رواية اللعب على حبلين
الفصل الخامس 5
بقلم مجنونة
عماد شال الشنطة و مشى يجيب الماذؤن و خلاني مع خالتي عوضية ست الشاي مرة ظريفة شديد كبت لي كباية شاي بي نعناع و لقيمات كنت جيعانة جغمتو طوالي قعدت تونس فيني و تحكي لي عن المدينة و قصص كتيرة عدو ساعات و عماد لسا ما جاء وأنا خلاص بديت اتعب من غير ما اشعر نمتا في الكرسي ما فتحتا عيوني إلا على صوت خالتي عوضية بتقول لي يابتي المغرب جاء وأنا دايرة اقفل عشان الحق المواصلات فعلاً الزمن إتاخر شديد و عماد لسا ما منو خبر و أنا اعصابي باظت خلاص شلتا تلفون خالتي عوضية إتصلتا ليه تلفونو كان مغلق وعلى كدا خلاص إتاكدتا إني إتسنبكتا حسيت بي طعنة في قلبي و نزلت مني دمعة حارة المرة دي بالزات كنت صادقة فيها لانو حسيت بي خزلان ما بعدو خزلان الواسعة ضاقت بي خلاص و قعدتا في الواطة بفكر في حجم الغلط العملتو دا كيف ارجع البيت اقول ليهم شنو اقول لي ابوي أنا سرقتا شقى عمرك حق الزراعة كلو و غوايش أمي الورثتهم من امها عشان اعرس بيهم واحد بعرفو عن طريق الفيسبوك بس 😭 واي يا زينب و سوادك يا زينب إنتي انتهيتي خلاص عاملة فيها مجرمة لمن لقيتي الاجرم منك 😭 هم ناس المدينة بلعبو بيهم كمان
كسرة
عماد دا إتعرفتا عليه عن طريق الفيس كان رافع صورتو في قروب كدا ماشاء الله الجلابية يحردوها فيه و الشعر و الشخصية عجبني عديل و كاتب ما بعرس إلا بنت من الريف ادب و اخلاق و اربيها على كيفي و أنا المطرطشة ركزتا على كلمة من الريف دي و نسيت أنو أنا لا ادب ولا اخلاق دخلتا عليه خاص وقلتا ليه أنا زينب من الريف قال لي اهلين فيك أنا عماد من الخرطوم خريج هندسة جامعة الخرطوم و عندي اكبر شركة في افريقيا لي البناء و المعمار قلتا ليه قلتا داير تعرس من الريف قال لي اي لكن إلا تكوني سمحة وقعد يضحك 😂 طبعاً ما وريتكم أنا سمحة ماشاء الله لون و جسم و شعر قمتا رسلتا ليه صورتي اعزروني يا جماعة الجنا سمح و مقرش ضروري اكون خفيفة عشان ما اضيع الصيدا من يدي المهم رسلتا ليه صورة سمحة كدا و الشعر فيها فاكي الولد طوالي اعلن انبراشو وقال لي رسلي لي رقمك و أنا اعجب رسلتو ليه سريع و بقى مكالمة ورا مكالمة و يوم ورا يوم لمن حبيتو و هو ذاتو قال حباني هو حنين و بهتم بي و بحول لي رصيد و بدلعني وأنا ذاتي بقول ليه حبيبو و برسل ليه صور و دلع كنت خاتا في بالي يا اخرب مع أحمد و اعرسو يا اخليه إستثمار لمن موضوعي مع احمد يكمل و كلو كان في السليم لحدي ما اتكشفتا 😭😭نرجع
قعدتا في الواطة و بقيت ببكي بي حرقا ما عادية حسيت راسي دا بقى تقيل و غلبني الاعملو معقول دا عماد الوثقتا فيه يعمل فيني كدا يارب ساعدني واقيف معاي يارب أنا محتاجة ليك معاي يارب 😭😭😭 خالتي عوضية بقت تقوم فيني و تقول لي عليك الله قومي يابتي والله بتتسهل قومي قمتا وقعدتا في الكرسي جابت لي موية شربتا و غسلتا وشي بقت تواسي فيني قلتا ليها أنا انقطعتا خلاص ما عندي اي مكان امشيهو قالت لي خلاص يابتي ارح معاي بيتي لمن ربنا يسهلا اصرت علي لمن وافقتا لميت معاها الحاجات و مشينا بيتا كان في جبل اولية لمن وصلنا كان بيت ما مبني بس نضيف اول ما دخلنا جوا بناتا استقبلوها احلا استقبال و جابو ليها الموية و واحدة ملت ليها جردل الحمام و واحدة جابت ليها الابريق و المصلاية طوالي اتزكرتا أمي و قعدتا ابكي 😭😭 يوم ما عاملتا كدا قطعو صلطة لي الغداء اتغديت و رقدتا جنب بتها الصغيرة لينا و نمتا طوالي من التعب و الزعل صحيت على صوت شكلا و كواريك ما عادية قمتا مخلوعة لقيت في راجل بضرب في خالتي عوضية و بنبزا بي اكعب الالفاظ قدام بناتا لمن لقيت الدق كتر عليها جريت عشان احجزا منو الراجل فكاها و قبل علي أنا كان بعاين لي بي نظرات غريبة لمن خفتا و بقى بقرب علي بطريقة مخيفة لمن قرب علي شديد
صلوا علي النبي
لمن قرب علي شديد وحسيت إنو هيعتدي علي لزيتو بكل قوتي لمن وقع وضرب راسو بالحيطة و اغمي عليه ما عارفة جبتا الشجاعة و القوة دي من وين بس ما ندمانة ولا زعلانة لكن خفتا لاني افتكرتو مات اتشليت في مكاني وبقيت بعاين ليه واقع قدامي كان في ضوضاء شديدة ما عارفها في الواقع ولا جوا راسي بقيت بسمع اصوات بتقول لي دي اخر حاجة إتوصلتي ليه تقتلي روح حدك وين يا زينب موسى عمايلك دي حدها وين يابت الناس في سرحتي ديك جاتني خالتي عوضية جسمها وارم و كابي دم جات وقفت جنبي و قالت لي قومي يا زينب الحقي نفسك قبل ما الشوم دا يقوم قلتا ليها بي خاطر مكسور و🥺 صوت متقطع قلتا ليها لكن هو مات 😭 قالت لي لالا ما مات هو الفقر دا بموت بكون واقع بس من كترت السكر قلتا ليها لكن دا منو قالت لي دا زوجي واحد سكير بقضي النهار كلو في محل السكر و القمار و بليل بجي يقلع مني القروش الاشتغلتا لمن ارفض اديهو بضربني كدا ورتني الجروح السببهم ليها لمن قلبي وجعني قالت لي اعفي لي يابتي كان نفسي اساعدك و اقيف جنبك بس شايفة الحال و المجنون دا لو قام ما بضمن ممكن يعمل ليك شنو عشان كدا لازم تطلعي قدمتني هي وبناتا لحدي نص المسافة و وصفت لي الطريق بي وين مسكتني قوي بكت معاي و بقت توصي فيني لمن دايرة ترجع قامت مدت لي قروش ابيت اشيلهم منها قالت لي والله بزعل منك أصلاً كدا كدا السكاري دا لو قام بشيلهم اولى بيهم إنتي كتبت لي رقما في ورقا و مشت وأنا ذاتي مشيت الطريق كان مهجور و مخيف شديد مافيه حاجة غير الكلاب و سكارا كل ما اشوف واحد منهم بقوم جارية ساعة كاملة حتى وصلتا الظلط البودي المدينة لكن ما كان فيه ولا عربية لقيت سبيل كدا مشيت قعدتا فيه و طبعاً لمن طلعتا من بيت خالتي عوضية نسيت خمار امي و طلعتا بالطرحة الصغيرة الكنت لقاها نقاب بس ومن الجري شعري فكى و العباية اتشرطت أصلاً هي النوع البكون مفتوح من قدام ديك بس ابوي قال إلا اخيطا المهم انتظرتا في المظلة ديك لمن النعاس غلبني و نمتا المرة دي صحيت على نور قوي كاشف لي في وشي لمن فتحتا عيوني عشان استوعب دا شنو سامعة واحد بقول دي واحدة برضو يا جنابو و التاني بردا ليه ارفعا طوالي الشر............ دي طوالي داك مسكني من شعري و جراني ذي الكلبة وانا لحدي اللحظة ديك ما فاهمة حاجة لحدي ما وصلنا دفار كدا مليان بنات شكلهم ما تمام جزو ملفوف بي مليات و واحدات متمكيجات ولابسات ملابس كعبة عديل و شايفة شرطة كتار و كدا الصورة بدت توضح لي و فهمتا أنو حياتي انتهت تماماً حتى أنا وبي عمايلي دي كلها ما بستاهل اكون مع الاشكال دي بقيت بقاوي في الشرطي و بقول ليه انو فاهمين غلط أنا بنت ناس و محترمة ما مفروض أكون هنا سامعة واحدة من جوا العربية ضحكت ضحكة مطاليق وقالت لي أنا ذاتي ابوي إمام جامع وامي شيخة فكني يا جنابو 😂 عسكري تاني ضرب ليها العربية بالعكاز الشايلو وقال ليها اسكتي يا...... المهم قدر ما حاولتا اشرح ليهم واحد قابل يسمع مني ماف و شالوني ذي الضبيحة جدعوني في العربية و اتحركت رجعتا في اخر زواية في العربية وضميت رجليني علي و ختيت راسي فيهم و بقيت ابكي بي حرقة ما عادية و كل ما صوتي يطلع واحد من الحرس ينهرني سامعة البنات بقولو شكلها مستجدة مرة مرتين بتتعود 😂 ما تخافي يا بيبي بكرا بكفونا عادي بس خلي حنك يكون سنين و سامعة واحدة قالت ليها لكن البت ما برعم و نجاضة خلي نسوقا معانا بتجيب لينا ذباين من غير ما اشعر قلتا ليها اسكتي يا وسخة أنا اشرف منك و من اهلك كلهم 😡 البنت زعلت و دايرة تقوم تدقني إلا الحرس مسكوها و الشارع كلو بتحمر لي بس ما اشتغلتا بيها لأنو مصايبي اكبر منها بكيت بكيت لمن راسي وجعني بعد ساعة حتى وصلنا وبقو بسجلو اسمانا و ينزلونا بالصف و يدخلونا القسم الناس كلها كانت قرفانة مننا و بنظرو لينا نظرات إشمازازة كدا طبعاً بالنسبة لي باقي البنات النظرات دي كانت عادية بس بالنسبة لي كانت مزعجة شديد كونك تتهم بي حاجة انت بريئ منها دي حاجة بتزعل بالرغم من إنو أنا بتاعت اولاد اي بس ما وصلتا مرحلة قضية اداب ولا دعارة 😭 قلبي كان واجعني شديد دخلونا قفص كدا و مشو خلونا ومن حظي السيئ دخلوني مع نفس البنات الاتشاكلتا معاهم في العربية