رواية دون أن أشعر
الفصل التاسع 9
بقلم ال زهراء
قال لي ليه بتعامليني ببرود بعد عرفتي الحقيقة، قولت ليهو في حاجة حا تتغير بعد عرفتها ما هو انت مشيت بطريقك وانا مشيت بطريقي، قال لي معقول ماف فرصة انو طرقنا تاني تتلاقى،قولت ليهو هل نحن زي ما نحن زمان؟!، قال لي قصدك شنو ؟!، قولت ليهو انت راجل بمرتك عايز تخرب بيتك عشان نرجع طيب هي حا يكون شعورها كيف ؟!، قال لي ما حا يكون عندها اي شعور انا ما حصل عشمتها بحاجة ،قولت ليهو متأكد ؟؟!، اتوتر وقال لي هي متفهمة لي 3سنين منها ما سالتني، قولت ليهو إنجاز عظيييم منك طيب من الاول متزوجها وكاسر قلبها بعمايلك لي... يلا دا سبب انو ما ارجع ليك، قال لي اتزوجتها عشان امي امي هي الكانت عايزة كدة، قولت ليهو بغصب ليه ما فكرت ببت الناس وليه ما اهتميت بيها وبمشاعرها ياخ معقول عايش معاها طول الفترة الفاتت وانت ما مديها اي حاجة حرام عليك عديل، انت كان تحاول في النهايه قسمتنا ما كانت لبعض، قال لي ما قدرتا انا ما عايز اي زول تاني غيرك، انتي بتحبيني صاح للان ؟؟،قولت ليهو ما تسالني السؤال دة انت بس حاول مع ندى واحتمال تلقاها احسن مني، انت ما اظنك في يوم قولت خليني اعرفها، انت لو من الاول ما وافقت بزواجك منها ما كان اسي في مشكلة بس انا ما بقدر اعيش حياتي على حساب تعاسة زول تاني، قال لي يعني انتي اسي قايلاها مبسوطة ،قولت ليهو لو ما مبسوطة وما عاجبها وما عايزاك ما كانت انتظرك طول الوقت داك، قال لي انا ما عايزاها لكن، قولت ليهو ما كان من الاول تقول ليها كدة، لشنو بس بعد ظهرت الحقيقة قررت تطلقها انت ما حاس نفسك انك ظالمها، قال لي انا ندى بعرف اتفاهم معاها، قولت ليهو بغضب كرهي كرهي الزول الزيك يا ياسر انت جبان انت كنت متمسك بيها كبديل ولمن عرفت سوء الفهم البيني والبينك قررت تتخلى عنها ،طيب هل تفتكر انو ممكن نعيش حياة هنئية وانت مزعل بت ما عندها اي ذنب ،قال لي ياخ انتي مالك ومالها انا بحل اي حاجة ،قولت ليهو ما تخليني اشيل صورة كعبة عندك يا ياسر اهتم بمرتك بس نحن كانت بدايتنا غلط ما كان اتكلم معاك وما كان الاقيك وامش معاك المطاعم!، لو انا قطعتها معاك ناشف وقولت ليك كون نفسك وتعال لي ولا انت قولت لي ما عايز اي تواصل معاك الا بالحلال احتمال اسي نكون متزوجين، بس نحن اتخذنا طريق غلط.
الارتباط في الزمن دة عادي وبقى كتير شديد بس الحرام ياهو حرام وما بتغيير حتى لو كل الناس بتعملو!، انا حاليا ما مركزة ما اي حاجة غير نفسي ومستقبلي العملي صاح زمان كنت زعلانة منك وحتى كل ما اتذكر ببكي والحاله الموضوع ليهو 3سنه، بس والله فتره من الفترات وبعد مرضي الاخير دة تحديدا وبعد شوفت الموت بعيني بقيت افكر واقول دا شنو الكنت بعمل فيهو دة ويادوب استوعبت الدوامة الكنت عايشة فيها ،ياخ انا كنت رافضة الأكل وحتى الشراب ونفسنت عديل وحتى معدلي نزل اخر سنه، وعباداتي ما كنت مركزه فيهم وكنت بس بشرد في موضوع الرساله الكانت محتواها البينا انتهى وبعد عرفت الحقيقيه كنت برضو مضايقة وبديت تاني انتكس بس والله المرض جاء في اللحظة المناسبه وذكري انو في حاجات اهم شديد من البعمل فيهو دة، وانو كل الأمور دي بعدين ما بتنفعني في قبري ولا في آخرتي عشان كدة اسي تاني انا ما عايزة ادخل معاك في اي علاقة اي كان نوعها ، نحن خلاص انتهينا انت بقيت راجل متزوج وعليك مسؤوليات كتيرة وكونك اسي تتكلم معاي دي شينة شديد في حق مرتك، اسي انت خت نفسك مكانها لو هي اتكلمت مع زول غيرك.....، قاطعني وقال لي ندى ما عندها اي أمور زي دي ،قولت ليهو شنو الضمنك انها ما قاعدة تخونك وانت جادعها 3سنيين، قال لي بغصب مها انتي ما بتعرفيها فما تتكلمي كلام فارغ ساي، قولت ليهو انت مضايق مالك حتى لو عندها زول انت الدخلك شنو ما اصلا انت ما عندك معاها حاجة وعايزاني انا صاح، اتوتر وقال لي لو بتتكلم مع راجل تاني وهي متزوجة مني ما بخليها، قولت ليهو وانت حضرتك بتعمل في شنو اسي، ما هو بتتتكلم معاي وحتى قولت بتحبني ولي ليك الأمر مباح وليها ما مباح!.قال لي وصوتو متغير برجع ليك انا اسي عايز احل المواضيع اللسه ما محلولة.
قفلت في وشو وبقيت قاعدة اي حاجة اتغيرت في الزمن دة وكلنا اتغيرنا صاح لسه في مشاعر عندي ناحيتو بس انا خلاص ما حا اخليه يتخذ اي خطوة اتجاهي.
في اليوم التاني قررت انزل في المستشفى جهزت نفسي ولبست ،في المواصلات اتصلت بي مروة ما رديت عليها لانو للان ما قادرة اسامحها على كذبها ،رجعت لي تأني برضو ما رديت، رسلت لي رسالة قالت لي فيها احمد دا طلع مدين دين كبير واسي سجنوهو وانا قولت لأبوي يساعدو بس ابوي رفض، واسي ما عندي اي حل غير ابيع دهب امي، نزلت المستشفى واتصلت بيها و قولت ليها دهب امي ما بتتباع دي اخر ذكرى لينا منها، قالت لي يعني ابو أولادي يقعد في السجن، قولت ليها كان تفكري قبل ما تجري وراء التياب والحاجات التانيه وتقدري وضع زوجك انتي عارفة وضعو المادي بقى ما زي زمان والمرأة الصالحة هي البتراعي للحتة دي وهي البتتعرف في الحارة، بس هو اسي مجبور عليك وكل مرة بقى ينبذك بعد ما كان بحترمك وبحبك حب ما طبيعي بس اسي شايفك مجرد ام لاولادو وما قادر يطلقك عشانهم، انا كنت متخيله انو هو كعب وصعب بس اخر رساله منو بعد اعتذر لي ورتني حقائق عنك كتيرة وانتي ما كنتي قاعدة تورينا ليهن، لو صبرتي على وضعك وخليتي مقارنة نفسك بصاحباتك أكان اسي برة السجن بس انت ضغطتي عليهو وحملتيهو فوق طاقتو ،هو ذبنو شنو لو خفضوهو، وريني هل انتي في بيتنا كنتي عايشه العيشه العاليه العايشاها اسي دي ،ما هو عيشتنا عادية ،وحتى لو كنتي عايشة في بيتنا كدة لو راجلك جاتو ظروف مفروض توقفي جنبو وتنسي مستوى معيشتك الأصلي لانو الحاجة دي ما بتأثر بس عليك حا تأثر علينا لانو حا يتهم اهلك وحا يقول انهم حوجوك عشان كدة بقيتي ماديه وما بكون عارف انو انتي الدلع اللقيتيهو ماف زول لقاهو، نصيحة ليك حاولي ارجعي لنفسك شوية والدهب الدقيتيهو فترة اغترابو ساعديهو بيهو ،وخلي انانيتك دي وخلي دهب امي في حالو، قفلت منها كان حسي عالي شديد! وحتى حلقي حرقني من شدة صوتي، دخلت جوة وانا مضايقة بس تاني فردت وشي ،وقولت ماف داعي تشغلي بالك بالامور دي ركزي بس على الشغل، مشيت لبوص عبد الرحمن وقولت ليهو عايز اشتغل عندك، قال لي ماف طريقة العدد مكتمل، وجهني لبوص تاني بس ما لقيتها تاني فجاءة في مرة دخلت وكانت معالمها بتشبة معالم سياف ؟!، قولت اكيد قريبتو مبالغة الشبه قعدت قولت ليها انا عايزة اشتغل معاك، قالت لي عرفي عن نفسك، قولت ليها مها عمر خريجة طب جامعة...، قالت لي مها عمر الاسم دة ما غريب علي اقعدي قعدت كانت ماسكة تلفونها تاني قالت لي مها عمر محمد ،قولت ليها اي، قالت لي ايوا القولتي ما عايزة الخطبة من ولدي، في اللحظة دي اتجمدت في مكاني ودنقرت راسي، ضحكت وقالت لي عادي يا بتي انا بهظر معاك اصلا هو زاتو ما كان عايز الخطبة دي والجمعة ماشين نخطب ليهو، إبتسمت ليها ،هي إبتسمت لي وقالت لي انتي لو عايزة تشتغلي معاك مرحب بيك، بس اعرفي انو انا حازمة شديد وما اظن في زول يقدر يتحمل معاملتي وخاصة البنات عشان كدة زي ما شايفة الوحدة دي ما فيها الا بت واحدة!،قولت ليها ماف مشكلة الزول لو ما وجهوهو بقسوة بتعلم كيف ضحكت!،قامت تاني وقالت لناسها المرة دي لو لقيت غلطه في اي حاجة ما بخليكم، امس بسبب مؤيد البت كانت عايزة تباصي، واعرفو انو انا بسامح في حاله الغلط بدون معرفة بس الزول لو عارف ومتاكد ليه يغلط.
وقفتنا في حاله واحدة عندها ملاريا بس بتاخد كينين،كترت علينا الأسئلة شديد وفي النهاية طلعت الملاريا ما زي الملاريا البعرفها زي كانو علم براهو!، مشينا كم عيان تاني وبنفس النمط كانت حازمة شديد وانا طبعا قايلاها نستني لانو المريضة ديك ما سالتني عن أي حاجة بس هنا في مريضة القلب معطتني معطة شديدة،وانا في حاجات غلبني لانو للأسف الباطنيه ما رجعت ليها كتييير وكنت في الفترة الفاتت راجعت الجراحة!.
بعد انتهينا قالت لي مها انتي قايله انو بعد اتخرجتي ما حا تقري تاني ولا شنو؟!، قولت ليها اسفة، قالت لي ما تعتذري مني اعتذري لنفسك عشان ما عارفة حاجة!، قولت ليها بوص انا...، قاطعتني وقالت لي بحزم بكرة القريبة دي تجيني عارفة اي شي عن القلب، قولت ليها بكرة!!!، قالت لي اي بكرة القريبة دي ،بقت تمشي وتسلم على الغاشي تاني دخلت وشالت أوراق كدة وطلعت وقالت لي انا حا اديك العيان حق مؤيد تتابعي معاهو وما تعملي غلطتو نهاي، قولت ليها غلط في شنو؟!، قالت لي اسألي زملائو مجرد اني اتذكر الحاجة دي بجييني فشل في القلب، ضحكت!، خبطتني ليك في ضهري وقالت لي تضحكي كمان، سكتا!، هي مشت طوالي، قولت في نفسي معقول دي امو طيب سياف دا جاء من وين!!؟؟.
__________________________________
بلسان ياسر
قررت امشي واتكلم مع خالتو تهاني وعمو محمد في الموضوع دة، رسلت لندى رساله وقولت ليها فيها انا الليله حا اجي اتكلم عن موضوعنا، وصلت بيتهم ولقيت سياف قاعد استغربت وقعدت معاهم ،عمو محمد قال لي البت دي أخبارها شنو؟ ؟!، استغربت شديد وقولت ليهو ندى ما معاكم يعني!!؟، قالت لي خالتو بخلعة كيف يعني ما معانا انت ما رسلت ليها وقولت ليها جيت وهي رجعت بشنطتها، وتاني عاينت لمحمد وقالت ليهو بتي وين يا محمد الخلا علينا، الناس ديل كانو خايفين وسياف دا طوالي قام و هجم علي وقال لي عملت لللبت شنو ؟!!، قولت ليهو ما عارف انا اخر مرة شوفتها لمن جات البيت وتاني ما شوفتها، قال لي بغضب الحصل شنو لمن جات البيييت خلاها تمشي منك ؟؟!، ما رديت بقى يضرب فيني وامو صرخت عشان يفكو فجاءة كدة ندى جات داخلة وقالت ليهم امي ابوي انا كويسة انا كنت بس مع صاحبيتي وما حبيت اكلمكم الا لمن يجي هو البيت ويواجهكم، قالت ليها خالتو تهاني يواجهنا بشنو ولشنو خليتي بيتك ومشيتي لصاحبتك الحاصل عليك شنو يا بتي !، ندى قالت خلي ياسر يكلمكم، جيت وقولت ليها اي صاحبة الكنتي عندها دي ،قالت لي الدخلك، قولت ليها انا راجلك ومفروض اعرف مشيتي لمنو ؟؟!، قالت لي فقدت الحق في انك تحاسبني كلمهم وخليني ارتاح!، مسكت يدها بقوة وقولت ليها ندى جاوبي سياف بعدني منها وقال ليهو ما تهبش اختي انا بحذرك!، عايز تقول شنو عشان انا زاتي عندي كلام معاك، قولت ليهو ما اسي انا اسي عايز اتكلم مع ندى فاسمح لي اسوقها! ،سياف قال لي ما حا تمشي معاك اي مكان لو عندك اي حاجة قولها هنا، قولت ليهو دي حاجة بيني وبينها بس وما عايز اي زول يسمع ،ردت لي خالتو تهاني وقالت لي ما حا تمشي معاك كونو مرتك ما تعرفها كانت وين اصلا دي في قمة اللامبالاة.... هي طلعت منك معقولة ما فكرت تتصل بيها وتعرفيها وين ؟؟؟!، قولت ليها انتو أهلها ما كنتو عارفنها وين، قالت لي هي كذبت علينا وقالت معاك بس انت اصلا ما عارف مكانها لانو ما فكرت تتصل بيها، ندى قاطعتنا وقالت لي وريهم سبب عدم اتصالك وسبب كذبي عليهم وسبب مشيتي من بيتك؟؟!، قولت ليها بغضب اول حاجة افهم كنتي وين اول، قالت لي ما عندك فيني شغلة!، قولت ليها انا لسه راجلك!، ولازم اعرف كنتي وين؟، سياف كان عايز يضربني، قولت ليهو مفروض تضرب اختك متأكدين انها كانت مع صاحبتها، ردت ندى وقالت لي قايليني خاينة زيك ولا شنو ؟؟؟!، سياف قال ليها قصدك شنو ؟؟!، قالت ليهو خلي ياسر يوريك قصدي، جاني ومسكني من قميصي وقال لي اتكلم قصدها شنو ندى بالكلام القالتو ،قولت ليهو انا ما خنتها انا قولت ليها ننفصل عشان ما قادرين نتفاهم، قالت لي ندى بس كدة ليه ما قولت لسياف كمان انو عايز ترجع لحبيبتك لانو ما قادر تنساها، سياف قال ليهو انت عشان كدة ليك 3سنين ماف كنت متواصل مع حبيبتك يا كلب ولا شنو ،قولت ليهو لااا ما كنت متواصل معاها ولا كنت قاعد اخون في ندى ،اصلا نحن كنا حاظرين بعض وطلع سوء فهم واسي اتحلا، وهي وافقت بي وانا الفرصة دي ما بفوتها، قال ليهو انت من الاول متزوج اختي عشان تنسى ديك وبعد رجعت ليك قررت ترميها انت عايزني ارتكب فيك جريمة ولا شنو!!، ضربني بنية وقعني في الأرض!!، طلع ليهو مطوة في جيبو وقال لي انا حا اقتلك عشان واحد زيك ما مفروض يعيش، امو دي بقت تصرخ وندى شغاله ليهو يا سياف ما بستاهل والله تضيع عمرك عليهو خلي البتعمل فيهو دة ،قال ليها لازم يموتتت الداهي دا........
تفتكرو سياف حا يعمل شنو لمن يعرف انو المقصودة مها وخاصة بعد ما كذب ياسر وقال وافق بي ؟؟؟؟
____________________________
إذا أردت النجاح في حياتك تحلّى بعقل يتقبل كل شيء وقلب لا يتعلق بأ
ي شيء