رواية لم اكن قاتل الفصل الثامن8بقلم جمانه السعيدي
محمد...جسمي تكسر تكسير والدم يجري من خشمي وحلكي
طبعا هو مراقبني صار فتره
اشوفه يوكف كبال المحل ويبقى يباوع عليه
جان منتظر فرصه حتى ينتقم مني هو مصور اني السبب
انكطع رزقه من هذا المكان
بس قسما بكل المقدسات اني مالي دخل
هو ثرثار وفضولي ويدخل بكلشي حتى الزباين من يجون قبل يضوجون منه
لان يبقى يسئل اسئله مالها معني ويطول بلشغل
يعني الشغله الي تخلص بعشر دقايق يبقى بيها ساعه
اني هسه مااحجي هواي ولا ادخل بحياة الناس واخلص شغلي بسرعه
الناس كامت من تجي تطلبني بلاسم
وهو بدا يكثر المشاكل ولهذا السبب خالي طرده من الشغل
بس هو بقه ضامها بكلبه اليه
يريد ينتقم مني يحس اني اخذت مكانه
وكطعت رزقه اني الصراحه شفته اكثر من مره أكف كبال المحل ومره لا من بعيد يراقبني
اني ابد ما توقعت هو يريد يضربني
اني اجي ويا خالي بلدراجه وجنت ارجع ويااا
وطول النهار كاعد بلمحل ويا خالي
بس هاي صار اسبوع واكثر كمت ماارجع للبيت وقت الغده
من شافني ابقى الضهر حدي حدد الوقت الي يكدر ياخذ ثاره مني
جمانه السعيدي
مع الأسف اني الي جنت محد.يكدر عليه
وواحد مثل هذا جبان يضربني لو بي خير جان اجه وحده
مو جايب وياا واحد عبالك مصارع
وهذا الي اجا ويااا صدك بلا عقل يعني رياض كاله تعال
نضرب هذا اجا ويااا
صحيح بلاعقل لو عنده عقل جان فكر الف مره
قبل لا يضربني جان ممكن اموت بايده
مثل ما مات عادل بايدي ويصير مجرم وينحكم
علي بلاعدام بس لان اجا ويا رياض
هو ماعنده مشكله ويااي ولا يعرفني لا شايفني قبل
اجا يضربني علمود رياض وبس
اني مو ضعيف لو مااكدرلهم
بس حلفت بعد ماامد ايدي على اي واحد بعد ما مات عادل
اخذني خالي ورحنا للممرض لكينا بعده مافاتح عيادته رجعنا للبيت بيومها خالي بعد مارجع للمحل
بقه حاير بيه وكلشي كلش ضايج عليه
ضايج لدرجه انعفس عفس عبالك ابنه وانضرب
بس دخلنا للبيت وشافتني خالتي عاطت بصوت عالي يايمه هذا شبي
خالي...رياض الغبي جايب واحد وجايين يضربو
خالتي...ليش هو شسوه
خالي...ماسوه شي لان طردنا رياض من الشغل
خالتي...وهو شعلي ياعيوني هاي شصاير بيك
اجت رحمه بس شافت وجهي كله دم عاطت وضمت عيونها
رحمه... هاي شصاير
خالي...روحي بابا لا تخافين
محمد...غسلت وبدلت ملابسي ورجعنا للمضمد
المضمد... هاي شبي
خالي...عركه بسيطه
المضمد...لازم اشعه خاف عنده كسر فصخ
خالي...ضمد جروحه وبعدين ناخذه للاشعه
بدا المضمد يعقم بلجروح ويشدهن
محمد...صح اني امشي بس جسمي كله يوجعني
صعدنا على الدراجه ورجعنا للبيت خالي
تعشينا وأخذت مسكن وتمددت
خالي طلع وطفى الضوه عليه
من طلع خالي كمت ابجي مااكدر ابجي كدامه
ابجي على حظي الاغبر اني محمد الكل جان يحسبلي الف حساب جنت موكف الناس كلها
محد.يخلص مني اضرب اكبر واحد
محد.يكدر عليه بعمري ما دخلت عركه وما كتلت الخصم
وواحد مثل رياض غبي واثول وحقير يضربني
اني شسويت بنفسي
جمانه السعيدي
ولك عادل اطلع وشوف حالي ولك اخوك اليوم انضرب
ونداس على كرامته
ياريتك موجود جان محد قرب عليه
شفت مو كتلك اذا نتفارك اني وياك انتهي
ليش ما سمعت كلامي ليش عفتني ولك اليوم ضربوني
وماكدرت حتى ارفع ايدي وادافع عن نفسي
اني انكسرت بدونك صرت واحد جبان لاحول لي ولا قوه
جنت اعرف اذا تعوفني راح اشبع ضيم
تعال وشوف حالي
اخوي عادل ليش عفتني
خالي مجرد ماطلع من يمي وسد الباب راح الاهل رياض
دك الباب طلع اخو رياض الزغير
خالي.. اريد ابوك
شويه وطلع ابو رياض بس شاف خالي رحب بي
وفرح من شافه
لان خالي اله مواقف هواي ويااهم
جان يساعدهم دائما ويحضر كل مناسبتهم
ابو رياض...هله وكل الله بابو رحمه زارتنا البركه
خالي......اني مجاي اضايف عدكم
انتم كومانيين اني جاي اكاومكم
ابو رياض...... خير انشاء الله ليش شكووو
خالي. ماتعرف شكووو اليوم رياض يجي للمحل
ويتعدى على ابن اختي
ليش بشنو ااذى ليش يجاسر علي
اني اجيت اروح اشتكي عليكم واخليهم يسحلون رياض سحل
وعندي دليل علي كامرت المحل الي بصفي مصورته وهو يضرب محمد
بس خليت خاطر للعشره احترمتك وكلت عيب من ابو رياض هاي مجازاتي هيج يجازيني رياض
ابو رياض...اني هاي السالفه كلها مااعرف عنها شي
هسه سمعت منك
انتظر شويه
دخل ابو رياض وكام يصيح رياض رياض خره وينك
طلع رياض هااا يابه
راسا تقدم علي وضربه راشدي خالي يكول من قوة الضربه سمعته واني واكف برا
جابلي رياض يسحل بي من اذانه مثل المطي
ابو رياض...صدك اليوم انت متهجم على محل ابو رحمه
رياض..جذب هذا الحجي جذب
خالي ...زين اني باجر اخذ تسجيل الكامره أقدمه للشرطه
اشوف شلون راح تكول جذب
اني جذاب رياض اني ولك انت صدك ما تستحي ولا تخجل
رياض...حيل بي يستاهل بسببه طلعتني من الشغل
خالي..مو بسببه انت السبب
لغوي ثرثار تدخل بلزغيره والجبيره
ماتخلص شغلك بسرعه كل شويه اروح اشرب جاي
اروح الصاحبي اروح للتواليت
مخلص نهارك اطلع حجج
عملك الخايس طلعك من الشغل
رياض...لا انت طلعتني علمود ابن اختك
خالي.. وين المشكله اريد ابن اختي يشتغل وياي
ليش اضربه شلون تمد ايدك علي
هو هسه دخل مستشفى والدكتور كتب تقرير بحالته
( طبعا خالي جاي يخوفه اني بلبيت وماشايف المستشفى ولا الدكتور ،)
ابو رياض...حقك عليه امسحها بلحيتي هاي
اني اجيبه باجر واخلي يعتذر من محمد وكل فلس صرفتو
اني ادفعه اني ماادري بهاي السالفه كلها
هسه سمعت منك
واذا تريد اجيبلك مشيه اجي اني خادم
بس لاتوصل للشغله للشرطه
ترا رياض غبي ومابي حظ لو بي حظ جان هسه لحك ربعه
كلهم تخرجو صارو موظفين وهو بعده يشتغل عامل
لا من كد ماغبي راح يتهجم على الناس
بمكان عملهم مو اكلك غبي
اني اعتذر بمكانه وهلمره صارت مرت الثانيه ماتصير
واذا قرب للشارع الي تشتغلون بي
اني ادفنه هنا باب البيت
جمانه السعيدي
خالي...اني جنت منتظر تقرير الدكتور واروح اقدم علي دعوه والولد الي بلمحلات كالو نشهد وياك
بس ما وكف بعيني غيرك انت رجال خير
ابو رياض.. الف رحمه الامك وابوك والنعم منك
انت انسان محترم والناس كلها تشهدلك
وهذا رياض دوا عندي اني راح اربي من جديد
خالي...لو ميت الولد بايده شنو اسكتله
لو اهله يسكتون لو الشرطه تعوفه ترا هاي السوالف الرعنه مالها داعي
لازم الواحد ينتبه التصرفاته
تصرف واحد غلط يضيع كلشي
ابو رياض... اي ولله لاعاب السانك انت معدل من زمان
وخير وابن اصول زين سويت طردت رياض
هو اني ابو ما متحمله شلون الناس جاي تتحمله ماادري
محمد...رجع خالي سمعته من دخل بس ماجنت متوقع هو راح تعارك وياا رياض علمودي
اني ماجنت نايم
كاعد ابجي على حضي الاغبر
مهضوم كلش مهضوم لان رياض ضربني
كلشي صار وياي من عمل ايدي استاهل اكثر بعد
الصبح كعدت على صوت خالي يكعدني
هلكد ما المسكن قوي نمت للصبح وابد ما حسيت بشي
خالي...محمد بويه شلون صرت
محمد...تحركت من مكاني وجعني ضهري
خالي...محمد. البارحه تعاركت ويا رياض وابو علمودك
وداعتك ابو جابه ساحبه من اذنه
عبالك مطي
محمد...ليش رحت
خالي...تريدني اسكت اشوفهم ضاربينك واسكت
قسما بلله لو انت ما مطلوب للشرطه
جان رحت قدمت بيهم بلاغ واخلي رياض يخيس بلسجن
شلون يمد ايده عليك
البارحه ما نمت من القهر عليك
انت ما تعرف معتزك عندي اني كلش احبك
محمد..الله يحفظك خالي
خالي.. اكعد نتريك اني وياك خل اطمن عليك قبل لا اطلع
للشغل
محمد...اروح وياك للشغل
خالي. لا انت مجاز منا لمن اصير احسن
محمد...وحدك ماتكدر
خالي...لا اكدر ليش مااكدر ولك عمري ٤٢ بعدني شاب
جمانه السعيدي
محمد....احلى شاب بلدنيا انت
وتسوه كل الشباب
محمد...كعدت اتريكت وياا خالي ورجعت اتمددت
طلع خالي بس اني مارجعت نمت بس متمدد
باوعت الساعه ثمانيه ونص الصبح
شويه ودخلت عليه رحمه
رحمه...شلون صرت
محمد...زين لا تخافين عليه عندي ذنوب هواي
مراح اموت هسه لازم اتعلعل شويه يله
رحمه....ولله البارحه شكلك يخوف
محمد...ليش اليوم مارحتي للمدرسه
رحمه...الضربه أثرت عليك فقدت الذاكره يمكن أليوم سبت
ماكو دوام
محمد....نسيت الايام ونسيت نفسي
رحمه....انت ليش عفتهم يضربونك مادافعت عن نفسك
محمد....سكتت
رحمه.. انت تعبان واني اليوم صايره مثل قمر
بس اسئل
محمد...دارت وجها تريد تطلع كتلها خفت
التفتت عليه كالت شنو
محمد...خفت
رحمه...من شنو خفت خفت ادافع عن نفسك
محمد...لا خفت ادافع عن نفسي ويموت بايدي
مثل ما صديق عمري مات بسببي
رحمه.. ابوي يكول مجان قصدك تكتل صديقك
محمد...اني جاي اتعذب كل يوم بسبب هاي المصيبه
رحمه...جنت تحبه
محمد....اكثر من اهلي واخواني
جنت اول ماافتح عيوني الصبح اركض علي احس يومي مستحيل يبدي اذا عادل ماموجود
والاكل ماله طعم من غير عادل
وحتى ملابسي ماعرف اختارهن من غير عادل
وشمت اسمه على ايدي وهو وشم اسمي على ايده
هاج شوفي
حتى اني وياا جنا متفقين نزوج سوه
بس لحظة طيش مني ضيعت صديق العمر
تعرفين ليش اني جاي يصير وياي هيج
رحمه....ليش
محمد...لان عافني عادل جانت أموري تمام وما ناقصني شي
مجرد عافني عادل
عافتني الضحكه عافني الامان عافوني اهلي
كلشي حلو جان موجود بحياتي عافني
مجرد ما عافني عادل
رحمه....شكد تحبه ماشايفه صديق يحب صديقه هلكد
محمد...كعدت على حيلي
احبه صدك تحجين بس احبه لا ولله جنت متعلق بي
واموت علي وما متخيل اني وياا ممكن نتفارك بيوم من لايام
امي امي نفسها جانت تكول هنيال عادل على هلحب
رحمه....الله يرحمه ويغفرله ويغفرلك ويااا
محمد....هلكد مااحبه كل يوم اتمنى لو ماخذني وياا للموت
لان الحياة بعده حيل صعبه
رحمه...الله يساعدك ويصبرك على فراكه
محمد...ضوجتج بكلامي
رحمه...لا بلعكس كلامك حلو بي دفو وحب ومشاعر حقيقيه
امي كالت روحي شوفي محمد خاف محتاج شي
واني كعدت اسولف
محمد...شكرا مامحتاج شي
احلى شي صار بحياتي من يوم مات عادل لليوم
التقيت بيكم
انتم عائله حنينه وطيبه مجاي احس نفسي غريب بيتكم
رحمه.. خاف ترجع البغداد وتنسانا
محمد....مستحيل انساكم اكون قليل لأصل
اذا نسيت الناس الي وكفو وياي وساعدوني
بيوم جنت امر بأكبر ازمه بحياتي
رحمه... مو اذكرك بهذا الكلام
محمد...اني الي راح اذكرج شكد اني احبكم
رحمه...هسه محتاج شي
محمد...شكرا تسلمين