رواية دون أن أشعر
الفصل الثالث 3
بقلم ال زهراء
بقيت متحركة لقيتهم قاعدين تحت شجرة وهو بضحك اول مرة اشوف مزاجو الرايق لمن يكون معاي بظهر اسوء ما عندو بس معاها زول تاني ،فجاءة كدة نادى لي واحد وطلع زميلي في الجامعة وائل سلم علي وقال لي شنو الجابك الولايه البعيدة دي ،قولت ليهو الظروف بقيت اخد وادي معاه لمن حسيت انو الوضع بقى ممل قررت انو اتخارج فاتحججت انو عندي عيان لازم اشوفو،قال لي من أول يوم، قولت ليهو اتخيل،قال لي طيب حا نتلاقى تاني إن شاء الله ،قولت ليهو إن شاء الله مشيت المكتب وبقيت قاعدة ومستكينه شكلو الزول دة حا يقنع مني لمن يلقى حبيبتو... تاني قولت لو كان شجاع وقال ما عايزني كان اسي خطبتها بس هو غبي!، يا ربي السبب شنو الخلاه يستمر في الخطبة دي وليه اتجبر مع انو زول زيو ما اظن يسمع كلام ابوه في حاجة زي دي ولا بحب ابوه وبار بيهو وضحى عشانو ،بس تاني قولت هو ما ضحى هو لسه معاها معانتو ما مفكر انو يتزوجني!،ابتسمت براي وقولت اكيد حا تجي منو اكيد وبكدة حا اتجنب غضب ابوي مني،جاء فجاءة وكانت معاهو زولتو قال لي فقدتي عقلك تتبسمي براك عاينت ليهو وما رديت انا ما ملزمة اوري الناس انو بعرفو حق المعرفة كفايه تعقيدات حياتي ،ما ناقصني عقد جديدة، طلع بعدها لمن شافني ما اهتميت.
حسيت بالنعاس قولت لي ريم انا ماشه انوم ما نومت امس من تعب السفر، قالت لي الليله ما اظن في طريقة، اللليله لازم نسد بس ممكن تمشي نص ساعة وانا بغطي عليك مشيت وغمضت عيوني جاء طوالي شكل ياسر وهو بعاين لي جوة العربية صحيت مخلوعة وقولت دا كابوس اكيد ليه بعد السنين دي كلها يظهر فجاءة!، يارب ما اشوفو نهاي يا رب يارب ما تختني تاني في نفس الموقف الامس المحرج دة.
امس كان مفروض اقعد اواجهو واعاين في عيونو وحتى انزل واتعرف عليهو زي كانو زول ما بعرفو عشان اثبت انو بقى غريب بالنسبه لي، بس انا كنت جبانه اي جبانه شديد وكانت كل المشاعر مسيطرة علي، قومت سريع وصليت ودبست الطرحة وطلعت لمن جيت المكتب سياف دق الطربيره لحظه قعادي وقال لي دكتورة انا قولت ليك امشي!، قولت ليهو قالت لي ريم و َ...، قاطعني وقال لي ريم زيها زيك ما من حقها تديك تعليمات ولا انتي من حقك تسمعي كلامها، ريم قالت ليهو حصل خير اصلا....، قاطعها وقال لي بهدو يا ريم انا ما عايز ازعلك عشان كدة اسكتي، وتاني وجه لي الكلام وقال لي بغضب انتي تاني تسمعي كلامي انا بس فاهمة وما عندك شغله باي زول تاني ، عاينت ليهو شديد في تمييز حاصل هي الغلطت لانو عارفه احتمال ما يقبل وبرضو قالت لي امشي وانا ما عملت حاجة غير سمعت كلامها لانو هي اقدم واكيد عارفة إذا الحاجة دي ممكن ولالا، ريم قالت ليهو سياف الله يهديك ما تتكلم مع البت كدة لو عايز تصرخ صرخ علي انا الغلطت هي ما عندها اي ذنب لاني انا القولت ليها بغطي عليك ،سياف سكت وقال ليها بنبره عاديه تاني مره يا ريم ما تتصرفي بدون علمي قالت ليهو تمام وانت تاني مره حاول اتحكم في نفسك، قال ليها حاضر، المشكلة كدة انتهت بمنتهى البساطه وفي النهايه انا الاتنبذت فيها قعدت زي الشي الصغير الما عندو قيمة جات ريم وبقينا نتبادل في الحديث قالت لي انا اول مرة اشوف الجانب دة من سياف سكتت مسافة وتابعت صاح بتعامل مرات بحدة بس ما بصل مرحلة زي دي ،قولت ليها لانو يكرهني!،قالت لي لا مستحيل ليه يكرهك يعني! ،ضحكت ضحكة مصتنعة وقولت ليها بهظر!، بقيت اتنونس وأتونس البت دي ظريفة شديد بس هل حا تسامحني لو اكتشفت علاقتنا، اتنهدت وقولت في نفسي ليه هي بالذات خليتها تلاقيني امس ليه ما ابعدها مني، انت لشنو ما فكرت بالبحصل، بس تاني قولت هو ما فاضي الا للمشاكل معاي، حدرت ليهو عاين لي زحيت عيني!، جاء وجدع لي ملف وقال لي دا مريضك الجديد عمليتو اتحددت بعد يومين، قريت الحاله وقولت ليهو موش بجي يرقد بكرة!، قال لي اي وانتي مما يجي عارفة حا تعملي شنو صاح!!، قولت ليهو اي عارفة، قعد في الكرسي وانا اتنفست الصعداء.
اتصلت بي مروة رديت وطلعت برة قالت لي اها الوضع كيف؟، قولت ليها سيء سيء شديد ،اقنعي ابوي انو يفسخ الخطبة دي وينهي اي حاجة ،قالت لي انتي ما بتفهمي ولا شنو كل الأمور دي لمصلحتك، انتي ما عايزة حياه كويسه ما عايزة تكوني مرتاحة عايزة تبقي زي، قولت ليها يا مروة منو القال ليك القروش هي السعادة وراحة البال، قالت لي نحن لو معانا قروش اسي تفتكري انو احمد ممكن يعمل معاي الحاجات دي كلها. قولت ليها اطلقي، قالت لي واولادي يا مها، قولت ليها طيب كلمي ابوي، قالت لي وبعدها البحصل شنو ما هو بحل الخلاف البينا وبعد يمشي تاني بتتكرر المشاكل ، قولت ليها راجلك دة ما نصيح والله ،قالت لي عارفة مجبورة استحمل عشان أولادي، قولت ليها أولادك بنربيهم سوا ،قالت لي نحن مرينا بشعور عدم التربيه مع الأم بس ما بخلي أولادي يمرو بنفس الحاجة المريت بيها هو ما مقصر منهم وبحبوهو، اتنهدت وقولت ليها الطلاق أبغض الحلال وصاح الاولاد بتربو بعيد من الأهل بس ما يعني انو قطع الصله بينهم وبين ابوهم، نحن حالتنا مختلفة امي اتوفت بس هم ابوهم حي وبقدرو يشوفو في اي وقت، قالت لي ما تجيبي سيرة الموضوع دا تاني ،قولت ليها طيب بس اعرفي يا مروة ماف علاقه بتكون سعيدة لو التوتر فيها على طول ،قالت لي خليني مني اسي احكي لي عنك، قولت ليها ما عندي حاجة معينه غير انو الحيوان داك جاء، قالت لي منو؟، قولت ليها منو يعني الما بقدر اذكر اسمو، قالت لي ياسر ،قولت ليهو ايوا هو، قالت لي بنبره عاليه انسيهو وعيشي حياتك، قولت ليها نسيتو بس أمس عملت حركة غبيه شديد وهو انو مما شوفتو نزلت من العربيه وبقيت ما حاسه بنفسي ،قالت لي ما كنتي قادرة تواجهيهو بس المرة الجايه اثبتي ووريهو انو انتي ما فارق معاك، قولت ليها إن شاء الله بس برضو بدعي انو ما اشوفو نهاي تاني.
_____________________________
بلسان مروة
بعد قفلت منها اتصلت باحمد وقولت ليهو انت وين قال لي الليله ما جاي، بكرة بجي، قولت ليهو طيب انا محتاجة قروش ماشه اشتري توب وما عندي كريمات زي النسوان و.....، قاطعني وقال لي انتي يا مرة ما نفسك في يوم تتصلي بي وتطمني على حالي كل يوم قروش قروش قروش، قولت ليهو انا بسأل...، قاطعني تاني وقال لي بصلنك انا من الاول ليه اتزوجت مرة زيك، قولت انا الغلطانة الاتزوجت راجل زيك لانك يا احمد لو مكفيني وخات لي قروش هنا ما كنت سالتك صاح، قال لي من وين انتي عارفة وضعي صاح! وقفل الخط في وشي، قولت في نفسي نهايه اي نقاش، انا القال لي اتغشي واتزوجوهو شنو هو كان في السعوديه وضعو مستقر بس بعدها كل امورو جاطتت واسي انا الادمرت وشقيت.
بقيت قاعدة وفجاءة نسيت موضوعي مع راجلي واتذكرت الماضي انا عملت لاختي حاجة كعبه شديد ولو عرفت ما حا تسامحني بس عملت الشي دة لمصلحتها.
الباب دق لقيتها خالتو انصاف ودي بتكون ام ياسر سلمت ودخلت جات وقالت لي الولد دة جاء وقال الا يطلق!، قولت ليها منو، قالت لي ياسر ،قولت ليها بخلعة لشنو بعد السنين دي كلها وندى موقفها شنو ،قالت لي ندى ما عارفة وجات معاهو ومبسوطة بعد كل العملو ليها ،قولت ليها يا خالتو انتي وانا عملنا اي حاجة عشان العرس دة يتم صاح وحتى انا ضغطت على نفسي ووقفت معاك ضد اختي بس عشان عرس ولدك يتم ،قالت لي تفتكري انو انا اسي حا اخليهو يطلق على جثتي والله، اتونست معاه وخليتها تمشي ،قولت في نفسي لو ياسر طلق يبقى انا مجهودي ضاع هباء منثورا ،رجعت للزمن داك زمن عرفت بالعلاقة.
نحن جيران ومها كانت بتجي تقعد معاي وشوية شويه اتعرفت على ياسر واتعلقت بيهو بس ما كان الزول المناسب ما كان عندو شغل كان كبير اسرتو ومعتمدين عليهو وحتى امو معروفة انها زوله صعبة ،وانا كنت عارفة انو اختي حا تخطب لولد محمد الماف زول ما متمني نسب معاهو ،بعد فترة جات وقالت لي عايز يتقدم ويكلم امو بعلاقتهم ،انا طوالي بقيت بفكر لطريقة اتخلص بيها من العلاقة دي قبل ما الأمور تتطور وقبل ما ابوي يعرف وتتعقد الشغلة، بقيت بمش وبجي على بيتها لمن عرفت انو ياسر عايزاهو لبت محمد يلي بكون راجل صحبتها، انا طوالي قولت ليها بس ياسر عايز اختي انا، هي اصطدمت وقالت لي كيف كيف اختك!، قولت ليها اي اختي واعرفي ان هي مخطوبة اصلا بس نحن ما كلمناها والارتباط دا شغل عيال عشان كدة لازم نوقفهم لكن انا ما بقدر امنع اختي بس انتي بتقدري تمنعي ولدك صاح ،عاينت لي وقالت لي تمام! بس عايزة منك مساعدة لو حصل اي شي ، قولت ليها بعمل اي حاجة عشان اساعدك.
بعد كذا يوم جات خالتو وقالت لي انو هي قالت ليهو يتزوج ندى والا ما بتعفي عنو وهو قال ليها انو بحب واحدة وما بقدر من غيرها وهي ما رضت فصرخت فيهو وقام قال ليها مستحيل اتزوج وطلع وهو معصب، قولت ليها وريهو المحادثة دي براهو بقتنع، قالت لي دي شنو!!، قولت ليها دي محادثة بيني وبينها ، شالت النظارة وقرتها قالت لي كيف اختك تقول كدة عن ولدي كانت زعلانة، قولت ليها دي ما هي دي انا، انا شلت تلفونها وكتبت كلام كعب عنو ونبذتو عشان عارفة انو كبرياء الراجل بتتجرح بحاجة زي دي ،وتاني اعتذرت منها و قولت ليها اضطريت اقول كل الكلام دة عشان يبعد منها، هدت و قالت لي واقول ليهو جبتو من وين، قولت ليها حا اوريك المهم وريتها تقول شنو!، جات وقالت لي انو هي وبتها اتفقو وقالو نفس الكلام وهو صدق انو اختو شافت الرسائل بالغلط لمن حمودي ولدي لعب جنبها.
المهم تلفون مها كان جبني الفترة دي لانو انا شلتو منها بحجة انو أصلح ليها السوكت الاتخرب ولا الانا خربتو اصلاً،وطبعا اتاكدت انو هي ما متواصلة معاه باي تلفون زول تاني لانو انا هددتها انو تقطع التواصل معاه الا لمن يجي يخطبها فكدة ضمنت انو ماف اي رسائل حا تكون بينهم من اي مصادر تانية، المهم طلعت الشرايح من التلفون ودخلتهم تلفوني بعد مسافة عملت واتساب فجاءة جات كم رسائل وكلهم قيد الانتظار كانن مرسلات قبل ساعة ، المهم فتحت وكان مكتوب فيهم انا ما كنت مفكر انك زولة مادية وانك شايفاني زول للعب بس واني انا ما من مستواك،كان كلام كتيير شديد وفي النهايه قال ليها دي ما انتي يا مها قولي لي لو في حاجة غلط ،تاني قال ليك حكايه اسبوع ما قاعدة تتصلي ولا عارف عنك حاجة وبجي الجامعة بلقاك ماف ،هو طبعا ما عارف انها ما قاعدة تطلع من البيت عشان ممتحنة المهم رسل ورسل قمت قولت ليهو انت عرفت كيف انو معتبراك كدة ومعاها ايموجي مستفز ،قال لي شوفت محادثتك انتي واختك عني ،اتصل قفلت في وشو ودخلت واتس قولت ليهو انت ما عندك كرامة بعد العرفتو عني دا كلو مصر تذل نفسك ،ابقى راجل شوية ،لمن قولت ليهو كدة حظرني من كل مكان ،قولت الخطوة التانيه بدت مشيت وصلحت تلفونها ورجعت بيتنا دخلت غرفتها وقولت ليها اتصلح، فرحت وقالت لي عليك الله خليني اطمن على ياسر لي اسبوع منو، قولت ليها طيب بس اسرعي!، كانت عايزة تتصل قال الرقم مقفول فتحت الواتس لقت رسالة منو مكتوب فيها مها البينا انتهى، هي طبعا ما منو بس اختو هي الرسلتها ،مها انهارت وحظرتو وما فكرت تمشي تسأل ليه عمل كدة وبعد فترة اتزوج وانا لانو حسيت بالذنب كلمت ابوي باي حاجة وابوي دة قال لي خير ما عملتي لانو مها عنيده شديد وما كانت خلتو الا هو يتخلى عنها بس كان زعلان على بتو وانا زاتي زعلت على حالها لانو كانت بالجد مكسورة لكن كل الحاجة دي لمصلحتها اي لمصلحتها امو ما كانت بتقبل بيها وهو ما عندو حاجة عشان يقدر يسعدها.
_______________________
بلسان ياسر
كان كلامها كلو غريب اول امس ما كان فيهو جمله صاح رساله، القال بحبني عمل شنو.
انا ضعفت قدامها ونسيت اي شي بدر منها وحتى افتكرتها انو هي عايزه للان تدمرني عشان كدة عايزة تتزوج سياف بس يبدو أنو هي ما مفكرة فيني اصلا ولأنها ماديه شافت سياف هو خيار مناسب، بس انا ما بقدر اشوفهم سوا وفي نفس الوقت ما قادر اطلق ندى لانو امي قالت بتخلي لي البيت كلو كلو لو عملت كدة، وانا بالحالة دي جات ندى وقعدت وقالت لي ضعفت شديد، قولت ليها يا ندى ما كل مرة تقولي لي كدة قالت لي طيب ما حا إسالك عايز تاكل حاجة ،قولت ليها لا، قالت لي معقول ما مشتهي شي، قولت ليها ابدا، قالت لي ياسر!!!، قولت ليها بعضب خليني براي ،قامت وبقت ماشه على اتجاة الباب وكانت بتبكي قولت في نفسي دا شنو البعلمو في بت الناس الما عندها ذنب ،مشيت وقفلت الباب وضميتها علي وقولت ليها اسف شديد انا كنت زهجان بس دة ما بعني انو أفضى زهجي فيك ،انا اهملتك وانتي كنت بت اصليه وما حصل سالتيني وحتى ما حصل خليتي زول يتدخل،قالت لي دا حياتنا نحن صاح ما من حق أي زول يتدخل، انت لو مضغوط من حاجة ولا انا لو ما عاجباك....، قاطعتها وقولت ليها انتي بت ما فيك كلمة كل الأمور دي مني انا وبس وسبب هجري ليك انتي ما عندك علاقة بيهو، قالت لي بتعرف انا كم مرة انبت نفسي وقولت انا ناقصني شنو عشان من اول شهر يجدعني، في اللحظة دي حسيت انو انا سيء وانو العملتو لي مها عملتو في بت الناس بس بطريقة تانيه، شعوري الزمان البنقص حسستو لندى الما عندها ذنب، قولت ليها انتي ست البنات والله مره ماف فيك كلمة بس زي ما قولت ليك دا انا وانا غلطان انو جدعتك، قالت لي تأني ما تعملها وانا مسامحاك.
_______________________
بلسان مها
اليوم كان طويل وانا ما نومت نهاي خوفت المجنون دا يجي يهرشني!!، زي 12 صباحاً مشيت الكافتيريا وبقيت قاعدة ومستكينه وبشرب في قهوة، جاني المنفصم وقعد قال لي تعبتي، قولت ليهو لو تعبت حا تخليني ارتاح دا الحاجة القاصدها لمن قولت بنشوف، قال لي احتمال ولا عايزاني اعمل اكتر من كدة، بلعت ريقي وتابعت شراب ،جاتني رساله من راجل اختي فيها إشعار ، قال لي خليهم عندك لمن احتاجهن بشيلهم منك واوعى تكلمي بيهن مروة ،قولت ليهو تمام مع انو ما بطيقو بس علاقتي بيهو ما سيئة وبينا كل الاحترام، قال لي دا منو الما عندو موضوع ويتكلم معاك انصاص الليالي دة ،قولت ليهو زولي انت مالك، قال لي طيب لو عندك زول ما كان ترفضي، قولت ليهو مجبورة كنت ،اتنهد وقال لي الموضوع دا لازم يتحل انتي ما شايفة حجم المشكلة يلي نحن فيها الاتنين بنحب ناس ،جريت نفس وقولت ليهو دا انت البتحب انا كنت بكذب عليك، انا ما عندي زول في حياتي وحتى لو عندي بعد اتخطبت مستحيل افكر فيهو واوريك شي اساسا العلاقات غير الشرعيه محرمة ،ضحك وقال لي يا شيخة يعني انتي ما حصل حبيتي، قولت ليها ما مضطرة اجاوبك،قال لي ما مفروض اسال منو اصلا البفكر يحب واحدة زيك كدة، حمرت ليهو وقولت ليهو وانت قايل نفسك بتتحب ريم بت لطيفة وانت ما مظهر ليها شخصيتك الحقيقة بس حا تنصدم لمن تعرفها، ضحك وقال والله ما بظهر اي حاجة ليها لانو ما زيك ولا بتشبهك شوفتك دي انا ما بطيقها... انتي بتخليني امرق اسوء ما عندي وما بقدر اتحكم في اعصابي.... انتي الوحيدة البكرهكك وانتي الوحيدة البتعامل معاها كدة وما حا افكر اتعامل مع أي زول تاني بالطريقة دي، قولت ليهو اعتراف عظيم اها انا زاتي بكرهك بس طبعا متزنة وما حا أظهر كرهي ليك ،قال لي بغضب قصدك اني انا مجنون ،لويت ليهو خشمي وقمت ،قال لي مهاااا ما رديت عليهو ومشيت.
مر شهر وانا اتعودت على الشغل وبقيت ما بشتغل بيهو ولا بحتك معاهو كتير وهو زاتو كان كل تركيزو على ريم .
علاقتي مع ريم اتطورت وبقت بيست وكدة حسيت بالذنب زيادة المهم وانا بفكر جات بت في عمر ال18 ومفروض تعمل عمليه زايدة مستعجلة بس ما كان في قروش، مشيت حنست سياف رفض وقال الا تدفع، قولت ليهو ما عندهم المبلغ دة قالو بجمعو فيهو وبعد العمليه بدوك ليهو، قال لي لاااا، قولت ليهو انت ما عندك قلب انا حا اتكلم مع المستر قال لي هو ماف وانا هنا المسؤول ماف عمليه بتتعمل الا تدفع.......
_____________________
ضاعت أعمارنا ونحن نجاهد لنخفى شعوراً ونعيش غيره.. فلا نحن أتقنا التخفى.. ولا نحن عشنا الحياة كما نريد..🖤🥀