رواية لم اكن قاتل الفصل الثاني2بقلم جمانه السعيدي
محمد....صار شهر امي وام عادل يدورن النا عرايس وياريت لو يكونن خوات حتى ما نتفارك اني وعادل
واي بنيه يوصفوها الهن يرحن يشوفنها سوا
امي وام عادل عبالك مسويات حلف
لازم ثنيبنهن تعجبهم البنيه
الحقيقه المشكله مو بلبنات المشكله بينا احنا
اغلب البنات من يعرفن احنا ماعدنا شهاده ولا مكملين دراسه يرفضن
وهم شغلتنا بلنسبه للبنات تخوف
يعني شنو كصاب شغله الناس الكلبها ميت
مادام يذبح ويصلخ يعني كلبه ميت
يتخيلن نرجع عليهن اخر النهار كلنا دم وربحة الزفره تكتل
تعبت امي وام عادل وهنا يدورن عرايس
اني وعادل ماشاغلتنا هاي السالفه حيل يمتى مانحصل نسوان نزوج
بيوم نمشي وصادفنا ولد صديق النا مسوي وشم على ايده
كلش عجبني الوشم
محمد...عادل تعال احنا هم نسوي وشم
عادل...اي ترا موديل كلها واشمه هسه بس شنوشم
محمد...اني اكتب اسمك وانت تكتب اسمي
حتى مانتفارك ابد
عادل...اي خوش فكره
جمانه السعيدي
محمد...طلعنا بليل اني وعادل ورحنا وشمنا اسمائنا
اني وشمت اسم عادل على ايدي يم النبض
وهو وشم اسمي بنفس المكان
رجعت للبيت شوفت اهلي الوشم
ابوي ضحك وامي كالت لو تحبني بكد ما تحب عادل
جان صار براسك خير
محمد...اني هسه ماكو براسي خير شبي عادل احسن صديق واخوووو
امي...انشاء الله تفركم النسوان واضحك عليكم
محمد...متفقين اي واحد زوجته تحجي على صديقه
يطلكها
امي...اي مو هيه لعبه ويطلكها
محمد...اني من البدايه اشرط عليها عادل اولا وهي ثانيا
امي....هسه كون نلكاكم نسوان ترضا بيكم خاف اضلون هيج
واحد يحب الثاني وماكو نسوان وجهال بحياتكم
محمد...عادي قابل اموت إذا ماازوجت
ثاني يوم ما بقينا واحد ما شوفنا الوشم
ماتصدكون احنا شكد فرحانين بهذا الوشم
اغلب الوقت من نخلص شغلنا من وكت ننصب على واحد
من ذوله الي يشتغلون يمنا
ونكعد نضحك علي لو نتعارك بينا وواحد يكتل الثاني
لو نشوف واحد ونكتله
على اساس نتشاقى بينا شباب وبحيلنا
وفارغين نحتار شنسوي بليل نطلع للكهوه نلعب
شطرنج لو دومنه
لو نروح ناكل لفات ونشرب عصير
الحياة بلنسبه النا حلوه وما خذين الدنيا بحيلنا
جمانه السعيدي
إلى أن اجا اتعس يوم بحياتي
اليوم الي كرهت نفسي بسببه
كلشي كنت أتوقع بس الشي الي صار ابد ما توقعته
ولا مر عليه حتى بلحلم
كعدنا من الفجر مثل كليوم
اتريكنا اني وابوي
ابوي....محمد اخذ السجاجين حدهن زين هنا والساطور
اليوم اني موصي على ذبايح ثنيين
محمد...اي انشاء الله بس أمر على عادل نطلع سوه
ومن اوصل اخذهن للحداد
ابوي...كون جاهزات قبل لا نوصل
محمد....اي صار
طلعت مريت على عادل اخذته وطلعنا اني ويااا
الدنيا بعدها ضلمه توه الفجر بادي يطلع
وصلنا كل واحد غسل مكان الذبح
محمد....اني راح اخذ السجاجين احدهن
عادل...اني راح ابقى هنا اخذ سجاجينا وياك
محمد...جيبهن
محمد...ياريتني مارحت ياريت رجلي انكسرت وما طلعت ذيج الطلعه
اخذتهن حديتهن ورجعت
ابوي بعده ماجاي
بس وصلت عادل شافني وتلكاني برا المحل
عادل.....هااا حديتهن بس كون حديتهن زين
ذيج المره ماحدهن قوي وابوي كام يحجي
محمد....ولك سواهن موس ايطيرن اطير
هاك شوف شلت اكبر سجينه بايدي وحاولت اخوفه
بس هو كان مطمن اني مراح اااذي بقه ثابت لا خاف ولا رجع ليوره
ايدي اجت على ركبته من الصفحه
يعني من فوك الجتف وطيرت نص ركبته هلكد ما حاده
رفع ايده لزم المكان شاف الدم يطلع عبالك نافوره
ووكع عادل بنفس المكان
حتى مالحك يحجي ولا كلمه وحده
وبنفس اللحظه مات
ااي اني كتلت صديق عمري
لحظه رعونه وطيش مني ذبحت صديقي واخوي
شفته وكع بلكاع والدم يطلع من ركبته عبالك نافوره
انصدمت من المنضر
دنكت علي عادل عادل اتشاقا وياك اخوي حاجيني
بس عادل ابد مارد عليه
مات اي مات اخوي وصديقي
واني الي ذبحته بهاي ايدي
بهاي اللحظه واني احاول اوعي افتهم شصار ويااا
اجمع كم واحد علينا من ذوله الي يشتغلون يمنا
دنكو علي كلهم صاحو مات
محمد انت شسويت كتلت عادل
مااعرف شصار بيه مااعرف شلون اتصرف لو شسوي
اني ذبحت عادل
وكفت وكمت كلني ارجف الصدمه اكبر من عقلي
ماتوقعت عادل يموت بهاي السرعه
مااعرف شلون اتصرف بهاي اللحظه الصعبه عليه
اجا واحد كصاب قريب علينا وكف بصفي
....محمد انهزم انهزم بسرعه قبل لا يرجع ابو عادل ويذبحك فوكه انهزم بسرعه اصلا لا تبقى بغداد كلها
اطلع من بغداد
اذا لزموك اهل عادل هسه مراح يرحموك ابد
لازم يذبحوك ولك هذا الولد الوحيد على اربع بنات
شلون سويت بي هيج
محمد...اني اصلا بهاي اللحظه مااكدر افكر شسوي
هلكد ما انصدمت من الشي الي صار
اني لابس التراك الي اكصب بي كل يوم بي آثار دم الكصابه
والنوب دم عادل ترس ملابسي
عفت الناس مجمعه على عادل وركضت
ركضت كل قوتي صدكوني مااعرف شسوي ولا اعرف شلون راح اتصرف
اركض مثل المجنون شلون اني هيج سويت بصديق
عمري
بقيت نص ساعه اركض مثل الضايع
ومايندل طريقه منيين اركض بلشوارع بدون وعي
وكفت اني وين رايح مااكدر ارجع للبيت
ااشرت التكسي اول واحد ما وكفلي
مبين عليه الخوف وتراكي كله دم
ولا الثاني وكف ولا الثالث بعدين وكفلي رجال جبير عنده سايبه تعبانه
جمانه السعيدي
بس صعدت كال عمي انت كصاب
محمد....اي كصاب اطلع بسرعه النهضه
السايق...ليش ماغيرت ملابسك اتريد تسافر بملابسك ذني
محمد... بس وصلني بسرعه الله يخليك
سكت السايق يمكن خاف مني مبين مرتبك ومضبع
نفسي
وصلت الكراج النهضه اكو سواق تكسي يصيحون محافظات برا
يعني بلشارع قبل لا تدخل كراج النهضه
ااشرت الواحد وكتله الفلان محافظه
المحافظه الي بيها اهل امي
السايق حاول يفهم مني شصاير مبين من منظري
مسوي مصيبه
بس اني سويت نفسي ماسمعته وماركزت بكلامه
مشت السياره شويه بعدني ما طلعت من بغداد
رن عليه ابوي
اول مره مارديت علي رجع كرر الاتصال
محمد...هااا يابه
ابوي.. انت وين شنو هاي المصيبه الي سويتها شلون كتلت
الولد
محمد....موقصدي ولله العظيم موقصدي اتشاقا ويااا
وصارت السجينه على ركبته
ابوي...وين انت هسه
محمد...راح اطلع من بغداد رايح الخوالي
ابوي....اي ابقى بيت خوالك لا ترجع منا لمن انشوف حل الهاي المصيبه
محمد...اي ميخالف
محمد...بس سديت التليفون رنت عليه امي
....هااا يمه
امي....روح الاهلي لا ترجع ولك الشرطه اجت ادور عليك
اني راح اتصل على امي وافهمها السالفه شنو
محمد....اي رايح
جمانه السعيدي
السايق جان خال اذنه يمي
السايق.. انت كاتل كتل
محمد....خليك مركز على الطريق وتأخذ اجرتك واكثر
مالك شغل بيه
محمد...رجعت راسي ليوره وغمضت عيوني
شلون كتلت صاحب عمري
شلون سويت هاي المصيبه
دموعي نزلن منا ومنا
ولك عادل شلون عفتني عادل اني مو اخوك
ولله جنت اتشقى وياك
اني وياك مو كل يوم نتشقى وبعدين نكعد
نضحك
ولله اني اتشقى وياك
ليش ما ابتعدت عني هيج انت ماامن بيه
وخليت ركبتك يمي
اني طلعت موخوش صديق
غدرت بيك وانت عزيز كلبي
حتى اسمك وشمته بمكان النبض انت عزيزي
شلون آمنت بيه وبقيت واكف
اني ليش انهزمت خفت على نفسي وماخفت عليك
ولله ماكان قصدي
كلها الناس حاسده هاي العلاقه
حتى امي وابوي وامك وابوك
خل يرتاحون عادل مات على ايد محمد
خل الناس ترتاح
بدون وعي كمت ابجي بصوت عالي
السايق استغرب مني
السايق....عرفت كاتل مبين من شكلك ومن ملابسك
محمد....مسحت دموعي
ولله موقصدي هيييي هيييي صديق عمري
واخوي اتشاقى وووياااا
ابد موقصدي اكتله اتشاقا ويااا اهييي بس هو ماامن بيه
ماابتعد عني اجت السجبنه بركبته
السايق...اتصير عادي زين انت وصديقك
اكو اب يكتل ابنه وام تكتل ابنها بدون ماتقصد
اتصير عادي
محمد....اهييي اهييي انت ماتعرف هو شكد عزيز عليه
أعز من امي وابوي وأخواني كلهم
السايق...عاد عندك مكان تروحله
محمد....مسحت دموعي ولله ندمان ليش انهزمت
لو باقي وكاتليني
شلون راح اكدر اكمل حياتي بدون عادل
السايق....ولله انت تكسر الخاطر
محمد...درت وجهي على الجامه وسكتت
بس دموعي مايقبلن يسكتن ابد
الطريق اربع ساعات واني دموعي ما نشفن ابد
مجاي اتخيل روحي شلون راح اكدر اكمل وعادل ماكو بحياتي
شنو هلصدفه شنو هلحظ
لو اي واحد بس مو عادل
ياربي الوحيد على اربع بنات شلون يموت
حتى مالحك يزوج كله بسببي
اني أحقر صديق
وانذل صديق قتلت صديقي بايدي
الفصل الثالث من هنا