رواية دون أن أشعر
الفصل الخامس عشر 15
بقلم ال زهراء
قولت ليهو عارفة حا تقعد تديني محاضرة، قال لي انا زاتي ما فاضي ليك عشان اديك محاضرة انا بس عندي كلام واحد معاك وهو انو مفروض ترجعي الشغل بعد ترجعي ولدك البيت ،ماف اخد إجازة بالمزااج! ،عاينت ليهو وقولت ليهو اسفة يا مستر، اتنهد وقال لي حصل خيير ماف مشكلة، مشى طوالي ركبت يزن الترحيل ورجعت المستشفى لقييت مرام والمره قاعدة لسه وكمان في الصاله بتاع الاستقبال وكانن مقبلات على الاتجاة التاني فما شافني جيت بعلي كراسيهن بوراء مارة سمعتها شغاله ليها هي بذات نفسها قالت منفصلة عشان كدة بتكون منفسنه، والولد ما حا يتربى ليها براها وخاصة انو انتي قولتي مدلعه دلع شديد ،لو ابوه كان قاعد كان ادبو بس هي اكيد ما بتادبو لأنها ظاهر عليها انو موضوع طلاقها دة عامل ليها عقدة وحتى رجلها دة ظاهر انها متأزمة منو كانت عشان كدة ما بتنفع تربي،واوريك حاجة انا حسيت انها فاكة سطر واتأكدت بعد نبذها ليك وللمعلمة انا بلاقيك كتير وانتي جايبه ماهر وما شوفت منك الا الخيير، قولت ليها مرااااام التفت بخلعة مسكت ليها شعرها وقولت ليها انا فاكة سطر صاااح حا اوريك الفكة الحقيقية!!،ضربتها وهي حاولت تبعد عني!، المدير الطبي وسياف جو، سياف قال لي فكيها، ابيت ما افكها ،عادها تاني والمرة دي كان صوتو يخوف وبصراحة حسيت بالرعب وطوالي فكيتها ،قال ليينا بحزم تعالن وراي وماف واحدة فيكن تتكلم بحرف ،مشينا قعد وقال اقعدن، مرام بقت تبكي، قال ليينا بصوت عالي الفضيحة الحصلت بره سببها شنو!؟، ماف واحدة فينا ردت، قال لي انا بديكن دقيقة واحدة فيكن تتكلم، قولت ليهو هي قالت كلام عني شين عديل وانا اكيد ما بسكت، قال لي قالت شنو؟، حكيت ليهو من الألف للنون ، قال لي تصرفك دة ما صاح برضو رغم الحكيتيهو لي ،الناس تكبر تعقل انتي زيادة في البتعمليه فيهو انتي دكتورة وعندك سمعة ولا كلامي غلط ،قولت ليهو انا بقيت ما بقدر اتحكم في اعصابي وبعدين ياخ اسكت لمتين ياما سكتت وما استفدت حاجة!، سكاتي دة هو سبب الانا فيهو هسي وحياتي دي انخربت بسبب ضعفي ،قال لي السكوت في المواقف ما بعني انك ضعيفة، انتي استعجلتي في تصرفاتك كان في مية حل قدامك وانتي اخترتي اسوء واحد وكمان قدام ناس المستشفى كلهم، قولت ليهو انت واقف معاها عشان مرتك بس انا ما حا اسكت ليها وشوفت اسي بدقها قدامك ،ضحك وقال لي دي مرام قدامك أتقدمي خطوة بس ليها ،ما قدرت وبقيت ساكتة! وتاني كنت ماشة لانو عرفت انو ما حا يقيف معاي ولا هي بقدر أقرب ليها وهو قاعد ،قال لي انا انتهيت كلام!، التفت وقولت ليهو مستر سياف انت قولت كلامك وانا قولت كلامي تاني في شنو!، قال لي لسه انا ما انتهيت اقعدي ،قعدت مد لي موية وعاين لي وقال لي اكيد بعد الصريخ دة حلقك بكون جاف اشربي، صريت وشي ليهو!، عاين لي وما رد وتاني عاين لمرام بنظرة غريبة،لمن شافتو كدة قالت ليهو قبل ما تتكلم خليني أوضح ليك انا ما كنت قاصدة حاجة انا بس كنت ببرر للمرة ليه هي كدة، قال ليها انا ما عايز اسمع وانا ما دخلني بيك ولا من حقي انو اوريك الصاح من الغلط، عاينت فيهو وقولت في نفسي وانا ليه توريني الصاح وكمان تهرش فيني وتنبذ، قالت ليهو ليه يا سياف انت لو عايز تنبذني نبذني لو عايز تنصحي انصحني انا ما عندي اي مشكلة انا ما غريبة صاح ليه عاملني غريبة كرهت معاملتك دي!!؟، قولت في روحي هي المنفسنة ههه،قال ليها انا ما عندي سلطة انو اوجهك المهم مها حا تتخذ الإجراءات ضدك ،قالت ليهو إجراءات شنو ؟؟؟، قال ليها حا تشتكيك، ضحكت ضحكة سخرية وقالت ليهو انا مفروض اشكتي على فكرة، ضرب الطربيزة وقال ليها طيب امشي اشتكي ووريهم سبب الضرب الحقيقي ،قالت ليهو طيب اسفة اسفة شديد ،قال ليها بغضب تعتذري لي انا، قالت ليهو طيب حا اعتذر لمها بقت تعتذر لي ، بقيت ساكتة سياف قال لي ما تسكتي وقولي حاجة انت ليك القرار لو عايزة تشتكي عليها انا معاك ولو عايزة تسامحيها تمام ،قولت ليهو انا ما عايزة اصل محاكم وبعدين كفايه انو فشيت غليلي فيها،قامت وعاينت ليهو وكانت ماشة سريع، قال ليها نحن لسه في بينا كلام صاح انا منتظرك عشان توضحي لي حاجات كتيرة حصلت في غيابي، التفتت وقالت ليهو بحس مبحوح وزي الكانت عايزة تبكي انا اصلا جيتك عشان كدة ،عاين ليها وشكلو حس انها حا تبكي بعد شوية جاء بعليها وعاين لوشها وقال ليها اسف عشان الضرب دة مها اتسرعت...، قولت ليهو ما تعتذر بالنيابة عني انا.... قاطعني والتفت وقال لي انا ما عايز اسمع اي صوت منك كفايه خلاص،خوفت وسكتا وهي حسيتها هدت وابتسمت وقالت ليهو انا زاتي لازمني اعتذار منها ، قال ليها بصوت مرعب تعتذر لشنو عشان نبذيتها صاح انا غطلتها في ضربها ليك بس ما حا تعتذر ،انا اعتذرت ليك كفايه وتاني لو جبتي سيرتها على لسانك انا المرة دي بذات نفسي الحا يكون عندي تصرف معاك، قالت ليهو سياف انا والله تاني ما اتكلم عنها بكلمة بس مها بتعرفها من وين عشان تدافع عنها، قال لي ما عندو علاقة بمها موقفي دة، لو اي زول انخت في موقف مها انا بدافع عنو، امشي خلي ينضفو ليهو الخدوش دي ،طلعت، قعدت اضحك، جاء وحدر لي وقال لي تضحكي على غبائك ،دنقرت راسي اتنهد وقال لي بنهرة ارفعي راسك اسي ما كنتي بتضحكي بأعلى صوت ليك، رفعتو قال لي انتي شايفة الغلط منك ولا منها، قولت ليهو دي دايرة تفكير اكيد منها ،قال لي طيب منو الكلمها كل الكلام دة، قولت ليهو انا، قال لي بنهرة منو الغلطان الغبي البكلم الناس بكل حاجة بتخصو عشان يتعاير بيهو بعدين ولا الزول القال الكلام، بلعت ريقي وبقييت اتمتم وما عرفت أقول شنو ،قال لي اسي ما كنتي بتتفاصحي، قولت ليهو وانا بقطع في الكلام انت مرام مرتك قولت ليها ما عندي حق ادخل فيك، بقى اسي عندك حق تتدخل فيني، ضحك َقال لي اي عندك اعتراض!!!، لو عندك قوليهو، ما اشتعل بيهو ،وقومتا، قال لي انا ما انتهيت لسه من كلامي، قولت ليهو عايز شنو تاني ،قال لي بحزم سلوك الغابة والشراسة دا ما بنفع هنا، حقك لو عايزة تاخديهو اخديهو بالطرق القانونية لانو لو حتى كلامك صاح بعد ضربتها كل الناس ديل حا يقولو انك انتي الغلطانة، انتي بقيتي كبيرة وواعية وحتى عندك ولد، عاينت ليهو وقولت ليهو ما عايزة منك اي نصيحة ، قال لي بغضب حا تسمعي النصحية ولا على كيفك ،حدرت ليهو وفتحت الباب بقوة وتاني قفلتو لمن عمل صوت طلعت برة وكل الناس ديل يعاينو فيني،قولت في نفسي كنت قاعدة اضرب في مرام واسي الباب، انحرجت شديد، وما عرفت اعمل شنو!، سياف فتح الباب وضربو بنفس القوة وقال انو الباب دة بقى فيهو مشكلة وما بقفل الا لمن ينضرب شديد ،ورح معاي يا دكتورة مها الغرفة الخاصة رقم 2 بعد حلينا المشكلة في مريض راقد بحصوة ولازم اشوفو عشان احدد العمليه، عاينت ليهو كانو ما كان الوحش البتكلم معاي قبل شويه، مشيت معاهو في الطريق قال لي اخر مرة تقفلي الباب بالطريقة دي ،السلوك اهم حاجة في المستشفي والاحترام ولا عشان عندك بي معرفة تعملي اي حاجة على كيفك!، ما عرفت أقول شنو اي انا بعرفو من زمان بس دة ما بعني انفصم فيهو واقل أدبي واقفل الباب بالطريقة دي، قولت ليهو اسفة، عاين لي وقال لي تاني ما تعيديها!،عاينت ليهو وما رديت عليهو، قال لي مها قولي حاجة ،قولت ليهو حاضر يا مستر انا اسفة اني اتجاوزت حدودي، عاين لي وما رد،دخل عمل ليهو كشف وقال ليهو العمليه يوم التلاتاء، طلعت بقيت ماشة معاهو وبعاين في تصميم المستشفى، قال لي بتعايني في شنو، قولت ليهو ولا في حاجة عندي شغل، قولت في نفسي هو انا مفروض ما اتعامل معاه زي البعرفو من زمان في النهايه اكيد ما نسى الماضي السيء البينا واحتمال للان متذكرو عشان كدة بصرخ فيني ،بس تاني قولت والله انا براي الما نسيتو الناس ديل كلهم عايشين حياتهم الا انا البحس انا معلقة هناك هو ما قال غير الحاجة الصاح هو نسا اي حاجة وحتى بعاملني كاي موظفة هنا وطبيعي يتعصب من قفلة الباب بس انا هنا العويرة وزي ما قال الماضي ماضي واي زول بقى عندو التزامات ومسؤوليات فلازم انسى اي معرفة سابقة بينا واركز بس انو هو بقى مديري وما من حقي اتصرف معاه اي تصرف تاني.
بعد شهر وانا بس من شغلي للبيت وسياف دة نهائي ما بلاقيهو الا نادراً لانو مشغول بس ما فارغ معاي وقولت احسن من الاحتكاك بيهو إن شاء الله يكون مشغول دايماً!!! اتصلت بي مديرة الروضة للاجتماع بتاع ولي الأمر، مشيت طوالي وقعدت كان في ام ماهر ومرام والأباء والأمهات التانيات ،ام ماهر قالت للمديرة انا بقترح انو يكون في حصص تربية وسلوك وتعليم الطفل العادات الصحيحة لانو في امهات ما بعلمو شفعهم الصاح من الغلط، المديرة اتوترت وقالت ليها المقررات فيها حاجات زي دي، وبعدين انتي قولتي الاقتراح دة من المشكلة الأخيرة ؟؟؟، قالت ليها اي لانو في بعض الأمهات يقيفن مع أطفالهن حتى في الغلط بس انا كاي ام خايفة على ولدي عشان كدة بقترح انو يكون في حصص تربية عشان يتربى ولد الام المهملة وما يعمل غلط!،قولت في نفسي ما تقول انااا، المديرة قالت ليها ديك مشكلة وانحلت وما بتتكرر بس الآداب والسلوكيات بساعدن الأطفال ودا اقتراح كويس جدا وانا حا اخدو في الاعتبار، سكتا ساي وبقى وشي ما بتفسر وهي تشيل وتعاين لي ومعاها كم واحدة يعاينن لي ،انا عارفة انو الاقتراح دة بس عشان ترميني بالكلام وما فيه اي منطق.
فجاءة كدة الأساتذة جات داخلة وقالت ليها يزن دفر ليهو بت ووقعها انا عاينت وانخلعت!، قولت في نفسي ليه بس يا يزن، ام البت جرت وانا جريت ،ام البت قالت انو الولد دة ما اول مرة يضرب زول!، عشان كدة مفروض يتفصل!، وتاني جضمتو وقالت ليهو لو سالتها تاني ما بخليك، انا طوالي جيت سحبتو منها وقولت ليها ما تسالي ولدي!!، قالت لي ما اسالو ؟؟؟كيف ما اسالو وهو ضرب بتي أقعد اتفرج! ،مرام جات وقالت ليها يا عايدة المرة دي ما بتفهم وجاهلة وما تسأليها هي لو شنو داك ما بتغلط ولدها وما بتعرف للتربية حاجة ،الحل بس يفصلوهو، دا ما مربى ولا شاف تربية بعينو، اصلا هو منو فاضي ليهو ابوهو مطلق امو وامو بس شغاله تدلع فيهو بس نحن ما بنرضى الاولاد والبنات يتاذو بسبب الشيطان دة ،واوريكم حاجة تانيه هي الجبتو بالطبع دة المرة الفاتت ضربتني واسالو ربا ما خاتي رجلها كان طلقها دي واحدة مجنونة وقليله ادب وما نافعة،المديرة وقفت مرام وقالت ليها كفاية خلاص، قولت للمديرة يزن من بكرة ما بجيكم، عاينت لمرام وقولت ليها بغضب ما تقولي قداااام ولدي كدة هو شافع بس بفهم احسن ليك تشوفي موضوع غيييري وتختيني عشان انا والله ما بريحك .
طلعت والعبرة خانقاني شديد والدمعة في طرف عيني قولت في نفسي تعبت والله!!، هو عارفين ليه انا مطلقة ولا عارفين ليه انا ما بقسى على ولدي ولا عارفين مخاوفي، بقيت ماسكة يزن وانا ببكي تاني ما قدرت وبقيت قاعدة في الارض وببكي بأعلى حس ويزن قاعد جنبي، فجاءة حسيت بزول مسك يدي فتحتو لقيتو مدرك ،قال لي خالتو مالك بتبكي !، مسحت دموعي وقولت ليهو ما قاعدة ابكي، قمت ومسكت يد يزن ووقولت لمدرك ارجع!، مدرك قال لي ماش مع يزن بيتهم، قولت ليهم تمام بس كلم امك اول، قال لي ما بتخليني اتكلمي مع بابا ،قولت ليهو ما عندي رقمو، جات مرام وقالت لمدرك ورح بابا بكون منتظرنا، قال ليها انا ماش مع ناس خالتو مها، قالت ليهو لا، قال ليها بمشي ادسى وراي ، في عربية وقفت وطلع سياف نزل وقال لمرام في شنو ومالكم اتأخرتو ،قالت ليهو مرام حصلت مشكلة بقت تحكي ليهو وانا كنت قاعدة اسمع، بس ما ذكرت ليهو انو هي قالت عني شنو ،قولت ليها لي ماقولتي ليهو كلامك القولتيهو لي ،تاني عاينت لسياف وقولت ليهو ادب مرتك والا انا حقي بعرف اشيلو منها انا اسي ما بقدر اتصرف عشان الاولاد ديل ما ذنبهم يشوفو أمهاتهم بتكاتلن ،سياف قال لمدرك سوق يزن وارجعو الروضة ،رجعو ،قال لي الحاصل شنو؟؟!، مما قال لي كدة الدموع نزلن شلال قولت ليهو قالت لي قدام ولدي انو هو ما مربى عشان اهلو منففصلين وتاني حكيت ليهو اي حاجة ،عاين لي وقرب وقال لي ما تبكي!، قولت ليهو ليه قالت قدامو كدة لو هو فهم البحصل شنو ؟!، قال لي ما تزعلي! معليش، قولت ليهو انا ما عايزهو يتأثر ليه تقول كدة وزدت بكاء، سكت شوية َوقولت انا لو كان بامكاني كنت ضربتها بس عرفت انو الضرب ما بجيب فايدة لانو المرة الفاتت عملتها واسي تاني كررتها لي وكمان قدام ولدي، سياف دا كان ملامحو ما بتستسفر وبس كان بعاين لي وبعاين ليها َوتاني مسح وشو كذا مرة وقرب واداني منديل وقال لي وقفي بكاء!!، مرام قالت ليهو سياف هي كذابه، حمر ليها وتاني جاء مسك يدها بقوة وقرب يديها كف لو ما انا مسكتو قولت ليهو انت ما قولت انو الأمور دي ما بتتحل بالضرب ،عاين لي وقال لي الموقف داك براهو ودا براهو التفتي مني انا ما عايز اشوفك بالحاله دي والا زهجي دا ما بروح ،استغربت واتلفت مرام قالت ليهو تضربي انا عشانها ،قال ليها اي انتي اتركبتي أكبر غلطة في حياتك وهو انو بكيتها وكمان اهنتيها قدام الناس كلهم ،قالت ليهو دي الحقيقية اكذب مثلا قال ليها مراااام حسك دة ما اسمعو انتي بس وفريهو لمن تمشي القسم ، قالت ليهو قسم شنو انا ما تبذتها، قال لي اكيد الشرطي عايز يعرف على اي اساس قولتي مجنونة وقليله ادب وما نافعة ،بقت تتمتم اتصل بالشرطة انا وقفتو وقولت ليهو عشان خاطر ولدك ما تعملها في النهايه دي امو برضو ،عاين لي وقال لي انا ما قولت ليك التفتي انا ما عايز اشوف عيونك الحمر ديل ،قولت ليهو سياف عليك الله هدي شوية انت معصب وما شايف قدامك من الغصب دي ام ولدك ما صاح، قال لي بغضب القال ليك منو ام ولدي انتي بتقطعي من راسك ...........