بقلم رزان محمد
بقلبي قلت ليها ريم انتهت من يوم ٩/٢٩ سنة ٢٠١٣ يوم خليت بتي وقطعة من روحي في الخرطوم جنب مسجد انا من اليوم داك ميتة وفجأه حسيت بحاجة حارة نزلت دي دموعي قشيتها سريع سريع ، لكن ملاذ شافتها ، مالك بتبكي يا ريم ، لا ما في شي بس في حاجة دخلت في عيني ... بعدها جات سمية صاحبتنا ودي جنها شمارات وقطيعة ، الليلة جبت ليكم شمار جديد وخطيررر شديد ، ملاذ فتحت خشمها وقالت ليها اها احكي ، قالوا رقية بت محمد قبل ما تم كلامها قلت ليها اسكتي يا سمية انا دايرة انصحك نصيحة ممكن قالت لي اتفضلي ، اخدت نفس عميق وقلت ليها يا سمية انتي بتحبي تاكلي لحم زول ميت ، يع مستحيل يعني دا شي مقرف ، قلت ليه طيب انتي عارفة لمن تغتابي وتقطعي في زول كانه اكلتي لحمه وهو ميت "
قال الله تعالى:
«وَلَا يَغْتَب بَّعْضُكُم بَعْضًا أَيُحِبُّ أَحَدُكُمْ أَن يَأْكُلَ لَحْمَ أَخِيهِ مَيْتًا فَكَرِهْتُمُوهُ» وانتي عارفة حسناتك كلها بتمشي لي البتقطعي فيه دا يعني تعبانة ساي تصلي وتصومي واي عمل خير بتضيعها كلها بتمشي للناس البتقطعي فيهم ، ما ردت لي لكن حسيت انه كلامي اثر فيها وطلعت منهم ومشيت بيتنا ودخلت غرفتي صليت الضهر وركعتين النوافل وقعدت في المصلاية بكيت بكاء شديد يارب انا غلطت غلطة كبيرة لمن جبت بت بالحرام وكمان خليتها وجدعتها يا رب يا غفور يا ودود اقبل توبتي وادخلني برحمتك في عبادك الصالحين ، يا رب تهديني على فعل الطاعات وتبعدني عن المنكرات .. بعدها مسكت التلفون دا مواعيد الحلقة مع محمد ، الولد الاسمه محمد دا فعلا أعمى لكن ربنا عوضه ورزقه بصيره وبقى داعي كبير ، فتحت اللايف ..
في الخرطوم ...
عند محمد دا مواعيد الحلقة بعد فتح اللايف طيب شباب سلام عليكم ورحمة الله وبركاته، بسم الله نبدأ ،الليلة نحن حنتكلم عن اكتر شي بقى منتشر بشكل كبير بين الشباب وشايفين انه الموضوع عادي شديد حنتكلم عن العلاقات المحرمة : انتو عارفين انه اي حرف كتبتو في علاقة غير شرعية انت مسؤؤل منه ومحاسب عليه ؟؟
رد واحد من المتابعين قال لي لا حولا ولا قوة إلا بالله كاتبين كم كلمة وقلنا كم كلمة وكم ساعة وكم شهر وكم يوم ، دا كله محاسبين عليه ، قلت ليه اي اتخيل كله محاسب عليه 💔💔💔 ، كفاية ذنوب باب التوبة مفتوح لمن تاب صادقا واوفى بشرط التوبة ان الله يغفر الذنوب جميعا انه رحيم وكريم على عبادوا ...
عند رحيق :
طلعنا انا ولين ويقين وهمام مشينا اول شي المدرسة سجلوا لي في المدرسة، كانت مدرسة خاصة وحلوة شديد ، لين قالت لي اها المدرسة عجبتك ، أي حلوة احلى من مدرستي الزمان ولون لبسكم حلو شديد ، همام قال ارحكم بعدا نمشي السوق نشتري مستلزمات المدرسة ركبنا العربية واتحركنا ..
لين : أثناء نحن في الطريق يقين همست لي في اضاني قالت لي انتي ما لاحظتي ، لاحظت لي شنو ، شوفي رحيق بتشبه خالو همام نفس العيون العسلية والحواجب وحتى شعرها لانو بني وناعم زي شعره ، قلت ليها يا بت دا كلام شنو من الشبه أربعين، قالت لي معقول تكون بتو وكمان يزن وراني الصور الداسيها خالو همام والطفلة الفي الصورة نفس ملامح رحيق ، معقول الفي بالي صاح وتكون بتو ! ، انصدمت من كلام يقين وقلت ليها انا الحالة حذرت يزن وقلت ليه الكلام دا ما يطلع لكن لا حياة لمن تنادي" وانتي يا يقين شيلي الفكرة دي من راسك " قالت لي اوكي لكن حسيت بيها ما حتمشي الموضوع ساي ،
يقين : انا متأكدة انه في علاقة بتربط بين خالو همام ورحيق وحاسة انها بنته والايام حتثبت لينا الشي دا .. دقيقة اذا طلعت بته معقول رحيق بت عمي وخالوا همام اكون عرس بت اخو 😮
رحيق : دخلنا المول وكان كبير شديد وفيه اي حاجة اشترينا الحاجات ورجعنا البيت .. دخلت الغرفة ولقيت محمد قاعد يتكلم ويقول علاقات محرمة وكلام كتير بس انا ما فهمت حاجة واخر شي قال ربنا يهدينا جميعًا للطريق الصح، ويبارك في قلوبنا وأيامنا.
والسلام عليكم ورحمة الله وبركاته."
بعد خلص ، قال لي رحيقي جيتي ، أي، سجلوا لي في المدرسة والمدرسة حلوة واشترينا من المول حاجات كتيرة ، قلت ليه انت عارف يا عمو محمد انا زمان ابوي ما بشتري لي حاجات المدرسة وكان عندي شنطة واحدة بقرا بيها كل سنة والجزمة بعد تبقى رجلي مع الارض حتى تاني اشتري لي واحدة غيرها والكراسات ما بشتري لي الا بعد بكا وتحانيس حتى اشتري لي كراس ، مسك يدي وقال لي ما تزعلي يا رحيقي انتي بقيتي خلاص مرتي وتاني بعزك وبدللك، ضحكت وقلت ليه أن شاء الله يا عمو محمد ، قلنا شنو نحن يا رحيقي ما تقولي لي يا عمو محمد 😂
في بيت اهل رحيق :
فاطمة: امي ، امي اصحي يا أمي، حاولت اصحيها بس ما قامت معاي ، جريت برا الشارع وانا عيوني مليانة دموع وبرجف عاينت يمين ، شمال ، لقيت في شاب برا ماشي قلته لو سمحت وانا نفسي قايم وبرجف ، بسم الله مالك ، بسم الله اهدي في شنو ، أمي ام أم أمي.. وقعت فجأة وبصحي فبها بس ما صحت ، دخلت وهو جاء وراي اول شي قاس نبضها قال لي النبض ضعيف شديد لازم نوديها المستشفى ، جرينا المستشفى والدكتور قال انه حالتها صعبة شديد .. طيب حصل ليها شنو يا دكتور، جاتها ذبحة صدرية ، بعدها جات الممرضة وقالت انه امك صحت وقالت دايرة تشوفك .. قمت جارية ليها وقالت لي يا بتي بعدا خلاص ربنا داير اشيل امانتو ، وصيتي ليك يا بتي اهم شي صلاتك هي البترفعك وهي البتخليك واقفة مهما الدنيا لفت ...
واوصيك بسمعتك.. خليك دائما مستورة ، وما تعاملي الناس الا بالخير والطيبة، يا أمي ما تقولي كدا انتي حتبقي كويسة وحنرجع البيت ، قاطعتني قالت لي بعدا خلاص ، وأنا عندي سر كنت داسه من زمان ومفروض اكلم بيه رحيق بس ما في وقت كلميها انتي انو هي ما بتي الحقيقية وانه ابوك لقاها جنب المسجد وجابها لي .......
صلوا على النبي الحبيب ❤️