رواية دون أن أشعر
الفصل التاسع عشر 19
بقلم ال زهراء
قولت ليهو ولدي كونو مرتاح يبقى انا زاتي مرتاحة، قال لي طيب دي ما عايزة استشارة اتفضلي برة انا وراي شغل، قومت وقولت ليهو شكرا على لا شي، عاين لي بغصب وقال لي انا صاحبك ولا اخوك تتعاملي معاي كدة، يلا اتخارجي وتاني ما اسمع منك كلام زي دة نهاي، قولت ليهو هل انا اول مرة اتكلم معاك كدة ما هو طول الفترة...، قاطعني وقال لي من الان وصاعدا ما تتكلمي معاي كلام خارج نطاق الشغل، قولت ليهو طيب مستر سياف!،طلعت وانا مضايقة ضيق شديد ،المغرور المنفسن ،مشييت وانا بطنطن لاقييت بت داخلة وقفتني قالت لي مكتب دكتور سياف ويين، قولت ليها جوة!، قالت لي تمام، بعد فترة جات هي وسياف!، سياف قال لي دي رونق حا تشتغل هنا فترة فحا تديها منك يوم ومن عدن حا تشيل يوم !، قولت في نفسي دي نفسها رونق القالت ليهو امو قابلها ،كانت جميله ورقيقة،قولت ليهو طيب!، رونق قالت ليهو المستشفى دي جميله! عايزة لفة فيها سياف ممكن تمشي معاي ،قولت لروحي سياف عديل دا لو انا كان قطع رقبتي بس بناساتو!، قال ليها تمام يا رونق، قولت في نفسي اسي يا حيوان ما طاردني عشان عندك شغل ولا فضيت لباربي دي،عاينت قوي، قال لي دكتورة مها في حاجة عايزة تقوليها، قولت ليهو لا، قعدت وهم طلعو.
بالمساء كدة رجعت البيت وبقيت افكر!، انا ما عندي اي مشاعر اتجاة علام بس زول مقدر ولدي!، ولازم اراعي للحاجة دي ،المهم حا استخير.
صباحية اليوم التاني اتصلت بي مروة ما كنت دايرة ارد بس قولت خليني اشوفها متصله بي بعد الفترة دي كلها، ردييت، سلمت وقالت لي عايزة اشوفك انا طولت منك وبعدين المرة دي تاني ما عايزة تكلميني بعرسك ،قولت ليها اي عرس دة ؟!، قولت ليها مش دايراك واحد اسمو علام ،قولت ليها القال ليك منو، قال لي هو اتصل بي وطلبك مني، قولت ليها دة مجنون والله، انا ما وافقت بيهو لسه، قالت لي ما حا تلقي احسن منو، هو طيب والله، قولت ليها طيب كيف عمل ليك شنو انتي ما بتقولي طيب ساااي ،قالت لي بري والله ما عمل لي حاجة!، قولت ليهو بعرف انا، قالت لي اساليهو انا اتادبت، المهم انت عايزاهو ولا لا، قولت ليها لسه ما قررت مع السلامة،قفلت وبقيت افكر.
بعد اسبوعين سياف تعاملوا اتغير وكان رسمي شديد،وانا كدة مر فيني وكالعادة اكتفى بقول السلام عليكم ،قولت ليهو وعليكم السلام، دخلت جوة! جات رونق قولت ليها يومك ما الليله لسه ما حفظتي، قالت لي انا اتعيينت مدير طبي، قولت ليها نعم ؟؟!، قالت لي قولت احسن!!، قولت ليها سياف وافق، قالت لي اي وافق!، المهم ارجعي لايامك!، قولت ليها حاضر!، تاني قالت لي دكتورة مها راييك شنو فيني الليله الطرحة دي مناسبه والمكيب واللبسة ،عاينت ليها وقولت ليها مناسبات وحلوات شديد ، قالت لي طيب تسلمي!!، حا امشي لسياف عشان اعرف الشغل، في البريك مشيت عشان افطر لقيتهم يفطرو، بقيت اكل وعملت نفسي ما شايفاهم والتفت منهم ، رجعت المستشفى وبقيت قاعدة في الطواريء، جات رونق وكانت عايزة تشيل جهاز الضغط ومستعجلة، قولت ليها مالك؟!، قالت لي سياف زي الما واعي وعندو حمة شديدة،انخلعت شديد ودقات قلبي زادت جريييت جري لمكانو!!!، لقيتو خات راسو في الطربيزة مشيت عليهو قولت ليهو سياف سياف!!، ما رد، قولت ليهو بحس عالي سياف قوم ياخ!، رفع راسو وقال لي مالك بتصرخي؟!، قولت ليهو كويس انت، قال لي شايفة شنو انتي !،ما رديت وبقيت اعاين فيهو، رونق قاست ليهو الضغط لقيتو عادي ،قولت ليهو انا حا اجيب حقنة واجي اشيل منك دم عشان الفحص ، مشيت وجبتها وطوالي شلت دم منو رونق تاني ادتو حبة بندول وانا شلت الدم ووديتو المعمل ،جيت وقولت ليهو انت اكلت معاهم صاح!، ردت لي رونق وقالت لي اي اكل ، قولت ليهو كويس بس يا سياف باين عليك انك مرهق شديد ما قاعد تنوم بانتظام؟؟! ،قال لي ما تسأليني ما قادر اتكلم اطلعي !،ما اشتغلت بيهو و جبت ليهو موية قولت ليهو سياف اشرب طيب !، قال لي شنو سياف سياف اطلعي ما عايز منك اي خدمات ،رونق قالت لي خليه براحتو يا مها انا قاعدة معاه، عاينت ليها وعاينت ليهو كنت عايزة اخت الكوباية وقعتها وكسرتها بقيت الم في القزاز!!،لاني كنت مغبونة ما انتبهت وانجرحت جرحة كبيرة! ،قومتا والدم ينقط مني ،رونق قالت لي يدك بتنزف قولت ليها اي انجرحت اسي بمشي الفها ،سياف قام وجاء علي ومسك منديل وختاهو قي يدي وضغطتها قال لي بغضب انتي ما بتشوفي اسي دمك دا كلو اتصفى يا غبية، فرحت بغبية اول مرة بعد فترة ما يتكلم برسمية معاي، قال لي بتوجعك ؟؟!، قولت ليهو اي ، قال لي احتمال في قطعة قزاز جوة لسه ورح معاي اشوف ليك الحاصل فيها. قولت ليهو انت عيان ارتاح، قال لي البندول خفف لي الحمة! ،ما عندي حاجة ورح!، مشيت معاه قال لي لو حرقتك كلميني انا حا اشوفها لو فيه قطعة قزاز، قولت ليها تمام ما حرقتني تاني عمقها ولفاها ،الممرضة قالت ليهو الرجال ببكو من نضافتك، غريبة انك رافت بمها ،ضحك وقال ليها البت دي بعرفها انا ما بتستحمل، مشت، قولت ليهو القال منو ما بستحمل، قال لي انا، المهم انتبهي على نفسك وتاني اوعي اشوفك تلقطي في قزاز ، قولت ليهو تمام يا سي...، ما قدرت اتم اسمو لانو خوفت يصرخ فيني زي قبيل، قال لي مها ليه سكتي في حاجة ،قولت ليها لا يا مستر شكراً جزيلا على كل حاجة، قال لي العفو انا حا امشي، انتي ارتاحي، قولت ليهو ماش وين؟!، قال لي وين يعني حا انتظر نتائج الفحص واشيل العلاج واتخارج،قولت ليهو طيب! ما تهمل صحتك ونوم كويس ،ما رد وطلع! قولت في نفسي احسن يرصنني وما يعمل معاي كدة، السخيف الكرييهه تجاهلو لي قاطع قلبي عديل!،بعد فترة مشيت وقولت لي بتاعت المعمل نتيجة دكتور سياف طلعت، قال لي طلعت وشالتها رونق ،قولت ليها عندو شنو ،قالت لي ملاريا وتايفويد تقيل ،قولت ليها الصفايح كيف، قالت لي ما نازلة!، المهم يبلع الحبوب ولو ما راحت تاني يفحص ويتأكد ،قولت ليها اي مفروض!، مشيت ودقيت باب مكتبو، رونق قالت لي اتفضل!، دخلت جوة لقيييت انو هي خاتة ليهو كنافة ومعاها عصير وتحنس فيهو!،قولت في نفسي انا الجابني شنو، قولت ليهو سمعت النتائج طلعت وطلع عندك ملايا الف سلامة عليك، قررت اطلع سريييع قال لي مهاا تعالي!، قولت ليهو عايز حاجة ،شال لي عصير واداني ليهو قال لي عوضي فقد الدم ،قولت ليهو هو بسسيط وماف....، قال لي مهاااا شيليهوو قولت ليهو لااا، قال لي لااا لا لشنو ،قولت ليهو بس كدة، قال لي طيب براحتك!!، رونق شالتو وقالت ليه انا بشربو لو هي ما عايزة انت اشرب باقي عصيرك، ما اشتغل بيها،انا طوالي طلعت، بتاع الدليفري اتصل بي مشيت وجبت العصير الطلبتو!!!، جاء هو وقال لي دة من علام ولا شنو، قولت ليهو اي عندك مانع!!!، ما رد.
في اليوم التاني سمعت انو مشى مؤتمر في سويسرا، قولت في نفسي سياف عابر والله.
عدا شهر عديل من غير ما اشوفو وانا من شدة ما اتعودت على شوفتو حتى لو ما بعاملني زي الناس لمن حسيت بالفراغ ،رونق كل يوم وبتجيني وتقول لي شوفي سياف متصور وين ،وشوفيه متصور مع منو، وكل مرة بقفلها وبقول ليها ما بهمني!، وانا كدة جاتني وقالت لي وااي يا مهويه سياف متصور مع بت شقرا عشان كدة ما اظن يجييي وبعدين هو بوجاهتو وشخصيتو دي حا تحبو الكافرة ،ضحكت عليها كانت متازمة، قولت ليها ما تشتغلي بالفارغة امشي اشتغلي شغلك!!، المهم انا بعد مدة ما قدرت اقاوم فزحيتو من قائمة عدم الرؤية، فتحت الصورة لقيتها اجنبيه وماسكة من كتفو!!!، رسلت ليهو ما بتجي بعد كدة وخاصة بعد لقيت ناس كتفي بكتفك دي، كنت مغيوظة شديد، شافها طوالي بس ما رد !، رسلت ليهو عامل ليها سييين وبرضو ما عايز ترد ولا ما فاضي قاعد معاها، ما رد، قولت ليهو عمرك ما ترد.
بعد يومين سمعت انو جاء فرحت وما عارفة ليه قولت حا يجي المستشفى ولا لا، مشيت هناك وبقيت قاعدة في الطواريء جاء وسلم على كل الناس، ولمن وصلني سلم علي سلام بارد كالعادة وبقى يتجاهل فيني لمن اسالو وحتى جاب للناس هدايا الا انا، زعلت زعل شديييد!!، ومشيت دقيت ليهو الباب قال لي اتفضل، اتفضلت قولت ليهو نفسي اعرف مالك معاي ،قال لي مالي، قولت ليهو ايوا مالك و ليه بتعاملني كدة بقيت، قال لي ممكن توضحي ، قولت ليهو دايما بقيت بتتجاهلني ولحدي اللحظة دي وحتى ما جبت لي هدايا زي الناس، قال لي ايوا همك الهدية فتح الدرج وقام جاب لي ساعة وقال لي هاك يلا اتخارجي!!!، لمن قال كدة دموعي دي جرت شلال شلال ،قولت ليهو انا ما عاتبتك عشان الهدية والله عاتبتك بس عشان تعاملك معاي القاسي دة بس ما كنت مفكرة انو ممكن تفكر انو عشان هدية، عاين لي ومسح وشو وجاء قال لي بعتذر ما تبكي!!، طلعت من غير ما اقول كلمة انا عويرة ولا بتعاور وبصفتي منو اجي كمان اقول ليهو ليه بتعاملني كدة، ركزي بس في شغلك وانسيهو اللئيم ،ما قدرت وقولت انقلب السحر على الساحر!!!، زمان بكرهو، اسي هو البقى يكرهني وما بطيقني!!! والفكرة دي ما قادرة اتقبلها، رقدت في طربيزة المكتب وبقييت مكتئبة شديد ،جات رونق وبقت تتفاخر بهديتو! ،قالت لي انت جاب ليك شنو؟؟!،قولت ليها هو بجيب للناس المهمين عندو انا هنا مجرد دكتورة شغاله في المستشفى حقتو، قالت لي والله معظم التيم العامل جاب ليهم واصلا هو قالو من زمان دة طبعوا بس غريبه ما يجيب ليك، قولت ليها انتي عايزة تزيدي علي المواجع ولا شنو يا رونق!!، ما جاب ما يجيب في ستييين انا ما هاميني، قالت لي تمام!!، قومت وقولت على الطواريء اسي يلوموني!!، بقيت مشغولة شغلة شديدة وما ركزت مع الموضوع!، لمن الساعة 5جات، رجعت البيت طوالي!!!، وهناك بقيت مكتئبة ،مروة اتصلت بي علاقتنا اتحسنت نوعاً ما مرات بتجيني ومرات بمش ليها ،رديت سلمت وقالت لي انا لي فترة ما فتحت معاك الموضوع وخليت تاخدي رأيك بس ليه لسه معلقة الراجل، ورد ما بتردي عليهو!!!، قولت ليها اي راجل دة، قالت لي علام نسيتي ولا شنو الشاغل قلبك شنو، قولت ليها الشاغل قلبي كتيررر ،قالت لي مالك؟؟! حصل حاجة!!، اتذكرت طوالي سياف وتصارفاتو وبكيت ليها في التلفون، قالت لي يا بت مالك؟؟!، قولت ليها ما عارفة!!، قالت لي بسم الله حصلت معاك حاجة في الشغال، سياف سالك، قولت ليها لا بس نفسي اسالك سؤال المشاعر ممكن تتغير، قالت لي اي ممكن بس ليه بتسالي السؤال دا، قولت ليها ولا لأي حاجة حا اقفل، قالت لي مها الله يرضى عليك ما تقفلي وتخوفيني مالك، قولت ليها شكلو انا بقيت حساسه زيادة عن اللزوم حا اقفل، قفلت واتكومت على نفسي!!.
في صباحية اليوم التاني لقيييت علام منتظرني ،قال لي مها كيفك؟؟، قولت ليهو بخييير الحمد لله وانت، قال لي تمام وتاني قال لي خليتك فترة وحتى سؤال ما سالتي مني ولا اديتني جواب للان ورسائلي ما بتردي عليهم، قولت ليهو كنت وين انت؟؟!، قال لي مشيت السعوديه عمرة، المهم للان ما عندك جواب، قولت ليهو ممكن نمشي حتة ونتكلم ،قال لي حاضر قعدنا طلبت عصير ،قولت ليهو انت زول كويس والله لكن انا ما بقدر أتزوجك اعذرني ،قال لي لشنو؟؟، قولت ليهو ما حاسه انو حا اكون زوجة مناسبه ليك بعتذر ،قال لي ليه مفكرة كدة، قولت ليهو عارفة نفسي المهم إن شاء الله تلقى الأحسن مني ،قومت قال لي مهااا فكري تاني ،قولت ليهو ماف داعي للتفكير قراري ما بتغييير لاي زول ،قال لي يعني عايزة تعيشي لولدك بس ،ما رديت، لو قبل ما سياف يتجاهلني كان جوابي حا يكون اي، بس بعد سياف اتجاهلني وقدرت اعرف مشاعري اتجاهو ما بقدر اقول اي لانو انا عايزة اعيش لولدي ولسياف كمان.
رجعت المستشفى لقيت مرام في صاله الاستقبال وبتبكي تاني جاء سياف مستعجل وشغال يهدي فيها وبعدها دخلو الغرفة!!!، دخلت وانا مكتئبة شديد وبقيت اتذكر كلامو الفي المطار، بس تاني قولت هو قال انسيهو يعني من الاول ما كان عندو مشاعر اتجاهي!!!، واسي كمان بقى يكرهني عديييل وانا الغبيه مشاعري اتغيرت ناحيتو و بدون ما أشعر حبو اتسلل جواي وبقى جزو مني ،هو اتغييير... أبو كويس، راجل حنييين وبحب يساعد كل الناس وكل الناس بتحبو!!!، وحتى انا بقيت بحبو ودفنت كرهي لسياف القديييم وبقيت بس شايفة سياف الجديد، بس هو للأسف ما شايفني وما معتبرني حاجة مهمة.
بالعصر كدة جات رونق جارية لي وقالت لي سياف ومرام، قولت ليها مالهم، قالت لي عايني خالتو تهاني كاتبه شنو في الواتس، قرييت كتبت الحمدلله اخيرا دعواتي استجابت وولدي الوحيد قرر يتزوج مبارك سياف ومرام، قفلت التلفون وحسيييت انو في قبضة في صدري، رونق قالت لي معقول الكلام حقيقي، قولت ليها ما عارفة وما عايزة اعرف قالت لي اسي بتاكد ليك منو هداك جاي مار بعلينا وقفتو قالت ليهو مبروك قالو عايز تعرس!!، قال ليها اي، قالت ليهو مرام صاح، قال لي ايوا عن اذنك انا مستعجل..............
اللهم صل على محمد عدد ما ذكره الذاكرين وغفل عن ذكره الغافلين..❤