رواية دون أن أشعر
الفصل العشرون 20
بقلم ال زهراء
وقفتو قالت ليهو مبروك قالو عايز تعرس!!، قال ليها اي، قالت ليهو مرام صاح، قال ليها ايوا عن اذنك انا مستعجل!، مشى قالت لي بت المحظوظة لقتها واااي ليه ما انا يا سياف!!، قولت ليها رونق ما تصدعي بي لو عاجبك امشي ليهو عدييل، قالت لي فات الأوان خلاص انا عايزة اعمل نسكافيه وامشي مكتبي أحزن براحتي ،مشت ،وانا بقيت ما مركزة وحتى استأذنت وقولت ليهمم تعبانة ما قادرة أتم اليوم، طلعت وانا مستعجلة ركبت سماعتي وركبت ركشة وشغلت قران لمن وصلت البيت ،لقيت يزن ومعاه مدرك قولت ليهو الجابك منو ؟؟!، قال لي جابني الترحيل مع يزن ،قولت ليهو كلمت بابا ،قال لي ايوا كلمتو! هو زاتو القال ليهم يوصلوني هنا، قولت ليهو تمام، عاينت ليزن الكان بشيل في التراب ويرمي فيهو في اولاد ميسون بنظرة حارة ،وتاني جيت قلعتو مني وقولت ليهو بنهرة عيييب اوعى تاني ترمي التراب فيهم العب لعب عديل مش انت شاطر يلا الشاطر ما بياذي اصحابو،بكا قولت ليهو الغلط غلطك يا يزن ما ان بكيت ان ادردقت انا ما حا اقول ليك انو كلامك صاح!، عاين لي!! وزاد البكاء انا عرفتو مستهبل هو اتعود لانو انا زمان ما اشوفو ببكي بعتذر وبجيب ليهو اي حاجة دايراها وبقى سلاحو الوحيد ،بس الفترة الفاتت اتعودت انو أقوي قلبي واخليه يبكي وتاني يسكت براهو وحتى هو البعتذر،دخلت وخليتو يبكي بعد فترة مدرك جابو من يدو وقال ليهو يلا قول اسف لماما، قال لي اسف وباسني في خدي، قولت ليهو تاني بتكشح التراب في اولاد الناس ،قال لي لااا، قولت ليهو طيب امشو العبو، مشو وانا قولت في نفسي ممتنة جداً لسياف ولربا ام ماهر، ربا اعتذرت ليها الفترة الفاتت وحتى رجعت يزن الروضة واعتذرت للمديرة ومن الوقت داك بقينا أصحاب، وحتى هي بتوجهني لانو عندها شفع ومرت بالتجربه قبلي.
بالمساء سياف اتصل بي عشان اجيب ليهو مدرك برة، طلعت ليهو وانا مكمكمة بالتوب وقولت ليهو نام تعال ليهو بكرة ،قال لي هو عندو صحيه في نص الليل وببكي وما اظن تقدري...، قاطعتو وقولت ليهو انا ام كمان ما تخاف انا بقدر اتولى امرو ،قال لي طيب شكراً، ركب العربيه واتحرك وانا انتظرت لمن اختفى ،قولت في نفسي دي ما حاله ليه يا قلبي سياف بالذات!!!!.
بعد نص ساعة لقيت منو مسج مكتوب فيها كلام لاقاني اسي وقال لي ما وافقتي علية انا طول الفترة الفاتت كنت قايلك وافقتي ،قولت ليهو لااا انا فكرت وفكرت ولقيت انو انا ما حا اكون مبسوطه معاه ،صاح بحب ولدي بس انا ما حا اكون عايشه مرتاحة، قال لي ليه ما حصل قولتي!؟، قولت ليهو هو انت اديني مجال ما هو طول الفترة الفاتت صاديني ومتجاهلني وبعدين هو زاتو كان ماف وانا نسيت الموضوع من اساسو، قال لي انتي كنت مصره، قولت ليهو كنت اي بس وعيييت وعرفت عندك معاي حاجة، ما رد، قولت في نفسي ثقيييل هو بعد كل المدة دي يرسل عشان بس يسألني من موضوع تافه زي دا.
الصباح ركبت الاولاد الترحيل وقررت امشي لمروة لانو الليله عندي اجازة، جهزت مع ميسون الفطور والغداء ومشيت ليها وقعدت ساكتة ،قالت لي اها يا مهوية علام الحصل ليهو شنوو،قولت ليها رفضتو ولو عايزة تجيبي لي سيرتو تاني ما بخليك، قالت لي طيب تمام سكتا بس ليه باين انك زعلانة، عايزاهو وما قادرة تكوني معاه ولا شنو ،قولت ليها لااا علام دة اخر همي اعرفي!، وبعدين انا لا زعلانة ولا حاجة، احمد اخبارو شنو ؟؟!، قالت لي جاي الليله!، قولت ليها انا اقول ليه وشك منور!، ضحكت، قولت ليها وضعكم اتحسن صاح ،قالت لي اي الحمد لله سمعت نصحيتك وللان ماف مشاكل بينا، وحتى وضع شغلو بقى تمام ،قولت ليها اي الحمد لله انك عقلتي، اتنهد وقالت لي اي الحمد لله والا كنت حا اخرب بيتي وازعزع عيالي ،قولت ليها اي وبعدين نسيتي اهم حاجة وهو انك بتحبي احمد وما اظن يا مروة تعيشي من غيرو بعد لسانك الطويل دة، ضحكت وقالت لي اي اي، قامت ومشت تعمل قهوة!، انا بقيت العب في بتها الصغيرة!، الباب دقا شلت البت ومشيت فتحتو طلعت جارتها دخلت وقعدت جات مروة وقالت ليها حصانك جراي حا اجيب ليك كوبايه ،جابت ليها وبقينا نشرب، قالت ليها مروة عندي ليك خبر شين خلاص، قالت ليها شنو ،قالت ليها انصاف ماتت ،قالت ليها انصاف الكانت جارتي ولا واحدة تانية،قالت ليها ياها زاتها ،قالت ليها لا حول ولا قوة الا بالله العلي العظيم ،وين ومتين، قالت لي في القرية المشت ليها دي ،قالت ليها مالها كمان، قالت ليها بري في ناس يقولو التهاب وفي ناس قالو انو عندها سل وداسنو، قالت ليها مبالغة لكن ربنا يرحمها يا رب طولت منها، المهم تاني بقت يتونسن وبعدها هي طلعت منها، أنا طوالي قولت ليها انا ما حصلت سالتك عن الناس ديل مشو وين ؟؟،قالت لي وضعهم اتهور وفكو بيت الإيجار ورجعو قريتهم ،قولت ليها ياسر ما رجع السعودية ولا شنو ،قالت لي ياسر عرس واحدة اكبر منو وبقى ما شغال بيهم الشغلة!!!، وسمعت انها عدمتو وطردتوو تاني ،قولت ليها يستاهل الخايب!! الحمدلله انو ما كان في بينا قسمة وربنا نجاني منوو،المهم ما علينا بيهم، تاني اطرقت ليها لعمو محمد وقولت ليها مختفي وانا بصراحة ما حصل سالت منو عشان زعلانة انو شال ورثة اخوانو واكلهم ،قالت انشل زعله على بتو ، وبقى ما بطلع من البيت، قولت ليها لا حول ولا قوة الا بالله العلي العظيم ،حارة شديد بس وقع في شر اعمالو، قالت لي انا خايفة على نفسي وخايفه على أولادي كمان عشان انا كنت مشاركة في الاجرام دة ،قولت ليها توبتي صاح انتي ،خير الخطائون التوابين ،قال لي اي توبه نصوحة بس الكلام ابوي وقعدت تبكي ،قولت ليها انا والله بحلم بيهو انو جوة نار كتيييرة ،وطوالي مما احلم كدة بمشي اتبرع ليهو وتبرعي زاد طول ال5سنين، وبدعي دايما انو ربنا يغفر ليهو العملو، قالت لي اللهم امييين ،قولت في نفسي حارة شديد انو الواحد يمشي من الدينا دي مذنب وما قادر يرجع ويصلح غلطتو ،مروة لقت فرصة بس ابوي ما لقى! وكل ما اتذكر دة قلبي بوجعيني بس بعمل العلي وبمشي لاعمام سياف اعتذر منهم نيابه عن ابوي وبخليهم يعفو ليهو.
طلعت منها متأخر وقولت ليها المرة الجاية بجيب ليك يزن معاي، وصلت البيييت ولقيييت يزن نايم!، قولت ليها نايم ليهووكم،عمتي قالت لي هسي ،قولت ليها تمام اكل حاجة، قالت لي اكلتو ميسون ،قولت ليها يديها العافية ما بقدر اجازيها!،اتصلت بي المجنونة وقالت لي الحقي شوفي حاله مرام لو عندك رقمها، قولت ليها ما عندي انت عندك؟؟!، قالت لي دة كلامك!! اقفلي برسلها ليك واتس ،قولت ليها طيب، رسلت لي فتحت الصورة كانت فيها صوره دبله!!!، وكاتبه تحتها تمت خطوبتي على من اختارة قلبي ♥️، دمعة حارة نزلت مني ،رسلت لي رونق شوفتها وااي نفسيات ،يا ريتني مكانها، قولت ليها رونق تاني اوعى ترسلي لي حاجات زي دي.
اليوم التاني مشيت المستشفى ودخلت المكتب، جاء دكتور سياف داخل وكان زي الما نايم كويس، وكان في يدو اليمين دبله وانا بقيت مركزة فيها، قعد قولت ليهو مبارك ربنا يتم ليك على خير، عاين لي وقال لي الله يبارك فيك ،بقينا نعاين لبعض ،قولت ليهو جيت تقول لي حاجة ،قال لي ايوا، قولت ليهو طيب انا سامعاك، قال لي في حاله انتي كنت ماسكاها اسي تاني جات المستشفى وعايزك انتي تتولي أمرها تاني ،قولت ليهو منو، بدا يقول لي تأني طلعت معاه ومشيت شوفتها ،وطلعت نفس مرة الicu.
طلعت للفطور لاقيت مرام مما شافتني نادت لي ،ما اشتغلت بيها، جات واعتذرت مني وقالت لي ما عايزة تنسي الماضي، قولت ليها في حاجات ما بتنسن، قالت لي عليك الله اديني فرصة تانيه انا عايزة اتغيير عشانو ،قولت ليها اتغيري عشان نفسك بس، قالت لي طيب بس قولي مسامحاني الله يرضى عليك، قولت ليها بفكر، قالت لي تمام... سياف قاعد؟!، عاينت فيها وقولت ليها بكون جوة ولا بكون مشى مع ناس رونق يفطرو ،قالت لي رونق التصبر لي البت دي ملتصقة فيهو كدة، قولت ليها ما تعملي مشكلة وتخسري سياف بسببها عارفاهو انتي صعب ،قالت لي لا ما تخافي هو موش بقى لي الباقي كلو هيين، طلعنا مع بعض وكانت ماسكة يدي ،سياف لاقاني انا ومرام في الطريق، مرام طوالي فكتني وجرت ليهو قالت ليهو كنت وين، قال ليها افطر، قالت ليهو اتصلت بيك ليه ما بترد، قال لي مشغول عايزة حاجة ،قالت ليهو لا جيت اشوفك، قال ليها ما تجي تاني ،ملامح وشها اتغيرت وقالت ليهو ما تزعلي بكلامك دة، مسح بيدو على وشو وقال ليها حا اوصلك البيت وتاني اتصلي قبل ما تجي ، انا قولت ليه واقفة مفروض امشي والا قلبي دة حا ينقطع من الألم، بقيت متحركة وما واعية سحبني سياف من يدي وقال لي العربية ما بتشوفي، قولت ليها اسفة ما انتبهت، قال لي انتي عايزة تموتي ولا شنو انتبهي، قولت ليهو طيب، رجعت بدربي قال لي اسي راجعة وين، قولت ليهو المستشفى، قال لي والفطور، قولت ليهو ما نفسي، قال لي كلامك دا ما بنفع معاي امشي افطري، عاينت ليهو وقولت ليهو ما عايزة، مرام قالت ليهو نمشي، عاين ليها وقال ليها طيب تمام، قولت في نفسي يا الله صبرني، رجعت المكتب بعد شوية اتصل بي رقم قال لي انو هو مطعم كدة وفي طلب باسمك، قولت ليهو الرقم غلط وقفلت.
بالمساء رجعت واكلت شوية بس ،ميسون قالت لي الايام دي نفسك مسدودة قولت ليها ما عارفة! والله مالي، قالت لي كدة بتمرضي لكن، قولت ليها ما بتجيني عوجة إن شاء الله.
بعد اسبوع اتضايقت شديد وقررت انو اخلي الشغل كلو كلو عشان شوية مشاعري الغبية دي تخف ،دقيت الباب ودخلت لرونق واديتها ورقة الاستقاله ،رونق قالت لي ليه؟؟!، قولت ليها تعبت وعايزة ارتاح واتفرغ ليزن شوية ،قالت لي ما اظن تلقي شغل احسن من دة بعدين، قولت ليها ما فرغت، في اللحظة دي دخل سياف، قالت ليهو رونق تعال شوف مها قدمت لي طلب استقاله، جاء وعاين وقال لي مالك؟؟!، قولت ليهو عايزة ارتاح انا مما جيت من السعودية نزلت طوالي وما ارتحت واسي ضغط الشغل زاد، قال لي ممكن ننقص ليك الايام...، قاطعتو وقولت ليهو ما عايزة اي استثناء خاص لو سمحتو أقبلوا الورقة ،عاين فيني وقال لي طيب، قولت في نفسي متوقعة انو يحنسك ولا شنو ،طلعت.
_________________________
بلسان سياف
رجعت مكتبي وبقييت قاعد واتذكرت كل ذكرياتي، بعد جيت من المطار!!! عاينت لنفسي ووقولت انا اصلا ما مفروض امشي عشان عارف الجواب مسبقاً، اتنهد وبقيت راقد في السرير اتصلت بي ريم وبقت تاخد وتدي معاي وانا كنت ما ضايق اي زول ولا حتى نفسي فقفلت فيها من دون ما ابرر ليها، بعد اسبوعين جاتني ولقتني في المستشفى كنت قاصد انهك نفسي بالشغل عشان انسى شوية ،قالت لي ليه ما عايز ترد علي، قولت ليها مشغول، قالت لي لو رديت دقيقة وطمنتي ما فيها حاجة صاح، عاينت ليها وقولت ليها اسف، قالت لي ما تقول لي اسف انت مما سافرت مها بقيت ما مهتم بي نهائي زمان على الاقل بترجع لي برساله، اسي بقيت ما مهتم، قولت ليها نحسم الفوضى دي انا حا أعقد عليك...، قاطعني بكف وقالت لي عقد شنو الكل مرة قام فيهو دة، انا ما برضى أعقد على واحد ماخدة قلبو واحدة تانية لو بس كلمتني وما عاندت المرة الفاتت ،قولت ليها انا في حد نفسي ما كنت عارف اكلمك كيف، جدعت لي الدبله وقالت لي ما بنفع معاي زول ميت في واحدة تانية، قولت ليها الحب دة كان ما بيدي، والله من غير ما احس البت دي حبها بقى جواي، انا اسي بتعذب الف عذاب انا غلطان انو اتجاهلتك بس والله ما اتجاهلتك عشان بحب زولة تانية لكن عشان خايف عليك وخايف اكسرك وعشان انا جبان وما قادر اوريك بحبي لمها، ضربتني في كتفي وبقت تبكي قالت لي سياف ليه هي وما انا ليه مال قلبك ليها، قولت ليها دا السؤال يلي للان ما قادر القى ليهو جواب،هدت بعد فترة من البكاء وقامت وقالت لي طيب ليه خليتها تسافر، قولت ليها رفضتني، قالت لي تستاهل واسي دي انا طلقتك، ضحكت ساعتها وهي كشرت وشها وتاني قالت لي انا اسي قولت العندي كلو وما حا أضيف اي حاجة و لا حا اسائلك واقول ليك كلب وسخ لانو شايفة انو الفيك مكفيك من شكلك ومها ظاهر اخذت حقي منك، قولت ليها بتصدقي انو انتي أطيب بت لاقيتها يعني انا قولت تضبحيني ،قالت لي اي بس برضو ما حبيتها ،ضحكت وهي تاني فردت وشها وقالت لي حا اشوف واحد احسن منك، قولت ليها عارف الحاجة دي ماف واحد ما يتمنى بت زيك، قالت لي الا انت ،ضحكت وقولت ليها القلب هو الاختارتها ما انا.
بعد انتيهت من موضوع ريم قررت اشوف موضوع الورثة ،الوقت داك انا كنت ما عايز ادخل مها عشان عارف ابو بعمل ليها شنو لو عرف انها عندها علم عشان كدة هددتها وخوفتها ، بس انا ما كنت عايز اكل حق زول، المهم مشيت لكل أعمامي وقسمت الورثة ابوي لمن جو وواجهوهو وحتى في واحد شال ليهو السلاح وقال بقتلتو بس انا هديتو واتنازل ،بعد مشو ابوي ضربني وطردني من البييت وهم المسكوني الوقت داك ،المهم امي تعبت شديد لانو انا ما كنت معاها وحتى فترة قالت لأبوي يا تطلقني ولا ترجعو البيت بس ابوي كان مصر على رايو، المهم حصل حادث اختي وكلنا نسينا الموضوع وحتى رجعنا سوا، وابوي دا بس كان ماسك ولدها وما رضيان يفكو وتاني انشل وانا بقيت في البيت حابسو، وبعد فترة قررنا انو نعمل مستشفى انا وامي بالقروش الورثة الجاتنا بالرغم من انو رفضنا الحاجة دي لانو اكلنا حقهم طول السنين الفاتت بس هم قالو انو نحن ما عندنا ذنب وعشان انا رجعت ليهم حقهم دا حا يكون نصيبي، المسشفى كانت خيرية اكتر مما هي مستشفى خاصة وبسبب الحاجة دي ربنا فتحها علينا والحمدلله وضعنا بقى فوق الممتاز تاني.
كنت متابع اخبار مها بس مما تسمع انها اتزوجت قطعت أخبارها وبقيت ما عايز اعرف اي حاجة عنها، امي كانت مصرة اتزوج مرام ومنها نربي مدرك ،بس انا كنت معند وما عايز اي مرة تدخل حياتي ،لاني ما كنت قادر انساها ولا كنت قادر اطلعها من تفكيري نهاي.
المهم عد الوقت ولقيتها قدامي حاولت اضبط نفسي وما اكشفها نهاي، وبعدها عرفت انها مطلقة وقولت بس دي هي فرصتي بس ما كنت عايز اضغط عليها وقتها فقررت انو بس اخليها جنبي الفترة ديك وما احسسها بحاجة عشان ما تبعد تاني.
بعد عرفت انها بتكرهها خوفي زاد وقررت انو الأفضل ما اعمل اي حاجة ولا أتقدم بخطوة اتجاهها وبقيت متعذب اكتر!!، لانو هي جنبي وانا ما قادر اصل ليها، تاني جاء علام وطلب يدها و لمن قالت لي انا نهاي ما حا افكر اتزوج اطمنت وخوفت فسالتها نهاي ،قالت لي اي نهاي، زعلت في اللحظة دي ولو ما ضبطت اعصابي كنت خسرتها متأكد لانو كنت عايز اقول ليها اديني فرصة ،وهي ساعتها اكيد حا تبعد تاني.
بعد فترة جات وقالت لي رايك شنو في علام ،قولت ليها من اي ناحية، قالت لي زوج، مما قالت لي كدة حسيت انو الزمن وقف وضربات قلبي زادت وحسيت انو الدنيا دي ضاقت بي، قولت ليهو انتي شايفة شنو قالت لي محترمني ومحترم ولدي ،قولت ليها طيب مستشيراني ليه وطلعتها برة.
بقيت متجاهلها عشان مشاعري دي تهدأ وعشان كنت غضبان لانو خسرتها للمرة التانيه وعشان غيران ، لمن شوفت انجرحت زي الانا انجرحت وما قدرت اتحكم في نفسي حتى صرخت فيها وجوطت من خوفي عليها وحا تكون ساعتها كرهتني زيادة لانو حتى العصير ما قبلتو مني.
مشيت سويسرا وبرضو الحال كان في حالو وما كنت قادر انوم كويس من الموضوع دا هي كانت بعيييدة شديد مني اصلا واسي بعد تتزوج ما حا يكون في طريقة لي معاها، بعد جيت جبت هدايا ليهم كلهم وما قدرت اديها هديه!! بالرغم اني ما خليت حاجة ما جبتها ليها بس قولت باي صفة!!، المهم اتحامقت واديتها ساعة هي زعلت وبكت وانا ساعتها عرفت حجم غلطي، كيف اخلي حبيبتي تبكي، اعتذرت ليها وما نفع، والوقت داك حسيت انو خسرتها للأبد.
بعد عرفت انها رفضت علام جاء موضوع مرام فما قدرت الا ارسل رسائل واستفسر والرسائل ما زادتني الا عذاب، في اليوم التاني قررت اتعامل معاها نفس التعامل!! عشان ما تحس بحاجة، واسي بعد استقالت ما كان بقدر اعمل اي حاجة لانو بقيييت مرتبط مع بت تانيه محتاجاني، واصلا هي بتكون زادت كره لي وخاصة بعد معاملتي ليها الأخيرة عشان كدة اتخذت قرار الاستقالة...........
اللهم صل على محمد عدد ما ذكره الذاكرين وغفل عن ذكره الغاف