الفصل الخامس عشر 15
بقلم شفق الغروب
بالنسبه لبر علاقتها بأهلها بقت معدومة حتي اخوها استسلم من صدها بقت تخرج في نص الليل قدمهم بكل بجاحة وتعصي كل أمر يقولوه بقي عندها سلطة علي نفسها ومفيش حد يقدر يقف قدمها او يوقفها
بالنسبه لعلاقتها بربها متحسنتش يمكن سئت اكتر بعيدة عن ربنا بعد شديد لدرجة انها نسيت ان في خالق نسيت الدين مبقاش في حاجه بتهمها غير مت*عتها ورغب*تها نسيت ان في حساب وآخرة نسيت عقيدتها تعمقت في الظلال وملقتش الي ينجدها منوا سابت العبادة من وهي ١٥ سنة ودلوقتي عندها ٢٥ سنة ومركعتش بقالها عشر سنين ولا ركعة ولا عمرها في العشر سنين دول قرأت ايه او صامت حتي يوم
بر عمرها ما فكرت في انها ممكن تتوب وترجع لربنا اصل مش
معقول بعد كل الظلال و التشكيك ده هتشوف النور ومين اللي هينور ليها الطريق مش ممكن انها تلاقي هدي ...
في احدي الشركات دخلت بطلتها الفاتنة ولبسها شبة العاري وببرودها المعتاد وشعرها اللي كان مفررد علي ظهرها
كانت لبسه سكيرت قصيرة مبينه رجليها وعليها شميز وبليزر صوت خطوتها الثابتة بيرن في المكان مع ريحة عطرها الفواحة لدرجة الفتنة
ملامح وشها ثابتة زيها بتبص للكل بذدراء ونظرتها باردة زي التلج واكتر حاجه ملفته لبسها اللي ديما مبين مفاتن جسمها كأنها اعرضت عن التستر واقسمت بالعري بس اللي محدش يعرفوا انها أقسمت بالعصيان مش العري محدش يعرف ان قنبلة المفاتن والمحرمات دي شيطان اتصنع علي يد بشر ........!
مشيت وراحت عند الاسانسير بتاع الشركه تحت نظرات الكل ليها منهم اللي بأعجاب وجزء تاني تعجب منها وجزء شيفها بنظرة كره بسبب لبسها وهيئتها
اول ما الاسانسير جه دخلت وطلبت اخر دور واول ما وصل طلعت وكانت دخلة مكتب صاحب الشركة بس السكرتيرة وقفتها وقالت :
- مينفعش تدخلي كده ...لازم ابلغ مستر نادر الاول
بر رفعت عنيها تبص ليها من تحت لفوق بقرف ورفعت حاجبها وقالت :
- غريبه زوقو اتعدل المرة دي !
- أفندم !!
هي ابتسمت ابتسامة تسليكيه بنفاد صبر وهي بتضغط علي سننها وقالت :
- شوفي شغلك وبلغي مستر نادر
- اقولو مين ؟؟
- بر
- اوكي ممكن حضرتك تستني ادخل ابلغوا
بر قالت بتهكم:
استنى مستناش ليه
السكرتيرة دخلت وبر وقفت بتتوعد لنادر
السكرتيرة خبطت ونادر رد عليها انها تتفضل وهي دخلت واول ما دخلت نادر ابتسم وهو بيبص عليها وقال :
- اتفضلي اتكلمي يا مز ..... اقصد يا آنسة نُهيلة
- في موظفه اسمها بر عوزاه تكلم حضرتك اقولها تدخل
نادر طلع من سرحانو في اللي قداموا وقالها :
- انتي بتسألي ؟ دخليها طبعاً ...احم علشان في شغل مهم انا ادتهلها تخلصوا
- تمام يا فندم
السكرتيرة فتحت الباب وقالت ليها تتفضل بر دخلت بكل تكبر وراحت اعدت علي الكرسي ونادر قال للسكرتيرة تتفضل تمشي
اول ما مشيت بر قامت من مكانها وراحت قعدت علي المكتب قدام نادر
وقالت :
- حلوة الجديدة كان بقالك فترة بتجيب أشكال غريبه
- ايه رأيك؟
- حلوة
- مالك!؟
- مفيش
- مش عرفك انا لما تضيقي ؟
- ولا حاجه علي اساس ان الموضوع مهم يعني او يهمك لو كان يهمك مكنتش لطعتني بره وتخلي واحدة زي اللي جيباها بره توقفني وتقلي أقول لمستر نادر
نادر مثل الصدمة وقال :
- قالت اقول لمستر نادر!!!
- ايوه اتريق اتريق
ضحك وقال :
- بهزر علشان افكك
بر قلدتوا بتريقة:
- بهزر علشان افكك ني ني ني
نادر قطعها وهو بيشاور تسكت
- انا عارف الفيلم ده هيخلص ازاي ثواني
قال كده ورفع السماعة يقول للسكرتيرة تيجي وهي استجابت لطلبوا واول ما دخلت نادر اتكلم وقال :
- نُهيلة الانسة بر اول ما تجي تدخل من غير ما تبلغيني.....حتي لو قلتلك متدخليش حد ...هي حالة استثنائية
ورفع عيونوا لبر يبصلها وابتسم وكمل :
- علشان الشغل بتاعها والتقارير بتعتها بذات مهمة جدا ومينفعش تستني ثواني
السكرتيرة كانت مستغربه الوضع وهو ازاي سيبها قاعدة علي مكتبوا كده بس حاولت متبينيش استغربها وتتماثل للأمر وخلاص
نُهيلة حركت رأسها وهي بتقول مفهوم واستأذنت انها تمشي اول ما طلعت نادر بص لبر وقال:
- حلو كده
بر ابتسمت وقالت :
- كده فل يا نيدو
- قلب نيدو
- محن هديك علي وشك!
- خلاص خلاص.....ليه مجتيش امبارح النايت ؟
قالت بدلع مصتنع :
- مكنتش فضيا كنت مع حبيبي
- اتعدلي!
- بجد مش بهزر كنا معزومين عند خالتي وبصراحه رغم كرهي للمكان اللي اهلي فيه بس مكنتش هفوت فرصة اني اشوفو
- اممم وقالك حاجه او كلمك ؟
" نادر قالها ببرود بعد ما ابتسمتوا اختفت "
- اداني شوية نصايح عن لبسي وشكلي ...بجد مش عرفه مالو بحط اغلي انواع البرفيم واقواهم واشيك حاجه عندي واكترهم إلفاتاً وهو برضو عيونو في الأرض حتي لو بصلي بالغلط بيرجع يبعد نظرو... لو اي حد شافني هيقع الا ده ....هو انا وحشة ؟
- الصراحه اه
بر زقتوا بغيظ وكانت هتمشي بس هو سحب أديها وقعدها علي المكتب وهو بيضحك وبيقول :
- بهزر والله
- دمك سم
- زيك
- هضربك
- تقدري علشان ا....
قطعتوا :
- ولا تقدر تعمل حاجه اتلهي ... ليكون فاكر نفسك راجل ؟
نادر قام وعيونو بتغلي من النار وبر نطت تجري لما شفتوا قام جريت بعيد عن الاتجاه اللي رايح لي وهو راح قفل باب المكتب وهي كانت عند الكرسي وقفة بتقول :
- بلاش هبل يا نادر ..قفلت الباب ليه ؟!!!
نادر وهو بيشمر كمام القميص :
- ده انا هوريكي الهبل علي اصولو دوقتي
جري عليها وهي جريت لفت من الناحية التانية من المكتب بر خلعت الهيلز ورمتو بعيد علشان تعرف تجري وفضلت تجري منوا ونادر وراها اخر ما زهق راح اخد الكرسي وحطوا عند الباب وقعد
- انا هعرفك راجل ولا مش راجل ...وريني هتطلعي ازاي يا بر الكلب
- هنط من الشباك
- لو قد كلمتك اعمليها
- ويرضيك اموت ؟
- طز اللي راح فدانا واللي جي بهوانا
- عليا انا !!
- ........
- نادر بجد عندي شغل طلعني
- انا صاحب الشركة وشغلك معايا دلوقتي
- اعتبرني عيلة وغلطت
- اعتزري
- ده عندها ....عارف عند مين ولا اقولك؟
نادر قام يجري عليها وهي جريت علي الباب بسرعه زقت للكرسي وفتحت الباسورد وكانت لسه هتطلع بس نادر جري عليها وكانت هتجري بس مساكها وزنقها علي الحائط كانت هتزقوا و تجري بس نادر مسك أديها الاتنين بايدو ورفعهم لفوق علي الحائط
غمضت عيونها بخوف وقالت:
- ورحمت امك يا شيخ إلهي تنستر وحيات اختك وستك ...يكرمك ما يحرمك يطعمك ما يحرمك تتجوزي اللي بتحبها يحبب في عبادة ...سبني
نادر بص ليها برفعة حاجب وفي ابتسامة صغيرة علي وشو حاول يخفيها
- انتي بتشحتي ؟؟
فتحت عيونها وقالت :
- اه بشحت منك الرحمة سبني بقا
عض شفتوا وهو بيبص عليها بنظرة هي عرفه معناها كويس
- بلاش نظرة المتحرش دي ورحمت جدك
- خليني اوريكي راجل ولا مش راجل
- طب وحياتك عندي ارجل من خالي
- امممم ....مش حساسها
- انا اسفة مش هقول كده تاني خلاص حرمت
- ولو قولتي كده تاني
- اعمل اللي انتي عيزو
عيونو لمعت وابتسم بخبث
- اللي انا عيزو ؟؟
- حيلك حيلك ...مش القذارة اللي في دماغك يعني مش هخليك تجبلي شورما لمدة أسبوع مثلا
- شهر
- ابقي قبلني لو عملتها تاني...امال هضيع فلوس مين علي الشورما طول الشهر ده !!!!
- مش حاسس اني صافي
- خلاص بقي يا نيدو وحياتييي بقي
- لازم تحلفيني بالغالي
- شفت بقي ...صافي؟
- وازاي مصفاش بعد وحياتي دي بس عرفه لو لسانك طول تاني هكون مكسر عضمك
- قلبك ابيض بقا
- ابيض ازاي ده انتي دخلتي عليه وسختيه
" قالها بطريقة استفزازية علشان يغظها"
بر عضت لسانها بغيظ من كلمتوا قصدو ايه ب وسختوا وكانت لسه هتضربو برجلها في بطنوا وتسفلت وشوا علي كلاموا بس قبل ما تعمل كده باب المكتب اتفتح ودخلت السكرتيرة اللي وقفت بصدمة لما شافت بر ونادر والمكتب المقلوب وهيلز بر المرمي ونادر اللي مشمر كموامو ووقف عند الحائط مع بر بالشكل ده اول ما دخلت نادر بعد عن بر بسرعه وبر ابتسمت ب شر هتعتبر ده انتقامها كفايه ان سكرترتو اتغيرت نظرتها عنوا لوحدة منيلة بر راحت ببرود تجيب الهيلز بتعها واعتدت تلبسوا ونادر سحب السكرتيرة بره اخد منها الورق ودخل اخد الكرسي رجعوا عند المكتب وراح يرجع الحاجات اللي وقعت وهو بيجري ورا بر وبعدها قعد وقال :
- عجبك اللي حصل بسببك ده ؟
- إيه اللي حصل؟
- شافتني كده اكيد فهمتني غلط وشيفاني بتاع نسوان
- طب وانت ايه اللي مضيقك انت فعلا بتاع نسوان ؟!!!
- ايوه مش ده اللي مضيقني كده لما اجي اوقعها هتشك فيا وتحس اني داخل العب بيها
- طب ما انت فعلا هتعلب بيها شوية وتسبها... اممم ايه اللي مضايقك برضو ؟
- ايوه ما هي مش هتديني الفرصة اصلا علشان استغلها انتي عرفه علشان ترجع تثق فيا تاني وتديني الأمان انا المفروض اعمل ايه ؟
- ايه يا فيلسوف عصرك وزمانك؟
- المفروض قصاد الموقف الوحش ده ٦٠ واحد حلو علشان ترجع ثقتها
- ده بجد؟!
- اه والله في علم النفس بيقولك ايه لو حصلك موقف وحش او حاجه وحشه محتاجه تشوفي ٦٠ حاجه حلوة قصدها علشان ترجع ثقتك فيها يعني لو وحدة عرفت راجل وطلع خاين هتكره الصنف كلوا وتشوفو كلو خاين لحد ما تقابل او تشوف ٦٠ راجل صالح ومحترم علشان ترجع تثق في الرجاله تاني يعني ٦٠ تجربة إيجابية بتعادل تجربة واحدة سلبية
- اممم ....حرام عليك خلتها تفقد ثقتها في كل أصحاب الشركات
- انتي السبب
- وانا مالي !!
- لو مكنتش استفزتيتي مكنتش جريت وراكي وزنقتك وبقيتي زي الفار المبلول مكنتش هي دخلت وشفتنا ودمغها لفت
- متخنقنيش بقا علي اساس انت هتغلب معاها انت توقع اجدعها وحدة
- كفايه مدح بقي
- مدح ايه ونيلة ايه اللي انت فيه ده زفت انت حلك الوحيد تتجوز
- هيحصل لما القي بنت الحلال
- اممم ...عوزها بنت حلال مش لما تتعدل وتتلم وتبطل القرف اللي عايش فيه ...لما تبقي انت ابن حلال ابقي دور علي بنت الحلال المحترمة مش تاخدها وتخونها
- انا مش هاخد غير واحدة محتشمة تبقي ليا ....عمرها ما كلمت راجل غيري تتدخل حياتي تغيرها للأحسن هي دي الوحيدة اللي هتملي عيني وسعتها عمري ما هبص بره او اخونها سعتها اوهب ليها عمري
- وحياتك انا عرفه اخرتك اكيد هتبقي واحدة من اللي تعرفهم في الاخر من بتوع النايت
- لو اللي اعرفهم زيك يبقي افضل سنجل طول عمري اهون من اني اخد واحدة زيك
بر رفعت حواجبها وقالت بردح:
- انت تطول يا بتاع انت اصلا تاخد وحدة زي.. ده انت مفيش واحدة هتعبرك وانت وشك شبه قفاك كده ...وشك يقطع الخميرة من البيت ..الكلاب اللي في الشارع بتف عليك ...ده انت لو شفتك الجن هيجلها صرع قال ايه مش عوزاها لو شبهك.. موهوم فاكر نفسو عندو جمال يوسف.. ده انا ببص علي وشك العكر ده بقول ازاي في بشر بوش ابو الهول كده !
بصت علي نادر اللي كان بيضحك واتضيقت اكتر وهو قال لما شاف نظرتها القاتلة :
- في ايه متبصيش ليا كده ...انا قصدي ان مفيش زيك اصلا انتي التوب والباقي فوتوا شوب يعني مش هلاقي زيك تاني
اعدت وهي بتنفخ وهو عدل جلستوا وقال :
- بس بجد انتي ازاي عوزاه تخدي واحد عارف ربنا وانتي كده؟؟
- لا وانت اللي نفسك في رقاصة صح ؟
- بس انا غيرك
- صدقني نفس القرف ونفس كل حاجه متديش نفسك افضليه عليا
- اممم ...بس انا اقل حاجه اني بصوم مش زيك
- صوم من غير صلاة صومك باطل يا روح طنط مش من مبطلات الصيام عدم الصلاة ؟
- بس بحاول وانتي لازم تحولي معايا اول يوم رمضان بعد بكره
- قلتلي اه ...انت بتلف علشان أصوم رمضان ده صح ؟
- جربي
- لا
- ليه ؟؟
- أصوم لي ليه هو مش بيحبني ولا عملي حاجه علشان اروح اعملوا حاجه وبعدين انا مفيش حد يمشي كلاموا عليا يعني يقولي صومي فا أصوم لا
- بر انتي غلط بتقيسي الموضوع بطريقة غلط ربنا مش زي البشر اعصي اللي تعصيه بس عند ربنا الزمي حدودك.....بر ده اللي مش بيصلي بيصوم!!!
- انت بالذات اخر حد تنصحني
- ليه ...ايه السبب اللي يخليني اخر حد انصحك بعدين انا بحاول
- انا وانت عرفين انك كذاب وبتضحك علي نفسك انت لو فعلاً بتحاول كان زمانك علي الاقل جربت انك توقف الخمره انت مش بتحاول بس وأهم نفسك بكده وصيامك ده أكبر دليل بتقول اديني بصوم وبحاول اتقرب واسيب كل حاجه لو مكنتش ناوي اتوب مكنتش صومت ...انت موهوم يا نادر...انت زي بالضبط ويمكن اسوء انا علي الاقل متصارحة مع نفسي
- بر انا عمري ما هبقي زيك ...مفيش حد زيك اصلاً ...بيتباهي بمعاصيه !!
- انت متطلش اصلا تبقي زي فا اسكت
قالت كده واخدت شنطتها ومشيت بضيق وراحت علي مكتبها تشوف شغلها
ونادر اعد سرحان بيفكر في محادثتهم
بعد ساعات طويلة من العمل الشاق لان نادر قرر ينزل على بر شغل زياده وده آخرها اليوم ده لدرجة ان كل الموظفين مشيوا وهي لسه.. هي كانت نيتها انها تخلص كل الشغل ده النهارده حتى لو هتبات هنا رغم ان ده بوظ مخطط في دماغها
كانت الساعة ٩ بليل وبر قامت تعمل ليها حاجه تشربها علشان تفوق رجعت لقت نادر قاعد علي مكتبها ماسك الورق اللي كانت شغالة فيه بيقلبوا وهو بيتفحصوا راحت ببرود قعدت علي المكتب وسحبت الورق من ايد نادر حططوا قدمها وبدأت تكمل كأنو مش موجود
هو فضل باصص ليها يمكن تتوتر بس هي كانت شاطرة في تمثيل الا مبالاة
نادر قال وهو بياخد الكوفي اللي عملتوا ليها :
- بس مش ده اللي طلبت انك تعمليه
قالت وعيونها لسه في الورق بلا مبالاة:
- انا عرفه انا بعمل ايه كويس ...واللي انت طلبوه ده مش مكانوا
نادر كان رفع الكوباية يشرب منها وهي بتتكلم بس فجأة تفوا وصرخ :
- ده من غير سكر !!!!
فتحت اللبتوب وقالت وعيونها انتقلت للشاشة :
- لساني بينقط سكر فا بكتفي بحلوتو
- لا والله ؟
- تخيل
نادر قفل اللاب وقال بحنان:
- زعلان؟؟
- لا
- طب ليه بتتعملي معايا بالبرود ده
- انت اللي بدأت وادتني الشغل كلوا وبعدين مفيش وقت لهزارك انا عوزاه اخلص الزفت ممكن تسبني؟
- الزفت يخلص بكره عادي...مش هاين عليا اسيبك لوحدك هنا لحد دوقتي والشغل ده انا منزلتهوش عليكي عنداً بسبب محادثتنا الصبح بس ملقتش حد كفء اكتر منك اني اسلمو الشغل ده.. بالذات ان ده شغل مهم جدا ونا عارف انك هتبدعي فيه
بر بصت لي بطرف عيونها بتشكيك ورجعت تفتح اللاب ببرود
- ماشي عوزاه اكمل شغل سبني بقا
- الوقت اتأخر !
- عادي
- الشغل كتير هتقعدي لبكرة وتكملي يومين متواصل!
- عادي
- لو جيتي هجبلك ٥ شورما فراخ و٣ لحمة
بر عيونها لمعت و ابتسمت ورفعت عيونها لي واتسألت :
- طب والحلو ؟
- مفيش احلي منك يا قمري
" قالها وغمز "
- مش وقتو محن !!
- يا ستي خلاص هجبلك اللي عوزاه بس يلا فكك من الشغل يكمل بكره الدنيا مش هتطير يعني
بر قفلت اللاب وقامت وهي بتقول :
- صح مش هيطير الاكل اهم
نادر ضحك وقام وميل ميلة صغيرة وقال :
- من بعدك أَنستي
بر ضحكت وقالت:
- مرسي
بر راحت مع نادر اللي اشتري ليها الاكل واعدو يكلو علي العربية اللي كانت ركنة قدام البحر
- انت عارف يا نيدو البحر ده اكتر حاجه بتجوعني
- انتي كل حاجه بتجوعك!!!
- بس البحر اكتر شويه عن الباقي
- انا مش عارف هفضل لحد امتي اجبلك شورما وصوابع زينب...هو انا خلفتك ونسيتك ده انتي هتخربي بيت اللي هيتجوزك في الشاورما وصوابع الزينب
- ولحد ما يجي اللي هخرب بيتوا انتي موجود
- طب هاتي سندوتش وبلاش طفاسة
- لا
- علي فكرة انا اللي دافع ليا حق اكل زي زيك
- مالك مالي عادي ...وبعدين ليه مجبتش لنفسك
- عوزاه الفرما دي تبوظ ...بعدين مش خيفه تتخني مفيش بنت تاكل ٨ سندوتشات وتنام مرتاحه
- بلا تخن بلا بتنجان كبرها ايه شهر ولا اتنين دايت فكك اهم حاجه اعيش حياتي محدش واخد منها حاجه...خلي الفرما تنفعك وبعدين هو انت هتعدلي اللي بكلوا !!!
- قلبي عليكي والله وزنك في الطالع
- دول هما ٣ كيلو زياده بس
- صح صح المفروض نقلق لو عدينا ال ١٠٠ كيلو زياده
- ايوه
بر فضلت تكمل اكل ونادر مسك الفون وهو ماسك الفون لقي ايد ممدودة بسندوتش بص لبر باستغراب وتشكيك يمكن عوزاه تسموا
- حسه عينك فيهم خد واسكت مش عوزاه يجيلي تلبك معوي
- مش عايز
- مش من خمس دقايق كنت عاوز واحد!!؟
- لا بضيقك علشان عارف ان اكلك خط أحمر
- اممم فهمت ...طب اتصدق لا انت اخدو بقي !
- مش عايز مش بحب اكل في وقت متأخر
- منا مش هتخن لوحدي
- انتي علشان كده !
- لا بهزر بجد خد بقا هتكسف ايدي ؟
- مقدرش
قال كده واتناول منها السندوتش
اتكلم وهو بياخد قطمة من السندوتش :
- انتي وريتال لسه مخصمين ؟
بر ضحك بتهكم وقالت:
- انا وريتال انتهت صحبتنا خلاص
- بجد أعجبت بالبنت دي اكتر بعدت عن كل حاجه واتغيرت ١٨٠ درجة لبست الزي الشرعي فجأة قربت من ربنا.. بعدت عن السهر ومجالسنا بقت خيفه من ربنا وبتبكي علشان ربنا يسامحها علي اللي عملتوا بقيت لو شفتها اغض بصري حاسس انو عيب عليا ابصلها وهي كده
- بقت معقدة
- انتي بجد شيفه أن اللبس الشرعي والقرب من ربنا عقد !!!
- غطت جمالها البنت كانت مزة آيه في الجمال لاكن دلوقتي مبقتش باين من جمالها حاجه جسمها اللي كان ملوف اتضاري تحت عباية فضفاضة مبقتش متأكدة ان دي ريتال اللي كنت عرفاها ....هي السبب في قطع علاقتنا كل شوية نصايح ملاهاش ٣٠ لزمة
- بتنصحك علشان انتي غاليه عليها مش عوزاكي تفضلي في الظلال
- انا عجباني نفسي ومبسوطة بحياتي عجبني عصياني انا مرتاحه جدا ومش عوزاه اتغير
- انتي مش مرتاحه انتي وهمه نفسك بالراحة يا بر
قالت بلا مبالاة:
- انت مش هتفهم استحالة تفهم !
بعد وقت خلصوا اكل واتكلمو شويه بر قامت تمشي
- اوصلك؟
- كل مرة نفس السؤال بنفس الإجابة لا
- ماشي
- ومتجيش ورايا
- .......
- لو جيت ورايا هستناك وهصرخ في نص الشارع عايز يتحرش بيا ...انا مش صغيره يا نادر
- عارف بس بحب اطمن عليكي
- هبقي ابعتلك اطمنك ...بس بلاش جوا المرقبة بيخنقني يا نادر بجد اوعدني انك مش هتيجي ورايا
- ليه حسك مصرة المرة دي اني مجيش وراكي !!
بر قالت بتردد :
- ولا مصرة ولا بتنجان بس انت موضع للشك ليا وتخيل اهلي يلحظوك
- علي اساس انك بتخافي منهم ؟!!!
- نادر اعمل اللي انت عيزو براحتك بس مترجعش تزعل لما ألم عليك الخلق
- مخبيه ايه ؟
- قلتلك ولا حاجه ودلوقتي اوعدني
- عارف انك مخبيه حاجه ومش عوزاني اجي اشوفها بس مصيري اعرف ...اوعدك اني مش هاجي
بر ابتسمت بحماس تروح تعمل اللي نويا عليه بقي
اتحركت ورجعت علي الشركه اخدت عربيتها اللي نادر جبها ليها في يوم ميلادها لما عرف انها نفسها فيها وبتحوش علشان تجبها اخدتها ومشيت ومشيت بيها للمكان المقصود
_____________________________________________
الساعه ٢ بليل بر بتجري بالعربيه بسرعه قصوي واديها اللي ملفوفه بشاش لحد نص درعها وهي مبسوطه بالي عملتوا لو نادر كان جه وراها كان زمانوا منعها بس عرفت تهرب منوا كانت سعيدة ومشغلة اغاني بإعلي صوت
كانت مشية سيقة العربية وهي مش مركزة كانت بتجري بالعربيه وفجأة ظهر زي ظل قدمها في وسط الظلام بر حاولت توقف العربية بسرعة قبل ما تخبط اللي قدمها بس ملحقتش خبطت اللي كان قدمها قلبها كان هيقف ايه اللي عملتوا ده!!!وقفت العربية وطلعت منها بسرعه تشوف خبطت مين واول ما طلعت لقت طفلة علي الارض قدمها مش بتتحرك....!
حست ان قلبها هيقف لما شافت د*م سايل تحت رأس البنت
معقول هي قتلت طفلة قتلت قلب صغير لسه مشفش الدنيا عملت كده ازاي!!! نزلت براحة واديها بترتعش تشوف نبض البنت ولما حطت أديها اتنفست الصعداء البنت لسه عيشة بر شالتها بسرعه وركبتها جنبها وجريت بيها علي المستشفى
-------------------------------------------------------------------------
كانت وقفة قدام الاوضة اللي البنت فيها والدكتور بيكشف عليها وفي سؤال بيدور في دماغها ايه اللي يخلي طفلة زي دي تبقي في الشارع الوقت ده البنت شكلها يوحي انها متتخطاش ١٠ سنين فين أهلها ؟؟
بعد وقت الدكتور خرج وطمنها انو كسر بسيط في رجلها ودمغها اتفتحت من الخبطة وقالها الحمدالله انها جبتها كان ممكن تنزف كتير والحالة تسوء
- طب هي هتفضل نيمة كتير ؟
- احنا اللي ادينها حقنة منومة علشان ترتاح
- تمام شكرا لحضرتك
- انتي والدة البنت ؟
- والدت مين يا حول انت !
- نعم!!!!!
- اقصد اني خالتها
- اممم....وايه سبب اللي حصلها ؟
قالت بهمس شبه مسموع:
"ده انت دكتور حشري بصحيح انت مالك "
- حضرتك بتقولي حاجه ؟
- بقول كنا رجعيين انا وهي من بيت جدتها وهي جريت مني وعربية خبطتها ولما جريت عليها كانت العربية هربت
قالتها وهي بتمثل الحزن والحصرة
- فين والدها والدتها ؟؟
همست لنفسها:
" مش لما اعرف انا الاول ابقي اقولك "
همست بكده بعدين بدأت تبكي وتقول :
- اختي وجوزها اتوفو في حدثة وهي ملهاش غيري دي اخر حاجه من ريحة اختي خلي بالك عليها يا دكتور دي الأمانة اللي اختي سبتهالي ....ازاي سبتها يحصلها كده ازاي اعمل كده في آخر حاجه من اختي
وأعدت علي الارض تبكي بانهيار
الدكتور اشفق علي حالها وقالها:
- متخفيش يا آنسة هتبقي كويسه وزي الفل ...احمدي ربنا انها جت على قد كده
- الحمد لله ( قالتها وهي بتشهق وتبكي )
- استأذن
قال كده ومشي واول ما ادي ظهرو لبر بر رفعت عيونها لي وتفت علي ظهرو وهي بتمسح دموعها التمثيلية
" دكتور غتت بصحيح لازم المشهد الدرامي علشان تحل عني ده ايه القرف ده "
ابتسمت وهي بتقول لنفسها:
- بس شطوره يا بت يا بر عرفتي تضقني تمثيل الدور
لفت وشها لاوضة البنت ودخلت تطمن علي البنت اللي نيمة زي الملاك
دخلت واول ما بصت لوشها استغربت هي شافت الوش ده فين قبل كده!!!!
هي لسه واخده بلها من شكل البنت هي بجد عرفاها ...عرفاها كويس البنت دي مش غريبه عليها..........!