رواية دون أن أشعر
الفصل الثالث عشر 13
بقلم ال زهراء
شوفت خالتو تهاني جارية ومخلوعة وكانت بتصرخ باسم سياف ،الاسم الانا بكرهو والنسيتو لي زمن،وقفت في الباب شكلها كانت عايزة تدخل بس منعوها!!، بقت قاعدة في الأرض!، قولت في نفسي دا سياف الجوة معانتو!، تاني قولت من متيين اتغيير وبقت الناس تحبو!، اتنهدت وقولت مالي ومالو انا همومي أكبر من اني اعرف، طلعت سريع ورجعت البيت بالمساء كدة اتفقدت البريد الإلكتروني عسى ولعل القى رساله لقيتها فتحتها كان مكتوب فيها تم القبول!، حسيت بالفرح الشديد وقولت الحمدلله ،باقي بس اسجل يزن في روضة خاصة، ابوهو قاعد يرسل مصاريفو وما محوجو للحاجة.
في اليوم التاني صحيت من الصباح واتجهزت قولت قبل الدوام امشي افتش روضة ليزن! ،لقيت روضة بتكون مسافتها من ماس قليلة وفي ترحيل بمشي بيهو ناس عمتي عادي، فقولت لو لقيت وقت امشي اشوفو ولا اسوقو منها دخلت قالو لي لمن يتم أربعة جيبوهو، قولت ليهم لو مستمع ما عندي مشكلة إن شاء الله ختوهو مع ناس الحضانة، المهم يتعلم، وافقو،خليتو ومشيت.
وصلت المستشفى ودخلت للمدير الطبي قعدت معاهو قال لي حالياً حا تشغلي كل الأسبوع انتي، لانو دكتورة عدن اخدت اجازة وحا تشيلي مرتبها بس اذا عندك مشكلة حا نشوف بديله لعدن ،قولت ليهو لا ما عندي اي مشكلة ،قال لي طيب.
طلعنا قال لي غرفة الطبيب العمومي على يمينك اول غرفة بالممر داك ، قولت ليهو تمام، مشييت طوالي ودخلت جو كم مريض وانشغلت معاهم ،بعد الساعة 11قررت افطر، طلعت ومشيت على مطعم قريب المستشفى قعدت لاقيت المره الامس والمره دي معاها ولدها، مما شافتني رفعت لي يدها جيت وسلمت عليها، قالت لي أمس ما لاقيتك عشان اشكرك على سوقتي لغرفة العنايه، قولت ليها العفو يا خالتو بقى كيف العيان ؟،قالت لي كويس وضعو استقر الحمدلله ،قولت ليها الحمدلله عن اذنك، مشيت وقعدت في الطاوله وقولت في نفسي ما اني ما كنت عايزة اسال بس حسيتها شينة، اكلت ورجعت طوالي.
اليوم التاني بقيت شغاله في الطواريء، ومعاي كم دكتور قعدت جاتني حاله حرجة وحولناها طوالي ICU،الحاله دي مسكتها انا وانا مفروض الاشرف عليها ،بعد كم ساعة دخلت اشوفها، بين كل مريض ومريض كان في ستار، بقيت ماشه لمحت سياف كانو مركبين ليهو اجهزة كتيرة ،وشكلو ما بقدر يتنفس طبيعي لانو في جهاز أكسجين جنبو والماسك مركب ليهو ، فضول بس مني قررت اشوف الفايل بتاعو جيت وقعدت وشلتو ،مكتوب فيهو صدمة في الراس نزيف داخلي!، كسر ترقوة! وكسر ضلع!، ختيت طوالي الفايل وقولت لاحول ولا قوة الا بالله، مشيت للمريضة بتاعتي وقست ليها كل علامتها الحيويه!،وجيت طالعة قولت اتحسنت شوية احتمال بكرة تطلع لو استمرت بالحالة دي.
صباحية اليوم التاني كدة شوفت واحدة سايقة ولد بكون عمرو 4 سنة كدة. قال ليها ماما بابا في الغرفة ديك انا ماش ليهو مسكت يدو وقالت ليهو اصبر ، وقفتني وقالت لي بدخلونا جوة العنايه ، قولت ليها ما اظن!، قالت لي طيب دكتور سياف كويس، قولت ليها وضعو استقر ،قالت لي الحمدلله وتاني عاينت للولد وقالت ليهو مدرك بابا كويس ما تخاف يلا عشان نلحق الروضة مش وعدتني وقولت لي لو جيت هنا حا تمشي ولا عايز بابا يزعل ،قال ليها عايز اشوفو اول وبقى يبكي ،نزلت ليهو في الارض وقولت ليهو ما تعذب ماما بابا لو عرفك اتغيبت من الروضة بزعل صاح وانت ما عايزو يزعل ،هو حا يصحا ولمن يصحا براهو حا يجي يشوفك، قال لي بصحا متين ؟!، هو ليه نايم كتيير، قولت ليهو كتير قدر شنو، عمل لي اصابو العشرة وقال لي قدر كدة، ضحكت وقولت ليهو طيب بابا حا يصحى بس لمن يصحا ويعرف انك ما قاعد تمشي الروضة بزعل، قال لي بزعل مني، قولت ليهو اي بزعل وشديد كمان ،قال لي حاضر حا امشي بس لمن يصحى قولي ليهو مدرك داير يلعب معاك تعال ليهو، قولت ليهو بقول ليهو اسي اسمع كلام امك وامشي، قال لي تمام، ساقتو ومشت ،قولت في نفسي يا حليلو ولدو إن شاء الله ربنا يرفعو، بس ليه ما اتزوج ريم واتزوج واحدة تانية لو لاسي مصاحبة ريم كنت سالتها بس انا كنت غصبانة من كل الناس الحولي وقررت أقطع كل علاقة عندها معرفة بسياف ومن ضمنهم ريم المسكينة يا حليها شعورها حا يكون كيف لمن عرفت انو اتزوج غيرها... اصلا ما فيهو خير سياف لزول ولو اسي اتغيير شوية بكون عشان المظاهر ما اكتر زول ما فيه اي فايدة وعديم احساس ،ليه يخلي ريم ويتزوج واحدة تانية لكن متوقعة منو هو وقح لدرجة انو بعد خطب ريم جاني وقال لي بحبك بس انا ادبتو، دخلت غرفة العناية وطوالي مشيت لمريضتي وقررت انو تتخرج وضعها اتحسن وحتى سكريها انخفض ،مشيت بعلي سياف البت قالت لي شوفي شكلو في تحسن ملحوظ حرك يدو جيت وفتحت عيينو قولت ليها اي شكلو حا يصحى راقبو حالتو ،قالت لي طيب حا اكلم بوص تهاني هي حا تفرح، قولت ليها ما تستعجلي وشوفي الحاصل اول ،قالت لي تمام، طلعت منو لقيت خالتو تهاني جاية بعلي وقفتي هي المرة دي لاني انا كنت عايزة اتجاهلها ،سلمت علي سلام شديد ،وتاني قالت لي سالت منك قالو لي مشيتي السعوديه واتزوجتي هناك ، قولت ليها ايوا مشيت واتزوجت،قالت لي زمان حصل بينا سوء فهم و....، قاطعتها وقولت ليها انا ما عايزة اتذكر الماضي يا خالتو فلو سمحتي ما تجيبي لي سيرتي انا اسي بقى همي بس مستقبلي ومستقبل ولدي عن اذنك، مشيت منها قولت في نفسي اتجنبي المشاكل ونهاي ما تتورطي معاهم تاني بس لو صحا سياف وعمل لي حركات انا اسوي شنو ،تاني قولت حا اخلي الشغل بس.
مرا اسبوع وانا بقيت مضغوطة من الشغل!، وحتى نفس ما بتنفسو!، اتصلو بي ناس الروضة قالو لي الترحيل اتعطل اللليه تعالي سوقي يزن ولا رسلي زول يسوقو، مشيت للمدير الطبي وقولت ليهو ،خلاني امشي ،لاقيت مرت سياف هناك وكان معاها ولدها وهو ببكي وعرفت انهم معانا في نفس الروضة !!، قولت ما اتدخل في خصوصيات الناس ،جيت مارة بعليهم وما اشتغلت بيهم بس هو لاحظ لي وقال لي خالتو بكل براءة الدينا !، التفت قولت ليهو ايوا يا ولدي عايز حاجة!، جاء ومسكني من عبايتي وقال لي عايز بابا ،قولت في نفسي الولد دة متعلق بابوهو اكتر من امو!، قولت ليهو نحن ما اتفقنا انو لمن يصحا حا يجيك ،قال لي لااا انا داير اشوفو هسي دي ،قولت لي امو سوقيهو هناك قاعدة بوص تهاني احتمال تدخلكم، قالت لي شكرا تمام ورح يا مدرك!، مسك يدها وابتسم هي مسحت دموعو وقالت ليهو اشتري ليك شكولاته داير ،قال ليها بابا قال انو الشوكولاتة الكتيرة ما سمحة ،قالت ليهو اكلت يعني ولا كيف ، قال ليها اي اشتريها من الروضة، قولت في نفسي سياف معلم ولدو تعيلم عجيب انا دا كان يزن كان اشترى ميه، قالت ليهو شاطر تستاهل مني قروش، ادتو ليهم وتاني ودعتني ومشت ،قولت في نفسي عائلتو حلوة اللئيم، انا ما كنت متخيله انو الداهي دة ممكن يكون أسرة طبيعية بس باين انو مرتو بتحبو وحتى ولدو بحبو ،دخلت يزوني طوالي جاء جاري علي شلتو وجيت طالعة بيهو قولت ليهو ادوك في الروضة شنو؟ ؟!، قال لي حاجات كتيله، قولت ليهو زي شنو، قالت لي ما عالف، ضحكت وقولت ليهو شكلو انت بس بتمشي تاكل حلاوة وتجي راجع ،ورح معاي المستشفى نشوفك قاعدين يدوك شنو.
وصلنا المستشفى شلت كراستو وبقيت افتش فيهم اكتر شي كان تلوين، وفي كراس فيهو واحد ،قولت ليهو دا كم الرقم دا، قال لي دا لقم ولا عصاية ،ضحكت وقولت ليهو دا واحد رقم ، قال لي واحد، شلت يدو ومديت ليهو اصبعو وقولت ليهو اي واحد زي اصبعك دا، بعدين لمن نمشي لحبوبة ترفع اصبعك وتقول ليها واحد دة تمام، قال لي تمام.
قعدتو وقولت ليهو انتظر هنا وما تشاغب، قال لي دايل التلفون اديتو ليهو عشان يسكت ،جاء مريض وانا بقيت معاهو كان عايز كشف على بطنو مشى رقد وانا مشيت معاهو لمن انتهيت واتلفت ما لقيتو قولت مشى وين؟!، قولت للمريض طوالي امشي اعمل لي موجات، كتبت ليهو الورقة وطلعت وانا مخلوعة وبقيت زي المجنونة ما خليت زول ما سالتو عنو، لمن لاقيت مرة سياف قولت ليها في ولد بكون أصغر بكم شهر من ولدك شوفتيهو قالت لي قاعد يلعب مع مدرك في الاستقبال، جريت طوالي وقولت ليهو يزن قلقت بي انا ما قولت ليك ما تطلع ،بقى يبكي، قولت ليهو انا اسي سالتك تبكي خلاص معليش، وين التلفون ،قال لي ما عارف شالتو مني مرة ، قولت ليهو شالتو، قال لي اي، قولت ليهو مشت وين، قال لي ما بعرف ،جاء مدرك وقال لي طلعت برة وتاني جات جوة ودخلت الغرفة، كان فصيح شديد وملم بالأمور البتحصل حولوينو ما زي ولدي ماشاء الله تبارك الله، مشينا ليها انا ويزن قولت ليهو دي، قال لي اي، طوالي جيت وقولت ليها جيتي التلفون، قالت لي اي تلفون، قولت ليها الشلتيهو من الولد،قالت لي بكذب الشافع دا انا ما شلت اي تلفون، قولت ليها ما تخليني افتح فيك قضية وبعدين المستشفى دي ما سايبة وفيها كميرات مراقبة، انصدمت وقالت لي بحس مبحوح خفت يكسرو فشلتو منو وكنت دايرة اخوفك عشان تاني ما تديهو ليهو، قولت ليها ظاهر ظاهر المهم اديني التلفون دا سريع جابتو لي ،شلتو منها ،قولت ليهو تاني انا تلفوني دا ما بخليك تلمسو اعرف،عاين لي وزعل وفكا يدي ومشى لمدرك اتنهدت وقولت تربية الولد صعبة شديد.
بقيت مراقباهم تاني جات مرت سياف قالت لي امشي لشغلك انا بحبسهم، قولت ليها تسلمي، بالمناسبة اسمك منو انا مها، قالت لي مها تشرفنا انا مرام، قولت ليها الشرف لي مرام.
بعد انتهيت من المرضى طلعت لقتيو نايم في حضنها وجنبهم مدرك جيت عليها وقولت ليها عذبتك معاي ،قالت لي ماف عذاب بس مشاغب ربنا يعينك، ضحكت وقولت ليها اللهم امين يا رب العالمين.
مشيت البيت وختيتو في السرير وجيت احكي لعمتو يومي ،تاني طلعت لعمو بابكر وشلت ليهو الشاي وقعدت اتونس معاهو طلع لي تلفون ابوي وقال لي انا نسيت ما اديك ليهو، قولت ليهو لا دة انا زاتي نسيت امرو، مفروض كان نسلمو للشرطة زمان ،قال لي ما اظن كانو محتاجين لأنهم ما سالونا منو وخاصة انو بعد قبضو على الحرامية في وقتها، قولت ليهو بس ما كان في حتة الحادث واحتمال قايلنو اتسرق ،مش سلمك ليهو الزول اللقا ابوي ،قال لي اي بس انا نسيت الموضوع وختيتو في المخزن، بس اصلا حا يستفيدو شنو منو ما لقو الجناة، قولت ليهو اي كلامك صاح، حا احتفظ بيهو للذكرة
زي نص الليل صحيت مخلوعة واتذكرت حاجة مهمة هم حرامية ليه ما شالو التلفون!! وخاصة انو التلفون دا في الوقت داك كان حديث عدييل اتنهدت وقولت احتمال ما شافوهو ، قولت تاني نفسي اعرف المشى يقابلو منو ؟؟عاينت لسجل المكالمات،بس لقيتهم ممسوحات شكلو في زول فرمط التلفون، احتمال يكون عمو ولا اي زول من ناس الوفاة ، اتنهدت وضربت راسي وقولت غبية انا انشغلت بهمومي ونسيت ما استفسر عن الزول المشى ابوي يقابلو الوقت داك ،بس تاني قولت هو ما اظن مشى ليهو لانو اتوفى قبلها طيب حا استفيد شنو ؟!، قولت ابوي ما بقابل زول زي الوقت دة الا يكون زول مهم وعندو حاجة مهمة معاه، اتنهدت وقولت بعد السنين دي كلها ما بقدر اعرفو، رسلت رساله لمروة وقولت ليها عارفة الزول الكان عايز يقابل ابوي في الوقت داك، قالت لي لا ما عارفة، قولت ليها طيب انتي فرمطي تلفون ابوي، قالت لي لا ،قولت ليها طيب حا اسأل عمو بابكر من الحاجة دي،قالت لي ليه بتسالي من الأمور دي علقت الرساله وما رديت ليها.
في الصباح جيت لعمو بابكر وكلمتو قال لي فرمطومهتدي ،قولت ليهو ايوا تمام يعني ما جاكم مفرمط، قال لي لا بس عشان الرمز فرمطو، انخلعت وقولت في نفسي طيب الراجل داك شال رقمي كيف من التلفون واتصل، قولت ليهو معاك عنوان الراجل اللقا ابوي ،قال لي لا بس بعرف عنوان شغلو هو شغال في شركة مقاولات جنب مطعم...، قولت ليهو تمام، قال لي عايزة بيهو شنو، قولت ليهو عندي معاهو كلام جا افهمك بعدين.
مشيت ليهو وسالت منو لانو بعرف اسمو سلمت وسالتو من احوالو وتاني قولت ليهو التلفون دا قبل 4سنين قدرت تفتحو كيف وتشيل رقمي وتتصل بي ،قال لي ما كان في خيار تاني غير اشيل يدو الفيها البصمة وافتحها ،قربت اضرب راسي بس تاني اتراجعت انا غبية شديد ،قولت ليهو طيب سجل المكالمات متذكر فيهو منو، قال لي ما متذكر والله، بس تقريبا كان فيهو انتي ومعاك واحد مسجلو باب شنب ،قولت اب شنب دا منو كمان، اول مرة اسمع اسم الزول دة ابو ما حصل ذكر لي اسم زي دة في حياتو كلها، لازم اعرفو منو.
مشيت المستشفى وبقيت قاعدة وبفكر وما وصلت لاي حاجة ولا قدرت اتذكر اي صلة بالاسم دة،اتنهدت وبقيت مستاءة شديد،في كم ممرضة جو بعلي وبجارن قولت لي واحدة في شنو،في قالت دكتور سياف شكلو بدا يصحصح، قولت في نفسي عرفت الحاجة دي كان عندو مؤشر انو حا يصحصح، البوص قال لي تعالي معانا مشيت ودخلنا الicu ،شايفة يقيسو ليهو في العلامات الحيوية وتاني عيونو رمشن وبعد مسافة فتح عيونو وبقى يعاين وانا كنت بعيدة، البوص قال ليهو سياف سياف!، قال ليهو بحس باهت ايوا ،تاني سالو من كم حاجة وجاوبو، تاني قالو ليهو حرك رجليك ويديك حركهم ،قال لينا الحمد لله استجابتو تمام ما عندو حاجة ولا مضاعفات!، البوص قال لي مها تعالي واعملي ليهو كشف، جيت وبقيت فوق راسو وكل الناس ديل كانو متلمين حوليهو برضو وهو كان بعاين لينا، فجاءة قال بحس مسموع شوية اطلعو كلكم برة...............