رواية رغبة في الانتقام الفصل الثلاثون 30 بقلم نوسه حمد
لحظه حكمو علي بالاعدام حسيت بظلم م طبيعي قصاد الشرطه العايزه تخفي الحقيقه وتستر عليها في أسرع وقت منعو مني الزيارات حتي اهلي ما شفتهم الا يوم الحكم ولا الضابط الكان ح يصل للحقيقه الكان ح يثبت برائتي ويكشف خيانه رجال الشرطه العايزين يضللو الحقيقه واختفي وقالو في مأموريه بس كيف احساسهم لمن واحده تنشنق قدامهم ظلم دموعي كانت بتحكي عن حالي وكنت بصرخ باعلي صوت اني انا مظلومه والجاني الحقيقي برا السجن وبمارس في حياتو الطبيعيه وما كده زور حياه إنسان عشان القروش وفي لحظه عيني جات في ملاذ وفي معتصم حسيت في عيونهم الفرحه وانهم انتصرو وكانو بتبادلو النظرات وفجاه طلعت من الصمت الكنت فيهو وبقيت اشتم في الشرطه والقضاء وانهم هم ورا الانا فيهو والاعلام والكميرات كلها اتسلطت علي وبدو يسالو فيني وبقيت اروي في قصتي والظلم الانا فيهو الضابط حاول يوقف التصوير ويلزمني الصمت عشان اكيد قضيتي ح تبقا قضيه راي عام ونادر اخوي حاول يعتدي علي رجال الشرطه والضابط الشرير كانو حاسي انو هو السبب فجاه وسط الجوطه ديك ظهر الضابط العارف الحقيقه وطلب انهم يعيدو الحكم ويديهو فرصه لانو عندو ادله كتيره ح تغير مجري القضيه وعرض ليهم اوراق ومعتصم وملاذ بقو اعاينو لبعض القاضي اجل الحكم حسيت بي انتصار عظيم نادر فرح وندي سجدت سجدت شكر وانا كمان سجدت سجده شكر حسيت انو الدنيا ح تبتسم لي والحق ح يظهر الضابط قال لي م تخافي انا معاك وان شالله اسبوع بالكتير وانتي ح تكوني برا السجن نادر اخوي شكرو وقال ليهو نحنا لا عندنا كبير ننسند عليهو لا قدرنا نجيب محامي يمسك القضيه دي كل البنجيبو بعتزر قال ليهو معليش نا عارف سبب تعطيل القضيه والتسريع في الحكم عليها وكل واحد ح ياخد جزاهو بأذن الله لحظه تأجيل الحكم عيني جات في ملاذ حسيت بي الخوف في عيونها قويت قلبي وقربت منها قلت ليها ما تفرحي انا حقي لو ادعا الامر بطلع وبشيلو بي يدي وانتي التستاهلي تكوني مكاني وعزه جلال الله اخلي حبل المشنقه اتلف حولك وتكوني عظه وعبره لغيرك قالت لي انتي بتخرفي بتقولي فشنو قلت ليها انا بقول في الح يحصل ليك وما تستفذيني اكتر الضابط معتصم جا قال ليها يلا يا ملاذ احترت الضابط دا ببقا ليها شنو اكيد وراهم سر وسر كبير كمان بس هو شنو لازم اعرفو واصل ليهو ساقها وفات نادر قال لي دي منو قلت ليهو دي قصه طويله طمني عليكم وعلي ابوي قال لي ابوي حاسي انو في شي بس ماف زول قادر يفهمو خايفين عليهو نوسه نحنا حياتنا اتبهدلت من بعدك انتي كنتي سندنا كلنا حتي انا الراجل دا حاسي حياتي وقفت خطيبتي حاسه اني اتغيرت بس انا م عندي نفس نوسه نحنا براك م بنقدر انتي امنا ندي كانت بتبكي قربت عليها وكانت بتعاين لي الكلبشات في يدي وكانت بتبكي بقهر قالت لي ليه انتي بالذات حياتك تكون كده نوسه انتي عشان طيبه المصايب بتقع في راسك م تستاهلي البحصل ليك دا دا ظلم هم م عارفين الدور الانتي قايمه بيهو انتي سانده بيت كامل ليه بالظلم يحكمو عليك كده نوسه انا تعبت ما قادره استحمل تعالي راجعه حاولت اضمها علي بس م قدرت قلت ليها ندي عشاني انا ابقي قويه انا اعمل شنو انا واقعه ضحيه في الدنيا دي م عندي ذنب في اي عذاب اتعذبتو كل م اقول خلاص الدنيا تديني علي راسي ادعي لي ربنا اتم برائتي والحياه ترجع لطبيعتها وانتو تكونو في افضل حال قلت لي نادر سوقها البيت وابقو علي اخواني عشره وانا والله ما قتلت زول ما تخلوهم يحكمو علي ظلم لو ادعا الامر اعمل اي شي عشان انا اطلع ذكي عارف الحقيقه خليهو يدافع عني العسكري قال لي يلا خلاص انا عندي شغل ساقني وركبني في البوكس ورجعني السجن السجينات لمن عرفو انو اجلو الحكم بقو يغنو ويرقصو لغايه ما الضابط معتصم جا بي سوط لما فينا كلنا بقا يجلد فينا من غير رحمه والبتتكلم بزيدها زياده لغايه ما جا الضابط محمد المسكين بقو يتشاكلو قال ليهو م من حقك تجلدهن وانو هو ساكت ليهو لكن اي كلام تاني ما بستحملو وطلعو من السجن وفاتو حسيت انو معتصم دا وراهو قصه بس هي شنو م عارفاها يوم ذكي جا وطلب يشوفني طلعت ليهو وكنت ملهوفه عايزه اعرف الحقيقه وكان وشو دا مخطوف قلت ليهو ذكي وين انت حرام عليك انا اتحكم علي ظلم قال لي نوسه انا عارف بس انا كنت بفتش للحقيقه قلت ليهو احكي يا ذكي فشنو ان شاء الله وصلت للحقيقه قال لي وصلت لجزء من الحقيقه قلت ليهو وصلت لشنو احكي قال لي القصه كبيره شكلها اكبر من تخيلاتنا قلت ليهو كيف قال لي المهم بقيت شاكي في ملاذ وبقيت متابع كل تصرفاتها وتصرفات ولدها وعلي فكره ولدها ما طايقني وبكرهني بس هي بتجبرو علي ومسمياهو ذكي علي لغايه ما يوم هي ماسكه التلفون والتلفون ضرب الولد قال ليها بابا اتصل و فعلا التلفون لمن اتصل كانت في صوره راجل جات مع المكالمه بس هي طوالي فصلت الخط سالتها قلت ليها دا منو الاتصل وولدك قال انو دا بابا قالت لي لا لا دي صوره عمار عاملاها نغمه اتصال كلامها م دخل علي والشك بدا يسيطر علي شالت ولدها ودخلت جوه وانا مشيت اتسحب وراها بقيت اتصنت لي كلامها قالت ليهو م تتصل الا اقول ليك كنا ح نتكشف انا اللحظه ديك جسمي هبط عرفت انو الزوله دي وراها قصه بالذات قالت عايزه تكتب المدرسه بي اسمها عشان عندها ولد من عمار وقالت لو م وافقت ح تقيف قدامي في المحكمه والمحكمه ح تحكم ليها انا رفضت عشان عمار عندو بنات ومرتو مسكينه من يوم مات راجلها م جابت سيره بي ورثه ولا عاينت لي اي شي بس ملاذ شكلها خاشه علي طمع والشكوك بدت تراودني وكانت بتلاحقني في اي مكان لغايه م يوم وهمتها اني مسافر مأموريه وخليتا طلعت دخلت الغرفه الهي فيها واتحصلت علي قسيمه زواج حقتها قديمه قلت ليهو متزوجه قال لي اي ووالده منو الولد الزورت اوراقو ونسبتو لي عمار صورت القسيمه وشهاده ميلاد الولد الحقيقيه والمزوره ومشيت السجل المدني م لقيت في اسم باسم ذكي عمار وفي نفس الوقت لقيت اسم بي الشهاده بتاعت الميلاد التانيه عرفت انها دي الاصل والبي اسم الولد القالت ولد عمار دي مزوره وهسي انا جيت اعرف اسم الضابط العارف حكايه البصمات وعايزين نطابق السيناريوهات دي مع بعض والموضوع بقا كبير هي متزوجه وزورت اوراق بي قصص وهميه وما بقت علي كده قتلت ولدي ياريتها طلبت اي مبلغ وخلت لي ولدي لي بناتو بس الحمد لله قدر الله وما شاء فعل انا بعتزر ليك يا نوسه علي اي حاجه حصلت ليك بسببنا وما طالب منك غير لو جاتني حاجه تقولي الحقيقة الحكيتا ليك دي وح ادي سيف اوراق يحتفظ بيها عندو لو جاتني اي حاجه اقيفي مع بنات عمار حسيت انو الموضوع اكبر مني ومن ذكي قلت ليهو م تقول كده انت ح تربي اولاد عمار وح تحافظ علي حقهم قال لي م معروف الظروف وملاذ دي وراها ناس ما براها احتمال تقتلني انا لو وقفت قصادها وانا حدي الان ساكت بس عايزه اعرف الضابط العارف الحقيقه اسمو منو عشان ارفع قضيه في ملاذ وفي تزوريرها للاوراق ودا ح يساعد في القضيه قلت ليهو طيب م حاولت تشوف راجلها منو وتمشي تشتكي ليهو قال لي نوسه راجلها عارف وشكلو مخططط معاها القصه دي كلها قلت ليهو ع الاقل تعرف مكانو وتصل لي اي قصه قال لي انا عايز امشي لي اهلا عديل بس خايف قلت ليهو عارف بيتهم قال لي اي مره مشيت جبتها منو وسلمت علي ابوها وامها قلت ليهو رايك شنو تشوف نادر ومهند خليهم يساعدوك انت م قصرت مننا ووقفت معانا قال لي لا ي نوسه نادر اخوك بكرهني م عايز اخليهو يكرهني ويفتكر اني عايزك لسه قلت ليهو لا يا ذكي م ح يفتكر لي اي شي طيب خليهو يجيني اتصرف قال لي انا طلعتي من هنا ح امش ادي سيف الامانه دي وما يفتحها الا لمن تحصل لي حاجه ويديك ليها قلت ليهو لا ي ذكي عليك الله م تقول كده ان شاء الله م ح تجيك حاجه قال لي الاحتياط واجب وان شاءالله يا نوسه ح اشيل ليك حقك م عشان اتزوجك انا خلاص فكره الزواج بعد موت عمار شيلتها من راسي بنات عمار محتاجات لي عاوز اتخلص من العقرب الفي البيت دي واجيبهم يعيشو معاي قلت ليهو افضل قرار يا ذكي ما تحضن ليك واحده كذابه ممكن تقتلك انت زاتك حاول ابعد منها قال لي اي ح اقول ليها عندي مأموريه وح ااجر لي شقه لغايه ما الحقيقه تظهر قلت ليهو كويس وانا ح اقنع نادر ومهند وح يقيفو معاك وح يفقدوك م ح يخلوك براك قال لي انا ربنا معاي بس ادعي لي وشكرا يا نوسه فتحتي عيوني لحقايق كتيره اولهم ولد اتنسب لي ولدي وهو ما ولدو وواحده طماعه وعايزه تورث ولدي وتظلم بناتو الحقيقيات حسبي الله ونعم الوكيل فيها قلت ليهو الحق ح يظهر ان شاء الله امشي للضابط الاسمو محمد احكي ليهو اي شي وارفع قضيه في ملاذ ولو لقيت الضابط الاسمو معتصم ما تحكي قدامو قال لي الضابط الاسمو منو دقيقه دقيقه قلت ليهو معتصم دا الزور البصمات وعايز يلبسني القضيه قال لي نوسه ملاذ زوجها اسمو معتصم قلت ليهو شنووووووو ……..يتبع