رواية دون أن أشعر
الفصل الاول 1
بقلم ال زهراء
كل زول في الحياة دي عندو خطط مستقبلية كتيرة وتاملات مبالغة فيها لنفسو بس انا كنت كل خططي هو حرفياً لاني كنت بانيه عليهو كل أحلامي كان هو باختصار مستقبلي، اي حاجة كنت بفكر فيها لقدام كان هو ضمنها، واسي كأني داخلة في دوامة وما قادرة اطلع منها بقيت ما قادرة أتقدم ولا قادرة افكر في حاجة لي، صعب شديد مستقبل بدونو والله بعد كل الآمال دي!!، استغفرت بعد قولت الكلام دا ونزلت دمعة مني مسحتها ، اختي جات داخلة وقالت لي وصلو!!، عاينت ليها وقولت ليها تمام انا جاهزة في اي وقت تنادو لي فيه حا اطلع ،قربت وقالت لي مها خلي الموضوع دا يمر بسلام إبتسمت وقولت ليها ما تخافي ما حا اطفشو مش عايزو العريس دة خلاص ،قالت لي الحكايه ما بس انو عايزنو انتي عارفة دا ولد منو وما محتاجة اقول ليك حا تعيشي معاه مبسوطة قدر شنو !، قولت ليها هل القروش كل حاجة!، قالت لي لااا بس ما شايفة عليه عيب سيف دة دكتور اسرتو كويسه واصحابنا كمان ، ابوي بعرف طبعو فلو شاب مايل وبتاع أمور كان ما وافق ولا انتي ما واثقة في اختيار ابوك ليك، ما رديت واكتفيت انو هزيت راسي مرتين!، قالت لي افهم شنو واثقة ولا ما واثقة شغل الغتاتة دة ما بنفع، ضحكت وقولت ليها امشي خلاص ابوي حا يقول البت دي مالها ما جات برة، قربت علي وقالت لي متين حا تتخلصي منو هو كسرك ذلاك وعاش حياتو ،قولت ليها لازم تذكريني صاح!، قالت لي اي عشان تتصحصي وتوعي لنفسك! هو حاليا عايش مبسوط وانتي هنا عايشة في ذكراه، اتاملت الكلمة دي الذكرة دي اكعب حاجة صعب شديد تكون عايش على ذكريات زول، قولت ليها اطلعي،قالت لي ما تزعلي بس المنطق منطق!، قولت ليها بحس عالي اطلعيييي!! يا مروة ، طلعت بعد مدة نادوني للنظرة الشرعية!،دخلت وانا مكتئبة عديل قعدت وما قدرت اعاين ليهو!، ،ابوي فجاءة جاهو اتصال طلع بقى معانا ابوه، ابوي جاء تاني و قال لي عمو محمد ابو الخطيب دقيقة في مشكلة في الشغل، طبعا ابوي شغال كان معاهم من زمان كان شغل بسيط شديد وما بجيب دخل كويس عشان ما عندو شهادة!، كان بشرف على أمور شحن البضاعة! جدو نادر سيد المصنع الله يرحمة كان بثق فيه ثقة عمياء المهم تاني جدو نادر تعب شديد! واستلم الشغل عمو محمد.
علاقتهم هو وابوي اتطورت وبقو أصحاب شديد وعمو محمد الله يديه العافية ساعدنا جداً حتى بعد وفاة ابوهو ما قصر وادى لأبوي مزرعة يشتغل فيها ! ، زحيت من شرودي بصوتو وهو بقول فجاءة بحس عالي ارفعي راسك!، استغربت وقلبي عمل شح رفعتو!!، كان شاب سمح بكون في نهاية العشرينات انا كنت سامعة بيه بس ما شوفتو نهائي اكتر شي بشوف عمو محمد!، تابع وقال لازم تعرفي حاجة مهمة عني !، قولت ليهو شنو؟، قال لي انا بحب واحدة تانية!، اتنفست الصعداء وقولت ليهو بكل برود وبهدوء طيب الجابك شنو الليله !، حدر لي وقال لي دة موضوع ما بخصك، قولت ليهو بحدة طيب لو ما بخصني المطلوب مني شنو من الاخر!، قال لي قولي ما عايزة الخطبة دي وغيرت راييي!، دمعت في اللحظة دي واتذكرت كل كلام ابوي الداساهو حتى من اختي وهو انو لو ما اتزوجتو لا بيني ولا بينو وعارف انو ما بقدر اعيش من غيرو لانو هو امي وابوي في نفس الوقت وهو الربانا انا واختي وادانا حنية الام وما حوجنا لحاجة فانا اسي ما بقدر اكسر كلمتو عشان حضرة واحد زي دة، قولت ليهو ما حا اقبل لو انت عندك اسبابك عشان ما ترفضني فانا عندي أسبابي، قال لي قروش مثلا!!!، انحرقت وقولت ليهو بغضب لو سمحت ما تتجاوز حدودك معاي !، أتراجع لوراء شوية ومسح على وشو وقال لي بعتذر بس انا ما بقدر ارفضك فانتي لازم ترفضي الشغلة دي !، قولت ليهو السبب ، قال لي ما بخصك!، اتنهدت شديد دي المرة التانية يحرجني!، قولت ليهو طيب لو قولت انا رافضة رفض تام انو اقول الكلام دة ،كان في طربيزة جنبو ضربها بأعلى صوت وقال لي يبزهج يا بت الناس انا من قبيل بتكلم معاك بهدوء صاح! انتي عايزاني اتصرف معاك تصرف ما ياهو!، لو ما القروش السبب شنو ال بخليك تصري على !،ما جاوبتو ودنقرت دة ما عندو اسلوب ما بستاهل رد !، فجاءة كدة جو داخلين ابوي وعمو محمد!، عمو محمد قال لي إن شاء الله تكونوا اتفاهمتو في المدة دي ، بعد مسافة رديت وقولت ليهو يا عمو سياف دة عندو حبيبة قال فانا والله ما بقدر اكون مع راجل بحب واحدة تانية!، ابوي كان بعاين لي بس وساكت ومعالم وشو باين عليها الغضب!، عاينت لسياف وقولت في نفسي انا لازم اني استغل الفرصة دي لصالحي عشان انهي الموضوع دة!، وفي النهاية دي حقيقة قالها بلسانو انا ما كذبت فيها فلازم يعرفو!، عمو محمد قال لي حتى لو الكلام دة صاح ما حا يفكر يتواصل معاها تاني ،قولت ليهو اضمن كيف!!؟، قال لي انا بضمن ليك! وانا واثق من ولدي ومن تربيتو، ابوي قال لعمو محمد انت ما سياف لازم يأكد لينا انا ما بدي بتي لزول داير بت ناس تانية، عمو محمد اتوتر وقعد!، ابوي جاء وهمس ليهو وما عارفة قال ليهو شنو عشان زاد التوتر حقو ،سياف قال ليهو يا عمو انا ما قولت عندي حبيبة ،قولت ليهو انا ما مجنونة عشان اخترع حاجة من راسي!، سياف قرب وقال لي انتي يا مها مجبورة علي ولا شنو الكذب بوصلك بس لطريق مسدود لو ما دايرة الخطبة قولي ماف زول حا يغصبك واعرفي انو انا ما عندي مشكلة معاك انتي بت مربية متعلمة وأهلك ممتازين بس يبدو انو انتي ما عايزة الخطبة عشان كدة بتكذبي صاح ؟! !، هنا ابوي لف وجاني مسكني من يدي وقال لي انا عرفتك انو لازم تعملي مشاكل كيف تكذبي!، قولت ليهو انا ما كذبت....، قاطعني وكان عايز يضربني عديل لو ما ادخل سياف وقال ليهو يا عمو اهدى ما تضربها في النهاية الحاجات دي قسمة ونصيب ،انا اتفاجئت ثعلب كبير قلب الكورة لملعبو في ظرف ثانية وابوي كذبني، انا قعدت وبقيت ارجف وابكي بأعلى حس!،ابوي قال لي خلي عوارتك دي!، أبيت ما اسكت اصلي انا مدعية القوة بس زولة بكاية شديد!، استغفرت وعاينت ليهو وكان نظراتو نظرات شماتة ،مد لي منديل وقال لي ماف زول بغصبك على حاجة!، انتهدت وشلت المناديل منو بكل غيظ! وبقيت افكر مسافة تاني مسحت دموعي وقولت ليهو انا اسفة يا سياف!، انا ما كذبت الا عشان انا عايزة أتم امتياز اول قبل اعرس وانتو دايرين عرس مستعجل وابوي قال لي ماف تأجيل!، فاضطريت اكذب عشان افسخ الخطبة لانو كان ماف خيار تاني لانو فكرت انو لو طلبت التأجيل منكم ابوي حا يزعل وانتو حا تزعلو فقررت انو اكذب ، بس انتو ناس كويسين وانت زول ما فيه كلمة ،قولت في نفسي عشان تعرف انا زاتو ممكن اقلب الطاولة لي ! واكذب، عمو محمد قال لي ليه ما قولتي كل دة من الاول، ابوي هنا حدر لي وجاني تاني مسكني من كتفي بقوة وقال لي انا ما قولت ليك الموضوع دة محسوم، سياف جاء وزح يد ابوي مني وقال ليهو يا عمو خليها هي كانت خايفة فكذبت وقايله انو ممكن تصدقوها وما تصدقوني انا بقيت ماسكة في كتفي قال لي وهو بهمس وبضحك المرة الجاية ما بمنعو، حمرت ليهو قولت بأعلى حس انا حا اقتلك!!، يادوب انتبهت انو انا وسط ابوي وعمو!، قعدت مسكينة!، وقولت بعتذر جات سهواً، سياف ضحك وقال ليهم انا هزرت معاها اسي عشان كدة انفعلت، عمو ضحك وقال لينا كويس يادوب حاس انكم حا تتفاهمو ، تاني قال لي العرس حا يتأجل زي ما عايزة نحن لازم نحترم رأيك وتاني قال لأبوي اسي عشان انت قولت ليها ما خليتها تقول العايزاهو كذبت عشان تنتهي من الخطبة ابوي طلع مع عمو محمد، سياف طوالي قال لي سمعت بكيد النساء بس ما متوقع الكيد تبعكم بوصل مرحلة زي دي ،قولت ليهو انت قصرت يعني!!!، ما خليتني كذابة وانا صادقة!، قال لي اعمل ليك شنو لو الناس ما بثقو فيك!، وقفت على كلمتو صاح عمرو ابوي ما سمع لي ولا وثق بكلامي عشان اسي يثق! ،سكتا وقعدت، هو قعد وكان باين انو مضايق، قال لي يا انتي لسانك دة اتشل لو الشغلة دي تمت ما حا اريحك، ما رديت واتجاهلتو، ابوي وعمو دخلو ابوي قال لي نحن اتفقنا خلاص العرس بعد تنتهي امتياز واوعى تاني تكذبي!، عاينت ليهو لقيتو غضبان شديد! ،قولت في نفسي شوفها حارة كيف!!!، هو كان داير يفسخ الخطبة بانو يمرقني انا الغلطانة بس انا قدرت ابرر موقفي! ،بعد كدة الا يتحرك هو ويقول ما عايز اني عشان ابوي انا ما يزعل مني ويشيل موقف حا اشوف حا يعمل شنو ،قرب انا قلبي دق حسيتو عايز يخنقني قال لي بتمني تكوني صادقة معانا في كل مرة وما تكذبي وإن شاء الله ربنا يقدرني اسعدك ،كان بقول الكلام دة وهو مبتسم لمن استغربت!، بس انا واثقة انو الزول دة ما بخليني.
عاين لأبوهو وقال يا ابوي انا مستعجل نلبس الدبل!، ابوي قال ليهو مستعجل ماش وين بدري الوقت ،قال ليهو لا ما بدري انا لازم اسافر بكرة شغال وعندي امور لازم اعملها !، قال ليهو عمو محمد يا ولدي انا ما قولت ليك شيل اجازة قال ليهو ماف طريقة! متكدسييين العيانين هناك! ،ابوي قال ليهو بتي دي ما بتلقو ليها فرصة معاكم!، عشان عرسكم يتم! ،سياف قال ليهو لا بس عمو محمد قال ليهو انا بدخلها عندي واسطة! وكمان هناك المستشفى مؤهلة! ما زي هنا قولت ليهو بعيد المكان، قال لي ماشه برجولك ما بمواصلات وبعدين بلد فيها زول بتعرفيه وحا يساعدك ، ابوي قال ليهو طيب شوف لينا نهاية الموضوع آخر الليل دا ما اقدرت اتكلم بعدها لا رأيي لي بعد رأي ابوي .
سياف كان بعاين لي بكل كرة الدنيا ما اشتغلت بيهو وبعدين زي ما هو ما طايقني وما عايزني امشي اشتغل معاهو و زي ما هو ما عايز الخطبة دي وما قادر اتكلم انا زيو بس زي ما هو ما ورا سببو انا ما بوري سببي واكيد حا القى طريقة ارتاح من موضوع الخطبة ! وانا متأكدة بس طبعا ما حا اقول ليهو كدة لانو هو ما بستاهل يتناقش معاه اصلا!.
طلعنا معاهم سياف جاء وقال لي جيبي رقمك!، خوفت عديل لمن قال لي كدة اضطريت امليهو ليهو طلع وطوالي لقيت رسالة مكتوب فيها لعبتي مع الزول الغلط ، رديت لو ما نكرت ما كنت انا كذبت!، قال لي الايام الجاية ايام قاسية استعدي ،جيت ارسل ليهو ما مشت، قولت حظرني كان يخليني أتم كلامي لئيم!.
دخلت جوة جات مروة وقالت لي انا متأكدة حا تلقي سعادتك معاه ما شايفين لابقين على بعض كيف، قولت ليها اي ماف اي شك على الحاجة دي ماشه استحم واغير وانوم.
_________________________
بلسان سياف
بعد اتحركت بمسافة عاينت لابوي الكان بعاين لتلفونو شافني مركز معاهو وبعاين ليهو بنظرة كلها استفسارات ابوي ليه كان مصر عليهم ابوي مستحيل يرضى بالاسرة دي.
كسر صمتنا بانو قال لي انا مقدر وقفتك معاي في المحنة دي ،قولت ليهو دا واجبي انا كولدك ما قادر اوفيك حقك فالشي دة بسيط بس ليه خايف بالذات من عمو عمر الراجل دة مهددك بحاجة انا اول مرة اشوفك بالحالة دي ، قال لي انا ما قولت ليك ما تسالني من الموضوع واعرف يا ولدي العرس دة مفروض علينا فرض ولو صاح بتحب واحدة الحاجة دي ما بتمنعك تحبها وانا بذات نفسي بزوجها ليك والبت دي انا بعرف اتصرف معاها كيف وما تخاف الزواج منها ما معانتو الالتزام بيها بس لمن تكون في يدك بنقدر نتحكم فيها وخشمها دا ما بتقدر تفتحو، ضحكت ضحك دا ابوي البعرفو انا مستغرب ليه سايرهم اصلاً.
في اليوم التاني اتفجاءت بيها وهي قاعدة في نص بيتنا ومعاها ابوها ومعاها شنطتها اتجاهلتهم وما اشتغلت بيهم وكنت متحرك عمر نادا لي وقال لي يا ولدي ما شايفنا ولا شنو ما اتلفت وعملت نفسي ما سامع وصلت الباب وبقيت متحرك على اتجاة العربية جاء ابوي وقال لي بتعمل في شنو انت، قولت ليهو الداهيه دي ما بتتحرك معاي شبر ،فجاءة كدة جاني صوتها وهو بقول ما ميته عشان امشي معاك بس مجبورة وبعدين لو عندك مشاكل معاي احترم ابوي الأكبر منك ،اتلفت عليها وكنت عايز ارد واقول ابوك بقى منو بس ابوي قاطعني وقال اسف يا بتي الولد دة بكون ما انتبه ليكم واسي كلامو دا عشان مستعجل بس ،ورح اركبي نادي عمر وقال ليهو جيب الشنط جابوهم وختوهم وهي همست لابوها بكلام بس ما أداها ردت فعل فركبت براحة وقعدت وانا ماش باتجاه العربيه اسمع صوت ما كان غريب علي التفت لقيتو ياسر راجل ندى اختي، جاء وسلم وانا كنت عايز اضربو بدل ما اسلم بس عارف ندى ما بترضى بعد كل هجرو ليها دا ،لو كانت الظروف ضدو ما كان عندنا مشكلة بس ما كان في سبب واضح من عدم جيتو السودان كل الفترة الطويله دي ، ابوي حاول يتكلم معاهو بس هي منعتو وقالت ليهو متفاهمين وما تتدخلو بيناتنا متى ما يجي اليجي، هو فجاءة ركز جوة العربيه وعييونو ما زحت منها كانت البت ديك قاعدة، قولن ليهو مستغرب دي منو صاح، ما رد لي فجاءة التفت ووسعت عيونها شديد وبقت تعاين تاني نزلت فجاءة وبقت مهروله ابوها كان بادى ليها بس ما كان في اي إستجابة منها........
وليس الهجر يؤلمني ولكن
جمال الذكريات يهز قلبي
اخادع حزن روحي بالتمني
فأين حنان ذاك القلب عني !؟
🍁متابعه لحساب رواياتي الوسام ليصلك كل جديد وحصري