رواية دون أن أشعر
الفصل السادس 6
بقلم ال زهراء
فجاءة ما القى ليك الا في وشي ياسر قلبي بقى يدق دق مبالغ فيه قال لي مها كيفك اسي ؟، قولت ليهو بثبات بخير الحمدلله ،قال لي البلد دي ما نفعت معاك ترجعي، عاينت ليهو وقولت ليهو لا بس انا عايز اسالك سوال ليه جيت، قال لي قلقت عليك بعد حادثة السجن، قولت ليهو ايوا انا نسيت من كترة همومي العلي انا حا ارجع ليك قروشك الدفعتهن، قال لي انا اسي قولت ليك رجعي لي ولا جبت ليك سيرة قروش، قولت ليهو ارضاء لضميري مفروض اوريك انو حقك برجع +ما كان تجي ،قال لي مفروض صاح بس للاسف مهما عملتي لي انا لسه بحبك، قولت ليهو بغضب انا العملت ولا انت، طلع التلفون ومداهو لي قال لي الرساله دي ليها سنين ما قادر امسحها كل ما اقول اتصل بيك لاني مشتاق ليك ولا ارجع ليك بفتحها وبقراها وبسببها جاتني القوة انو ابعدك عن حياتي ، قريتها كانت رسائل بيني وبين اختي وكلها نبذ ليهو ،قولت ليهو ياسسسر مستحيل يكون الكلام دة حقيقي، قال لي انا بكذب ولا عيونك بتكذب دا ما الاكونت بتاعك وبتاعها،قولت ليهو اي بس انا ما كتبت كل دة ولا انت زورتو عشان تثبت انك بري لكن ما علي، انا بعد رساله البينا انتهى دي ما بصدقك نهاي ،قال لي انا متين قولت البينا انتهى هو اصلا انتي اديتيني فرصة معاك، قولت ليهو بحزم اوعى يا ياسر تنكر فتحت التلفون ووريتو الاسكرين وقولت ليهو شوفت انا كل ما اشوفها بتراجع عن التواصل معاك، قال لي انا ما رسلت اي حاجة انتي الحظرتيني وانتي قولتي فيني كلام كتير الوقت داك، قولت ليهو انااااا!!!؟، لا مستحيييل +انا ما حظرتك الا بعد قولت البينا انتهى بدون سبب ،وشو اتغير وقال لي يا بت الناس انتي بتاريخ.... اهنيني وحظرتيني وانا بحلف ليك انو ما رسلت البينا انتهى، قولت ليهو انا التاريخ دا متذاكراهو ما كان عندي التلفون اصلا وكان عند اختي وكنت بذاكر للامتحانات ارسل ليك كيف يعني لو عايز تكذب شوف كذبة غير دي وبالنسبه للاسكرين حقك دا كلو غلط وانت عارف انو انا لو موتا ما بقول عنك حاجة زي دي، مسك راسووووو شديد وقال لي انا حا اجن والله حا اجن كيف طيب انا الاسكرين دة جابتو لي اختي من تلفون اختك مباشرة وقالت شافتو بالغلط، قولت ليهو اختك هي اصلا عرفت بعلاقتنا كيف! ؟، هنا وقف ومسك راسو وقال انا ما فكرت لانو الغضب كان مسيطر على ما فكرت والله، انا زاتي قومت في اللحظة دي وحسيت انو راسي عايز يطق كيف الكلام دة يحصل!!!، قال لي مها البينا انتهى اترسلت متين ،قولت ليهو و انا مصدومة بتاريخ...، قال لي التاريخ دة متذكرو كويس كنت طالع لمقابله شغل وبتذكر انو اختي شالت تلفوني وقالت عايزة تنزل فيه محاضرات وبتذكر اليوم داك انا مشيت من غيرو واضطريت اتصل بيها عشان تفتح بنكك تحول لي، قولت ليهو كذااااب، وراني ورقة بتاريخ مقابله الشغل ،قولت ليهو انا راسي دا حاساهو عايز يطق يا ياسر انا ما فاهمة حاجة ما فاهمة والله وبقيت ابكي، قال لي ولا انا فاهم بس حا افهم، قولت ليهو متذكر الكلام الكان بينا ،قال لي هو بتنسي عندي ليهو اسكرين، وراني ليهو وطلع سريييع وانا بقيت محتارة وقلبي بدق دق مبالغة وصدعت من كترة التفكير ليه الرسائل جات لمن اختي كان عندها التلفون وليه لمن هو كان في الشغل الرسائل حقات الانفصال جن رجعت لايام زمان مروة زمان ما كان عايزاني نهاي اتواصل معاه وخاصة في فترة الامتحانات تاني التلفون خسر وبقى عندها كم يوم!، هل هي عندها علاقة!!، اتصلت بيها ردت قولت ليها بحس عالي مروة عندك ليك سؤال وتجاوبيني عليهو بصراحة كان عندك يد في انفصالنا انا وياسر، ما كان في اي رد، قولت ليها مروة اعترفي هو وراني رسائل انا عمري ما رسلتهم ليك، قالت لي بكذب الزول دة ،قولت ليها كيف بكذب دا الاكاونت تبعك انا شوفتو يعيوني، قالت لي ذكاء اصطناعي اسي هو بعد شافك مبسوطة يقول اخرب عليها، قولت ليها لا وراني إثبات، قالت لي شنو؟، قولت ليها انا ما قاعدة ارسل ايموجي بس غلطه الشاطر بالف ،قالت لي ما هو زورو، ضحكت ضحكة ياس وقولت ليها انا بكره الايموجي دة وهو وحدو العارف فمستحيل يعملو لو عايز يزور كلامي، فدي انتي، قالت لي شنو؟؟؟؟ متهماني بايموجي بس ،قولت ليها اي ياسر البعرفو يعرفني اكتر من نفسي ولو عايز يزور كلامي كان استعمل اسلوبي بس دا اسلوبك انتي يا مروة انتي صاح اختي بس ما بتعرفيني زي ما هو بعرفني، قالت لي دة كان لمصلحتك كان لازم تنفصلو اصلا مستحيل تكونو للبعض هو امو كانت عايزه ليهو ندى وانتي كان عمو محمد عايزك لسياف فما كان في حل، انتي صاح بتسمعي كلامنا بس انا متأكدة انو في ياسر ما حا تسمعيهو فعشان كدة انا اضطريت اعمل الحاجة دي معاك بس اسي كلو بقى من الماضي وياسر اتزوج....، قاطعتها وقولت ليها كفايه انا من اليوم ما عندي اختك واختي ماتت الليله بقت تبكي، قفلت منها التلفون اتصلت بي حظرتها وبقيت ابكي بأعلى صوت لمن ناس العنبر لاحظو لي ،قولت في نفسي ضيعت مستقبلي وضيعتني ،انا موجوعة شديد منها موجوعة وقلبي عايز يتقطع ،رقدت واتجهت على الحيطة وبقيت ابكي واتنهد.
_________________
بلسان سياف
جات ريم وقعدت قالت لي قبيل في زول سألني من مها وشكلو خطيبها،قولت ليها خطيبها ؟؟، قال ليك ولا شنو؟!، قالت لي لا بس باين انو مقلق عليها وخايف!، قولت ليها ما سالتيهو من اسمو، قالت لي لا ما جاتني الفرصة! بس وجية وطويل و...، قاطعتها وقولت ليها ما عايز اعرف ،قالت لي طيب نتحول لموضوع تاني متين الخطبه بتاعنا ،حكيت راسي وقولت ليها انتي عايزاها متين ؟؟!، ابتسمت وقالت الليله قبل بكرة، ضحكت وقولت ليها والله ياخ لو ممكن مالو طولنا نحن، قالت لي ما فهمت لو ممكن دي في مانع؟؟!، قولت ليها الفترة دي اموري جايطة شوية اديني شويه وقت، قالت لي تمام بس اقول لأبوي شنو هو جايب لي عريس، قولت ليها بغضب عارفة انو انا ما بخليك لا انتي ولا العريس الجايبو ليك ابوك صاح، انتي لي انا وبس، إبتسمت وقالت لي اكيد ليك بس انت اتلحلح، قولت ليها اصبري شوية وكل الأمور بتتحل، قومنا بعدها قالت لي ما عايز تشوف مها، قولت ليها لا لو عايزة شوفيها انتي ،قالت لي تمام.
بعد مسافة اتصلت بي وقالت لي مها خاشه في حاله تانيه جاتها تشنجات! ،قولت ليها انا جاي! مشيت طوالي لقيت حرارتها مرتفعة، قالت لي نحن غلطنا كان لازم نعمل ليها فحص حمى الض...، ما تمت كلامها وانخلعت ولونها انخطف ، قولت ليها انتي مش قولتي انو كل الفحوصات اتعملن وحتى فحص الضنك ،قالت لي وهي بتمتم انا اسفة انا نسييييت وقولت لو قولت ليك انو اتعمل حا تشاكلني وافتكرت انو ما بحتاج اصلا لانو ماف حالة هنا ،ضربت الطربيزة وقولت ليها دا استهبال واستهتار منك ،انا عندي حاجة واحدة بكرهها وهي الكذب الكذب عندي نقطه ما بقدر اتجاوزها وبتنزلك من قيمتك ، فحصتها ليها وطلعت عندها ،قولت ليها اقعدي هنا معاها انا ماش افتش دربات بندول ،قالت لي الغلط غلطتي انا الحا امشي ولو منعتني ما بخليك، قولت ليها باليل يا ريم ،بكت وقالت لي اي باليل انا الغلطت وانا الدهورت حالتها، قولت ليها اقعدي مكانك بس، مشيت وجبت ليها دربات بندول.
في اليوم التاني لقيت اتصالات كتيرة من ريم رجعت ليها قولت ليها في شنو؟؟!، قالت لي ماف اختفت، قولت ليها منو الاختفى، قالت لي مها انا مشيت اتوضى جيت لقيتها ماف ،فتشت اي مكان ما لقيتها.
طلعت سريع ومشيت لباب المستشفى قالو لي طلعت اسي، طوالي دورت العربية ولحقتها لقيت الشارع فاضي قرررت امشي الميناء مشيت ولقيتها هناك ،لمن شافتني ركبت البص ،انا طوالي ركنت العربيه واتحركت عليها وركبت البص قولت ليها بغضب ماشه وين ؟؟!، قالت لي البيت ،قولت ليها البيت لشنو ابوك مش نبهك انو تقعدي هنا و....، قالت لي اي نبهني بس ما عايزه اقعد، قولت ليها عارفة لو رجعتي بحصل ليك شنو من طرفو وبعدين كيف زول تعبان بقدر يسافر!!!؟، قالت لي بزهج اي شديد عايز يحصل خليه يحصل جدعت لي الدبله في وشي وقالت لي هاك دبلتك انا الحا أرفض الزواج دة ولو قتلني ابوي حا ارفضو!!، قولت ليها من وين جاتك الشجاعة، قالت لي حسيت بالاستغلال بس ووعيت على نفسي كلهم بقولو لصالحك بس ما شايفة حاجة لصالحي كلهم عايزين الزواج دة لمصالحهم الشخصية هم مستعدين يدمرو حياتي بس عشان مصلحتهم وانا بعد كدة ما بكون جزو من الحاجة دي ما بكون نهاي، بقيت متره فيها شديد بت زي العاصفة وبميه لون ،قعدت جنبها وقولت ليها طيب عارفة انك واحدة في البص ، عاينت للمقاعد وقالت لي كل همك دة ، قولت ليها اي، حدرت لي!، قولت ليها انا ما حا امنعك من السفر لانو حاجة حا تنفعني شديد بس المشكلة تموتي في نص الشارع قبل ما تصلي فانتهي علاجاتك والعايزه تعمليه اعمليهو بعدها انا ما بسالك +الدبله الجدعتيها دي أغلى منك ،حمرت لي وقالت لي دي أغلى مني انااااا عارف الكليه بكم يا غبي؟!!!، قولت ليها الغبي منو ؟؟؟!، انتي شكلك مخك دا حصل ليهو حاجة وبقيتي ما بتعرفي حدودك معاي ،قالت لي لا انت شنو.....نفسي اعرف ليه عامل لنفسك قيمة كدة، قولت ليها بنهرة مهاااا ما تقولي عشان انتي عيانة حا تقدري تقولي اي كلمة في بالك، انا بحذرك وما بكرر تحذيري ابقي بت عاقله واعرفي حدودك معاي!!! لاانو حاليا راخي ليك ومعتبر انو الحمة طايرة ليك بس لو ختيتك في راسي ما بخليك وانتي عارفاني كويس، واسي تنزلي من غير اي كلمة وتخلينا نمشي المستشفى ولمن تبقي كويسة لو عايزة تمشي المريخ امشي ماف زول بمنعك،قالت لي عليك الله أنزل وزح من خلقتي علاقتنا انتهت بانتهاء التمثيليه دي،قولت في نفسي انا عملت العلي وهي رافضة الفكرة ،قولت ليها طيب براحتك انا ما بجبر بت عمرها 28سنه، زهجت شديد وقالت لي انت اكلت سمايتي وتقول عمري 28سنه وتاني ضحكت ضحكة استفزاز وقالت لي لو انا عمري 28 انت عمرك 40 اعرف!!!، قولت ليها بس ركزتي مع العمر ،التفت وقالت لي بحدة اي + اعرف نصحييه لوجه الله ما انك ما بتستاهلها المره بتكره سيرة العمر وكمان لو عمر غلط بتقتل عادي فيه، ضحكت والله كلامها دا ما قادر افهمو البت دي جنت رسمي الحصل شنو بين ليله وضحاها بقيت متحرك وتاني التفت وقولت ليها حبيت أوضح نقاط قبل ما امشي كانت اسوء ايام حياتي القضيتها معاك هنا، بقت تصرخ ضحكت ونزلت بقيت متحرك وهي تنبذ بالشباك، ركبت العربية وقولت خلاص انتهى اي حاجة ومستقبلي بقى واضح.
وصلت المستشفى جات ريم مخلوعة قالت لي لقيتها ما قاعدة ترد علي قولت ليها مشت أهلها وتاني ما جايه، قالت لي بالوضع دا ،قولت ليها اي هي رفضت تنزل ،قالت لي لو جاتها حاجة في الطريق هي ما اكلت من امس وتعبانه، قولت ليها اطمني هي كويسه واحسن مني ومنك لانو لسانها دة ما وقف كلام، قالت لي الله يستر بس، قولت ليها ماف حاجة حا تحصل!، بعد كدة المرور حا امشي اجهز، قالت لي تمام، مشيت واستحميت وجهزت وطلعت المستر لقيتو سبقني اعتذرت ليهو وتمينا العيانين العندنا ،قال لي في فرد ماف. قولت ليها اي مها انا حولتها من الوحدة بس هي مشت وخلت المسشفى ،قال لي لشنو، قولت ليهو بكون عندها ظروفها المهم بتمشي هي ويجي غيرها، قال لي والله يا ولدي ما اظن تجي واحدة زي مها، قولت ليهو السبب؟، ضحك وضربني في كتفي وقال لي عشان مها الوحيدة القدرت عليك وادبتك، الجماعة كلهم ضحكوا بس لمن عاينت ليهم وقفو ضحك،هو ضحك زاتو وقال اضحكوا ما تخافو منو هو هيبتو راحت خلاص، ضحكوا وانا قولت ليهو مستر سفيان انت غلطان وما عارف الحقيقة والله هي....، قاطعني وقال لي سياف انا غلطان، سكتا وما قولت كلمة تانيه المستر دة رايو واحد وما بغيرو، طلع ريم قالت لي بحب يهظر معاك ما تشتغل بكلامو، قولت ليها تمام، اتحركت على الباب وقعت حاجة من جيبي طوالي التفت عشان اشيلها خطفتها ريم ،قالت لي دي دبله منو؟؟!،قولت ليها بسرعة لقيتها واقعة ،قالت لي دي بتاعت مها، قولت ليها عرفتيها كيف ؟!، قالت لي منقوشه بحروف صغيرة،قولت ليها ما ركزت فيها امسكيها عندك هي لسه ما جات شالت شنطتها ،قالت لي تمام بس المحبس، قولت ليها ما عارفو ما لقيتو معاها.
بعد مسافة جابو في الطواريء مها وكانت تعبانه شديد ،ريم قالت لي انا دة الخوفت منو، قولت ليها البت دي عنيدة وما بتسمع الكلام، اول حاجة عملنا ليها أكسجين لانو شكلها شمت حاجة ضايقتها والبخاخ ما عمل ليها شي بعد مستوى التنفس رجع طبيعي، تاني قسنا ليها الضغط والنبض ولقيناهو منخفض وكان في حمى ،اديتها نورمال سالين ،وتاني اديتها درب بندول عشان الحمة تخف.
بعد حالتها استقرت وصحصحت شويه قولت لريم راقبيها.
________________________
بلسان مها
ما كنت قادرة اتكلم وكنت بنوم وبصحى لبليل كدة حتن قدرت اتكلم زي الناس، ريم قالت لي قلقتي بينا ،قولت ليها اسفة والله، قالت لي تأني ما تبقي عنيدة واسمعي الكلام، قولت ليها طيب، بعدها قالت لي دبلتك وين ما تكوني وقعتيها، عاينت ليها وقولت ليها لا ما وقعتها انا اديتها هي والمحبس لخطيبي وانفصلنا،قالت لي لاقيتو وين خطيبك؟؟، قالت لي هو جاء يشوفني وانا انفصلت منو ؟،قالت لي لشنو؟!، قولت ليها قسمة ونصيب انا ما عايزة افتح الموضوع دة التفت منها، قالت لي سياف لقى الدبله واقعة شكلو خطيبك وقعها بدون قصد بلعت ريقي والتفت عليها تاني وقولت ليها بكون اصلو هو ما قاعد ينتبه، مدتها لي ،قالت لي شكلو الدبله ما عايزة تفارق صاحبتها وضحكت وبعدها طلعت.
_____________________
بلسان ريم
مشيت المكتب وبقيت قاعدة جات واحدة وقالت لي المحبس دة وقع من سياف قبيل لمن جاء مستعجل وشال ميزان الضغط،انصدمت شديد هو ما قال المحبس ما لقاهو مع الدبلة ليه يكذب وافهم شنو انا ،هو مستحيل يفكر يسرقو لانو ما محتاج ليهو بس ليه كذب، بقيت قاعدة والف فكرة جات في بالي من يوم سياف عرفني بيها لحدي الليله علاقتهم كانت مميزة مميزة لدرجة حتى المستر علق عليها قدامي، معقوله سياف هو خطيبها..........تفاعلكم بخليني استمر ❤️
____________________
"أَعْتَذِرُ لِنَفْسِي عَنْ كُلِّ الَّذِينَ ظَنَنْتُهُمْ قَنَادِيلَ تُضِيءُ قَلْبِي، وَمَا كَانُوا إِلَّا عَتَمَةً."