رواية دون أن أشعر
الفصل السابع 7
بقلم ال زهراء
بقيت قاعدة والف فكرة جات في بالي من يوم سياف عرفني بيها لحدي الليله علاقتهم كانت مميزة مميزة لدرجة حتى المستر علق عليها قدامي، معقوله سياف هو خطيبها!!!، قومتا طوالي سريع وبقيت متحركة على العنبر المرقده فيهو ،دخلت كانت متلفتة قومتها سريع ومسكت اكتافها وقولت ليها انتي خطيبة سياف!!!؟، بقت منططه عيونها فيني، قولت ليها جاوبي، ما ردت ضغطتها شديد ما كان فيها حيل تلاويني فما ادت اي ردة فعل!!، تاني حركت يدها الفيها الفراشه وحاولت تزح يدي انا طوالي نفضها ليها لمن الفراشه فكت والدم دا بقى جاري، قالت لي ريم انا بتألم فكيني وانا حا افهمك والله حا افهمك انا ما كنت عايزة اكذب عليك بس خفت اخسرك انا ما حصل صاحبت واحدة بالشكل دة ،وانتي اول واحدة ارتحت ليها بس طلعتي حبيبتو صاح كان قلبي موجوع اني داسه منك الحقيقة بس برضو ما كنت عايزه اخسرك ،قولت ليها كذااابه انتي وهو غشوتوني ولعبتو علي انا ما حا اسامحكم نهاي وحا اوريكم!!! انا...، كنت عايزة أتم كلامي بس اتفجاءت بيد جدعتني بعيييد وقالت لي بعدني منها ودا كان سياف، قولت ليهو انت تسكت الدور لسه ما جاك، ما اشتغل بي ولا عبرني مشى ليها طوالي وقال ليها دمك اتصفى يا بليدة طلع منديل وضغطت على يدها، قالت ليهو وهي بتبكي ريم عرفت اي حاجة ،قال ليها بغضب انا حا احل المشكلة مع ريم ركزي بس مع نفسك ، انا طوالي طلعت لانو حسيت بالقرف منهم .
________________
بلسان سياف
طلعت وراها ووقولت ليها ريم وقفي خليني اتفاهم معاك، قالت لي ما عايزة اي تفاهم انا بكرهكم الاتنين ،الاتنين ضحكتو علي وبقيتوني لعبة، انا ما بخليكم والله ما اريحكم! ليه تاذوني كدة وبالاخص انت ،انت عارف اني بحبك اكتر من نفسي بس انت بعملتك ودسك خذلتني ،قولت ليها بحزم ممكن تسكتي دقيقة انا حا اوضح ليك، قالت لي انا ما عايزة اي تبرير ولا عايزة اي توضيح من طرفكم انا غلطت انو وثقت بيكم ،كانت زعلانة شديد والدمعة في طرف عينها، قولت ليها ريييم انا ما بخليك الا أوضح ليك، نحن كنا مجبورين على الخطبة، وما كنت عايز اكلمك عشان ما اخسرك لانو انا ما بقدر اعيش من غيرك، انتي مهمة في حياتي ،وانا بحبك ،بكت وقالت لي كذاااااب انا ما بصدق، انت وهي طول الوقت كنتو داسيين علي يوم واحد ما فكرتو تكلموني وانا العويرة الكنت قايلاها زوله بتبقى لقربيك هههه ، طلعت خطيبتك، خطيبتك العرفتني ليها من اول يوم والخليتني اهتم بيها واوريها الغرفة..... انا ما اكذب عليك استغربت شديد وقولت سياف من متين بهتم ببت وبامورها لدرجة يقول لي لاقيها بس تاني صفيت النيه وقولت عشان قريبو بس طلعت خطيبتك، قولت ليها انا ما كنت قاصد انو تتعرفي بيها بالطريقة دي بس انتي عارفة انو دوائر علاقتي محدودة وما كنت بأمن على واحدة الا ليك عشان كدة طلبت منك الطلب دة لكن ما عشان انا مهتم بيها لا ابدا لكن عشان ابوها يطمن انو بتو بين ايدي امينه، ضحكت وقالت لي قناعك دة حا تقلعو متيين ،انت شكلك ما ملاحظ لنفسك والله يا سياف البت دي ماخدة كل تفكيررك، قولت ليها بغضب دا خيال منك انا ما معتبراها حاجة الخطبة دي كانت ارضاء للأهل والكذب دة عشان بس ما تنجرحي وعشان انا وهي عارفين انو مصيرنا حا ننفصل وما كنا عايزين نزعلك واسي زي ما شايفة انفصلنا، قالت لي وهي بتبكي يا يريت لو كلمتوني من الاول مما اكون في موضع الغبي، علاقتنا لحدي هنا حا تنتهي يا سياف انا ما حا اقدر اسامحك ولا حا اسامحها هي منافقة وبت بوشييين و...، قاطعني وقال لي ريم ما تقولي كلام بدون ما تحسبي ليهو انت عارفة مها حق المعرفه ومهما عملت ما بتكون عملتو الا لأنها خايفه تخسرك كصديقة ،هي كل مرة بتقول مخاوفيها لي ،وبتحس بتانيب الضمير ،قالت لي بغضب ما تبرر ليها اوعى والتبرير انا عارفاك بتحبها واسي دي تمثيليه منكم الاتنين!!، انا َ....، قاطعتها واتصلت بابوها قدامها وقوولت ليها حا اثبت ليك انو الحاجة البينا انتهت رد سلمت عليهو َاتونست معاهو مسافة تاني قولت ليهو انا عايز يد ريم، حكيت ليهو عن اسرتي وعندي وعن شغلي ،قال لي انا بعرف ناس في مدينة.... بسأل منك ومن اهلك وبديك خبر!، قولت ليهو اخد وقتك يا عمو، قفلت منو، قولت ليها كدة اطمنتي انو البينا والبينها مجرد خطبه اجباريه واسي انتهت،قالت لي انت ما فاهم المغزى انت كذاب يا سياف وكنت بتعاين في عيوني وبتكذب كيف أصدق زول زيك، قولت ليها انتي عارفة ليه كذبت صاح ؟؟؟، انا ما عايز البينا ينتهي بس انتي زودتي الموضوع اكتر من اللازم، قالت لي انا زودتو اكتر من اللازم؟؟ ؟؟ياخ منو الما علق عليكم حتى الإشاعات كترت، قولت ليها انتي كنتي معانا وما شوفتي اي تصرف مشبوه مننا انا البت الاسمها مها ما عندي ليها حاجة ومستحيل يكون وحتى هي نفس الشي، اخدت نفس وقالت لي عايزة إثبات، قولت ليها اكتر من كدة اثبت ليك كيف ؟!، قالت لي اي حاجة تطمن قلبي، قولت ليها انا اتكلمت مع ابوك! اعمل شنو تاني، قالت لي ما عايزاك تشوفها وما عايزاك تمر بعليها،قولت ليها طيب اصلا هي ما فارقة معاي اتصافينا!؟؟ ،قالت لي لا اديني وقت افكر في علاقتنا،ونحن كدة جات مها كانت تعبانه بس جات مسكت يد ريم وقالت ليها اسمعي مني كلامي دة للنهايه وتاني اي حاجة عايزه تقوليها قوليها لي ريم قالت لي احكي حا اسمعك لاخر مرة ،قالت ليها يوم الخطوبه سياف كان واضح و قال لي انا بحب واحدة تانيه ارفضيني، ولانو كنت مجبورة وابوي ضاغط علي قولت ليهو أرفض انت فهو قال لي ما بقدر فشكلو كان برضو مضغوط من ابوهو!، المهم الخطبة تمت غضباً عننا وبعدها ابوي قررر انو اعمل الأتاش في المدينه الفيها سياف وانا كالعادة وافقت، تاني اتعرفت عليك انتي بس اصطدمت لمن عرفت انك حبيبتو، كنتي طيبه شديد معاي وحتى عامليتيني كاخت ليك وانا كل ما اقول اكلمك بالحقيقة أتراجع عشان ما عايزة الصحبة البينا تنتهي سكتت مسافة تاني قالت نحن لو عايزين الخطبة دي تفتكري انو انا كنت حا اصاحبك ولا سياف كان بتعامل معاك تعاملو العادي ....مس كان انفصل منك ووراك الحقيقة ؟؟!، سكتت وما قالت حاجة قالت ليها دة ما مبرر تدسوا مني ،قالت ليها اي ما مبرر بس والله لو ختيتي نفسك محلنا احتمال تتقبلي،انا وسياف كنا خايفين بس والله لا اكتر ولا أقل واسي انتي عشان يرتاح قلبك وتعرفي انو الخطبه دي اجباريه انا حا اتصل بعمو محمد لانو ابوي في السجن وانهي الخطبة دي ،انا كنت بس محتار ليه ابوها في السجن، اتصلت بيهو وكلمتو ابوي ما أداها اي ردة فعل وقال ليها بس لمن يطلع عمر من السجن حا نشوف موضوعكم دة!، قالت ليها دي الخطوة الأولى تاني حا امشي اشوف ابوي واكلموا، ضحكت قالت ليها يعني اسي انتو بتنفصلو عشان ثبتو ما عندكم علاقة ببعض ؟؟!، قالت ليها لا انتي عارفة انو الانفصال قببل ما تعرفي اساسا فماف داعي لتعقيد الأمور، كونك تلقي الزول البتحبيهو والبحبك ما حاجة ساهلة فانتي ما تخربي على نفسك بسبب حاجة زي دي ونصحية ليك استعجلوا بالعرس فالحرام بمحق الحلال وتاني مشت مننا، ريم بعدها اتحركت بدون ما تقول لي اي كلمة وانا قولت ما اسالها نهاي.
بعد اسبوع وانا كنت عند وعدي ما كنت قاعدة اشوف مها بس بلاحظ لريم انو هي مهتمة بيها بعيد بعيد كانت بتطلب من ريان توصل ليها الاكل وتهتم بشرابها واكلها ،انا عارف انو اختاري صاح وعارف انو لو مشيت اي مكان تاني ما بقدر القى زي ريم.
ريم جات فجاءة وقالت لي مها جات ودعتني وسافرت بس انا ما قولت ليها انو سامحتها، قولت ليها هي عارفة انك سامحتيها ما تخافي، قالت لي انا سيئة والله، قولت ليها انتي ما سيئة ردة فعلك كانت طبيعية انتي بس زعلتي مننا لانو عندنا عندك مكانه وعشان الموضوع الدسيياناهو دة كان خطير، اتنهدت وقالت لي لمن تصل حا اتصل بيها، قولت ليها العايزة تعمليه اعمليهو.
____________________________
بلسان عمر ابو مها
=محمد انا لي كم هناا انت عايز اكشف كل الحقائق؟؟
_اصبر انت متهم بتهمة كبيرة
=البضاعة دي ما كانت بينا انت عايزني أجرك معاي
_عندك إثبات ؟؟؟
=هههه انت بقيت ما خايف شكلك مني انت قايل حا تقدر تشلني هنا، انت عارف انو انا مكلم بالمسند دة كم زول والله اسي تبقى على الحديدة طلعني!
_بشرط واحد بس انك تتنازل عن شرط كتابه البيت لبتك بعد العرس البيت دة بيت أسرة كامل كيف نكتبو لبتك
=انا ما بتنازل ليكم لو بتي كان بيتها انتو ما بتقدرو تحقرو بيها وما بتقدرو تطردوها لاي سبب، مها مسكينه واكيد لمن تتزوج ما بتوريني المشاكل الحاصلة معاها
_انت لو خايف عليها شرط تزوجها لسياف انا ياخ قولت ليك بدييك اراضي
=لااا انا عايز مها تعيش مبسوطة
_هي ما عايزة العرس دة هي اتصلت بي وقالت لي عايزة الغي الخطبة
=كلام دة ما صاح هي ما بتخالف لي طلب وبعدين ما تنسى انو انت الوعدت انك حا تزوج سياف لواحدة من بناتي بشرط انو اسكت وما افضحك
_ عارف بس بتك ما دايرة وهي براها حا تجيك وتقول ليك المهم انا حا اطلعك من السجن بس تاني مرة اوعى تحاول تصغطني بأمور تعجيزية البيت دة حق أولادي كلهم وانا ما بقدر اكتبو لبتك بس ولو ما عايز خلي المسند دة ينكشف وتكون انت خسرت اي حاجة! انت عندك شنو غيرو اصلاً.
طلع وبقيت افكر كلامو صاح دي الورقة الوحيدة المستعملة ضد محمد وبسببها على مر السنين عشت احسن عيشة واسي ما بقدر اخسرها حا اطلع واقنع مها تتزوج وتكون جزو من اسرتهم النفوذها واصلة.
بعد يوم طلعت والتهمة اثبت على الكان حابس المزرعة! ما عارف محمد اشتراهو كيف بس كل ال بعرفو انو الزول دة خطييير وانا مفروض تاني احذر منو .
رجعت البيت وبقيت قاعد جات مروة وقالت لي في جماعة هنا جو فتشو البيت بس انا دسيتو في حتة الجان ما بعرفها، قولت ليها انا عرفت انك قدر المسؤوليه دي ولو جات اي حاجة لي انتي حا تكوني خليفتي واكيد بطمن انو مها بقت من الأسرة دي،قالت لي ما بتجيك حاجة إن شاء الله تاني قولت ليها راجلك احمد وين ؟!، قالت لي الغبي دة ما عارفاهو وين ليه كم يوم مختفي، قولت ليها اطلقي منو ،قالت لي واولادي، قولت ليها أولادك بتربو لو مها اسي قالت ما عايزاه سياف تتزوجيهو انتي! ،ضحكت وقالت لي يا ابوي دا كلام شنو؟؟، قولت ليها محمد قال لي كلام غريب شديد ،قالت لي شنو، قولت ليها مها عايز تفسخ الخطبة ،قالت لي بزعلة عرفت حا يحصل كدة، هي ما حا ترضى وخاصة انو عرفت الحقيقة، قولت ليها حقيقة شنو ،حكت لي، قولت ليها الا على جثتي يرجع ليها ،قالت لي والله يا ابوي فكر شوية!! لو الأمور مشت كدة احتمال تكون لصالحنا، قولت ليها كيف، قالت لي محمد اكتر حاجة هاماهو في الدنيا شنو؟!، قولت ليها سمعتو، قالت لي لو طلقو بتو وبقت مطلقة حا يرضى، قولت ليها لا هو مرتو ما كان طايقها بس ما طلقها عشان الناس، قولت ليهو هل حا يخلي ندى تتطلق من ياسر ،قولت ليها لا، قالت لي طيب لو عرف سبب ياسر للطلاق البحصل شنو ؟!، قولت ليها يا بتي قولي العندك، قالت لي اسفة اسفة حا يحاول انو يزوج سياف لمها ،ضحكت وقولت ليها انتي ما بتعرفي محمد لو عرف انو مها عندها علاقة بياسر حا ياذي مها وما بخليها تتزوج ولدو ،صلحت قعدتها وقالت لي جد!؟، قولت ليها اي عشان كدة اسلم خطوة انو مها ما تحتك بياسر نهاي.
الباب دق فتحتو بت مروة الصغيرة كانت مها ،جات وحضنتني وقالت لي مشتاقين كيف قدرت تطلع من السجن، قولت ليها التهمة سقطت ،قالت لي عرفت انها حا تسقط ما سلمت على مروة وقعدت طوالي ،مروة ما اشتغلت بيها ومشت بس جابت ليها موية قالت ليها ما عايزة.
______________________
بلسان مها
ما كنت بقدر اعاين في عيون مروة نهاي، تاني عاينت لأبوي وقولت ليهو انا مفروض ما افتح الموضوع من جيتي طوالي بس ماقادرة لانو حا اتفجر لو ما قولتو انا ما عايزة العرس دة باي صورة من الصور!!! وحتى كلمت عمو محمد، قام وقال لي وانا ما بخليك، قولت ليهو والله لو ما وافقت اقتل نفسي وارتاح بس، قال لي اقتليها الخطبة دي ما بتتفسخ، قولت ليهو تمام مشيت جبت السكين، قال لي انتي مجنونة كنت برجف ومعرقة شديد قولت ليهو تلغيها ولا اقتل نفسي وارتاح كلو كلو، قال لي اقتليها، مروة قالت ليهو ابوي عليك الله وافق حا تقتل نفسها ،قال ليها تقتل شنو دي بتخوف فينا انا ما عندي بت بتخالف أمري، قولت ليهو بكذب يعني تمام بديت اقطع الوريد ألفي يدي ،مروة بقت تصرخ وتقول اسي دمها كلو بتصفى ، ابوي قال لي وقفي انا موافق اتصل بمحمد وقال ليهو الخطبة اتلغت.
جدعت السكين جات مروة ولفتو لي بقطعة قماش ودخلت بي قالت لي اشكريني انا لو عايزة اكشف تمثيلتك دي كنت كشفتها في زول عايز يقتل نفسو بجرح روحو جرحة سطحية ما كان تدخلي السكين البطن ، قولت ليها ما تتكلمي معاي+ليه اموت وانا كافرة انا كنت عايزة أخوف ابوي بس ونجحت!، قالت لي طيب سامحيني وقت انا غطيت عليك وما كشفتك انا غلطانة شديد واسي اعترفت ليك بغلطتي ،قولت ليها ما بقدر اسامحك انتي سلبتي مني سعادتي اطلعي من هنا، طلعت بدون ما تقول كلمة مروة غريبة شديد ،رسلت لريم وقولت ليها انتهى اي حاجة وانا بقيت حرة، قرتها وما ردت تاني ردت بعد مسافة وقالت لي كيف اقتنع حكيت ليها بريكورد وقفلت.
_________________
بلسان ياسر
الباب دق لقيتها ندى ومعاها شنطتها قالت لي معقولة اعرف من الغريب انك شاكلت اهلك واجرت بيت وكمان ولا فكرت انو ترجع لي وتقول لي انا جيت، قولت ليها منو الكلمك، قالت لي دة كلو الهاميك ما على اساس قولت انك حا تغيب شهر بس يبدو كنت عايز تبعدني عشان ما اسمع مشاكلكم انت ما معتبرني فرد من الأسرة ولا شنو ،قولت ليها دا موضوع ما عندك فيهو اي دخل، قالت لي انا مرتك ومفروض تعتبرني من الأسرة ،قولت ليها في حاجات ما مفترض تعرفيها لانو ما ليك دخل بيها ، قالت لي طيب تمام بس مستحيل اخلي اهلك عشانك، قولت ليها ديلك اهلي امشي ليهم متى ما عايزة وعايزك تعرفي حاجة تانية انا كنت طول الاسبوع الفات بفكر فيها ،قالت لي شنو؟؟!، قولت ليها علاقتنا انا وانتي، قالت لي علاقتنا ؟!، قولت ليها اي علاقتنا، قالت لي كيف ما فهمتك، قولت ليها علاقتنا من البدايه كانت هشه عشان كدة انا وانتي لازم ننفصل انا ما قادر انسى البت البحبها وعايز اتزوجها............