رواية دون أن أشعر
الفصل الثامن عشر 18
بقلم ال زهراء
قولت ليها انتي قولتي سياف اختار حياة تانية معناتو خانك مع ام مدرك الحاليه صاح ،قالت لي لا ،قولت ليها ايوا طيب ام مدرك منو ؟؟!، قالت لي معقول ما عارفة، قولت ليها تصدقي سالت سياف وما كلمني، قالت لي ولا انا حا اكلمك اعتبريه عقاب عشان حظرتيني قامت، قولت ليها طيب ما تتكلمي يا غتيتة، ضحكت وقالت لي اسألي اي زول شرط نحن، قولت ليها ما هاميني الموضوع، بقيت ماشة قولت ليها وقفي على وين، قالت لي راجلي بكون جاء مفروض نطلع عشان نحصل بدري! البت دي تلقيها انشقت بكاء أصلها متعلقة بينا وخاصة ابوها، قولت ليها شوفي الزعل والغيرة وانتي بتقولي كدة ،ضحكت وقالت لي واضحة موش بس بالجد سامر راجل ماف منو وليها حق تتعلق بيهو اكتر ،قولت ليها ربنا يخليكم لبعض، قالت امييين وطلعت.
في اليوم التاني مشيت المستشفى ودخلت غرفة المدير الطبي!، لقيت دكتور يس ماف وفي سياف بعاين في ورق!، كان زهجان شديد قولت ليهو دكتور سياف، رفع راسو، قال لي لشنو ما دقيتي الباب، قولت ليهو دقيت بس انت ما سمعتني، قال لي طيب اطلعي انا مشغول ،قولت ليهو بالنسبة لدوامي... ، قاطعني وقال لي انا عندي الف شغلة في راسي غير دوامك لمن يجي يس خليه يشوف ليك، قولت ليهو طيب امشي البيت عدن شايفاها جات ولا انتظر دكتور يس يمكن يجي ،قال لي يس ما حا يجي طول الاسبوع دة، قولت ليهو يعني انتظر لمن يجي ولا انسق معاها ولا كيف، ما رد!، قولت ليهو يا مستر، ضرب الطربيزة وقال لي بحس عالي يا مها ما تزعجيني، قولت ليهو انت بتصرخ فيني مالك!!، كنت مضايقة بقيت ما بستحمل عديل الصراخ! ،اتنهد وقام وبقى يمسح في وشو وقال لي طوالي اسف كنت مضغوط اعذريني، الحسابات دي كلها طلعت غلط في حاجة حصلت في ال6 شهور وانا اسي لو ما جيت صدفة افتش في ورقة في مكتب يس ما كنت شوفت ولا عرفت حاجة ، عاينت ليهو ظاهر كان غضبان ومقلق،قولت ليهو شاك في زول، قال لي شاك اي بس إن شاء الله يطلع شكي ما في محلو!، انا الزول دا مامنو على اي حاجة هنا، قولت ليهو اهدا الخيانة من اقرب الناس ليك حارة بس اتعلم انو ما تثق بزول كامل الثقة، واتوقع اي حاجة من اي زول في اي وقت ، قعد وخت يديهو في راسو وقال لي معقول جزاء المعاملة الكويسة والمساعدة طعن في الضهر!، قربت وقعدت وقولت ليهو أجرك محتسب عن رب العالمين ،وكونو الزول ما قدر الحاجة دي وطعنك في ضهرك يبقى هو مريض!،و النفس البشرية امارة بالسوء، وفي ناس طماعين وما بعرفو الزول دا احسن ليهم ولا بعرفو حاجة،والله لو فلست ما عندهم شغلة بيك المهم مصلحتهم ،قال لي اي كلامك صاح!، انا اسي حا اراجع الورق دا تاني واشوف القروش الماف دي مشت وين!، واي زول مشترك في الأمر دة حا يتحاسب، قولت ليهو عايز مساعدة!، قال لي بتقدري!، قولت ليهو كونو اني ما موزعة ممكن ابقى محاسبة مؤقتة ،ضحك وقال لي ما انو الورق دا ما مفروض زول يشوفو غير الماليه بس ماف مشكلة انتي ما غريبة!، كلامو دة فرحني ما عارفة ليه شلت الورق وبقيت احسب واضرب في مبالغ طلعت ناقصة شدييد!، وفي كمان حسابات مفروض ما يكونن متساويات وكلهن متساوين يعني اليوم الأول المبلغ الكلي حق دخل المستشفى زي المبلغ ألفي اليوم التاني وهكذا، المهم قولت ليهو المبلغ الناقص بكون قريب.... مليار ،دا اختلاس عدييل وبالمعنى الصريح! ،قال لي طيب نشوف المبلغ دة مشى وين؟؟!، اتصل بي زول وقال ليهو تعال لي في غرفة المدير الطبي، قومت وقولت ليهو بخليكم براحتكم قال لي اقعدي وسكت ،قعدت وبقيت احلل في راسي في نقطه انا فايته علي بقيت افكر،الباب دق دخل واحد ممكن يكون في بدايه التلاتينات!!، قال ليهو الحسابات دي كلها غلط يا كمال، كمال دا شغال يعرق ساي وقال ليهو حا نعمل مراجعة ليهم تاني وبنوضح ليك اي حاجة، انا طوالي مخي دا فهم القصة اخيرا، فقولت ليهو عشان تصحح الاغلاط صاح ،انا متأكدة انو حتى الورق الفي يد سياف دة مصلح والقروش الضايعات اكتر ،انت كنت مفكر انو الحا يراجع الورق دكتور يس الشهر دا برضو عشان كدة اطمنت، وللشهر الجاي اكيد انت ودكتور يس حا تلقو حل لانو طبعا اكيد ما حا تكون مختلس براك والتقارير كلها بتصل ليس بقت كل شهر واكيد هو عارف الموضوع وعارف انو سياف ما حا يطلب يشوف الحسابات عشان واثق فيهو والسنه الجديدة اكيد انت وهو كنتو لقيتو طريقة واتخارجتو من القصة بس للاسف سياف جاء بالصدفة وشاف ودا ما كان في الحسبان ،عاينت لسياف وقولت ليهو انت ما شاك في الزول دا من الاول انت شاك في يس صاح، عاين لي وسكت وتاني قال لكمال اطلع انا حا اعمل مجلس محاسبه بنفسي واي زول كان عندو يد في الاختلاس دة حا يتفصل وحا يتحاسب على الجريمة، انخلع خلعة وبقى يبرر ويقول دا من دكتور يس انا...، قاطعو وقال ليهو ما اسي بسمع تبريراتك اتخارج،طلع ،سياف رجع راسو لوراء وكان باين انو زعلان،قولت ليهو انت مفروض تفرح ربنا نصرك وخلاك تشوف الحقيقية ،قومت كان في سخان عملت ليهو قهوة واديتها ليهو قولت ليهو مستر سياف انت اكبر من انو تضايق من واحد زي يس انا اصلا حسيتو كعب الزول دة من عيونو الخبيثات ديل ،ضحك وقال لي بالعيون الشغلة طلعت!... المهم يا مها انتي طلعتي ذكيه وكل الكلام الكنت عايز اقولو قوليهو وحتى عرفتي اني قاصد يس ،يس بالرغم من انو أصر يراجع براهو الحساب الشهر دا كنت مامن فيهو وما قولت ليهو لا بس ربنا أراد اكشفهم ،قولت ليهو سبحان الله انت لحدي اخر لحظة كنت واثق فيهو انا فهمت كل حاجة في ساعتها وشوفت الأمور دي بعرفها لانو مصاحبة ناس المحاسبه ،وبعرف نظام المستشفيات الخاص فحللت وحللت ووصلت للنتيجة دي،قال لي عشان شطارتك دي انا عندي ليك جائزة، قولت ليهو شنو ،قال لي عارفة انو المدير الطبي ممكن يبقى اي زول ، فانا فكرت انو انتي تستلمي الشغلة دي، قولت ليهو فكرة كويس بس ما بفضل حياة المكاتب انا عايزة اعالج المرضى، قال لي ايوا تفكير منطقي برضو حا افتش زول والمرة دي حا أحرص انو يكون كويس ، قولت ليهو اسمح لي أعمل حاجة واحدة بس قبل ما اطلع ممكن، قال لي عايزة تعملي شنو ، زحيت الاسم الكان مختوت في الطربيزة وجدعتو في السله، قولت ليهو المكتب دا عايز تعقيم من الخساسه والخباثة، ضحك وقال لي اديتك الأذن دكتورة مها ،قولت ليهو تمام بس ماش وين، قال لي مشوار، قولت ليهو وين؟؟؟!، قال لي حب الاستطلاع دا احسن تبطليه، قولت في نفسي ثقيييل، تاني قولت ليهو مستر سياف ممكن انسق مع عدن براي، قال لي ممكن، مشيت قالت لي أحد وتلات وخميس ،قولت ليها طيب.
الليله عشان الاتنين قررت ارجع بدري لقيت اتصال من علام رجعت ليهو قال لي فاضية اليوم، قولت ليهو راجعة البيت بس لو قريب ممكن نشرب قهوة، قال لي طيب دقائق ،جاء ومشينا كافيه قريب المستشفى لقيت هناك سياف ومعاه امو ومعاه مرام ومرة كبيييرة ،عاينت ليهو وهو عاين ونزل عيونو طوالي ،قال لي علام حا اسلم على الجماعة ديل!، قولت ليهو طيب انا منتظراك، قعدت جاء وقعد قال لي الناس ديل شكلهم عايزين يتفقو على عرس مرام وسياف، قولت ليهو ليه يعني في مكان عام ما احسن في البيت، ما لقو الا هنا، ضحك وقال لي سياف ما كان جاء لو في البيت ،اكيد غشنو عشان يجي هنا، قولت ليهو هي مرام منو وامها منو ؟؟!، قال لي ديل نسابه اختو الله يرحمها ،ختيت كوبايه الموية من يدي وقولت ليهو اختو ماتتت ندى!!!، قال لي اي والله للاسف!!، هي وكمان راجلها بهاء يلي هو اخو مرام!، قولت ليهو لا حول ولا قوة الا بالله العلي العظيم ،كيف لكن!!؟، قال لي متذكرة كان في حادث مشهور في طريق الدبه، كان بين دفار وعربية! ،قولت ليهو اي سمعت بيهو بس ما كنت مفكرة انو ديل هم ،لا حول ولا قوة الا بالله العلي العظيم ،متين؟!، قال لي ياااخ طول قريب ال4 سنين خلت مدرك دة عمرو شهور بس، الحمدلله الوقت داك ما كان معاهم في العربية والا هو كان مات ،دمعت!!! ودنقرت راسي!! قولت ليهو يا حليلو مدرك ويا حليل ندى!، اتنهد وقال لي كان موتها قاسي على امها واخوها وابوها بس تاني تصبرو واحتسبو ،الحمدلله انو عندهم ولد شايل اسمهم،قولت ليهو اي الحمد لله بس زعلانة عليها، ما بتكون عاشت فترة مع زوجها ولا ولدها، قال لي اي بس دة قدرها صاح!، قولت ليهو اي صاح بس مدرك يا علام مستوعب انو اهلو ماتو ؟؟!، قال لي عارف!، وحتى لو سالتيهو وقولتي ليهو ماما ندى وين، بقول ليك في الجنة، قولت ليهو يا حليلو والله، برئي شديد،الحمد لله انو لقى حبوبة طيبة وخال طيب ،قال لي اي سياف وخالتو تهاني ما قصرو منو!!، حتى انو بقول ليهو بابا وسياف معتبرو ولدو واتحمل مسؤوليتو من هو شافع هو ووامو ،قولت ليهو الحمد لله!!، قال لي اي المهم عايزة اطلب ليك شنو مع القهوة، قولت ليهو ولا شي، قال لي ولا شي كيف، قولت ليهو نفسي اتسدت، قال لي يا متأثرة أنتي ،دنقرت وقولت في نفسي الدنيا دي فيها ماسي كتيرة خلاص، جاب القهوة وبقيت اشرب فيها بسرعة، قال لي براحة!، ما اشتغلت بيهو، قال لي اسمعيني انتي اطلقتي ليك كم ؟!، قولت ليهو لي قريب السنة ونص بعد كدة بس عرفت كيف انو اصلا مطلقة، قال لي وصلني خبرك ما عايزة تتزوجي تاني ،عاينت ليهو وقولت ليهو قفلت الباب دا، قال لي حتى لو جيتك انا حا تقفلي الباب!!؟، عاينت ليهو في عيونو ووقولت ليهو ايوا ،قال لي صريحة بس انتي اديني فرصة!، قولت ليهو ما عايزة اخوض اي تجربة زواج تاني ،قال لي اسي انا زواجي الأول كان فاشل بس لسه عايزة اتزوج، قولت ليهو دة انت لكن انا لا والعروسات في كتار، قال لي انا عايزك انتي لكن!! ، قولت ليهو انت بتعرفني من وين عشان تقول عايزني اتكلمنا مع بعض متين اخر مرة ،قال لي ما ضروري انا بعرفك من زمان واسي رشحوك لي وانا فرحت لمن عرفت انو ممكن يكون عندي فرصة معاك! فقولت اشوف رأيك، قولت ليهو دا منو الفارغ الرشحك لي دة، قال لي حسام متذاكراهو الكان شغال معانا، قولت ليهو هو عامل جلحاتو ديل لو اشتغل بنفسو ما كان احسن شغال خطابة، ضحك وقال لي انا سالتو اذا عندك لي عروس من مجالي ، فرشحك لي انتي وانا كنت عايز اتواصل معاك بس لحسن الحظ تطلعتي في السودان اصلاً،قولت ليهو انا اسفة والله يا علام بس ما بقدر اتزوج تاني ،قال لي انتي لسه صغيرة ولسه الحياه قدامك ويزن على عيني وراسي!! وبعتبرو ولدي، عاينت ليهو وقولت ليهو الحكايه ما في يزن يزن ما بوقفني انا بالجد ما عايز اي علاقة تاني!، كفايه التجربة الأولى، قال لي كدة حا تضيعي نفسك!، قولت ليهو لا ما بضيع العرس ما ضروريه قصوى وما بضيعني اطمن انا بضيع اذا اتزوجت،ضحك وقال لي صعبة لكن انا مصر علييك، عاينت فيهو وقولت ليهو علام انت لسه صغير والله كل البنات ديل يرضن بيك، داير بمطلقة وعندها ولد شنو؟؟؟، قال لي يا زولة عاجباني انتي مالك، انا والله لمن رشحك لي لمن قلبي دة طار من الفرح!، وقولت أطلقت متين! ،عاينت ليهو وقولت ليهو كنت معجب قديم ولا شنو ،قال لي ايوا والله فكرت أتزوجك عديل في مرتي بس اتزوجتي بعد فترة وقعد يضحك، لمن شافني بقيت اعاين بصدمة ،ضحك وقال لي بهظر بهظر!، المهم انا بديك وقتك للتفكير وفي فترة تفكيرك دي بثبت ليك انو انا الزول المناسب، قولت ليهو عشان امشيه تمام بس قولت في نفسي موقفي ما بتغيير!، عاينت للطاولة الفيها ناس سياف لقيت انو سياف قام ومرام وامها وام سياف قاعدات!، قومنا وطلعت برة ،قال لي اوصلك قولت ليهو شكراً ليك، قال لي مها ما تبقي صعبة، عاينت لقيت عربيه سياف واقفه عشان اهرب منو مشيت ليها ودقيت الشباك لقيتو مدنقر راسو على الدركسون ،قولت ليهو مستر سياف مستر سياف ما اشتغل بي، جاء علام وقال لي شكلو نايم ورح!!، قولت ليهو برد علي زمان!!، مستر سياف هووووي!!، ما رد فتحت الباب بخلعة ولكزتو وقولت ليهو سياااف مالك ؟؟؟؟، عاين لي وقال لي لو الزول عايز يكون في حالو ما بخلوهو ما عايز ارد عليك بس، ضربات قلبي هدن وقولت ليهو الحمد لله ،مشيت بالجهه التانية وطلعت في العربيه عاين لي باستغراب، قولت ليهو مش قولت عندنا اجتماع اسي يلا ورح، قال لي اجتماع اجتماع شنو ،علام كان واقف وعشان الكضبه تتصدق ،قولت ليهو انت القولت انا القولت يلا دور العربيه وخلينا نمشي ،قال لي انتي مجنونة انا...، فتحت قارورة الموية وقولت ليهو اشرب اشرب وما تصرخ شكلك نستيو في اجتماع وشغال اغمز ليهو ،مافهم!!، قولت ليهو اوريك الرسالة دقيقة كتبت سريع خارجني من علام واديتها ليهو قراها وعاين لي! ،تاني قال لي تمام ، دور العربية علام جاني بهناك وقال لي فكري كويس تمام، كشا العربية بسرعة قولت ليهو حا نعمل حادث انت ما بتتوب قبل 6 شهور عملتو!! متهور!،قال لي انزلك!!، قولت ليهو لازم ترد الكلمة بالكلمة!!، نزلني!!!، عاين لي وبطا السرعة وقال لي اسف البيت صاح، قولت ليهو اي، قال لي تمام بس اسالك سوال ليه هاربه من علام، قولت ليهو اقترح علي اقتراح وانا ما عجبني، قال لي شنو شغل؟ ؟؟!، قولت ليهو يا ريت لو شغل عايز يتزوجني وانا بصراحة ما مفكرة اتزوج نهاي ،عاين لي مسافة وقال لي نهاي، قولت ليهو ايوا انا شوفت باقي عمري دا لولدي بس ،قال لي ايوااا،تاني جاهو اتصال من امو، ركب السماعة وقال ليها ما تجي المستشفى انا هناك ماف وبعدين موضوع ما اقتنعت بيهو لي 4سنة اقتنع بيهو اسي كيف ،بعدها ضحك و قال ليها حنكك دا ما عايزة تغيرة يا حاجة!!!، ياخ ليك أربعة سنين بتقولي نفس الكلام، مرام شنو عليييك الله، والله لو بقت اخر بت ما اتزوجها، قال ليها تاني ما يقول فترة وبنسى كلمة ماما دي دة اذا هي ما العلمتو ليها اصلا ،قال ليها تحب لي شنو انا نفسي زاتي ما بحبها!!!، ضحكت لمن قال كدة!!، عاين لي سكتا، قال ليها بعدها عليك الله يا أمي فكيني من السيرة دي، بعدها قال ليها ما شاء الله البديل طوالي اختها يا أمي عليك الله انسي انسي انا نسب معاهم ما داير ما من مرام والله عشان ما تتعقد البت، بعدها قال ليها بت منو؟؟؟ رونق ولا هيام ، قال ليها تاني والله انا امس الحصل فيهو ما بتذكرو اتذكر ليك انو لاقيتها قبل كدة، شكلها قالت ليهو لازم تشوفها، لانو قال ليها تمام لو فضيت بتصل بيها وبحدد معاها وقت عشانك يا ست الكل، قفل الخط ،قال الأمهات وقلقهن ،قولت ليهو طبيعي ياخ ماف ام ما بتتمنى انو ولدها يعرس ،انت زاتك طولت، قال لي ما لقيت بت ماليه عيني وقال كلام في سرو ما قدرت افهمو، قولت ليهو ريم زمان كنت بتحبها ما كانت ماليه عينك، قال لي ما قولت ليك طلقتني،ضحكت وقولت ليهو لانك شوفت درب غيرها، ضحك وقال لي قالت ليك كدة ولا شنو، قولت ليهو ايوا يا خاين كل الرجال زي بعض ،ضحك وقال لي دة درب بستاهل لكن صعب وموقفني للان في نفس النقطه ،قولت ليهو منو عليك الله ،قال لي اكلمك لشنو يلا انزلي وصلنا، نزلت عاين لي ومشى.
مرن اسبوعييين وعلام يحاول معاي وحتى بقى يجي ليزن في الروضة، ويلعبو لمن يزن بقى يحبو واتعلق بيهو ،وبدييت اغيير راييي نوعاً ما ،مشيت لسياف ودقيت الباب دخلت قولت ليهو عندك معاك موضوع، قال لي شنو، قولت ليهو راييك شنو في علام، قال لي من اي ناحية، قولت ليهو كزوج لي،سكت ومارد وبقى بس يعاين لي تأني قال لي رايي الناس ما بنفع لانو اي زول بشوف الزول التاني حسب تعاملو ليه ،انتي شايفه الزول المناسب وحاسه بالراحة معاه؟؟؟، قولت ليهو ولدي مرتاح معاه، قال لي بسالك انتي مرتاحة معاه ما سالتك عن ولدك، قولت ليهو ولدي كونو مرتاح يبقى انا زاتي مرتاحة، قال لي طيب دي ما عايزة استشارة اتفضلي برة انا وراي شغل................
اللهم صل على محمد عدد ما ذكره الذاكرين وغفل عن ذكره الغافلين..