رواية مهد القدر الفصل الثلاثون30والحادي والثلاثون31 بقلم ملك سعيد
شاور ياسين للشباب وقالهم:
يلا يا ولاد علشان تكتبوا الكتاب
عز فرح لإنه وأخيرًا قدره هتتكتب علي اسمه
وقدر كانت واقفة جنبه وبتبص في الارض بخجل
فمال عليها وقالها بعبث : بلاش تحمري قدامي ... علشان أنا ماسك نفسي بالعافية
ضربته قدر في كتفه بغيظ وقالت : بطل قلة أدب
عز بابتسامة خبيثة : ومالو نبطل قلة أدب ... علشان هحتاجها بعدين
غمزلها في آخر كلامه
وقدر بصتله بخجل ممزوج بغضب وقالتله وهي
بتدفعه لقدام : روح يا عز الله يسترك
مشي عز و هو بيضحك علي غضب قدر
وراح عند المأذون
♥ ❥ ♥ ❥ ♥
فارس بفرحة: هروح أنا اكتب كتابنا يا قلبي
نور بلا مبالاه مصطنعة : مع السلامة
فارس بغيظ من برودها : هو أنا قتلتلك قتيل ولا حاجة ... يا بنتي إنتِ ليه مش مستوعبة انك كمان كام دقيقة وهتبقي مراتي حبيبتي وقلبي وعمري
نور بخجل : امشي يا فارس ... علشان في اي لحظة هضربك ... وإنت عارفني مش بتكسف حد
فارس بغيظ : رايح رايح ... حسبي الله و نعم الوكيل في كل ظالم مفتري
وراح فارس وهو بيدعي علي نور
تحت ضحكاتها علي تذمره
♥ ❥ ♥ ❥ ♥
ندي بخجل من نظرات سيف العاشقة ليها : سيف مينفعش كده
سيف باستغراب : وهو أنا عملت حاجه ... ما أنا واقف محترم اهو
ندي بخجل : محترم اوي ... يلا روح علشان عمي ياسين بيناديلك
سيف حط إيده علي قلبه بحركة درامية وقال: ياه مش مصدق انك خلاص هتبقي ملكي
.... قلبي هيخرج من محله
بعدت عيونها عنه من الخجل وقالت بتوتر:
بطل يا سيف كلامك اللي بيكسفني ده
... ويلا روح علشان تكتب الكتاب
بصلها بخب ومال عليها علشان يبوسها من خدودها
بس ندي لاحظته وبعدت عنه بسرعة وقالتله بغضب مصطنع:
إيه اللي كنت هتعمله ده؟؟
سيف ببراءة : كنت هاخد بوسة بريئة ... بس إنتِ اللي تفكيرك شمال
ندي بغيظ: أنا اللي تفكيري شمال بردو ... ماشي يا سيف حسابك معايا لما نروح
سيف باستفزاز : طب معاكي فكة
اتعصب ندي من تريقته عليها وبحركة سريعة ضربته بكعبها علي رجله
سيف مسك رجليه واتنطط بوجع زي القرد
وهو بيبص لندي بتوعد علي عملتها
وهي ضحكت عليه إما هو قالها بتوعد:
شكلك عايزة تتربي يا ندوشتي وأنا بحب اربي جدا
ندي بثقة : ولا هتعرف تعمل حاجة
سيف بثقة : هنشوف
♥ ❥ ♥ ❥ ♥
عدي سيف علي رضوي لقاها واقفة مع فهد ووشها احمر وسيف
باستنتاجه العظيم عرف انها مكسوفة
فقرب منهم بغيرة اخوية ومسك ياقة قميص فهد وقاله
بغيرة : مالها البت وشها احمر كده ليه؟! ... قولتلها إيه ؟! ... قول متنكرش
اتفاجئ فهد بتصرف سيف ومسكته ليه
ورضوي كانت بتضحك علي شكل فهد المصدوم
فاق فهد من صدمته علي صوت سيف وهو بيقوله : فهد أنا عارفك انك محترم ... ولو هتقل أدبك علي البت ... ف إحنا معندناش بنات للجواز
رفع حاجبه بمعني والله وقاله بسخرية:
أولًا أنا من يومي محترم ... ثانيًا انهاردة بالذات مينفعش اكمل مسيرتي في الاحترام علشان الناس هتاكل وشي وإنت اولهم ... وثالثًا بقي إزاي معندكوش بنات للجواز ؟! ...
اومال رضوي دي بنت مين؟؟
ردت عليه رضوي وهي حاطة إيديها علي وسطها
وبصاله برفعة حاجب:
قصدك إيه يا فهد هكون بنت مين يعني بنت الجيران؟؟
فهد بلين : ابدا يا حبيبتي ... حتي لو كنتي بنت الجيران .... فأنا هكون ليكي حسن شاكوش
ضحكت رضوي علي كلامه وسيف بصلهم بقرف وقالهم:
يع هرجع ... بذمتك دي معاكسة ... وإنتِ بتضحكي علي إيه ؟! ... علي خيبتك!!
فهد لإغاظة سيف : ولد ملكش دعوة بمراتي علشان أنا بغير
سيف بسخرية : مرات مين يا خويا ... هو إنت لسه كتبت الكتاب؟؟
فهد مسك إيده وقاله وهو بيشده وماشي : حالًا هتبقي مراتي
ضحكت رضوي عليهم وسيف قال لفهد:
اتقل الله يكسفك
♥ ❥ ♥ ❥ ♥
الشباب اتجمعت حوالين الطاولة
اللي المأذون قاعد عليها
والبنات واقفين بمسافة بعيدة عنهم
المأذون : مين اللي هيكتب الكتاب؟؟
الشباب بصوت واحد: أنا
عز باعتراض لا يقبل النقاش : إنت مين منك ليه؟؟ ... أنا اللي هبدأ
فارس : ليه انشاء الله أنا اللي هبدأ
سيف : والله ما يحصل ابدا .... ابقي أنا موجود وانتوا اللي تبدأوا
زقهم فهد ببرود وقال:
ابعد يلا إنت وهو ... مفيش غيري اللي هيبدأ
عز ببرود : مين لا مؤاخذة؟؟
فهد بثقة : أنا طبعا..
عز بصوت عالي نسبيا : ده علي جثتي
المأذون : ما تخلصوا يا جماعة احنا بنهزر
سيف : تمام يبقي أنا اللي هبدأ
الشباب لسه هيعترضوا بس سيف وقفهم بحركة من إيديه وهو بيقول بحزم : خلص الكلام ... مين اللي بدأ وخد خطوة في الجواز مش أنا بردو ... يبقي أنا اللي اكتب الأول
عز : طب ما أنا خطبت معاك
فارس : وأنا كمان
بصلهم فهد وهو مش عارف يقول إيه
لإنه اخر واحد فكر يخطب فيهم فقال بضيق: ما بلاش شغل العنصرية ده أنا اللي هبدأ
ياسين بصوت عالي سمعه كل الموجودين في الصالة : ما تخلص إنت وهو ... بلاش لعب عيال
وبص لعز وقاله : يلا يا عز ابدأ إنت
فارس بصريخ : ليه ؟!
سيف : ده ظلم
فهد : مش قولتلكم انكم ناس عنصرية
عز بتكبر : ايوا احنا ناس عنصرية ... يلا يا عمي خلينا نكتب قبل ما يقتلوني
ضحك ياسين والمأذون عليه وقاله : يلا يابني ... إنت مش شايف بيبصولك إزاي ؟؟
عز بيبصلهم بغرور وبيقوله : معلش عيال بقي هنعمل إيه
الكل ضحك عليه حتي سيف و وفهد و فارس
♥ ❥ ♥ ❥ ♥
عند البنات كانوا واقفين جنب بعض
فقالتلهم نور : بصوا يا بنات ... بما إن انهاردة كلنا ببركة ربنا كده هنتجوز ... فأنا عايزة انصحكم
قدر باستغراب : تنصحينا بإيه؟؟
نور بخبث : هقولكم _____
ندي بصدمة: إنتِ مجنونة ده سيف يقتلني
قدر بتأييد لندي : فعلا والله عز يقتلني ... اصلا هو جاب اخره
رضوي : أنا بقي مقدرش اعمل كده
نور بغيظ : ليه انشاء الله؟؟
رضوي بهيام : علشان بحبه
نور : حبك برص يا شيخة
... إنتِ وهي لو مسمعتوش كلامي صدقوني هتندموا
قدر: نور أنا من ساعة ما شوفتك وأنا ندمانة اصلا ... ف مش هتفرق يعني
نور بغيظ منها : خلاص يا ستي أنا غلطانة اني بنصحكم ... و بشارككم خبرتي
قدر : مستغنيين عن خدماتك
بصتلهم نور بغيظ وقالت في سرها : عيال غبية بصحيح ... اما أنا بقي هربي فارس علشان يفكر يخوني تاني
♥ ❥ ♥ ❥ ♥
بدأ عز يردد ورا المأذون
ووقع علي قسمية الجواز وحتي قدر وقعت بخجل تحت نظرات عز العاشقة ليها
وانتهت إجراءات الجواز بجملة المأذون المعتادة :
بارك الله لكما وبارك عليكما وجمع بينكما في خير
الكل زغرط وسقف بفرحة وباركوا لقدر وأمينه حضنتها وقالتلها بفرحة: الف مبروك يا ضي عيوني ... مكنتش اتخيل ابدا إن هييجي اليوم اللي هشوفك في عروسة
قدر باست إيديها وقالت بحب : و ادي جه اليوم اللي عمري ما كنت هفرح فيه إلا وإنتِ معايا
سيف قرب منهم و حضن قدر بحب اخوي
وقالها بمباركة : الف مبروك يا قلب اخوكي
قدر بابتسامة واسعة : الله يبارك فيك
عز لما لقي سيف حاضن قدر قام بسرعة وقرب منهم وشدها من حضن سيف وحط إيده علي وسطها بتملك
وبص لسيف بغيرة وقاله بتحذير:
بص بقي قدر بقت مراتي ... يعني خط أحمر... لو شوفتك بس قربتلها هنسفك من علي وش الارض
سيف ضحك علي غيرة عز الواضحة وقاله : دي اختي علي فكرة
عز ضغط علي وسط قدر بتملك وقاله ببرود : مش مبرر بردو
قدر بضيق : عز ده اخويا
عز بتهكم : حتي لو كان ابوكي مش هخليه يقربلك
قدر بتمتمه: متملك
عز بابستامة بثقة : هو إنتِ لسه شوفتي حاجة
سيف بانسحاب : همشي أنا علشان مبقاش عزول
عز ببرود : احسن بردو
قدر بنبرة تحذير : عز
عز ببرود : اخرسي يا بت
♥ ❥ ♥ ❥ ♥
فارس بحماس : خلصنا من عز وجه دوري
فهد : لا طبعا قصدك دوري
سيف متدخلا : لا دورك ولا دوره ده دوري أنا
فارس : مستحيل
فهد : ابدا ما يحصل
سيف بصلهم ببرود وبص علي الكرسي اللي المفروض يقعد عليه ورجع بصلهم تاني
فهد وفارس عرفوا هو بيفكر في إيه
ف إستعدوا للجري علشان يلحقوا المكان
وفعلا جريوا علي الكرسي
تحت النظرات الصادمة من كل الموجودين في الحفلة
و فارس هو الي لحق المكان الأول
وبص ل فهد و سيف بغرور : وقالهم : مش قولتلكم دوري
سيف : عن ابو شكلك يا عم
فهد : مفتري طول عمرك
فارس حط رجل علي رجل بغرور وقالهم : شكرا
بص علي أحمد أبو نور
وقاله بابتسامة واسعة : يلا يا عمي علشان أنا جبت اخري ... وهخطف بنتك
ضحك أحمد عليه وقاله : الصبر يا بني نور مش هتطير منك
فارس لأمه : ما تقولي حاجة يا أمي ... بدل ما إنتِ ضيفة شرف
صباح : اتلم يا ولا
فارس بضيق: اتلميت ... يلا بقي يا عمي
ضرب أحمد كف بكف وقرب قعد علي الكرسي اللي قدام فارس
وبدأو بإجراءات كتب الكتاب
لحد ما اعلن المأذون عن إتمام الجواز
وبدأ المعازيم بالمباركة للعروسين
وسط فرحة فارس ونور
♥ ❥ ♥ ❥ ♥
فهد بص لسيف وقاله وهو بيشاورله علي الكرسي : اتفضل أنا مش حمل خناق
سيف حط إيده علي كتفه وقاله بفخر : تصدق انك راجل بجد ... وبسبب جدعنتك دي إنت اللي هتكتب الكتاب الأول
فهد برفض : والله ابدا إنت اللي هتكتب
سيف : مش هيحصل
عز متدخلا : هو يا تتخانقوا علي مين اللي يكتب الكتاب الأول ... يا تتعازموا علي بعض
... ما تتلم إنت و هو واخلصوا
فهد شاور بإيده علي الكرسي لسيف
وسيف هز راسه بيأس وراح يقعد علي الكرسي ومازن قعد قدامه
و بدأ المأذون في كتب الكتاب
وبعد ما انتهي
بدأو المعازيم للمرة التالتة يهنوا و يباركوا
سيف بص علي فهد وقاله : دورك يا بطل ادخل برجلك اليمين
فهد ضرب كف بكف وقال : ربنا يهديك يا سيف ... وتعقل
قعد فهد وقدامه ياسين اللي سيف طلب منه انه يكون وكيلها مكان أبوها
وأخيرا المأذون أعلن إن فهد و رضوي زوج و زوجة
وبدأت المباركات للمرة الرابعة
♥ ❥ ♥ ❥ ♥
عز مسك إيد قدر و اتوجهوا لساحة الرقص وقالها بحب:
الأغنية اللي هغنيها دي ليكي
قدر بعدم تصديق : إيه ؟! ... إنت بتهزر صح ؟! .... معقول هتغنيلي؟؟
عز بنبرة حب صادقة : وليه لأ .... هو أنا هغني لحد غريب أنا هغني لمراتي و حبيبتي و كل دنيتي
بدأ يغني بصوته اللي مليان حب و نظراته العاشقة لقدر
( خطوة ورا خطوة بتمشيها
دي اللحظة اللي انا مستنيها
والأرض اللي بتمشي فوقيها
مفيش قدك يا حبيبتي عليها
🤍🤍
خطوة ورا خطوة بقربلك
جايلك علشان افرح قلبك
و عمري اللي فات قبل ما اقابلك
مش بحسب أيامه من قبلك
🤍🤍
فستانك الأبيض اللي هياخد منك حته
وعشان اليوم ده رسمت عملت انا مليون خطة
و الناس بتغني و الدنيا بتعزف زفة
و المزيكا تعلي و معاها بتعلي السقفة
🤍🤍
والناس بتغني و الدنيا بتعزف زفة
و المزيكا تعلي و معاها بتعلي السقفة
🤍🤍)
انضم فارس و نور ، و فهد و رضوي ، و سيف وندي للرقصة
وبقوا قدر و عز في نص ساحة الرقص وحواليهم باقي الثنائيات
وعز كان بيرقص مع قدر وبيقربها منه بتملك
وبيغني من كل قلبه
(حبيبتي و عمري و اميرتي
يا بكره اللي مددلي ايديه
يا قصري و بيتي و جزيرتي
وحلم قدرت اوصل ليه
وقالوا الشعر عن ليلي
و كتبوا في سحرها دواوين
وانا وليلي بقينا لبعض
في دنيتنا سوا عايشين
عايشييييين
فستانك الأبيض اللي هياخد منك حته
وعشان اليوم ده رسمت عملت انا مليون خطة
و الناس بتغني و الدنيا بتعزف زفة و المزيكا تعلي و معاها بتعلي السقفة
اه والناس بتغني و الدنيا بتعزف زفة و المزيكا تعلي و معاها بتعلي السقفة
🤍🤍
خطوة ورا خطوة بنمشيها
دي اللحظة اللي انا مستنيها )
♥ ❥ ♥ ❥ ♥
خلصت الرقصة الرومانسية مع تسقيف كل الضيوف والعيلة
وبدأت الموسيقي تعلي و الكل انضم للرقص بفرحة و حماس
♥ ❥ ♥ ❥ ♥
مازن كان بيتكلم في التليفون ومن غير قصد خبط في بنت وكانت هتقع بس هو مسك إيديها ولحقها
ولما شافها سرح في جمالها
بس فاق من إعجابه علي صوتها وهي بتشكره
وبتبعد إيديه عن ايديها بخجل
وبتقوله وهي بتحط خصله شعرها ورا ودنها بتوتر : أنا آسفة لإني خبط فيك ... وشكرا لإنك لحقتني
مازن كان بيبصلها وعلي وشه ابتسامة بلهاء وسألها بعفوية : إنتِ مرتبطة
البنت بصدمة من سؤاله الجرئ قالتله بحدة : نعم!!
مازن بنفس ذات الابتسامة البلهاء: هقولهالك بطريقة احسن ... إنتِ مشبوكة
البنت بخجل : بعد اذنك مينفعش تسألني بالطريقة دي
مازن وهو هيمان في جمالها : ليه بس ... مش يمكن ادخل البيت من بابه
البنت بعفوية : طبعا لازم تدخل البيت من بابه ... أكيد مش من شباكه
مازن بفرحة وحماس : يعني ادخل
البنت انتبهت من كلامها وقالت لنفسها بعتاب : إيه اللي إنتِ قولتيه ده ... والله إنتِ ما شوفتي تربية
قطع شرودها
مازن وهو بيحرك إيديه قدام وشها علشان تنتبه ليه وقالها : إنتِ معايا ؟؟
البنت : ايوا وبعد اذنك علشان بابا بيناديلي
جريت البنت من قدامه بسرعة
وهو حط إيده علي قلبه وقاله ببلاهه : إيه البنت القمر دي لا مش هستني لازم اتجوزها واستتها
بس اعرف هي مين الأول
♥ ❥ ♥ ❥ ♥
الحفلة خلصت وكل شاب خد عروسته
إما عز فكان ليه رأي تاني
خد قدر و أتوجه للمكان اللي هيقضوا فيه ليلتهم الاولي
وقدر كانت بتزن علي راس عز علشان يقولها هو واخدها علي فين
بس هو كان بيقولها اصبري و هتعرفي كل حاجة