته لما ضربني صاحبي عمار في راسي وانا عيوني معها لما دخلت ضحكتة (كانت عيناكِ هي السبب،

‏الأكثر إقناعاً للوقوع في حبكِ كل يوم.🖤..)انا من ارجع البيت وهي مابتفارقني مريم عيونة وسماره ضحكتة البريئه مافيه حاجه فيه مصتنعه اي حاجه فيه طبيعية (.اصلو الفرح وكتين يفيض... ما ليهو قيف غير ضفتك🖤💫.)

وتاني لما دخلت الكفتريا وفي شلة كده شاغلته ماقدرت امسك اعصابي كنت خايف من انو الدنيا تركز  معاها خايف من نظرات الطلاب عليها لو علي ادسه من عيون العالم ماعايز اي زول يقع في حب عيون مريم غيري ماعايز زول يشوف جماله ولما عاينت  ليه وهي مضاااااايقة وخجلانة من نظرات الطلاب وكللام الشلة فيه طوالي اتحركت  ماحسيت بي نفسي الا وعمار بحجزني منهم يالله ياالله على القلب لما يحب انا مكاشفي العمري مارفعت ايدي او صوتي على زول كبير أو صغير دايمآ بتحكم في غضبي ودايما ايدي ما بمدها الا لي فعل  الخير ومساعدت الناس ما لي في   الضرب ماعارفه كيف عملت كده يالله يالله رجعت الطاولة وقعدت و طلعت طوالي على البيت من جيت ما سلمت على أمي كنت زهجانه شديد ماعارفه من حب مريم ولا من نفسي ولا من كلام الشلة فيه ولا من نظرات الطلاب ليه ولا من انو ضربت لي زول وانا ما كده  مريم جننتني دا الحب البحكو عنو ياربي ولا دا ادمان ساعدني يالله ياااللة وكل شوية بخت ايديني على راسي او شعري وبقول يالله مريم يالله قلب مريم بي الحلال 🖤ومن اليوم داك كل مااشوفه مابترفع عيونه عشان تعاين في الناس وديمآ بتمشي سريع حتى الكفتريا عملت كما حركه عشان ترفع عيونه وتركز معاي كنت مشتاقة لي عيونة!(..:في بحر عينيك هامت كل أشواقي يا ربه الحسنِ هل تنوين إغراقي ما كنت اؤمن بل عيون وفعلها حتى دهتني في الهوى عيناكي 🖤 👁️...)وهي نهاي مارفعته حاسي انو مريم بعيده مني شديد حاسي بي نفسي ضايع شديد ماقادره اعمل حاجه وماعايز اعمل حاجه تغضب رب العالمين وانا قلبي مافيو غير اسم مريم مع انو قدرت اعرف رقمه وحسابه في الفيس والانستا وحتى الواتس بس ماقادر ارسل ماقادر اسأل!! مشيت البيت اتكلمت مع امي وابوي انو انا عايز لي وحده واعايز اتقدم ليه امي وابوي فرحو شديد لانو كنت الولد الوحيد وبوي كان متمني اتزوج وأمل عليو البيت اولاد وبنات 

وامي دي عايزه تطير من الفرح زغردت لما مسكته وضحكت وقلت لي امي ماتتحمسي لسه انا ماتقدمه ليه قالت لي اخيرا آ يامكاشفي اخيرا قلب دق لي وحده وفكرت في نفسك انا يومي بدعي الله يرزقك بي بنت الحلال عايزه اشوفك في بيتك يامكاشفي وعايزه اشوف اولادك عايزه افرح بيك صح انت لسه صغيره بس عايزه تمل علي البيت بي أولادك ياولدي  وتاني زغرت وعيونها كلها دموع حضنته وقلت ليه يامي لسه ماكلمتها عايز اشوف رايها في الأول وتاني بنمشي نتقدم ليه قالت لي واثقة بتوافق يامكاشفي انا واااثقة  انت منو البترفضك خلقه وأخلاق مشاء الله ولدي الحنين ودموعه نهاي ماوقفو ابوي قال لي مكاشفي اها احكي لينا عنها شوية من الاهل؟شوفتها وين قلت ليو يابوي ما من الأهل وشوفته في الجامعة ومابحكي ليكم تاني حاجه انا مابعرف عنها حاجه غير انو هي محترمه شديد وبنت ناس ابوي قال لي واثق من اختيارك وانا معاك يامكاشفي ربنا يسعدك ياولدي ابوي عيونه دمعو حضنتو وقلت ليو الله يخليك لي ياحاج 

امي وابوي فرحانين شديد وانا فرحنا اكتر منهم كنت عايزه مريم توافق وما عايزه الخطوبة تطول واتزوجةطوالي عايزه امي يكون عندها بنت تونسه وخاصه هي خلت المستشفى بسبب المرض وقعدت في البيت 

ام مكاشفي( ناديه )

اهاااا اخيرا مكاشفي فكر يتزوج واخيرا قلبو دق كنت خايفه عليو شديد وخاصه مكاشفي ماعندو شغله بي البنات وبشوف دا كلو حرام مع انو عارفه البنات كلهم جريت عليو وممكن عادي يحب ويتحب بس هو اختار يغض بصرو ويحفظ قلبو وماعايز حاجه الا ترضي رب العالمين صح بكون فرحنها من تفكير مكاشفي شديد وافتخر بي تربتي ليو بس حزينه عليو شديد كنت خايفه مكاشفي قلبو نهاي ما يحب وانا حالفه ماازوجو الا هو يختار لي نفسو ويجي يقول لي يامي انا عايز لي وحده وبحبه  وعايز اتقدم ليه قبل ما اموت  عايزه مكاشفي يكون عندو البقدر يطبط عليو ويسندو ويكون معاو في الحلوه والمره وخاصة مكاشفي حنين شديد وكتوم مابحكي وجعو نهاي بتحمل اي شي وبشيلو في قلبو  عايزه البتشيل معاو وجعو شوية الحمد لله حمدللة الله استجاب لي ولي دعواتي  والله يتم ليو على خير يارب 

مكاشفي 

بعد ما كلمت امي وابوي دخلت غرفتي وانا اصلا عندي الرقم مسكت التلفون واندفعت شديد رسلت ليه بس مافي رد ولا ظن مافاتحه نمت في السرير والتلفون في أيدي منتظر الرد وقلبي دا تحس بيو عايز يطلع من مكانو صوتو واصل الغرفه كلها انتظرت ساعه وساعتين وفي النهاي طلعت من البيت ماقادره اتصلت على عمار حكيت ليو وفرح شديد وبارك لي قلت لية عمار هي ماردت وماعارفه كيف اكلمه وخصوصا الفتره الاخيره دي هي بتكون مستعجلة وهاربه  من اي شي في الجامعه قعدت يضحك وقال لي ماتندفع كده اصبر شوية واشتغل فيني اسأله كيف وبتين مع انو نت مركز معاك ههههههه طلعني من الجوه شويه كملت الونسه مع عمار ورجعت البيت على ١١ استحميت ماكان عندي نفس اكل شربت لي عصير  وفتحت التلفون بس برضو ماشافت الرساله اخ بس استمريت افكر فيه وماحسيت بنفسي الا مع صوات اذان الصبح طوالي قمت اسحميت وصليت وقريت قرآن وراجعت شوية امي جابت لي الشاي شربتو معها مسكت التلفون وبرضو ماقرات الرسايل قلت لو شفته في الجامعه بحكي ليه طلعت الجامعة وانا مستعجل وأخ بس الليلة ماشغاله ياربي كيف اصبر وكيف ارجع البيت وانا اكون منتظر ماقادر نهاي الله يصبرني من الجامعة مشيت البيت وامي سألتني اها اتكلمت معاها قلت ليه لسه ختيت لي الاكل ما كان عندي نفس اكلت بعد تحانيس   وفتحت التلفون مافي اي رد زعلت زعل طلعت من البيت زهجان مشيت صالة رياضه فضيت زهجي كلو هناك لما جات الساعه ١١ونص رجعت البيت زول نوم بس نمت صحيت على ٢فتخت التلفون لقيت شافت الرسايل والله فرحت فرح ماصدقت نهاي تعبتي قلبي يامريم بس اصبري تكوني حلالي لو ماخليت قلبك دا لي ما يكون اسمي مكاشفي شافت الرسايل بس ماردت منتظر ترد قلت أمكن خجلانه رسلت تاني ماعارفه كيف اعبر عن مشاعري انا في المواضعي الزي دي صفر عكس عمار المابخلي بنت عندو الف حبيبه ههههه الله يهدي    رسلت ليه تاني  انو انا ماعايز الف وادور عليك  انا عايز اتقدم ليك وانتظرت ترد طلع معاي قرت الرسالة انتظرت ومافي رد ااخ منك يامريم زمن دي كلو البنات يجرو وراي جري وانا نهاي مابحاول ارد ليهم واسه انا الما بردو لي جنننتيني عديل كده انتظرت وانتظرت في النهايه نمت صحيت الصباح وطلعت الجامعة مر  اسبوع وهي ما ردت لي وحتى في الجامعة بتهرب مني والله العظيم قربت اصل بيتهم واعرف رد شنو مهما كان ما لدرجة دي تطنشي على الاقل ترد لي بي كلمة بس لنو انا ماقلت ليه عايز اتونس معاك ولا عايز اهظر معاك كنت جادي شديد ع الاقل كانت تحترم كلامي شوية مافي زول طنشني كده دي زعلت زعل ولو زول تاني كنت حظرتو وتاني لو قبله ماصلي عليو بس قلبي دا ماقادر اتحكم فيو وهو قلبي براو عقلي كان معاو تاني مسكت التلفون ورسلت بعد ماسلمت عايز اعرفك ردك شنو طوالي طلع معاي جاري الكتابة فرحت فرح ونسيت الزعل كلو ومركز شديد مع التلفون ومنتظر ردت على السلام والله كانو قالت لي مكاشفي انا بحبك ابتسمت على سلامه بس ورسلت لي تاني خلت الفرح كلو يروح قلبي انشق عديل معقول ترفض السبب أمكن مخطوبة او متزوجة أو بتحب الأفكار اتداخلت في راسي ماقادر افكر سألته سريع السبب ماقالت لي غير مابقدر اقول وإنشاء الله الله يرزقك بنت الحلال مريم كسرتني اول مره افكر في الحب وفي الارتباط اترفض وكمان حظرتني خلاص صلت معاي ماوصلت قفلت التلفون وطلعت من البيت وماشايف اي حاجه عايز حاجه تريح قلبي تمسح مريم من عقلي وقلبي وحياتي انا مستحيل مستحيل ارجع تاني اتكلم او اعاين ليه تاني كرامتي مابتسمح لو قالت لي السبب ساي كانت أمكن تخفف علي شوية بس خلتني زي المجنون ياربي العيب فيني شايفني ما انسان مناسب ليه ولا عندها زول في حياته الأفكار عايزه تجنني اتجهت على صالة الرياضة وفرغت غضبي كلو هناك وتاني مشيت الجامع وقعدت فيو شلت كتاب قرآن وقعدت ارتحت شوية وقلت تركتا اي حاجه بيد الله ويارب نسيني وثبت قلبي وقررت اشغل نفسي بي الدراسه وخصوصا الامتحانات قربت وقلبي وعقلي بقفلهم على مريم الله لو كاتب تكون من نصيب بتكون من نصيب حتى لو مهما عملت او انا عملت وطلعت طوالي من الجامع وانا بقلب مكسور وروح تعبانه(..وسيبقي الجزء المكسور مني في زمتك الي الأبد💫💔..)

ـ................انا راضيـ  راضي وارضي بـ الحاجه لـ المكتوب لي 🤍 رجعت البيت وانا شبه متحسن حاولت اهرب من امي وابوي عارفه لو حكيت معهم بصبرنوني بس اسه ماعايز اسمع اي حاجه بتخص مريم طوالي نمت من غير ما أشعر  صحيت الصباح صليت الصبح وشربت الشاي وانا عارف امي نفسها تعرف الحصل شنو واضح في عيونه بس ماحابه تسأل ولا خايفه لانو عيونه ظاهره فيه وملامحي ظاهره انو انا مكسور وخصوصا امي بتعرفني اكتر من نفسي وفي سرحتي دي خت ايده في راسي وقالت انت عارف يامكاشفي اي حاجه مكتوبة ياولدي ومافي زول بفوت نصيبو والكاتبو رب العالمين ليك بكون ليك ودايما بكون لي الأحسن ماعايزه اعرف انت مالك بس خليك عارف انا معاك وبدعي ليك انو الله يحقق ليك الفي بالك ومايكسرك ولا يكسر قلبك يامكاشفي خليك وقوي الدنيا دي ياما تشوف فيه البكسر بس اوع تضعف وخلي إيمانك قوي بي الله يامكاشفي 

كلامه ريحني شوية رديت عليه انشاء الله يامي مع ابتسامه

طوالي اتحركت على الجامعة وانا خلاص م ككز على الامتحانات بس 

مريم 

الامتحانات دخلت وانا رهف ونون نقرأ وعملنا جدول لي المراجعه الليله اول يوم في الامتحانات طلعت الجامعه وانا بس عايزه أنجح واحقق حلمي وبدعي ساي الله يسهل لي الامتحان طلعنا من الامتحان وكان وكويس شديد ورهف قالت في حاجه صعبه شويه المهم الايام عدت والليله الامتحان الاخير وانا مبسوطة لانو عندي فوبيا من حاجه الامتحانات طلعت على الجامعة واصلت على رهف وقالت قريبه طبعا ايام الامتحانات مافي زول شغال بي زول الا الشلة الكريمة وتشغلاتهم لي وانا ما مركزه معهم ومكاشفي دا اختفا عديل مابشوفوه نهاي الولد ماعارفه عمل لي شي مع انو مابرككز كتير مع الاولاد بس هو شاغل تفكيري بحب اعرف عنو اي حاجه مع انو كان ممكن أوافق واكون قريبه منو بس اخترت ابعد ولي سبب وماعايزه اقولو المهم دخلت الجامعة وصادفت رهف سلمت عليه وسألته قالت انو جاهزه انشاء الله لي الامتحان دخلنا وطلعنا وخلاص انتهينا انتهيناااااااا من هم الامتحانات مامصدقه ومبسوطه شديد بس نون لسه ما انتهت عندها تاني امتحانين طلعنا انا ورهف قالت لي نمشي الكفتريا قلت لي ارح كنت عايز ه اشوف مكاشفي وماعارفه السبب بس عايزه اشوفه دخلنا الكفتريا كانت شبه فاضيه عيوني على الطلاب فيه عشان الم مكاشفي بس كان مافي زهجت شديد طلبنا فطور وشربنا قهوة وطلعنا خلاص الاجازه وتاني جامعة مافي ياريت لو شوفت مكاشفي انشاء الله لو مت بعيد اترددت ارجع الجامعة رهف مريم مالك سرحان قلت ليه عايزه احكي ليك موضوع واسفه انو مكلمتك من الاول قالت لي شنو قلت ليه بعد ارجع بتصل عليك طلعت طوالي على البيت وانا قلبي مع مكاشفي ياربي دا شنو دا ليه مركزه كده مهو انا رفضتو ياربي مالي ااااااخ بس استغفر الله العظيم 

دخلت البيت ومن دخلت اغني واضحك. وراقص اخيرا خلصت امتحانات امي تضحك ساي ستحميت وصليت الضهر ونمته فتحت التلفون وصفحت مكاشفي مافي منشور جديد زهجت اتصلت على رهف وقلت ليه فاضيه تسمعي قالت لي اي الفضول ياخي هههه اسه كنت عايزه اتصل عليك احكي حكيت ليه اي حاجه عن مكاشفي وحتى انو اتقدم لي وانا رفضت وسبب الرفض شنو وبعد رفضت لسه انا بفكر في الموضوع قالت لي وااااااااي منك ومع صريخي انت متخلفه خلي السبب الرفض على جنب بس مكاشفي اتقدم ليك وانتي رفضتي استعلتي يامريم كنت تحكي من الاول وااااااي منك انت مااظن بتعرفي مكاشفي مكاشفي قريبي وانا بعرفو كويس مكاشفي زول محترم شديد وكويس وملتزم والله العظم لو لفتي الدنيا كلها غير مكاشفي ما بتلقي حبه كده نادره مع اهلو حنين والبرا دا شايل هم نص الكره الأرضية أفعال الخير الفي البلد دي كلها مكاشفي وااااي منك يامريم مكاشفي برفضو انا الليله بقتلك عاديل كده انت عارفه السبب الرفضي بيو مكاشفي ولا كان بهمو واخر همو وحتى اهلو دا ماعيب ولا انت عندك يد فيو وااااي منك يامريم وانتي مالك ومال المجتمع ؟عايزه تعرسي المجتمع ولا مكاشفي لو بارتي نظرت المجتمع وكلام الناس ممكن تخسري حتى نفسك ومكاشفي مستحيل يكون اتقدم ليك كده ساي الا لو كان بحبك انا الليلة بقتلك ياااااامريم انفعلت فيني شديد وقالت لي ماعارفه اقول ليك شنو بس اعرفي كلو لي خير ومكاشفي لو الله كاتبو يكون من نصيبك بكون حتى لو عندم الف سبب بعد انفعال داك قعدت تواسيني قلت ليه ممكن الموضوع يكون سر وانا بحكي لي نون بس قالت لي اطمني مابكم زول وكلو لي خير انشاء الله المهم اتصلت بي نون وعملنا مكالمة جماعية وحكيت ليه وبرضو انفعلت وكانت عايزه تموت عشان استعجلت في الرفض وبرضو في النهاي واستني وقفلت منهم وقعدت افكر هل انا بحب مكاشفي ولا إعجاب ساي تاني طردت الأفكار من راسي احسن اقوم انشغل بي حاجه تانيه الايام عدت ونون الليله اخر لي يوم في الامتحانات وقالت الا الا تجي الجامعة انتي ورهف نقعد شوية وبعدين نطلع عندها شلة عامله ليه قعده اصلا كنت زهجاننه طوالي مشيت استحميت ولبس لي عبايه سوده وطرحه سودا عارفه كترتو بس خلاص ماقادره اغير شبه ادمنت كده ولا نفسيات مني ماعارفه رهف قالت متحركه علي عشان نمشي مع بعض المهم جات وسلمت عليه وحلفت عليه تدخل تشرب ليه حاجه دخلت سلمت على أمي واتعرفت عليه اتونسنا شوية وطلعنا وماكنت عارفه المنتظرين شنو ياريت لو مامشيت 

وصلنا نون وصفت لينا مكانه مشينا عليه ولقينا مشاء الله ونسه وضحكك وعندهم واحد بعزف بي العود قعدت معهم مع انو م بحب ونست الشباب بس قعد متطرفه شوية وشبه ساكته مدو لي قهوة شلته وقعدت اشرب قاعدين كده في الجامعة مكان كلو شجر ونجيلة وزهور يفي جلسات كده ظريفه والجو كان مغيم وحلو شديد وفي كم طلاب قاعدين يتونسو كان المح ليك الشلة البشغلوها لي جايه علينا سلمو واحد قال لي الغراب مع ضحكه كده لسه ماغيرتي اسودك دا سكت ساي رهف ونون عايزات يتكلمنا قلت ليهم اسكتو منو واحد ماعندو موضوع بس البنت الشقرا حرقتة الكلمة وهي اصلآ شايله معاي ماعارفه لي طوالي قالت لي انتي يامريم عايزه أسألك وهي بتتكلم كده مكاشفي معاو اصحابو قعدو قرييبين مننا شديد يعني كلامه واضح ليهم قالت لي اتفضلي قالت لي انتي دخلت الجامعة دي كيف وانا شايفه انو انتي ما من مستواناجامعة زي دي الا تحلمي بيه عارفه بتقولي عرفت كيف بس انا بعرف عنك اي حاجه مع ضحكة كده وبي طريقة كده تحس بيه مخلوعة قالت لي ماتقولي انتي صاحبت المنحه الدراسيه الاتكرمت بيه شركت......  لي الناس الفقرانه لكن جات معاك ظابطه ياالغرب وضحكت مامتعوده على الاجوا الزي دي عشان كده بتلبسي الأسود وطرحه وعاملة محترمة عشان تلفتي النظر مهو مافي شي تعملي غير كده طلعا الكل مركز والكل مصدوم من الكلام رهف ونون عايزات يتكلمنا انا قلت ليهم دقيقه رديت ليه فعلا كلامك صح انا البنت الطلعت ليه المنحه وانا الجيت الجامعة البحلم بيها ناس زي كنت متوتره شديد بس ماسكه نفسي قلت ليه صح من مستواكم لكن انتي عشان تفكيرك متخلف بتشوفي الناس بنظرت الطبقات انا مبسوطة بي وضعي وعاجبني شديد انتي عارفه انا دخلت بي اجتهادي الشخص مابي قروش اهلي انا وصلت لي الجامعة دي وانا جايبه كم ٩٠ وماكان عندي اساذه خصوصية ولا كنت في  مدرسه خاصه زيك وانا متأكده انتي جايبه كم و ٥٠ وأهلك تمو ليك الباقي بي القروش هههههه الجامعة البتتكلم بيه دي مفترض تكون لي الناس الزي ما الزيك لي البجتهدو وبكونو متفوقين ما بي واسطات وقروش وبالنسبه لي لبسي انا من اسره مسلمة وانتي لو عارفه شنو اسلام  مابتلبس كده مع انو اي زول بلبس البريحو وانا مابدخل في لبس الناس ومابحب اعلق لانو دي حاجات تافه ماعندها اي قيمة والأسود البتتكلم عنو دا ناس كتيره عاجبه فيني انت اشتغلي بي نفسك وخلي الناس في حالة لانو انا ماشغالة بي الناس كتير💔🖤 وطوالي اتحركت من مكاني ماعايزه اشوف ردت الطلاب شنو رهف ونون جرو وري بس انا جريت جريت عديل ركبت المواصلات وانا ماسامعة اي حاجه ومامركزه كمان مع انو موضوع عادي ودي الحقيقة بس حسيت بي النقص وانا برجف نزلت البيت مع انو مافي زول بختار نفسو يكون كيف والارزاق مقسمة واي رزق بيد رب العالمين بس في النهاي انا بنت واكيد كلامة بفرق معاي وقفت قدام المرايا شايفه النقص وشايفة نفسي ممابشبهم اول مره تنزل مني دمعه ماعارفه من كلامة لي ولا عشان قدام الناس ولا عشان مكاشفي عرف انو الشركة  القدمت لي المنحه شركت ابو يعني مكاشفي  اهلو متكفلين بكل جامعتي اخ بس من كسرت النفس وخاصه هو اتقدم لي وماعارفة انا البنت الاهلو  اتكرمو عليه عشات تدخل الجامعة شبعت بكا وماحسيت بنفسي والا وانا نايمه 

رهف كلام السحليه الشقرا كان حار شديد والله انا لو مكان مريم مابتحملو وخاصه انو مكاشفي الاتقدم ليه كان سامع وعرف بي قصة المنحه وهو اكيد عارف ابوه قدمه المنحه ليه 

نون وااااي انا قلبي معاك يامريم ماعارفه اقول شنو ولاشنو  ماقادره اخت  نفسي مكانه البنت كسرته الله يكسر بخاطره زي ماكسرت بخاطر مريم قدام الطلاب 

مكاشفي

انا قاعد واسمع في الكلام ولا الكل القاعد يسمع مريم كيف بكون شعوره اخ بس عارف الموضوع مامهم لانو مافي زول بختار حياتو أمكن لو كانت ولد كان بكون عادي بس هي بنت اكيد بتكون اتحسست  ولا موضوع المنحة ياربي عارفه انو ابوي هو القدم المنحه بس ماعارفة انو هي البنت الاخذت المنحة اتحركت طوالي وعمار اتحرك معاي وقاعد ينادي فيني مكاشفي مكاشفي موكا ياموكااا وانا ماجايب ليو اي خبر عايز الحق مريم بس هي وين ياربي جرت ولا شنو فتشت الشارع كلو بي عيوني مافي مريم مريم مريييم عمار خت ايدو في كتفي مكاشفي مكاشفي اهدا ياصاحبي  وانا ما مركز زي المجنون بفتش فيه قال لي خليه بتكون منهاره اسه بس هي اكيد قوية من رده عرفت انو هي بنت قوية شديد حتى كلامه كان واضح انو هي زوله مامهتمه بي كلام يارا مكاشفي انت سامعني ماحسيت بي نفسي الا برد عليو سامعك ياعمار سامعك  ختيت  ايدي في وشي وقلت ليو انت عارف انا القلت لي ابوي فكرت المنحة علي  كنت حابب اغير من الجامعة شوية وماتكون محصوره على العندو قروش كنت عايز أحقق حلم شاب او بنت نفسها تدرس في جامعة... وكنت ساعي اقدم كم منحه السنه الجايه اتخيل انا الدخلت مريم الجامعة وانا الخليته تكون قريبه مني من غير مااعرف  سبحان الله على الدنيا  عمار

 مكاشفي كان متوتر شديد وقعد يتكلم ويتكلم في النهاي ركب عربتو وفات ....(كنت أعرف منذُ الوهلةِ الأولى التي رأيتُكَ فيها أنّي سأنفق قلبي كلّه دفعةً واحدة في سبيل عينيك..!🤎

الفصل الخامس من هنا 

لقراءة باقي الفصول اضغط هنا