رواية دون أن أشعر
الفصل الخامس 5
بقلم ال زهراء
قولت لسياف ساعدني ،قال لي انتي الغلطتي ماف ليك اي مساعدة مني، قلبي دا المني انا ما كان اقول هو راجل كبير ما ساعدو يساعدني انا،ريم قالت ليهو عليك الله ساعدها انا والله لو عندي كنت دفعت القروش، اعتبرو دين علي و...، قاطعها وقال ليها انا بحترمك جداً وكلامك مسموع عندي وانتي عارفة بس في موضوع حساس زي دة ما تدخلي، قالت ليهو ليه بس عرفنا الشغل كمان ما عايزني ادخل خارج نطاقو، قال ليها مها زي الشغل و واحد والاتنين اعتبريهن خطوط حمراء ، ريم قالت ليهو سيييياف انت جادي هي ليها كم هنا عشان تقول عنها الكلام دة وليه معتبرها خط أحمر وكيف تقول لي الشي دة وانت بتعاين في عيني، انا اسي افهم شنو ؟،قال ليها انتي موش واثقة فيني، قالت ليهو كنت واثقة بس بعد كلامك القولتو بقيت أشك ،قال ليها هي زولة وصاني عليها واحد قريب لي عشان كدة قولت كل الكلام دة بس ما قاصد فيهو حاجة ، اتنهدت وقالت ليهو طيب يا سياف انت براك قولتها لو انت خات ليها مكانها عشان قريبك وصاك عليها يلا ساعدها، قال ليها ما بقدر هي بليدة وغلطت وتستحمل غلطتها ،الشرطي قال لي يا أستاذة عايزة تقيفي هنا ولا شنو ما مفروض نتحرك يادوب استوعبت انو انا دة شنو االبعمل فيهو دة وليه اصلا اسمع لمحادثة زي دي هو ما فيه اي رجاء ومستحيل يساعدني .
وصلت مركز الشرطة قدمت افادتي وقولت ليهم انو ما قصدي ااكل القروش قصدي بس البت تعمل العمليه وما لقيت الا قروش احمد قدامي، قال لي المشكلة انو ما في حوجتك لللقروش المشكلة في انو دة بعتبر نوع من انواع السرقة هو مامنك عليهم وانتي شيلتهم بدون علمو ودة ما بسقط التهمة وهو معاه إثبات التحويل وحتى عندو مقطع صوتي بثبت انو قال ليك خليهم معاك لمن يجي يشيلهم بس انت اتصرفتي بدون علمو، قولت ليهو الحل شنو اسي يا جنابو، قال لي والله يا مها ماف اي حل الا ترجعي القروش والا حا نضطر نختك في السجن وتاني نحولك المحكمة وهي البتقرر تعمل معاك شنو، حسيت انو لساني اتلجم وما قادرة انطق وحسيت انو الدنيا لافه بي ، بعد مسافة لمن وعيت على نفسي قولت ليهو عايزة اتصل بزول ممكن ،قال لي تمام، اتصلت بمروة ووريتها الحاصل قالت لي بصريخ كيف أحمد يعمل كدة معاك انا ما بخليه والله ما اخليه اسي دي يطلعك، قولت ليها مروة عليك الله فهميهو انو القروش برجعن بس انا ما بستحمل اقعد في السجن، قالت لي تمام، قفلت رجعت لي قالت لي تلفوني مغلق، اترعبت وقولت ليها مروة اها اعمل شنو، قالت لي بنبرة سريعة بيعي الدبله ،جاء كلام سياف كلو في بالي انتو جيعانين وانتو بتاعين قروش، قولت ليها لو اتعفنت في السجن ما بشيل منو حاجة، قالت لي بصوت عالي اسمعي الكلام، قولت ليها ما بسمعو هو رفض يساعدني واسي لو بعت الدبله احتمال هو بذات نفسو يدخلني السجن ما تشوفيه هو اكعب من أحمد راجلك، قالت لي بخوف طيب الحل شنو!، قولت ليها شوفي بيتنا فيهو قروش ولالا امشي تحت الدولاب ابوي بخت اي قرش هناك، قالت لي شالهم كلهم امس انا اديهم ليهو ،قولت ليها انتي الساعديهو في...، قاطعتني وقالت لي اسي يا مها ركزي بس مع نفسك، قولت ليها مروة ما تقاطعيني ، كانت عايزة تتكلم الشرطي قال لي اقفلي التلفون خلاص كفاك، قولت ليهو دقيقة خطف التلفون وقال لي شوفي شغلة تانيه، قولت ليهو طيب خلي التلفون معاك بس ضروري ادخل السجن ما ممكن اكون برة لوقت المحكمة، قال لي لا ،التهمة مثبته ،دخلت وانا مكتئبة شديد وقعدت في زاويه كنت ما قادره اعبر من شدة الصدمة بقيت ارجف كلي من الخوف انا والله ما قادرة يا رب القى زول يساعدني.
___________________________
بلسان مروة
ماف حل غيرو اي ماف حل لو عمو محمد عرف انو مها في السجن حا تكون مصيبه يارب سياف ما يكون كلمو، مشيت بيت خالتو انصاف دقيت الباب فتحت لي ندى قولت ليها ياسر قاعد قالت لي جوة، دخلت عليهو وقولت ليهو ممكن نتكلم، قال لي تمام مشينا بعيد منهم ،دمعت وقولت ليهو انا اسفة بس ما بعرف زول غيرك، قال لي مالك الحاصل ،قولت ليهو راجلي سجن اختي وهو ما....، قاطعني وقال لي مهاااااا، قولت ليهو اي، قال لي بقلق ليه ؟؟؟، قولت ليهو عشان قروش حكيت ليهو اي حاجة ،قال لي بحزم دا مبلغ عشان يسجنها بيهو جيبي رقم أحمد، اتصل بيهو الرقم مغلق رسل ليهو واتس، قولت ليهو قبيل ما رد لي، قال لي انا حا يرد لي بعد مسافة رجع ليهو احمد باتصال ، قال ليهو قروشك حا ترجع ليك طلع مها، قال ليهو رسلهم اول ،رسل ليهو رقم الحساب رسلهم وتاني قال ليهو يلا انا منتظر اسحب الشكوة، بعد مسافة قال ليهو سحبتها ومها حا تطلع ،اخدت نفس وشكرتو وقولت ليهو خليهو سر بينا ما لازم مها تعرف، ندى مرتوو كانت بتعاين بس من بعيد لينا، انا حبيت أوضح ليها فجيت وحكيت ليها انو نحن في ضايقة ماليه وطلبت المساعدة من ياسر وهو ما قصر اتبسطت وقالت لي الحمدلله انو لقيتوهو عشان يسد الحوجة الناس للناس ولا شنو ،خالتو انصاف كانت ساكتة وبتعاين لي بس ما فتحت خشمها بكلمة وتاني قالت لولدها راجل وود رجال بس مالكم يا بتي، قولت ليها والله الحاصل لينا كتير بس انا ما بقدر احكيهو وشكرا ليكم ،جاء وقال لي هي وين مها، قولت ليهو في مكان بعيد نسيت اسمو عديل، ما كنت حابه أوضح ليهو اي تفصيله بتخصها ،ما سألني بعدها وتاني انا مشيت واطمنت انو مها حا تطلع بخير وسلامة.
_________________________
بلسان مها
طلعت وما كنت عارفة اي حاجة غير انو الشكوة اتسحبت ،اتصل بي فجاءة احمد رديت اعتذر لي شديد وقال لي انا كنت مضطر قولت ليهو اسي في داعي لكل دة وقت عايز تسحبها يعني تخويف ولا شنو ،قال لي لا انا ما سحبتها الا لمن دفعو لي ،قولت ليهو الدفع منو ؟؟؟، قال لي ياسر ،قولت ليهو نعممم ؟؟!، قال لي ليه مستغربة ياسر الدفع بتكون دي اختك، قفلت في وشو ورجعت لمروة قالت لي ما كان عندي خيار تاني ،قفلت في وشها لانو ما عايزة اتكلم معاها كيف تذلني كدة ،ليه تشيل من ياسر قروش، اسي تفكيرو بكون كيف فيني، قعدت تحت شجرة لانو كنت تعبانة شديد وتاني رجعت الميز وصليت ركعتين وكان الوقت بين الضهر والعصر جات واحدة وقالت لي يا حلوة الوقت دا مكروه انو تصلي فيهو وامس برضو لاحظت ليك صليتي ركعتين قبل الغروب مباشرة دا برضو مكروه ، قولت ليها ممكن توضحي لي اكتر انا ما فاهمة، قالت لي طيب السنن الرواتب ديل هن الصلوات التابعات للصلوات الخمس ديل بكونن قبل صلاه الصبح ركعتين ،وقبل الضهر اربعة ركعتين ركعتين ،بعدو مباشرة اتنين ، العصر ما فيه سنه مؤكدة والمغرب والعشاء ركعتين بعدهن مباشرة بس اوقات شروق الشمس والغروب وبين العصر والضهر وبين العصر والمغرب مكروها عشان كدة اتجنبي الأوقات دي ،خجلت من نفسي عشان كنت بصلي ساي من غير ما انتبه او اعرف الأوقات الصاح قولت ليها طيب لو الشمس شرقت اصلا متين اصلي الضحى وهل اخلي الرقيبة ولا اصليها ،قالت لي الرقيبه ما بتصليها بس الضحى بعد 15 ل20 دقيقة عادي ممكن تصليها، قولت ليها الضحى دي موش صلاه نوافل ما سنن رواتب ،قالت لي اي، قولت ليها جزيتي خيرا وفي ميزان حسناتك ،قالت لي وجزيتي المثل.
بالمساء جات ريم وقالت لي بخلعة طلعوك كان اسي ماشة اشوفك، قولت ليها اي ضمتني وقالت لي كيف؟، قولت ليها القروش ادفعن، قالت لي الحمد لله الحمد لله.
الصباح بدري مشيت بدري عشان اشوف عياني، تاني جيت وقعدت جاء داخل سياف وما سلم ولا اشتغل بي واكتفى بانو قال لي انا عملت ليك تحويل من الوحدة دي واحدة بتخش السجن ما لازماني هنا، بقيت مصمغة في مكاني ما كنت قادرة اتحرك بعد شوية قومت وقولت في نفسي من شنو مصدومة اصلاً دا متوقع منو اي حاجة قولت ليهو انت ليه ما بتقدر ظرف زول في الحياة دي عارف دخلت السجن لاسباب معينة وعارف انو جريمتي دي ما بتعتبر جريمة وبتعتبر سوء تصرف وتوقع غلط .... انا كنت فاكرة انو احمد بتفهم وبقول لي تمام بس خذلني واسي انت تجي تمها وتقول لي ما ناقصني زول في الوحدة داخل السجن، انا راجعة كلو كلو ما عايزة اقعد ولا لدقيقة في المدينة دي، قال لي ارجعي!، طلعت سريع جاني اتصال من مروة قالت لي ابوي انقبض، قولت ليها حا اجي، قالت لي بنبرة عاليه خليك مكانك ماف داعي ابوي يشوفك انتي بس تمي الأتاش وما عايزين حاجة منك، قولت ليها وانا ببكي دا ابوي لكن وانا مقلقة عليهو خليني اجي اشوفو، قالت لي ابوي بتوتر لمن تجي خليك هناك انا هنا قاعدة واصلا حا تعملي ليهو شنو، قولت ليها مروة انتو ليه بتلعبو بي كدة انا ما عايزة أتم اي اتاش هنا ، قالت لي بحدة ابوي كلامو معاك واضح ولو عايزة تجلطيهو وتعذبيهو بعد عذابو دا تعالي وخلي الشغل، قفلت منها ليه مصرة تسير حياتي ياخ لو عايزة اشوف ابوي ما بتخليني، دخلت لسياف وقولت ليهو اي وحدة، جاء وقال لي شنو الغير رأيك مش قولتي مسافرة، قولت ليهو بغضب قول لي اسم الوحدة كنت برجف!، تاني قعدت لانو ما كنت قادرة!!!، جاء وجاب معاه جهاز الضغط وقال لي مدي يدك رفضت وقولت ليهو لاا، مداها لي بالقوة وقال لي اسمعي الكلام تاني ،قاسو لي وطلع منخفض قال لي من متين ما اكلتي، قولت ليهو بنهرة قول لي اسم الوحدة وما تعمل نفسك مهتم انا كان موتا زاتك حا ترتاح ،قال لي وجهة نظر برضو!، قام وطلع مني حاولت اقوم ما قدرت، قولت ناس الوحدة ديل وين اللليله فجاءة اتذكرت انو اللليه ما عندنا شغل اصلا بس انا عشان مهمومة نسيت الحاجة دي، جو داخلين ناس وحدة تانية وكان معاهم وائل جاء علي وقال لي خير مالك؟، قولت ليهو ضغطي منخفض بس قال لي دقيقة بس امشي واجيب ليك ....، قاطعو صوت سياف الكان داخل قال ليهو يا دكتور نشكرك على مجهودك انت ركز مع شغلك، جاء ومد لي سندوتش وقال لي اتقوي عشان تقدري تقومي،وائل قال لي كلام دكتور سياف صاح لازم تحاولي.. َ.، قاطعو وقال ليهو يا وائل انت ما عندك مرور ، قال ليهو اول حاجة اطمن على مها، قال ليهو زي ما شايف دا الوضع وبعدين انت اصلا بتعرفها من وين ؟؟؟، قال ليهو زميلتي في الجامعة، قال ليهو ايوا بس دا ما بخليك برضو تهتم بيها وتخلي شغلك صاح، فجاءة جاء البوص وطلع معاهم ،قال لي يا مها حتى الناس ال بتعرفيهم زيك ،حمرت ليهو ، ضحك وقال لي اكلي عشان تقدري تنبذيني براحتك، رفضت!، قال لي ااكلك يعني ،طيب، قومت بالقوة وبقيت ماشة على الباب بس قواي خارت وتاني ما حسيت باي حاجة.
لمن صحيت لقيت نفسي انو مركب لي درب وقاعدة جنبي ريم ،ريم قالت لي الف سلامة ليك ليه اهملتي صحتك كدة ،انتي عارفة انو فحوصاتك بتوضح انو عندك ملاريا تقيله وبالإضافة لانيميا ،قولت ليها كلو متلم فيني الحمدلله على كل حال.
قالت لي تاني اكلي، قولت ليها ما باكل لو من سياف، قالت لي ليه؟، قولت ليها انتي عارفة ليه المهم ديل القروش جيبي لي اكل، مشت وجابت لي وما جادلتني اكلت وفجاءة كدة حسيت انو عايزة اغمض لمن صحيت لقيت انو في درب بندول مركب لي وكان جنبي المرة دي سياف، قولت ليهو مالي انا، قال لي قولنا نديك بندول احتمال ضنك ،قولت ليهو ما عندي، قال لي دا للاحتياط بس ،شلت ال cbc قلعها مني ،قولت ليهو جيبها قال لي ماف داعي تشوفيها، قولت ليهو جيبها، جات ريم داخلة وقالت ليهو وريها ياخ انتي عندك ضنك وصفايحك ناقصة شديد ،خوفت ،ضحكت شالت الورقة منو ومدتها لي لقيت الصفائح طبيعية،قالت لسياف انت بتحب تعصبها، قال ليها لو هي ما بتفهم اعمل ليها شنو انا قولت للاحتياط، قالت ليهو كان تقول انو جاتها حمه، قال ليها ما كنت عايز اخوفها واقول ليها اغمى عليك بسبب حمة،قالت ليهو بس بالضنك خوفتها زيادة ،ضحك، انا غمضت عيوني، قال لي بصوت عالي صحصحي يا مها، صحصحت لمست جبهتي ريم وقالت ليهو الحمة خفت لمن ينتهي حا تروح كلها إن شاء الله ،بعد راحت الحمة ويادوب استوعب انو دة درب سياف قولت ليهو سعرو كم عاين لي وقال لي دة من الطواري يعني مفتكرة انو حا اخسر فيك قرش، ريم كانت عايزة تتكلم وقفها وتاني قال الليله وقتي ضاع فيك ،قولت ليهو هل انا قولت ليك ضيع وقتك معاي، ريم ضحكت علينا وقالت والله مبالغة الاتنين اكعب من بعض ورح يا سياف خليها ترتاح وتنوم وبنجيها بعدين ،قال ليها اي ورح طلعوا.
بالعصر كدة جاتني رغبة في اكل الطين طبعا زول إنيميا نقص الحديد كدة بكون عندو رغبة في الطين طوالي طلعت براحة من العنبر ومشيت حوش المستشفى ووصلت الحيط لقطتا كذا طينة وتاني دخلت واحدة كبيرة في خشمي، قبضني ليك سياف وقال لي بتعملي في شنو؟؟!، ما رديت، قال لي ماليه خشمك بشنو اتكلمي ،ابيت ،طوالي مسك يدي الكنت مضارياها منو ولقاهو طين قلعو وجدعو ،وقال لي طلعي البتاع دة احسن ليك بعد طين كمان طين مستشفى الما معروف حاصل عليهو شنو ،ابيت، قال لي بعد ل3 واحسن ليك تتطلعيهو، بقى يعد وانا كنت مصرة بس خوفت بعد عدا لاتنين، طوالي طلعتو، قال لي ديك ماسورة امشي ليها ونظفي نفسك، مشيت واتضمضمت جاني وقال لي ما اسمع جيتي على حيط ولا اكلتي طين من حتة تانية، قولت ليهو تمام عشان امشيهو وكنت منتظرة يتخارج لانو عندي اتنين في جيبي لسه ،قال لي مها انا حذرتك، قولت ليهو انا وعدك وبعدين شنو الاهتمام الزايد دة ،قال لي انا بس ما عايز اتبلي بيك اكتر من كدة وما ناقصني أمور تسمم ولا أمراض تانية ،انا للاسف مسؤول منك هنا،ختيت يدي جوة الجيب وقولت ليهو ما تخاف ما باكل، قال لي مالك خاته يدك في جيب العباية قولت ليهو ماف شي!!، قرب وقال مها جيبيهن، قولت ليهو هن شنو، قال لي بحزم مهااا ،طلعت ليهو واحدة، قال لي اكيد في تاني ،قولت ليهو ماف، قال لي افتش براي ،قولت ليهو أقدر بس ،قال لي عارفة اني بعملها، طلعت التانيه وقولت ليهو ما عندي غيرهم، قال لي ورح نرجع طيب ،قولت ليهو عايزة اشم هواء ،اتنهد وقال لي انا بديك دقيقة تشمي هواء فيها وتمشي معاي صريت ليهو وشي ودخلت قبل ما اتميها وهو دخل وراي ، لقينا ريم قاعدة قالت لي كنتو وين، قولت كنت عايزة اكل طين بس سياف ما خلاني ضحكت َوقالت لي اتصلي بس بخطيبك اسي بجيبو ليك اتوترت وقولت ليها بكون مشغول، قالت لي هو منو وريني ليهو صورة، قولت ليها ما عندي صورة قالت لي طيب صفاتو كيف ؟!، قولت ليها والله طيب معاي وكويس شديد وهادي، قالت لي طيب خطوبة تقليدية ولا عن حب ،قولت ليها لا عن حب ،قصدت اكذب عشان ما تشك فينا انا وسياف نهاي ،تاني قالت لي هو وين اسي خطيبك ،سياف قال ليها ريم خلاص خليها تترتاح، قالت ليه اسفة بس نفسي اعرف الخطيب الما شغال بخطيبتو دة ياخ ما حصل شوفتو متصل بيها ولا حصل شوفتها مبتسمة مع تلفونها واسي هي عيانه ما شوفت اي اتصال منو، كحيت وقولت ليها قولت ليك مشغول وانا عاذراهو، قربت وقالت لي انتبهي الشلابات كتار، قولت في نفسي يا حليلك ما عارفة انو انتي الضحية وانا الخطبت حبيبك واي انا حاسة بالذنب.
طلعو بعدها وانا قررت اعمل هروب وادخل الميز بس تاني قولت اسي المجنون دا بجي وراي رقدت فجاءة ما القى ليك الا في وشي ياسر قلبي بقى يدق دق مبالغ فيه ..............
_______________________
امرت النسيان ان ينساك فنسيت النسيان ولم انساڪ💔