رواية دون أن أشعر
الفصل السادس عشر 16
بقلم ال زهراء
قال لي بغضب القال ليك منو ام ولدي انتي بتقطعي من راسك!!، قولت ليهو ولدك بقول ماما فافتكرتها مرتك!، قال لي شاطرة!، قربت وقولت ليهو انت تستفز فيني صاح!، انا...،قاطعني وقال لي عليك الله فصاحتك دي ما تعمليها فيني نملة تخوفك، امشي ليك لزواية وابكي هناك!،زعلت وقولت ليهو ما عايزة اتكلم معاك، قال لي ببرود عايز انا!!!، انحرقت وقولت في نفسي اه مالي ومالو!!، شال التلفون وكان داير يتصل، جات مرام وقالت ليهو عشان خاطر بس مدرك ما تشتكييني ،قال ليها مدرك زاتو ما حا يتشرف بوحدة زيك لمن يكبر ويفهم، قالت ليهو عليك الله طيب عشان اهلي، هم ناس كبار وما بستحملو انو بتهم تكون في السجن، عاين ليها وقال ليها انا ما حذرتك المرة الفاتت قالت ليهو اسفة تاني ما بعيدها، قال ليها اصلا ما حا تعيديها، امشي بيتكم، قالت ليهو ومدرك، قال ليها انا بقيت كويس وامي بقت فاضية وما عندها حاجة بعد انا اتعافيت فاكيد حا نمسكوا ،قالت ليهو هو اتعلق بي وحتى بقى يقول لي ماما! عايز تحرمو مني، قال ليها لا ما عايز احرمو مدرك كاي شافع ومحتاج ام تكون معاهو بس ما انتي براك البقول ليك ماما في امي وفي امك كمان يعني ما جديدة عليهو كلمة ماما دي وهو بقولها ليك عشان حباك بس ،قالت ليهو انت ما شايف انو هو محتاج أسرة يعني هو عارف وواعي انو امي وامك ما أمهاتهو الحقيقات ،قال ليها وهو برضو عارف انو انتي ما أمو، قالت ليهو بس انا بقدر اكون امو انت ليه عايز تحرمو من شعور الأسرة ،(انا طبعاً بس فاتحة خشمي وعاجبني الكلام المبهم دا ونفسي اعرف هي شنو بالضبط لسياف وعلاقتها شنو بمدرك ومدرك عموماً دا منو هل هو ولد ريم وريم لقدر الله حصلت ليها حاجة ولا ولدو من مرة تانية) قال ليها الموضوع دا ما اتقفل من4سنين، قالت ليهو اتقفل بس تاني لازم يتفتح انا للأن منتظراك وكلو بس عشان مدرك انت ليه ما هاماك امرو وما عايز تضحي ،انا عيبي شنو ؟؟،وريني بس ليه ما عايزني، انا مستعدة انو اخلي الشغل بس عشان اكون معاه، ما تعند هو بقى متعلق بي شديد!، هو عايزني اكون امو!!، ليه دايماً ما بتتنازل انت ما عايزو يتربى تربيه طبيعية! ،قال ليها انا ما شايف انو مدرك محتاج ام جنبو امي ما حرمتو من حاجة، وانا ما حرمتو، ضحكت وقالت ليهو عشان انت بس بتشوف الحاجة العايزاها وما شايف احتياجو لام ،لو ما محتاج صدقني ما كان قال لي امي وكان اكتفى بأمك وامي بس.
في أثناء الحديث المشوق دا سياف عاين لي وقال لي بغضب شايفك مستمتعة!!!، اتمنيت تنشق الأرض وتبلعني، قولت ليهو لا منتظرة اخر قرارك بس حق السجن، قال لي خلاص خليتو ولو سمحتي ادخلي جوة انا عندي كلام معاها وما عايز اي زول يسمعو!، قولت ليهو حاضر!.
دخلت وشلت يزن ومدرك قال يمشي معانا طلعت وبقيت منتظرة الكلام ينتهي!، المهم سياف دا ظاهر كان معصب وهي بس كانت بتتكلم وما ساكتة، تاني جات هي وسياف وقالت لسياف لو انت ما كنت مقتنع المره دي حا تقتنع!، قال ليها انا اسي ما فهمتك انو ماف حاجة في راسك دا حا تحصل،ما ردت ليهو، مدرك جاء لسياف وقال ليهو عايز امشي مع خالتو مها،قال ليهو خالتو تعبانة الليله فما تمشي تغلغلها انا بسوقك ليها يوم تاني ،بقى يبكي قولت لسياف ماف مشكلة خليهو يمشي معاي ،قال لي بس يا مها انتي...، قاطعتو وقولت ليهو ماف مشكلة خليه يمشي وبعيدين يغير جو ، كنا ماشين مرام مسكت مدرك وقالت ليهو حبيبي ما تتأخر حا اعمل ليك الشبس البتحبو الليله!، فرح وضماها ،اتقدمت خطوات سياف قال لي اوصلكم احسن!، قولت ليهو بنلقى ركشة توصلنا ،قال لي احسن نختصر القصة واوصلكم! وبعدين الاولاد ديل حا يشاغبو ليك في الركشة!، مرام قالت ليهو اقتراح حلو! ورح عشان توصلني انا زاتي ،قولت ليهو لو مشت مرام انا ما ماشة احسن لي الركشة!، سياف بقى بعاين فينا ومحتار! ،تاني قال طيب يا مرام تعالي بالمواصلات شالت طوالي مدرك وقالت لي مدرك بتحب ماما تمشي معاك لناس مها ،قال ليها ايوا ركبت العربية وسياف دا بقى ساكت، قال لي لو سمحتي عشان مدرك ما يزعل ممكن تركبي!، عاينت ليهو مسافة واضح انو اضايق قولت ليهو حاضر!، قولت في نفسي هو ساعدني والولد ما عندو ذنب، ركبنا وراء مدرك طوالي جاء وقعد مع يزن!، تاني نامو!، سياف قال لمرام ما تستعملي مدرك في امورك دي تاني انا بحذرك!!، قالت ليهو انا بس بثبت ليك انو هو عايزني!،قال ليها بزهج انتي متأكدة انك دايرة تكوني ام لمدرك ولا دايرة بس تتزوجيني!، قالت ليهو الاتنييين فيها شنو لو بقيت زوجة ليك وام ليهو ،انت ما عايز تكون أسرة ما كفاك قايل امك ما خايفة عليك!، عايز تعيش طول عمرك كدة، فاكر انو مدرك دا حا يكفيك ما هو حا يكبر ويمشي منك... !!!، ضرب الدريكسون بقوة وقال ليها ما طالب راييك، قولت ليهم كفايه حا تصحو الشفع ديل مشاكلكم ديل حلوها بينكم بعدين ،مدرك دة لو صحا اسي مخلوع ولاقاكم تتشاكلو حا يفهم شنو،قالت لي ما طالبين راييك،كنت بشاكلها بس الاولاد نايمين فسكتا، سياف وقف في حتة وقال ليهز انزلي! خلاص، قالت ليهو انا وعدت مدرك امشي معاة...، قاطعها وقال ليها بغضب انزلي!، نزلت وقالت ليهو فكر بالكلام القلتو وشوف مصلحة مدرك ومرة واحدة كون ابو حقيقي واتنازل عشانو هو ما داير الحنان من طرف واحد داير الحنان من طرفين، بقى يرفع في القزاز بتاع العربية ولو ما زحت راسها كان علق ،انا ضحكت! وسكتا، دور العربية قولت ليهو ممكن اسالك سوال ،قال ليها لا بس اسكتي وخليني اوصلك واتخارج ،زعلت وقررت انو اشتغل بتلفوني تاني شوفت رساله من ود عمو طبعاً ود عمو دا وصلت ليهو بالصدفة بس في سجل المناوبة كان مكتوب دكتور علام بدر الدين نادر، المهم كل الاسامي مطابقة لنفس اسم سياف ،والحاجة دي كانت بعد سنه من قعادي في السعودية، اول يوم عشان اتأكد قولت ليهو انتو أسرة نادر ديل ببقو ليكم وسياف دا بتعرفو ،عاين لي وقال لي اي ود عمي، بعد اسبوع وكل يوم براقب فيهو وهو بس بعاين لي وبضحك، تاني لانو ضميري كان مانبني قررت اعترف ليهو باي حاجة في الورثة فاعترفت وقولت ليهو شيل حقكم باي طريقة وخاصة من الكلب الاسمو سياف ولو عايز تقتلتو اقتلو هو الشال مني الأوراق، ما اني الوقت داك كنت متأكدة انو بس بعقد المواضيع لانو ماف دليل انو مقسمات ليهم الأملاك والاراضي،قال لي تمام، استغربت وقولت ليهو تمام بس ما صدمك الموضوع ،ضحك وقام وقال كلام في سرو ومشى !، وتاني قولت المهم انا برئت ذمتي ما عندك شغله بيهو لو صدق ولا لا، تاني كلنا دخلنا قروب وهو كان فيهو فدخل على برساله وسيفت رقمو بس ما كان في تواصل الا على أرض الواقع وبعدها تاني انا اتزوجت واي زول عاش حياتو، بس اسي لي هو رسل لي رساله بعد المدة دي كلها، فتحتها لقيت فيها شوفتك اسي في عربية انتي جيتي السودان، رسلت ليهو ايوا جيت!، اتصل عديل المرة دي رديت قال لي كيفك مها؟!، قولت ليهو كويسة وانت يا علام وجيت البلد متين ؟؟، التفت سياف وعاين لي! ،قولت في نفسي دا مالو دا، قال لي استقريت لي زمن ،قولت ليهو شغال وين؟!، قال لي في مستشفى...، قولت ليهو يا زول انت قريب مننا انا في ماس، قال لي ايوا ولدك كيف ؟!، قولت ليهو بخييير، قال لي تمام حا نتلاقى إن شاء الله ،قولت ليهو إن شاء الله.
سياف قال لي علام منو ؟؟،ما رديت اسي هو ما قال ما عايز اي كلام، تاني ما سألني، قولت ليهو خلاص وقف هنا وصلنا عاين لي وقال لي ما تصحي مدرك خليني اسوقو ،قولت ليهو لشنو ؟، انا حا اشيل يزن وتاني حا اجي اشيل مدرك، عاين لي وقال لي دقيقة انا اساعدك طيب!، شال مدرك وانا شلت يزن دق الباب ودخل!! ختينا الشفع في السراير، سلم على ناس البيت كلهم وتاني مشى، قولت لعمتي انو دا ابو مدرك صاحب يزن ومدير المستشفى ،قالت لي ايواا.
دخلت جوة وقولت مدة ما ينوموا اعمل ليهم اكل!، جات ميسون وقالت لي الشافع النايم جوة دا منو ،قولت ليها مدرك، قالت لي ايوا نعمل ليهم كيكة! وقت جاهم ضيف الشفع بحبو السكر ،قولت ليها كيكة شكولاتة موش! ،قالت لي ايوا دقائق اجيب دقيق وكاكاو ،قولت ليها انا بمشي وبجيبهم مشيييت وجييت! ،لقيتهم صحو وبلعبو مع ولدين ميسون، عملنا الكيك وتاني عملنا الاكل وجهزناهو وبقينا قاعدين فجاءة واحد يامن جاء يبكي لامو وقال ليها ضربني يزن ،قالت ليهو طيب وين يا حبيبي، قال ليها في بطني، ساقتو وانا مشيت معاها ساقت ولدها ايمن ومشت ،وتاني جات وقالت لي مها عندي معاك موضوع، قولت ليها عارفة بس انا اسفة هو شافع وما عارف الغلط من الصاح لسه !، قالت لي شافع يا مها بس تادبيهو اول امس اشتكو لي انو ضرب ايمن في رجلو بس قولت ما اسالو وقولت لعب شفع ومرات بتحصل بدون قصد،بس الليله البطن دي حارة وبكرة يعور عيونو ولا يضربو في حتة حساسة، لا يا مها فهمي ولدك ووعيهو انو الضرب ما صاح، قولت ليها افهميني هو صغير واكيد لمن يكبر حا يعقل، قالت لي ولو للوقت داك عمل عاهه للشفع ،موش أولادي ديل فايتين ولدك بكم شهر بس عارفين الصاح من الغلط وما بضربو بعض، انتي لو فههمتيو بفهم والأطفال في العمر دة بستوعبو ما تقولي ما بستوعبو، قولت ليها ميسون انتي عايزة معاي مشاكل، قامت وقالت لي لا بس لو ما ادبتي ولدك ما تجيبيهو يلعب مع أولادي لانو انا حا اطردو، قولت ليها عايزة تعملي ليهو عقدة، عاينت لي وقالت لي واخليه يضرب أولادي لكن لو ما عاجبك الوضع الحا يحصل ليهو ادبيهو ولا هداك الباب امشي محل ماشة ،تاني بقت تقول لي ما قاصدة كدة... ،قاطعتها وقولت ليها طيب،بقيت افكر في كلامها، ختينا الغداء وعزلت أولادها براهم عمتي قالت ليها مالهم أولادك يا ميسون، قالت ليها يزن بقى يضربهم ما بخليهو يكون معاهم، عمتي قالت ليها دا كلام شنو يا بتي هم شفع، قالت ليها اي شفع بس بصراحة يا خالتي هي ما بتوريهو الصاح، عمتي قالت لي مها ليه ما بتشاكلي ولدك في الغلط انا زمان والله ضرب بضربهم لو غلطتو ،ما اشتغلت بيها وبقيت اغسل في العدة سامعة بكاء يزن ،جريت قولت ليهو مالك، قال لي طردوني!، مشيت لميسون وقولت ليها كان ما تبدي الشينة طوالي انا براي كنت بمنعو من أولادك، قالت لي انا ما كلمتك، صرخت فيها وقولت ليها هو شافع عارف ليك انو مفروض ما يجي، قالت لي ما تصرخي شافع ربيهو محتاج تربيه ولا عشان أولادي ما قدر المقام اسكت واخليهم يضربوهو ،قولت ليها انا ما قولت كدة، مسكت لي يدي وقالت لي طيب ليه بتعملي كدة، قولت ليها شفع ياخ، قالت لي طيب موش شفع نادت ايمن وقالت ليهو اضرب يزن في بطنو شفع موش طيب ولدي يتسدى لو عادي ،ما قدرت استحمل ولا قدرت اعمل حاجة ،دسيت ولدي منهم، قالت لي هوي يا مها انا أولادي دي زاتهم تعبت فيهم وما بخلي زول يحقر بيهم فابعدي مننا ،ريحتك ومسكتو ليك ااكلو واشرب فيهو انتي قاعدة تعملي شنو ،تجي تلقي الغداء جاهز تنومي تصحي تمشي الشغل ،يوم واحد سالتك بس أولادي ديل خط أحمر عندي وما برضى فيهم، وتاني شوفتي اكلي دة البعملو ما تهبشيهو ،امشي اعملي ليك عيشة زي الناس كفايه راجلي صارف عليك ،انصدمت من تفكيرها قولت ليها انا ما قصرت والله،ضحكت وقالت لي ياهن عيشاتك البتجيبيهن معاك ديل ،قولت ليها لا وانتي عارفاني جبت شنو بس انا ما بحب اذكر الجبتو ومش مضايقة انا ماشه ليك من البيت دة كلو كلو،حسيت انو زي المعالمها اتبدلت!، جات عمتي وقالت لينا اصواتكن عاليه مالكن ،قولت ليها بغصب مرت ولدك دي...، تاني سكتا وقولت عمتي ما ناقصها قالت لي مالها، قولت ليها ما مالها حاجة انا يا عمتي ماشة من البيت دة، قالت لي لشنو، قولت ليها ما عايز اكون عليكم حمل ،قالت لي ماشة وين؟!، قولت ليها في سكن للموظفات، قالت لي ولدك البمسكو ليك منو،قولت ليها بلقى زول ،قالت لي لا ما بتمشي، قالت لي ميسون سبب المشكة شنو اسي، حكت ليها وتاني قالت لي بس انا زاتي قولت كلام شين وما انكر بس ما كنت قاصداهو وتاني بكت ودخلت ،عاينت لي وقالت لي مها تعالي معاي جيت قعدت قالت لي انتي يا بتي لمن ولدتي ما كان عندك ام توجهك ولا كنتي مصاحبة اختك عشان تنصحك ولا شغاله ببتي الشغلة، انتي بس اعتمدي على نفسك! وكان صعبه عليك لانو اول ولد ليك وعادي الأمور تفلت من يدك وخاصة انك اطلقتي، بس يا بتي الدلع الكتير للشافع بخربو ،قولت ليها انتي ما فاهماني والله انا مضايقة شديد وعاصرة على قلبي ،ما دايرة يقولو ما مؤدب بس ما قادرة انهرو برضو واقول ليهو الحاجة دي غلط ،قالت لي لشنو؟؟ ؟، ما رديت وقمت منها طوالي وطلعت برة البيت لانو كنت حاسه نفسي مضغوطة شديد وكنت عايزة ابكي بس ،بخيت من البخاخ ،في عربية وقفت وكان سياف نزل وقال لي مالك واقفة منتظرة حاجة ، قولت ليهو بحس مبحوح لا ،بخيت تاني ،قال لي الأزمة قامت عليك، قولت ليهو ايوا شكلو الجو متغير، جات ميسون طالعة ومخلوعة وقالت لي عمتي قالت لي انو طلعتي مضايقة انتي عارفة انا ما قصدي الكلام داك، قولت ليها الزول لمن يكون غضبان بقول الحقيقية انا حا امشي من البيت ،قالت لي لااا انا ما دايرة الأمور توصل لهنا بس انا بس قولت ليك أدبي ولدك عشان ما يضرب أولادي تاني َ،عاينت ليها وقولت ليها بصريخ وانا ما عايزة اادبو وحا اطلع من البيت، قالت لي انتي والله كل ما الزول قال يتنازل عشانك تبقى اسوء ،دخلت ،سياف جاء وقال لي مها انتي مالك يا بت الناس مشاكل متحركة، قولت ليهو انااا دي هي وبعدين انت مالك، قال لي شوفتي دايماً تهاجمي ،قولت ليهو انا كدة العاجبو عاجبو والما عاجبو...، قاطعني وقال لي بنهرة هسس، قرب وعاين لي وقال لي قايله انك كدة خلاص بقيتي ناهرة وقوية ،قولت ليهو بحس راجف اي ،وانا ما خايفة من اي زول، قال لي جد وليه عيونك ديل مدمعات، العبرة كانت واقفة لي في حلقي وقولت ليهو ما مدمعات وانا شوفت ما بسكت لزول ،قال لي دا ازعاج منك للناس ماف زول بشتغل بتنهرك دة دي عوارة منك بس وحا تبقي لا تطاقي، قولت ليهو ما عندي شغله برايي اي زول ،انا اي زول يسال ولدي ولا يتكلم عن تربيتو ليهو ما بخلية، ما عندهم بي شغلة، قال لي طيب اعزليهو من المجتمع ماف ام بترضى ولدها يضرب ،رفعت يدي وكنت عايزة اتكلم، قال لي اولاً نزلي يدك بأدب وابقي زولة عاقلة واتكلمي معاي ،قولت ليهو ولو ما نزلتها وبعدين نفسي افهم بتتدخل في حاجات ما بتخصك لشنو ،قال لي مهاااا انا حالياً بتكلم معاك بالحسنى نزلي يدك ،ما نزلتها قرب وكان شكلو بخوف عديل لمن دموعي الحابساهن جرن من غير ما أشعر، قال لي ما قولتي ما خايفة وما عايزة تبكي انتي مالك يا بت الناس مضطربة كدة، ليه بتعملي كدة وتصرخي كدة بدون منطق، قولت ليهو انا بس ما عايزة زول يتكلم فيني، اادب ولدي اذا كرهني وقال ماش لابوهو اعمل شنو ،انا ما عندي زول غيرو وحتى عايشة ليهو هو فخوفي من فقدو دا اكعب من كلام الناس عني، هو صغير صاح بس لو كرهني بقول لي ما دايراك، قال لي تشتري في محبتو بدلعك ليهو الطفل لو مهما عملتي ليهو مفروض تختي في بالك انو في يوم احتمال يشتاق لابوهو ويقول دايرو لانو دة طبيعي، بس اكيد كمان ما يقول ما دايرك وحا يرجع ليك لانك انتي امو ، عشان كدة ما تخافي ووريهو الصاح من الغلط، وبعدين انا شايف انك انتي لسه طفوليه وزاتك ما عارفة كيف تقدري تربي شافع... المشكلة عمرك ما 15 ولا 18 سنه عمرك بعد كدة قريب ال 5oسنه ولسع ما قادرة تبقي عاقلة ولا قادرة تفهمي ولا قادرة تستوعبي الأمور،قولت ليهو سيااااف انا عمري قريب ال50 يا زول انت مخرف انا يادوب 29ماشه على 30 ،قال لي صغيرة يعني!!!، انحرقت شديد وقولت ليهو انا ما حا اتجادل معاك ،قال لي احسن بس اسمعي كلامي كويس العمر دا عمر تشكيل هويه الشافع ولقدر الله وخليته كدة احتمال مستقبلا يبقى عنيد وطبعو يبقى اصعب ،أدبي الشافع ووريهو الصاح ولو شايفة الشي دا صعب وغالبك انا بساعدك في النهايه انا عندي ولد، قولت ليهو طيب، عاين لي وقال لي سبحان الله وافقتي من غير صريخ، قولت ليهو سيااااف، ضحك، فجاءة جاهو اتصال رد وقال ايوا يا ريم تاني قال ليها اصبري جاي وجايبو معاي ما حا اتأخر ....