رواية دون أن أشعر
الفصل الرابع 4
بقلم ال زهراء
قولت ليهو انت ما عندك قلب انا حا اتكلم مع المستر قال لي هو ماف وانا هنا المسؤول ماف عمليه بتتعمل الا تدفع،ما عرفت اعمل شنو حسيت انو الدنيا وقفت ،مشيت لريم وقولت ليها اقنعيهو حست بالخوف وقالت لي حا اخسرو هو كان واضح معاي من الاول انو ما ادخل في شغلو، قولت ليها يعني انتي رضيانة بطبعو دة ،قالت لي لو ما اتقبلنا عيوب بعض علاقتنا تمشي كيف، قولت ليها بزهج انتي ما فاهمة الوضع الأسي هم فيه، انتهدت ودمعت وقالت لي لو كان بامكاني اعمل حاجة كنت عملت ،قولت ليها لو انتي ما اتكلمتي معاه وخليته يعمل البريحو بعد الزواج ما حا يكون عندك كلمة ولو تصرفاتو اتمادت وبقت طباعو اسوء ما حا تقدري تقولي ليهو حاجة، فانتي من أسى كوني شجاعة...، قاطعتني وقالت لي بنبرة حادة دي حياتو المهنية انا ما عندي علاقة بيها وانا واثقة انو سياف ما حا يزعلني ولا حا يتمادى علي انا فهمتك انو هو ما بحب ادخل في شغلو وحتى اول امس هرشني عشان قولت ليك امشي نومي، فانا تاني ما بدخل في نفس الدوامة ما ناقصني مشاكل معاه،قولت ليها طيب عندك قروش!، عاينت لي وقالت لي لا والله اهلي لسه ما رسلو لي بس لو رسلو اسي دي بدفع ليهم، قولت ليها عارفة ما بتقصري، كانت معالمها حزينة شديد شكلو ما اول مرة تمر عليها حاله زي دي وشكلو من زمان برفض، دا ما انسان دا وحش.
لفيت كذا مكان وما قدرت اجمع قروش رجعت المستشفى لقيت الراجل الكبير يترجى فيهو وهو ما هاميهو، قولت في نفسي دا قلب شنو العندو دة، وين الإنسانية حسبي الله ونعم الوكيل، فتحت حساب بنكك وعاينت لقروش احمد راجل مروة، قولت غلط بس ماف خيار وحا ارجعهم ليهو بعد يجيبو القروش، مشيييت طوالي وقولت ليهو حا ادفع انا يا عمو والعمليه حا تتعمل ،عمو دة انبسط وسياف بقى يعاين لي ،المهم دفعت والعمليه اتعملت والبت وضعها استقر وانا بقيت قاعدة، سياف جاء وقال لي من وين جبتي المبلغ دة!؟، ما رديت واتلفت منو، قال لي بقيتي ما بتجاوبي كمان، قولت ليهو بنبرة عاليه ليه اجاوب واحد زيك وشوفت بعد مني انا خلقتك دي ما عايزة اشوفها واوريك شي كمان كرهي ليك زاد زيادة ،ضحك ضحك وقرب وقال لي بنبرة استفزازية وعاليه انتي ما فارقة معاي و انا ما معتبراك زول اصلاً فكرهك دة ما بأثر معاي بحاجة ،وتاني مرة اوعى وتعليه صوتك علي لانو ما معروف البحصل ليك شنو، دمعت من شدة الموقف الانا فيه وتاني قومت وقولت ليهو البحصل لي شنو ؟؟؟؟؟، قال لي ما ضروري تعرفي جدع لي منديل في وشي ودلى لي طرحتي ،قال لي انتي في مستشفى هذبي نفسك وصلحي طرحتك شعرك كله برة +اعرفي ابكي وين!!، كلامو دة وجعني اكتر قولت ليهو الدخلك شنو ؟؟،انا منظري كدة مبسوطة بيهو عندك معاي حاجة، قال لي طيب اقعدي كدة وانا بسبب مظهرك وسلوكك بطردك من الوحدة وبضمن ليك انو ماف زول حا يشغلك معاهو ،قولت ليهو بحس مبحوح تكون عملت واجب انا حا القى شنو بعد اعمل الأتاش غير انو اتزوج واحد زيك امنعني كدة بكون عندي حجة، ضحك وقال لي لا انتي مصدقة انو ممكن نتزوج بعد تخلصي والله اسي دي لو انا دقيت جرس نتزوج فعشان ما تخليني اعمل حاجات الاتنين ما عايزنها فاتادبي ،مديت ليهو بوزي وصريت ليهو وشي! وقولت ليهو انت عايز مني شنو!؟، قال لي ولا شي، قولت ليهو طيب بعد مني وما تقرب علي، قال لي والله دي ما حاجة بتحدديها انتي ،انتي لو من الاول اتنازلتي وقولتي ما عايزة الخطبة ما كان اتعاملنا مع بعض اصلاو....،قاطعتو وقولت ليهو انت بتعاقب فيني انت برضك ما كان عندك الشجاعة انو تقول ما عايز انت....، قاطعني ومسك يدي بقوة وقال لي بغضب كلو منك ومن ابوك اسرتكم أسرة عاشت علينا وبعد دة كلو ما كفاها فطمعت في حقنا ،قولت ليهو بغضب دة من ابوك هو العايز الخطبة ما مننا واعرف انو نحن ما طمعنا في حق أي زول، ضحك وقال لي منو الحا يصدقك،وانا عارف انك قاعدة تمثلي وعايزة الزواج دة يتم عشان القروش وعشان انتو ناس جيعانين و.....، اديتو كف وما خليتو يتم كلامو دموعي بقن يجرن! ،هو كان ساكت بس ومصدوم من الكف دة، تاني رفع يدو وانا قولت حا يضربني بس نزلها وقال لي بغضب احسن ليك تتخارجي والا انا ما حا اقدر اتحكم في نفسي، زحيت طوالي وبقييت مسرعة لمن وصلت الاستراحة بكيت بكى شديد وكل البنات بقولن لي مالك، قولت ليهن ضغطة بس ،غسلت وشي بعدها وصلحت طرحتي وقولت في نفسي مستحيل اتزوجو اموت وما اتزوجو!.
عاينت للتلفون الكان صامت لقيت من راجل اختي كذا مكالمة رجعت ليهو قال لي حولي لي القروش للحساب دة، انخلعت شديد وتاني استجمعت شجاعتي وقولت ليهو انو دفعتهن لزول محتاج عمليه وحا يجنك راجعات لانو أهلها قالو بجمعو فيهم ،قال لي بغضب انا محتاج ليهن اسي يا تدبريهن ولا حا يكون عندي معاك تصرف تاني قولت ليهو احمد انت عارف انو انا ما عندي قروش،، قال لي مها كلامي وااضح واصلا انتي ما كان تتصرفي بقروشي بدون علمي+انا غلطان لانو انتي اخت مروة كلبه القروش واكيد انتي حا تكوني زيها،قولت ليهو بحس عالي ليه انت مفكرنا كدة نحن ما حصل احتجنا لحاجة عشان اسي تخلعنا القروش، ضحك وقال لي والله يا مها ظاهرين الناس الما احتاجوا لحاجة المهم قروشي ترجع لي الليله والا بكرة بتلقي نفسك في السجن، قولت ليهو احمد قول انت بتهظر سجن شنو يا اخوي، قال لي بحس مضطرب انتي ما عارفة الورطه الانا فيها وقفل.
مشيت لأهل المريضة واتكلمت مع ابوها قال لي القروش الجابوها ناس القرية دفعنا منها حق العربيه والباقي علاجات بس بعد اسبوع جايب لينا عمها وبنرجعهن ليك ،هنا الدينا ضلمت في وشي هم ما عندهم ذنب بس انا ما قايله انو احمد ممكن يتمادى معاي لدرجة يهددني بالسجن ،اتصلت بابوي ما رد ،اتصلت بمروة ما ردت، قولت ديل مالهم ديل ،اتصلت بيها تاني ردت وقالت لي برجع ليك انا مشغولة ،قولت ليها في شنو؟؟! حاصل حاجة، قالت لي برجع ليك وبفهمك، قولت ليها فهميني اسي، قالت لي لقو مخد*ر*ات في المزرعة الشغال فيها ابوي ولانو باسمو عايزين يقبضوهو بس هو هرب، قولت ليها شنو شنو!!!، كيف لكن واسي هو وين!!، قالت لي ما عارفة بس يا مها ما تركزي مع كل الحاجات دي وركزي بس مع نفسك وشغلك ابوي اكيد حا يكون كويس والتهمة دي ما حا ثبت عليهو وباكد ليك، قفلت قبل ما اكلمها، بقيت قاعدة في الارض وهمي زاد من ناحية ابوي ومن ناحية تانية احمد عاينت للتلفون ألفي يدي قولت دا 50 ما بجيبها اعمل شنو!، قعدت بالحالة دي لاذان العصر صليت وادعيت، عاينت للتلفون لقيت منو مكالمات من الثقيل!، ما رديت على اي واحدة فيهم، طلعت ولمحتو أشر لي عشان اقيف بس ماووقفتا وخشيت طوالي الميز قولت مستحيل يصل ليهو بس فاجأني انو جاتو الجراءة ودق الباب وكمان صرخ وقال لي اطلعي والا حا ادخل !، قولت دة جنا ولا شنو ،طلعتا سريع وقولت ليهو في شنو؟، قال لي انا لمن اقول اقيفي اقيفي!، قولت ليهو عايز شنو؟، قال لي كنتي وين!؟، قولت ليهو ما من حقك تسالني السؤال دة، كان عايز يرد جات ريم ووقفت قالت ليهو سياف انت علاقتك بمها دي شنو ؟ انا اسي سمعت الجوطة وعرفت انو دا انت وهي ،قال ليها ريم ما عندي بيها اي شغلة بس انا قولت ليها اقيفي وهي اتجاهلتني ،قالت ليهو تعمل كدة لكن ما ملاحظ انو لمن تكون معاها ما بتقدر تتحكم في نفسك، اسي لو بت اشتكت بتعرف البحصل ليك شنو ،ولو المشرفة كانت قاعدة متخيل حا يكون تصرفها معاك كيف، قال ليها انا اتهورت وعارف انو غلطان بس ما كنت حا ادخل انا كنت عايز اخوفها بس ،قبل ما ترد عليهو جات المشرفة وحذرت سياف تحذير شديد وتاني مشت وهو ما قال كلمة انا بقيت اضحك براي ،قال لي شايفك مبسوطة! ،ريم قالت ليهو سياااااف ياخ خلاص، انا ما عايزاك تاني تحتك معاها ولا تختها في راسك البت دي مسكينة وما عملت ليك حاجة وبعدين كدة حا تجيب لي نفسك سمعة سيئة هنا هي مخطوبة وانت بتصرفك معاها كدة زي المعاكسها والجاري وراها ،عاين وقال لريم عرفتي كيف مخطوبة، شالت يدي وقالت لي ما شايف الدبله والمحبس ، عاين لي مسافة وسكت وتاني قال لريم طيب ما حا اشتغل بيها بس انتي ما تفكري انو انا...، قاطعتو وقالت ليهو انا واثقة فيك وفي حبك لي، ابتسم ليها وهي ابتسمت ليهو وتاني مشو مني وانا اتنفست ودخلت الناس ديل كلهم يعاينو فيني، لقيت رساله منو قال لي فيها انا ما قولت ليك ما عايز زول يعرف انك مخطوبة ديل شنو اللابساهن ديل +انا ما قاعد اشوفهم لي ،رسلت ليهو وقولت عشان انا قاعدة البس جونتيات + ما تفكر عشان اثبت خطوبتي منك بس ديل لنفسي لاني زي ما قولت ليك التزامات الخطبة بتطلب مني كدة، قال لي تقلعيهم، قولت ليهو ابيييت ولو سمحت اختاني،بقيت قاعدة سامعة بتين في الغرفة التانية يقطعو فيني واحدة قالت عينها حية مخطوبة وتحب في دكتور سياف ،والتانيه قالت كل الوقت معاه وكل الناس ديل شافوهم وحتى قالو انو شلبتو من ريم، البت التانيه قالت ما حا يتشلب هو بس بلعب معاها + يا ريت لو عندي رقم خطيبها كنت وريتو حركاتها وامورها،قالت ليها اي يا ريت بس يا ربي ليه بتصل مراحل زي دي وهي مخطوبة، ضحكت التانيه وقالت لانو دة سياف طبعاً منو البت الما بتتمناه بس هو قولي كيف وصل مراحل زي دي معاها، قالت ليها الكتاب ظاهر من عنوانو ما شايفها كيف دي قادرة واسي تلقاها ما غشت بس سياف تلقاها المستر زاتو غشاهو ،ضحكت التانيه وقالت المشكلة مخطوبة!!!، الاتنين تاني بقن يضحكن وسكتن بعدها.
اتكرفست في سريري وحاولت انسى كل الكلام الاتقال، اتصلت بمروة ردت قولت ليها بخوف اها الحصل شنو؟، قالت لي ولا حاجة لسه ما اتلقى حسك مالو تعبان كدة، بكيت ليها لمن قالت كدة، قالت لي اهدي مالك ؟،قولت ليها ماف شي خايفة على ابوي بس طبعا ما بقدر احكي ليها كل المريت بيهو الليله ،قالت لي تمام بس ما تخافي كل الأمور بتتحل واكيد التهمة بتسقط.
بعد قفلت منها بكيت بكاء شديد على اي حاجة!، تاني قومت صليت ركعين وانتظرت المغرب اذن بعدها صليت تاني وادعيت ورجعت للسرير ،جات ريم وقالت لي مالك عيونك مورمة، قولت ليها ليه الناس ديل ما برحمو وبتكلمو بدون ما يعرفو الحاصل ،قالت لي دي طبيعتهم بس مالك، حكيت ليها اي حاجة وعن كلام البنات ،كان عايزة تمشي تشاكلهم بس قولت ليها ماف داعي.
في الصباح اتصلت بي رقم غريب طلع ابوي قال لي يا مها اول زول جاء على بالي انتي، قولت ليهو بنبرة خوف وين انت، قال لي ما تسأليني بس كنت عايز اقول ليك قبل ما يحصل لي اي شي انو انا اي عمله عملتها كانت لصالحك انتي يا بتي غاليه علي شديد بتشبهي المرحومة امك وجزو مني وكل قسوتي وفرض رأيي دا كان عشان انا عايز ليك الاحسن، قولت ليهو وانا ببكي عليك الله يا ابوي ما تقول كدة انت بتخوف فيني، انت سلم روحك مش واثق انو ما عملت كدة، قال لي بغضب مستحيييل، قولت ليهو طيب انت وين، ماقال لي وقفل، قولت في نفسي أفضل حل انو يسلم روحو ايوا ماف حل تاني كدة حا يتورط زيادة سامحني يا ابوي سامحني، اتصلت بالشرطة وكلمتهم قالو لي بنحولك لفرع ولايتك ،حولوني اديتهم الرقم عشان يتعقبوهو وقفلت بعدها انهرت وبقيت قاعدة ،جات ريم وقالت لي ما ماشه، قولت ليها لا، قالت لي من موضوع امس، قولت ليها اخر ما يشغل بالي موضوع امس، قالت لي طيب مالك، قولت ليها ما عندي مزاج. قالت لي وسياف اقول ليهو شنو، قولت ليها ما تقولي اي حاجة و ياخ لو عايز يطردني خليه يطردني ،اتكرفست وغطيت نفسي ،هي مشت طوالي وانا بقيت ببكي لمن حسيت دموعي نشفن، جاني اتصال منو ما رديت جات مسج مكتوب فيها اطلعي برة دقائق ،رديت ابيت، قال لي انتي ليه عايزاني انتهك القوانين تاني ،طوالي لبست عباية وطلعت ما كان فيني حيل والله امشي بس حاولت عشان عارفاه مجنون وقفت في شجرة جاء ومعاه البتين الأمس وريم ، قال ليهم اعتذرن منها وانا بفكر اخليكم في المستشفى ، قعدت في الأرض لانو ما كنت قادرة اعتذرن مني، قال ليهن بغضب تاني بس لو جبتن سيرة حرف الميم على لسانكن ما بخليكن واعرفن انو هي اشرف منكن الاتنين وعلاقتي بيها ما بتخصكن وما من حق أي زول يحكم عليها ولا اي زول ليهو الحق ياذيها فاهمات ،واحدة قالت ليهو تمام ما حا تتكرر مننا غلطة زي دي ،ريم قالت ليهن اصلا ما حا تتكرر لانو لو اتكررت المرة الجايه ما معروف سياف حا يعمل فيكن شنو ،انتن هنا جايات تشتغلن ولا جايات تنتهكن أعراض الناس ،شوفتن بكلامكم الأمس خليتن البت تنهار كيف ،في اللحظة دي عاينت في ريم كانت جادة شديد ،هو صاح انا مرهقة بس ما من الحاجة دي براها من حاجات كتيرة.
بعد مشن البنات سياف قال لي قومي يا مها ما انتي البت البتضعف، قولت ليهو انت ما فاهم حاجة ،قال لي فاهم وعارف انو الكلام كان...، قاطعتو وقولت ليهو ما الكلام براهو والله المخليني في الحالة دي، قال لي شنو طيب ؟؟؟؟، ما رديت، كان عايز يتكلم جاهو اتصال قال شنو ليه الشرطة دايرة مها ،انا هنا انهرت،تاني قال ليهو انا جاي عليهم، قال ليهو تاني تمام جاين سوا، قولت ليهو ما ماشة، قال لي ما تخافي ماف حاجة، قولت ليهو انت ما عارف الحاصل بس، قومني وقال لي صاح ما عارف بس عايز اعرف اسي ساقني بالقوة قعدت وانا خايفة، قال واحد من الشرطة البت الاسمها مها عمر مقدمين فيها شكوة لأنها شالت قروش من زول واتصرفت فيها من غير ما يعرف ،قال لي سياف الحاجة دي صاح، قولت ليهو اضطريت عشان العمليه، قال لي بغضب انتي مخك دة مقفول، الشرطي سكتو تاني قال لي الشرطي قومي معانا، قولت لسياف ساعدني ،قال لي انتي الغلطتي ماف ليك اي مساعدة مني............
_____________________
لَقَدِ استُهلِكتُ بِالكَامِلِ ، لَم يَبقَ مِنِّي غَيرُ وَجهٍ شَاحِبٍ مَلِيءٍ بِالخَيبَةِ وَ
الحُزنِ