رواية دون أن أشعر
الفصل الرابع عشر 14
بقلم ال زهراء
فجاءة قال بحس مسموع شوية اطلعو كلكم برة،البوص قال لينا اطلعو انا حا اقعد بس معاه، طلعنا قولت في نفسي اكيد مني من ما شافني اتعصب اسي لمن يقوم حا يطردني،رجعت للطوارئ لاقيت مرام ومعاها خالتو تهاني ومعاهم مدرك وكانو مستعجليين وملامح الفرحة في عيونهم، فرحت عشانهم ،قعدت في الاستراحة وبقيت اكل عشان اقوم لشغلي ، جات مرام وقعدت قولت ليها مدرك وين ؟!، قالت لي ما راضي يفارق سياف ،ضحكت وقولت ليها شكلو متعلق بيهو ،قالت لي تعلق شديد نحن خوفنا على نفسياتو عديل في فترة من الفترات والله من شدة ما ببكي وبقول داير ابوهو،قولت ليها لا حول ولا قوة الا بالله، اسي انا ولدي دا نهاي ما بقول داير ابوهو، قالت لي غريبه هو برة السودان ولا شنو ،قولت ليها لا نحن منفصلين، قالت لي ايوا بتكوني انتي عشان معاه اكتر بس صدقيني في لحظة حا يشعر بالفقد لابوهو ،انتي وصلتو لطريق مسدود ولا مشاكلكم بتتحل ،قولت ليها وصلنا لطريق مسدود ماف حاجة تاني بترجعنا، قالت لي طيب ما حابة تخلي ولدك يعيش جو أسرة تاني ،قولت ليها والله ياخ ما عايزة اعيش في علاقة تانية، ما عندي ثقة في اي راجل، قالت لي هو مالو عمل ليك شنو، قولت ليها لو قولت ليك انا بتوجع زيادة فاعذريني بس كلو مني ومن قرارتي المتسرعة هو قال لي كعب وما بنفع معاك، بس انا اتحامقت ورضيت بيهو ،قالت لي قسمتك معاهو قوية في ناس كتار زيك ما براك يعني الواحدة عارفاه بعمل في شنو وعارفة طبعو كيف بس بتوافق وبعدين تندم ،قولت ليها اي غلط كبييير انو تتجاوزي والله ،قالت لي اي عشان كدة مستقبلا لو عايزة تختاري اسالي اول ولو طلع فيهو اي شي ما تتزوجي، قولت ليها ما قولت ليك قفلت السكة، ضحكت وقالت لي بنشوف يا مها انا في وانتي في، قومت وقولت ليها تمام انا لازم ارجع البوص حا يقتلني.
لمن رجعت البيت بالمساء لقييت يزن نايم ،قولت لعمتي شرب اللبن، قالت لي اي شربنو ليهو ميسون مع أولادها ،ميسون دي طبعاً مره ود عمتي البكر زولة طيبه شديد وماسكة لي يزن مع عمتي وبلعب مع أولادها، دخلت جوة لقيتها اديتها حاجات وقولت ليها ديل لاولادك ،قالت لي ماف داعي، قولت ليها كيف ماف داعي زي ما معتبرة يزن ولدك انا أولادك أولادي، ابتسمت وقالت لي ما بتقصري، طلعت وطوالي استحميت وصليت العشاء ونومت جنب يزن، كلام مرام جاء كلو في بالي هل في يوم يزن حا يقول لي داير ابوي، تاني استغفرت وقولت بس دا ابوهو في النهايه وما عايزة احرمو منو لو قال انا بوديهو ليهو، بس تاني قولت لو اختارو علي، طردت الأفكار دي كلها من راسي وقولت نومي نومي وانسي اي حاجة.
في اليوم التاني مشيت المستشفى وقولت في نفسي اكيد لو قام حا يطردني بس بشتغل لمن اشوف الحاصل شنو ،وصلت ودخلت غرفة الطبيب العمومي وبقيت شغاله ،واحدة من الممرضات جاتني وقالت لي عايزنك تعملي كشف لدكتور سياف هو خرجوهو العنبر ،قولت ليها ليه انا الحاله دي انا ما ماسكاها، قالت لي اي ما انتي الماسكاها بس الليله قصي ما جاي عندوفاة وقال لي كلمي اي طبيب يكشف عليهو ويعمل ليهو متابعة ،طوالي شلت ميزان الضغط وقومتا.
لمن دخلت الغرفة لقيت معاهو بوص تهاني في السرير التاني وهو نايم، قولت لروحي لو هو شاكلني ما بخلي قصي، طوالي جيت وقولت للبوص عايزة اقيس ليهو الضغط والنبض واعمل ليهو كشف عام، قالت لي تمام بصحيهو ليك طيب دقائق بس ،بقيت واقفة وخايفة من ردة فعلو!، صحتو وهو فتح عيونو طوالي وعاين فيني مسافة! ،جيت وقولت ليهو بحس متوتر انا دكتورة مها جديدة عنكم وعايزة اعمل ليك فحص عام، خالتو تهاني ضحكت وقالت لي سياف بعرفك ليه عرفتي بنفسك، قولت في نفسي عشان يعرف اني شغاله هنا لو عايز يطردني من أسي،قال لي بهدوء اتفضلي يا دكتورة قست ليهو الضغط والنبض وسالتو كم سؤال بعد انتهينا انا شلت الفايل عشان اكتب ، جاء داخل المدير الطبي قال ليهو بقيت كيف، قال ليهو بقيت عال العال الحمدلله بكرة دي بتلقاني معاك في الشغل، خالتو قالت ليهو والله أقل حاجة شهر شهرين تنزل شغل شنو كمان، قال ليها والله انا كويس ما عندي اي حاجة ،ختيت الفايل ،المدير الطبي قال ليهو دي جديدة معانا عرفتك عن نفسها، سياف قال ليهو ايوا بس انا تاني حا اعيد الهيكلة انت وظفت كم في غيابي، عاينت ليهو شديد وعرفت انو عايز يطردني لو انا الزمان كنت صرخت فيهو بس انا ما فيني حيل للمشاكل نهاي.
رجعت البيت وبقيت افكر طول الليل وقررت انو استقيل قبل ما يطردني لانو هو اكيد عامل الهيكلة دي حجة هو بس عايز ينتقم مني.
اختفيت اسبوع لاني لسه مترردة في قراري بعد اتخذتو وابيت امشي الشغل ويشيلو يتصلو بي بعدها قررت استقيل والبحصل يحصل واصلا تلقاهم جابو زول بدلي، مشيت ليهم وختيت ورقة استقالتي قدامو وقدام المدير الطبي ،جيت ماشة قال لي سياف اقعدي يا دكتورة مها وضحى اسبابك لينا الخلتك تغيبي اسبوع والخلتك اسي تقدمي استقالتك. قولت ليهو عندي ظروف!، قال لي يلا نحن ما بنقبل استقالات ما لم توضحي ظروفك ،دكتور يس قام وقال لي سياف خليها توضح ظروفها في ورقة وبنشوف بعدين ورح الاجتماع، قال ليهو بلحقك مشى، قال ليها اها يا دكتورة مها، قولت ليهو انت كنت عايز تطردني عشان كدة قولت استقيل قبل ما تعملها، اتنهد وقال لي لشنو فكرتي كدة؟؟!، قولت ليهو لانك يا ما عملتها زمان، واسي قولت هيكلة وبتاع ،قال لي لسه انتي معلقة في الماضي انا نسيت اي حاجة عنو انا بقيت زول بالتزاماتو وحياتو وانتي بقيتي زولة بالتزاماتك وحياتك صاح ،واكيد انا تاني ما حا أكرر نفس عمايلي الزمان لانو فهمت غلطي... انا بعتذر ليك وبتمنى تقبلي اعتذاري.. ولو سمحتي يا دكتورة خلينا نقفل صفحة الماضي ونركز بس في شغلنا، انحرجت شكلو انا الوحيدة الما قادرة انسى اي شي وعاملة انو للان الناس مركزة معاي، كلامو صاح كل الناس ديل نسو الا انا المعلقة بالماضي ،لا قادرة اسامح اختي ولا قادرة ابطل كرة لي سياف ولا قادرة انسى معاملة لؤي لي ،انا زاتي مفروض اعاين لمستقبلي ،قولت ليهو انا اسفة انا فكرت انو...، قاطعني وقال لي ما تفكري باي حاجة غير الشغل وتاني مرة ما تغيبي بدون عذر، دنقرت راسي من الخجل دا ولا متذكرني زاتو ،قولت ليهو طيب قومت،شال الخطاب وشرطو وقال لي كمان جايباهو مطبوع ،قولت ليهو انا قولت مستشفى خاصة اكيد ما حا اجيبو في ورقة عادية، ضحك وقام وقال لي طيب طيب بقينا ماشين سوا حسيتو ما زي سياف الزمان!، الزول دا هادي شديد بس لسه نفس الحزم بس اسي كلامو موزون وما قاعد يرمي الكلام ساي، اي زول يقابلو يسلم عليهو، تاني افترقنا هو مشى الاصانصير وانا طوالي دخلت جوة غرفة الطبيب العمومي ،اتصلت بي مديرة الروضة وقالت لي تعالي ولدك ضرب ولد في الروضة، قولت ليها معقولة دقيقة طيب جاية مشيت طوالي وقولت لي بتاعت التسجيل خلي الناس ينتظرو انا حا اطلع 5دقائق واجي.
مشيت بركشة ودخلت طوالي وقعدت ،قولت ليها المشكلة شنو قالت لي ما براهو الضربو خلي يجي ولي أمر الطالب التاني، قولت ليهو الطالب التاني منو قالت لي مدرك، قولت في نفسي دا ولد سياف، الباب دق دخل وبانت عليهو الدهشة لمن شافني قعد وقال ليها اسف بس كان عندنا اجتماع في المستشفى بتاعت الروضة ابتسمت وقالت ليهو ماف مشكلة الحمدلله على سلامتك يا مستر، قال ليها الله يسلمك ،تاني قالت لينا أولادكم اتفقو وضربو ولد ،سياف عاين لي وانا عاينت ليهو قولت ليهو مستحيل يزن ياذي نملة وسياف قال ليها انا ما بقول ليك انو مدرك مؤدب وما بعملها كل الاولاد في العمر دة ممكن يرتكبو غلط ،عشان كدة انا ما حا اقيف معاهو الا اعرف الموقف والحاصل، بقيت ساكتة ساي وانحرجت وما قدرت افتح خشمي بحرف ،قالت ليهو كان بلعبو سوا لكن الولد قلع لعبة يزن فقام يزن ضربو تاني مدرك جاء وضرب معاهو،قولت ليها يبقى الغلط من الولد صاح ويستاهل ضرب ،سياف قال لي لاا التصرف الصاح ما انك تشيل حقك من الزول الروضة ليها قوانينها كان يكلمو عليهو الأستاذة ،الضرب عنف وبعلم الاولاد عادات سيئة وتاني بلجو ليهو عشان يشيلو حقوقهم،ما قدرت اقول كلام بعد كلامو قال ليها ممكن تتصلي بأهل الولد انا بعتذر منهم ولو في اي حاجة انا بتحمل المسؤوليه!، قالت ليهو امو في الطريق!، الولد جاء وكان مشلخ ومضروب وببكي، ويزن ومدرك كانو بعاينو لينا وببكو يزن جاني جاري وقال لي الاستاذة قرصتني وقالت لي ما تضرب اخوك، هو ما اخوي لكن، قولت ليهو وين قرصتك اسي بتروح وتاني قولت للأستاذة ما من حقك تعملي كدة الا اجي انا،قالت ليها انا هنا مربيه والبعملو ليهم في مصلحتهم وما براهو القرصتو كلهم قرصتهم ،ماهر لانو غلط وشال لعبتو وديل لانهم غلطتو وضربوهو ولو انتي ما قادرة تفهمي جيبي ابوهو ونحن بنفهمو تصرفات ولدو وهو براهو بادبو، قولت ليها ابوهو ماف في الإمارات، قالت لي طيب جيبي رقمو قولت ليها ما عندي، قالت لي معقول في زول ما عندو رقم راجلو، قولت ليها نحن منفصلين وتواصلنا بس من خلال اختو لو عايزة رقم اختو بديك ليهو،قالت لي طيب تمام ماف مشكلة بس معقول حتى ولدو ما قاعد يتكلم معاها، قولت ليها اي حاجة باختو بس ماف اي تواصل لينا معاه ولو سمحتي ما تسأليني أسئلة تانية، المديرة قالت لي بس الحاجة دي...، سياف قاطعها وقال ليها يا أستاذة انتي جايبانا نحل مشكلة معينة صاح الكلام دة ما وقتو،جات ام الولد ولمن شافتو زعلت شديد ونبذتنا ونبذت تربيتنا ،انا زاتي نبذتها، سياف قال لينا لو الزول ما اعترف بغلط ولدو أولادكم ديل حا يتربو كيف وكيف تتلفطن بالألفاظ زي دي قدامهن وقدام المديرة وقدامي ، سكتنا ،قال لينا انا حا احل المشكله دي،قولت ليهو حلها انا عن نفسي ما عندي اي كلام ولا حا اعتذر منها ولا حا اقول ليزن اي حاجة !، عاين لي وما اتكلم نادى مدرك ومسح ليهو دموعو وقال ليهو لو اي زول شال حقك ولا حق صاحبك انت طوالي تشتكي للأستاذة وما تضرب زول ،الضرب دا غلط كبير والزول التاني بتوجع زي ما اسي قرصتك الأستاذة موش اتوجعت يلا شوف زميلك حا يكون اتوجع كيف وانتو بتضربو فيهو ،يلا امشي اعتذر من زميلك وقول ليهو اسف، مدرك قال ليهو بتجيب لي شكولاتة ،قال ليهو الشكولاته دي للزول الشاطر الما بضرب زول يلا قول ليهو اسف واعتذر ،بكى ،قال ليهو لو بكيت لو قعدتا ما لم تعتذر انا ما بخليك ولا بحنسك، اخد بكيتو واعتذر ،وتاني جاء للولد التاني وقال ليهو الزول ما صاح يشيل حق غيرو بدون استئذان انت استئذان اول وبعدين شيلها عشان الحاجة دي غلط كبيير، قال ليهو انا عجبتني وهو ابا يديني ليها ،قال ليهو ابا تخليها طوالي وما تشيليها منو بالقوة،قال ليهو انا ما عندي زيها في البيت، قربو ليهو وقال ليهو كلم بابا يجيبها ليك تمام ،قال ليهو تمام، تاني قال ليهو في حاجة بتوجعك، قال ليهو لا، ام الولد بعد عرفت الموضوع اعتذرت لي سياف وللاستاذة وما اعتذرت لي انا، قالت لسياف انا حا اوريهو الصاح من الغلط في البيت وتاني ما بهبش حاجة زول بس بتمنى ما يحصل تصرف تاني من أولادكم معاهو ،قال ليها مدرك زول شاطر وعارف انو ما بكررها وحتى حا يكون صاحبو وحا يلعبو مع بعض، مش يا مدرك، مدرك هز راسو ،المديرة قالت لي انتي ما عايزة تقولي حاجة!،قولت ليها ما بعتذر ولا ولدي بعتذر مدرك جاء ليزن طوالي وقال ليهو تعال اعتذر لماهر بابا قال انو اي ولد ما شاطر هو البضرب زميلو و ،يزن نزل معاهو طوالي مع انو كان عنيد المرة قالت طوالي مرات الصغار بفهمو اكتر من الكبار المتعلمين، بقو يلعبو سوا ،المديرة قالت لي شوفتي يا دكتورة مها الاولاد ديل برئييين شديد وبس محتاج زول يوجههم ما تتافقي ولدك على الاعوج َوريهو الصاح من الغلط من أسى، معقول شافع يجي يقول ليهو اعتذر وانتي امو بس تقعدي تنبذي وكمان قدامو ،التربيه الصحيحة هي البتمشي الاولاد لقدام تربية الدلع ما بنفع ،قولت ليها هي الجات نبذت ،قالت لي اي هي استعجلت بس تاني عرفت ولدها غلط واعتذرت صاح ،بس انتي كنتي مصرة على راييك، سياف قام طوالي وقال بعد كدة ماف حاجة تانية صاح، وعاين لام الولد وقال ليها لازم تمشو معاي المسشفى عشان افحصو مرة تانية ونطمن عليهو،قالت ليهو شكرا يا دكتور سياف بس دا مجرد تشلخ، قال ليها لا انا لازم اتحمل المسؤولية لازم افحصو بذات نفسي ،نادى مدرك والولد التاني قال لي مدرك يلا ودع يزن وورح ،يزن قال ليهو ماش معاكم،جيت وقولت ليهو لا ماحا تمشي! ،سياف قال لي خليه يمشي وبعدين انتي زاتك امشي معانا انا جيب العربية معاي ،قولت ليهو لا شكرا انا ما بقدر أأمن على ولدي معاكم، احتمال المرة دي تعمل ليهو حاجة ولا احتمال انت تذلو زي ما ذليت ولدك اسي ،انا ماشة البيت ما راجعة الشغل اعذرني ،ما رد وطلعو كلهم، جيت وقفت للركشات، جاء وقال لي مها انا عايز اتكلم معاك، قولت ليهو انا ما عايزة لكن!!؟، انت ما من حقك تقول لي اي شي فاهم ،اتنهد وقال لي انتي ليه مستعجلة عارفة حا اقول ليك شنو اول، قولت ليهو عارفة حا تقعد تديني محاضرة، قال لي انا زاتي ما فاضي ليك عشان اديك محاضرة انا بس عندي كلام واحد معاك وهو...................