رواية دون أن أشعر
الفصل الواحد والعشرون 21
بقلم ال زهراء
واصلا هي بتكون زادت كره لي وخاصة بعد معاملتي ليها الأخيرة عشان كدة اتخذت قرار الاستقالة،اتنهدت وبقييت قاعد جات رونق وقالت لي الفطور سياف، قولت ليها ما عايز!، قالت لي خير مالك عيان ولا حاجة. قولت ليها لا ولو سمحتي نبهي رندة وقولي ليها ما تخلي زول يدخل علي، قالت لي تمام.
__________________________
بلسان مها
قررت افتش لوظيفة تانية فلفيت المراكز مركز مركز وفي النهاية وصلت لمركز اسمو مركز الحياة دخلت طوالي وقدمت أوراقي للمدير ،قال لي الدكتورة حا تاخد اجازة عشان ولادتها قربت ،تعالي بعد اسبوع واستلمي شغلها، قولت ليهو طيب شكراً ليك.
رجعت البيت وبقييت راقدة بالبطانية عمتي قالت لي حالتك دي ما عاجباتي يا بتي، قولت ليها مالي، قالت لي ما حاسه بالسخانة ،مهتدي جاء داخل وقال لامو مها دي شكلها مشوكشة، زحيت البطانية وقولت ليهو يا قليل الادب الليله اصبر لي فنيتو بطوبة بس جلت منوو،عمتي ضحكت وقالت لي ياخ انتو كبار مالكم بتتعاورو كدة ،وأنت كمان بولدك اخجلي قايله نفسك صغيرة ،قولت ليها كلو من ولدك دة، عمو بابكر اليلله الاجي اوريه حركات ولد انا اتشكوكش، ضحكت ودخلت ،طوالي انا اتغطيت بالبطانية وقررت انوم!.
بعد فترة حسيت بيدين باردات اتختو في راسي عاينت لقيتو مدرك، قومت وسلمت عليهو وقولت ليهو حبيب خالتو وين مختفي وحوربتنا، قال لي بابا قال لي انو ما اجيكم كل يوم ،قولت ليهو ما تشغل بيهو هنا بيت خالتك وفي أي وقت تعال، قال لي تمام، بعدها قعد وقال لي شوفي ادونا شنو فتحت كتابو وعاين قولت ليهو ادوكم عمة وعم وخال وخاله بالانجليزي ،قال لي اي، كان في صور لراجل ومرة وتاني راجل ومرة وتحت كل صورة مكتوب عمة عم بالانجليزي، خال خالة بالانجليزي، قال لي بالانجليزي عمة مرام واشر على الصورة التحت ليها اسم عمة بالانجليزي ،عاينت ليهو وقولت ليهو شاطر!!، ودا منو، قال لي بالانجليزي بابا سياف، قولت في نفسي هو عارفو خالو بس برضو بحب يقول ليهو بابا،قولت ليهو شاطر ما شاءالله ،ابتسم قولت ليهو لمن تمشي البيت وريهم لمرام ولبابا تمام ،قال لي لااا بوريهم لبابا ،مرام كعبه، قولت ليهو ليه عملت ليك شنو، قال لي قرصتني، قولت ليهو لشنو ؟؟!، قال لي عشان ما قولت ليها ماما، قولت ليهو انت لشنو بقيت ما بتقول ليها ماما، حرك يدينو وقال لي اقول ليها لشنو هي امي لكن ،ضحكت وقولت ليهو انت زمان لكن ما كنت بتقول ليها قال لي هي القالت لي قول لي ماما، واسي انا ما داير اقول ليها لانو زعلان منها، ضحكت وقولت ليهو تمام ما تقول،قولت في نفسي مرام الجبرت مدرك انو يقول ماما طلع كلام سياف صاح لامو بس ليه ترغم شافع انو يقول ليها ماما معقول كلو بس عشان تكسب سياف اتنهدت وضميتو شافع زيو ما مفروض تستخدمو في أمور زي دي،تاني قولت ليهو اعمل ليك شنو الليله عايز حاجة َمعينة، قال لي لاا، قولت ليهو ما تخجل قول العايزو!!!، قال لي بيرقر!!، يزن بقى ينطط براهو من الفرح، قولت ليهو الليله يوم عيدك لكن!!، انا واثقة انكم ما حا تقدرو تاكليهو كلو بس ماف مشكلة،امشو العبو.
بالعصر سياف اتصل بي قال لي نص ساعة واكون عندك ممكن تجهزي لي مدرك ،قولت ليهو تمام طوالي مشيييت حممتو ولبستو وعطرتو ،اتصل بي تاني قال لي انا برة جيبتو ليهو وقولت ليهو مع السلامة يا مدرك، باسني في خدي وقال لي مع السلامة ماما مها، عاينت ليهو باستغراب اول مرة يقول ماما مها!!، تاني مدرك طلع العربية، سياف جاء وقال لي مدرك دة شكلو حباك ماما دي ما بطلعها لاي زول حتى مرام عمتو نزلها طوالي لرتبة عمتو مما بقى يعيش معانا ،ضحكت وقولت ليهو ما هي شكلها كانت هناك بتقول ليهو قول لي ماما ولمن جاء وما لقى ضغط منها بطل، عاين لي وقال لي بتصدقي انا زاتي شكيت انو دة الحاصل، قربت اقول ليهو هو كلمني بس تاني كسرت الحنك وقولت ما يقول عايزة تخرب علينا، شكرني وودعني.
في الأسبوع التاني نزلت شغل المركز كان مزدحم شديد ،وانا شغاله بيدي ورجولي عديل لمن تعبت.
مرن قريب اسبوعين عديل وانا من المركز للبيت واتعودت على ناس المركز وانا شاردة جات نبيلة ودي المسجلة قالت لي ورح الفطور طلعت برة وبقييت افطر مع الشغالين كان في بتاعت مختبرات سبا وياها نبيله ومعاهم واحدة ،بتاعت المختبرات اتصلت بيها واحدة ردت وقامت وانا زاتي قمت وقررت ادخل جوة بعد انتهيت جيت داخلة على الممر سمعت بتاعت المختبرات بتقول انا ما ناقصني اترفد يا مرام، قالت ليها تاني ملاريا هينة انتي كذبتي في الاكعب غالباك تزوريها امشي لاي زول يكتب ليك ورقة وخلاص، قفلت منها وقالت بت عذاب راجل شنو البعمل ليهو كل دة عشان يهتم بي،لمن شافتني انخلعت وطوالي دخلت المعمل ، قولت في نفسي يا ربي قصدها مرام ولا واحدة تانيه غيرها، المهم بعد فترة الباب دق وكانت مرام انخلعت لمن شافتني وقالت لي بقيتي شغاله هنا، قولت ليها ايوا المهم شكت لي أعراضها قولت ليها افحصي الملاريا طلعت قولت في نفسي معانتو دي مرام القاصداها قبيل سبأ تكون كذبت في شنوو البت الخبيثة دي ؟؟،عملت نفسي ماشة المعمل عسى اعرف حاجة دخلت طوالي وقولت لسبأ بتاعت المعمل حاسة اني ما كويسة افحصي لي ،شالت عينة الدم مني وقالت لي نص ساعة وتطلع، قولت ليها مرام فحصت ،اتوترت وقالت اي فحصت قولت ليها العينة وين، قالت لي ديك مشيت وشوفتها قولت ليها ديل 5عينات وانا الفحص دا كتبو ل6 وكلهن قريبات بعض معقول في عينة استلمت النتيجة ليه ما جاني المريض، قالت لي لا ماف واحدة استلمت كلهن ما انتهن ، قولت ليها في واحدة ناقصة طيب ،انتي ضيعتي واحدة امشي اقول للمدير، جات وقالت لي لااا مرام ماف ليها عينة هي عايزني أزور ليها التقرير ،قولت ليها لشنو ؟؟!، قالت لي عشان تقلق بخطبيبها اسي اتصلت بيهو وحا يجي، قولت ليها بس دة غلط كبير صاح، قالت لي اعمل ليها شنو صاحبتي، قولت ليها بس برضو أخلاقيات المهنة ناسيها ورح معاي للمدير اكيد ما برضى نتائج من مركز محترم زي مركزو تتزور لانو حا يفقدو المصداقية، قالت لي عليك الله استريني يا دكتورة، قولت ليها لو قولتي لي معنى الكلام السمعتو قبييل ممكن اخليك، قالت لي اي كلام قولت ليها انتي قولتي ليها كذبتي في الاكعب قصدك شنو ؟؟!، مرام جات داخلة اللحظة دي قالت ليها النتائج طلعن سياف قال جاي في الطريق، قالت ليها لسه، قالت ليها طيب بنتظر برة وتاني قالت لي جايه هنا لشنو، قولت ليها افحص حاسه نفسي مرهقة، قالت لي تمام، المهم بعد طلعت قولت ليها جاوبي ،قالت لي لا دة موضوع ما بقدر اكلمك بيهو، قولت ليها طيب ورح معاي للمدير يشوف قصتك شنو احتمال اي زول كاتبه ليهو نتيجة حسب مزاجو، وساعتها اعرفي ردي ،ملامح وشها اتغيرت وقالت لي لا عليك الله والله ما قاعدة اطلع نتائج للناس غلط الا هي، قولت ليها طيب وريني كذبت في شنو وانا ممكن اغض نظر اذا وعدتني ما تزوري لزول اي فحص، قالت لي طيب بكلمك بس لو سمحتي ما تدخليني انا بعدين، طلعت ليها ورقة قالت لي انا طلعت ليها دة باسمها قريت الورقة قولت ليها دي ورقة حمل لكن، قالت لي اي هي طلبتها مني، قولت ليها طلبتها منك لشنو؟؟! قالت لي عشان تقول حملت من واحد وهو رفض يعترف بالولد وتخت سياف قدام الأمر الواقع ويرضى يتزوجها عشان يسترها، قولت في نفسي سياف الحمار في ميه طريقة للتأكيد، قولت ليها انتي الدور جاياك ما بسامحك على غشو اصبري لي ،طلعت برة لقيت سياف قاعد جنبها وزهجان، قولت في نفسي مستر كبيير كدة تلعب بيهو واحدة زي دي، وكمان عايزة تتزوجو التصبر لي بوريها، اول حاجة مشيت وخمشتها من شعرها قدامو وتاني ضربتها ضرب شديد ،سياف فكاها مني وكان مصدوم وهي بكت بس ،قال لي مالك يا بت الناس معاها، قولت ليهو انت تسكت لسه يا غبي الدور ما جاك خليني انتهي منها اول، كنت عايزة اهجم عليها وقفني وقال لي مها البتعملي فيهو دة شنو هي وضعها....، قاطعتو وقولت ليها وضع شنو يا غبي يا ما بتفهم جدعت ليهو الورق في وشو وقولت ليهو مزور زورتو ليها صاحبتها ،واسي الملاريا كانت دايرة تزورها بس انت ما حاولت تتأكد وطوالي وقعت في الفخ، وتاني عاينت ليها وقولت ليها حا تستفيدي شنو من كذبك بجي يوم ويعرف الحقيقة وانك كذبتي عليهو ،قالت لي وهي بتتمتم انتي يا بت مجنونة!!!، جريتها بره نسبه لتقليل الفضايح وسياف كان وراي قولت ليها انتي ما حامل ولا حاجة، انتي بس عايزة تخليهو يعرسك يا مهوسه باي طريقة كانت حتى لو سمعتك اتضررت ما كان عندك مشكلة يا متخلفة، قالت لي اكذب لشنو في حاجة زي دي، قولت ليها طيب اسي دي تعملي الفحص ،قالت لي ما بعملو قولت ليها ما على كيفك كنت دايرة أجرها، قالت لي اي ما حامل ولا حاجة، انا كنت عايزة اتزوج حب حياتي باي طريقة، قولت ليها تفتكري انو سياف كان حا يحبك !!!؟، قالت لي كان حا يتعود علي وما حا يطلقني وحا يحبني وحتى لو عرف الحقيقة ما كان سألني، اديتها كف وقولت ليها بغضب عايشه في عالم وردي وما بتعرفي سياف يا حلوة، المهم لو مريضة اتعالجي وما تخلي سياف يبتلي بيك والا انا ما بخليك والمرة الجاية بشرب من دمك فاهمة ،جرت لسياف ومسكت يدو وقالت ليهو كل حاجة عملتها عشان ميته فيك، انا من زمان بحبك ومكسرة فيك بس انت ما شايفني نهاي، جيت ونضفت ليها يدها وقولت ليها اسمعيني هنا تاني بس لو شوفتك قريبه منو ولو سم واحد ما بخليك!!!، سياف كان عايز يتكلم معاها، قولت ليهو ما عايزاك تتكلم معاها هي ما بتستاهل منك حرف وما عايزاك تنزل لمستواها خليني ليها لو سمحت انا بصل معاها الحد، عاين لي بانبهار عجيب وقال لي خلاص كفايه يا مها الحد دا لحدي وين!!؟، قالت ليهو سياف حبيبي عليك الله اديني فرصة معاك، جدع ليها الدبله وقال ليها انا ما كنت ضايقك بس بعد جيتيني تبكي وقولت لي بتتنحري لو كلمت زول ولا مشيت طالبتو انو يعترف بولدو لانك ما عايزة فضايح، ورضيت انو استرك واتزوجك وكلو عشان بس أحميك، لكن طلعتي واحدة كذابه وكان ما مها ما كنت كشفتك، انا ما عايز معاك اي تعامل تاني وشوفتي مدرك دة ما بخليك تشوفيه انتي ما مناسبه لا زوجة لي ولا ام لمدرك، قالت ليهو لا عليك الله ما تقول كدة انا عملت الحاجة دي عشان بس بحبك!!!،اديني فرصة ،قال ليها ما حا يكون ليك اي فرصة معاي، واعرفي انو حتي لو الكذبة دي ما انكشفت ما كنت في يوم حبيتك ،قال لي مها ورح، مشينا وهي كانت لاحقاهو وهو ما اشتغل بيها طلع وانا طلعت معاهو واتحركنا وانا طوالي جوطت وانفعلت وقولت ليهو انت كان تتأكد وانت غبي واسي لو اتروجتك كيف كنت قدرت تعيش مع شيطانة، قال لي اعمل شنو ما شوفتي حالتها كانت كيف، قولت ليهو طيب اي بت تجي تغشك صدقها!!!، ضخك وقال لي لا خلاص انا اتادبت!!، قولت ليهو مشكلتك ما بتفوت عليك نقطه بس المرة دي وقعت وما سميت وكنت حا تتزوجها ، عاين لي وقال لي ما كنت مركز الفترة ديك عشان كدة مشيت الموضوع وبعدين هي قالت حا تتنحر اخليها تتنحر ،قولت ليهو طيب اي بت تجي لعندك وتقول عايزة تنتحر اتزوجها تمام ،ضحك وقال لي الموضوع كان حساس والا انتي بتعرفيني، اتنهدت وقولت ليهو حصل خيرر المهم كشفناها ،عاين وابتسم وقال اي الحمد لله ،اتذكرت يادوب انو حاجاتي في المركز وانو دوامي ما انتهى ،قولت ليهو رجعي المركز انا علي شغل!!، عاين لي وقال لي انتي مع اساس تعبانة وعايزة ترتاحي ،قولت ليهو الشغل مريح هناك المهم رجعني وما تسالني أسئلة كتيرة،رجعني نزلت قال لي شكراً على اي حاجة ،قولت ليهو على الرحب تاني ما تتغشى ما كل مرة انا بسمع ليك الكلام، دي بالصدفة بس ،ضحك وقال لي تمام تمام ما تقومي بس تمسكيها لي سنة، ضحكت وقولت ليهو حسب الموقف يلا مع السلامة،دخلت ومشيت لسبأ مسكت يدها بقوة وقولت ليها تاني لو اي زول قال ليك اعملي لي نتيجة غلط وعملتي ليهو والله افضحك!! وانا حذرتك!!!، فكيت يدها كانت شاحبة قالت لي تمام انا ما بعمل حاجة تانية بوعدك، ختيت اصبعين في عيوني ووجهتهن ليها تاني وقولت ليها حا اراقبك انا!!!، طلعت وحسيت بالانتصار بس لسه كنت مضايقة عشان غشن سياف!!، واكان ما بعاقبوني كنت غطستها في معملها العاجبها دة!! رجعت المسجلة قالت لي كنتي وين الناس من قبيل منتظرين ؟؟!، قولت ليها انتي شوفيني طلعت وحضرتي اي حاجة صاح!، خافت وقالت لي اي اسفة، دخلت وقولت في نفسي إهدي الناس ما عملو ليك حاجة!، بعد انتهيت دوام طلعت برة وركبت ركشة!!! وصلت البيت ورقدت طوالي من شدة التعب ،عمتي قالت لي جات واحدة هنا اشتكت منك، قولت ليها منو!!؟، قالت لي ما بعرف بس قالت انو انتي خربتي خطبتها وافتريتي عليها ،ضحكت وقولت ليها واحدة طويله كدة!!!، قالت لي اي، قولت ليها مجنونة وعايزة مصح ما تشتغلي بيها حا احكي ليك الحاصل كلو بس خليني استحم واغير وارتاح ،قالت لي تمام.
لانو كان الخميس عديت الجمعة في البيت والليله حا امشي المركز اتجهزت وطلعت وصلت المركز لقيت في ناس كتيرة قولت ليها في شنو؟؟!، قالت لي في مستر جاء ما قريتي الاعلان في القروب امس ولا شنو، ما حبيت اقول ليها انو القروب العاملنو دة عامله ليهو أرشفة!!، قولت ليها لا!!، مشيت اكشف اي مستر لقيتو سياف ،رفع لي يدو ورفعت ليهو يدي!!، ومشيت طوالي غرفة الطبيب العمومي!!!، طلعت للفطور لقيت كل التيم قاعد قولت ليهم ما ماشين الليله الفطور، قالت لي نبيلة المدير قال نفطر مع مستر سياف، قولت ليها انا ما بقدر انتظر! ولا كمان انتي حا اخليك تنتظري ورح عشان لسه في عيانين، قامت ومشينا فطرنا وانا رجعت بقينا شغالين للساعة 5 ،قولت كفايه مفروض يجي الدكتور التاني بعد دا ،قومت وبقيت ادخل في حاجاتي في الشنطة الباب فتح عاينت لقيتو سياف ،قولت ليها انتيهت يوم متعب صاح ليه قررت تعمل عيادة فجاءة بنص القيمة!، قعد وقال لي ما عارف طولت من الحاجات دي، قولت ليهو لو زهجت افتح عيادة ،قال لي لا ما عايز اتقيد!، المهم طالعة ،قولت ليهو ايوا، قال لي قبل ما تطلعي عندك ليك سؤال انتي بتكرهيني، بحلقت فيهو عيوني وقولت ليهو اكرهكك ؟؟!، لا طبعاً، سلوكي هو الخلاك تفكر كدة ؟!، اتنهد وقال لي لا بس عشان كلامك الزمان وعشان انا بقيت اعاملك....، قاطعتو وقولت ليهو كلامي الزمان اي كلام انا ما متذكرة، المهم انا ما بكرهكك نهاي وبجترمك جدا ،كنت بكره سياف القديم بس انت لا والله بالرغم من انو كنت مزعج في الفترة الفاتت، ضحك وقال لي طيب لو رجعت لنفس الزول البتكرهيهو في يوم ،قولت ليهو نشوف طريقة ترجعك بس ما حا اكرهك نهاي تاني ،إبتسم ابتسامة خلت قلبي يدق ودنقرت من الخجل، قال لي طيب اتصافينا كدة، قولت ليهو اي، قال لي تبدي معاي بدايه جديدة ،قولت ليهو شغلكم دة ما راجعة ليهو هنا مرتاحة، ضحك وقال لي هو اي بدايه شغل، قولت ليهو انت غير الشغل عندك شنو؟؟؟، إبتسم وقال لي عندي بس انتي بدي الواحد فرصة يتكلم، صريت وشي وقولت ليهو سامعاك يا مستر قول العندك، قال لي البدايه الجديدة القاصدها انا هي بدايتنا سوا، انا عايز اكون معاك اسره يا مها، عايزك تكوني زوجتي وام اولادي،دقيقين وانا كنت يستوعب الكلمة كنت مضطربة وما عقلي وقف من التفكير قولت ليهو سريع ومن غير تفكير لااا...............
اللهم صل على محمد عدد ما ذكره الذاكرين وغفل عن ذكره الغافلين..❤