رواية من العتمة إلى قلبي الفصل الخامس عشر 15 بقلم ال زهراء
بعد فترة سمعت صوت كواريك وصريخ وكان صوت عزام اخوها!!!، مشيت ولقيت انو هو ماسك يدها بالقوة وهنا الدم فأر في عروقي مسكتو وضربتو لمن أغمى عليهو وما استوعبت الا لمن عزة دفرتني و قالت لي بغضب اطلع من هنا يا وحش!، ما اشتغلت بيها ومشيت قومتو وقعدتو وقولت ليها حا اوديهو المسشفى بس اول شي يصحصح ،قالت لي ما عايزاك تعمل اي حاجة اطلع بس!، قولت ليها هو مد يدو عليك وانا ما قدرت استحمل، قالت لي اول زول يمد يدو علي؟؟!، ما انت شبعتني ضرب!، هنا فقدت اعصابي ومسكت اكتافتها قولت ليها يا بت الناس عارف اني مديت يدي عليك بس والله ندمان ولو رجع بي الزمن ما بعملها!،سامحيني، قالت لي مسامحاك بس ما عايزة اشوف وشك طلقني يا بشر!، انا تعبت والله منك!، تعبت لدرجة بعيدة وما قادرة اتحمل خلاص العيشة معاك، زحيت يدي من اكتافها وطلعت وانا معصب شديد وصلت شقة ناس زياد ودخلت لقيت زياد ومعاهو تاليا يشربو في قهوة واخر رواق وبهناك فيفي قاعدة تتونس مع ريان الباين انها مكتئبة ،زياد قال لي اوووو السيد البقى شيخ!، قولت ليهو زياد ما ناقصني انت بس!، شيخ شنو؟؟! عليك الله! جيب الشيشة دي! ،جابها وبقيت اشرب فيها ريان جات وقعدت جنبي وقالت لي يبدو من حالتك انها رافضاك دا حقي انا!، في النهاية انت لعبت بمشاعري وما صاح منك، عارف ممكن تقع في اخواتك الحاجة العملتها لي ،قولت ليها لو ما انا كان لقيتي غيري يا ريان!، فما تحمليني المسؤوليه انتي سيئة واكيد ما بتبقي معاي بس واحتمال لعبتي من وراي كذا مرة فما تخطي الحق علي!!!، ولا تقولي يمكن يحصل لاخواتي زي العملتو ليك لانو انا ما اجبرتك!!، ضحكت وقالت لي يعني انت كنت واقف لعب مع البنات منو الكان بهدد انو ينشر صور ليهن بس عشان يتقرب منهن! ،ومنو الكان كل ليله مع واحدة جديدة!، اتنهدت وعصبت وشوتا الشيشة بعيد تاليا قالت لريان خليهو دة نسى ماضية الأسود عشان اتزوج منقبة شيخة!!!، ضحكن علي!، بقيييت اشرب عشان انسى الحاجات العملتها كلها في حياتي!، مستحيل عزة ترضى بي مستحيل!، امي اتصل بي ردت ليها وانا سكران وقولت ليها ما تزعجيني، قالت لي انت وين الوقت اتأخر تعال البيت ،قولت ليها بصوت بطي ما جاييي انا مع صاحبي!،!، بقيت شغال لريان شغلي الموسيقى دي وخلينا ننطرب.
__________________________________
بلسان عزة
بعد نضفت لعزام الجروح وخليتو ينوم بابنا دقا مشيت وقولت اللهم اجعله خيراً لقيتها خالتو ثريا قالت لي مروان بعد خلا الناس ديل رجع ليهم!،قولت ليها ناس منو؟!، قالت لي اصحابو ليهو فترة منهم بس تاني هدا رجع ليهم اسي اتصلت بيهو!، بقت تبكي وتقول لي شغلي يادوب بقى تمام ويادوب ابوهو وثق فيهو ! ،عليك الله ساعديهو! امشي معاي لشقة صاحبو زياد! ،عليك الله ،قولت ليها يا خالتو هو براهو الما عايز يخليهم فنحن ما بنقدر نجبرو، قالت لي انا ما غالبني امشي بس هو ما برضى اجيهو بعرفو!، بتعقد، بس منك ما بتعقد، اتنهدت وقولت ليها يا خالتو انتي مدلعة ولدك يتعقد شنو هو ديل اصحاب اصلا عشان يتعقد منهم! ،كلهم ما محترمين وما مربيين! ومدلعيين، انا ما بمشي ليهو!، قالت لي لو ما مشيتي بوقف دفع علاج امك!!!، وبدي السلطة لمروان واكيد عارفاهو انو حا يهددك ويرجعك بالقوة لعندو،قولت ليها وانا بدمع حتى انتي مستغلة نقطه ضعفي ،قالت لي بكل ياس الدنيا ولدي بدا يادوب يتصلح وما عايزة يتخرب تاني ،وبعمل اي شي عشان ما يرجع ليهم حتى لو هددتك معليش انا ام في النهاية.
لبست عباية ونقاب وكنت زعلانة وكاتمة جواي انا مضغوطة من جميع الجهات وماف اي منفذ لي الا امشي معاها، وصلنا شقة قالت لي انا منتظراك هنا امشي وتعالي!، دقيييت الباب فتحت لي زياد قال لي أو منقبتنا الحلوة اتفضلي اتفضلي راجلك عزمك ولا شنو ؟!، قولت ليهو بعد من خلقتي انا بس جاية اسوقو منكم !، دخلت ولقيتهم قاعد في الكنبة و ريري راقدة في صدرو وهو كان محاوطها بيدو وناميين!، استغفرت شديد من المنظر وقولت في نفسي قرف!، تاليا جات وقالت لي خليهم براحتهم ما صدقت انو رجع ليها!، قولت ليها احسن ليك تبعدي مني!!، ضحكت وبعدت وقالت لي حا يضربك لو مشيتي!، ما اشتغلت بيها وقفت الموسيقى طوالي وجيت وقفت جنب الكنبة القاعدين فيها بقيت اضرب في خدودو وقولت ليهو مروان صحصح!، فتح عين وقال لي بحس السكر دة عزة..ولا.... انا.... بحلم، قولت ليهو بنهرة ما قاعد تحلم قوم وزح النايمة دي منك ويلا البيت!، عاين لريان الخاتة راسها فيهو! وبعدها سريع وقام وقال لي عزة ما تفهميني غلط انا ما عملت معاها حاجة انا قعدت في الكنبة وغمضت عيوني وما عارف جات كيف!!؟، قولت ليهو ورح البيت وبنتفاهم!!!، قال لي ما تزعلي!، قولت ليهو ما ازعل كيف وانت حاضن واحدة تانية! اوعى تاني اشوفك بهنا انا المرة دي حذرتك بس المرة الجاية ما بتسلم مني اعرف، قولت في نفسي ما كان نفسي اقول كل دة بس مضطرة عشان ما يكررها ويعرف انو البعمل فيهو غلط كبيير في النهاية حرام لأنها اجنبية وما عندها صلة بيهو!، قال لي ما تزعلي انا اسف، قولت ليهو كل يوم اسف اسف زهجت انا منك وكل مرة اغلاطتك متكررة ،وراي يا مروان ، مسكت يدو اللتخة وقالت ليهو ما تمشي معاها، بعدت يدها وقولت ليها ما من حقك تمسكي يد راجلي! ، وتاني مروان دة ما حا يجيكم هنا ودا وعد مني وحتى ارقامكم ديل انا بذات نفسي حا امسحهم منو، خيلكم في وسخكم دة بس ابعدو من زوجي لانو هو بدأ يتغير، زياد بقى يضحك وقال لي شيخة عزة ما تسلفيني نفسك يوم يومين احتمال انهدي بيدك زي ما مروان بدا، استغفرت مروان بعد سكرو دة كان داير يضربو وقال ليهو ما حذرتك انو تاني ما تجيب سيرة عزة!!! مسكت يد مروان وقولت ليهو ما تضرب زياد خلينا نمشي بيتنا بس، وبهنا ريان شغاله ليهو ما تمشي معاها! هي ما بتحبك ولا حا تحبك!،قال لي وهو لسه سكران ما تحبيني انا بحبها وحا امشي معاها لاي مكان!، ضغط على يدي بقوة واتحرك بي !، ركب العربية خالتو قالت لي شكرا ليك، قولت ليها العفو ركبت جنبو كان ماسك لي يدي وما رضيان يفكها ،وحتى خت راسو في كتفي، قالت لي متعلق بيك شديد!، قولت ليها ما متعلق هو طبيعي كدة لصقة!، ضحكت وصلنا، نزلتو وبقيت ماسكاهو ،لمن دخل جوة كشحت فيهو موية باردة حرقة بس عشان خلاني امشي ليهو اخر الليل!، امو حنت عليهو مشت وجابت ليهو بطانية و قهوة شربها صحصح بعد مسافة ومشى استحم وغير وجاء قعد ،قولت لخالتو مضطرة امشي! ،قالت لي بيتي الوقت اتأخر!، قولت ليها لااا مرة تانية!، مروان قال لي اوصلك، قولت انت هو لسه تأثير السم الشربتو دة ما راح منك، بمشي براي!، قالت لي خالتوانا بوصلك! ،قولت ليها تمام!، قربت منو وقولت ليهو لو تاني سمعت انك مباري الشله دي ما بخليك والله اجيك هناك واوريك وشي التاني!!!، عاين لي مسافة وقال لي طيب، امو قالت لي دقيقة اجيب نظارتي واجي قولت ليها تمام، قعدت قرب مني!، قولت ليهو هو لازم تتصلق بي!،ضحك و قال لي عزة شكرا على اليوم ،قولت ليهو العفو يلا جيب تلفونك انا لازم امسح منك ناسك ديل وكل الحاجات البتخصهم!، عاين وقال لي التلفون دة خصوصية وبعدين انتي رضيتي كيف تمشي لي، قولت ليهو خالتو هي الطلبت مني اساعدك!، يلا جيب التلفون ،قال لي بمقابل شنو ،قولت ليهو ما ضروري تعرف جيب التلفون ،قال لي طيب ما تجاوبي على سؤالي داك وجاوبيني على دة.... كلامك عن انك زعلتي حقيقة ولا لا؟؟ ، قولت ليهو ما حقيقة ازعل لشنو ما عارفاك انك قاعد تقابل البنات وما وقفت!، قال لي الفترة الأولى بس لي فترة وقفت وبعدين احلف ليك بشنو انا كنت مغمض وهي جات وختت راسها وما كنت عارفها ، قولت ليهو ما تتبرر لي انا عارفة حقيقتك، قال لي عزة ظنك السيء بي بكسبك سيئات بس اعرفي انتي زولة متدينة فلو سمحتي صدقي كلامي ،استوقفي الكلام الزول دة خلاني ادخل في اثم وبقيت ما بصدقو من شدة كذبو علي بس برضو مفروض احسن الظن بيهو، قولت ليهو خلاص مصدقاك جيب التلفون!، مداهو لي وقال لي ما تشوفي المعرض!، الشك دخل في قلبي خلاص وقولت حا يكون عندو صور بنات اكيد فتحت المعرض اول واحد!، ولقيت فيه رمز، قولت ليهو افتحو!، ما رضا قولت ليهو مروان افتحو!، فتحو لقيييت الاستديو ما فيه غير صوري وصورو وفي صور لامو وابوهو واخواتو بس وشوية صور مع زياد ومازن مسحت صورو المع مازن وزياد اول وتاني قولت ليها مروان صوري ديل جبتهن من وين؟!، قال لي من زمن بعيد معاي بس ما تمسحهن، ما عندي غيرهم!، قولت ليهو ولو انتشرن!، قال لي انا انسجنت بسبب صورك دي انشرهن لي ؟؟!، سكتا وحظرت كل ناسو تاني وبعدها دخلت الفيس قولت ليهو صفحتك تتقفل وتعمل واحدة جديدة لو عايزة، قال لي تمام كتب راجل عزة! عاينت ليهو وضحكت! مسحتها وقولت ليها بطل يا مروان ما عايزة اضحك معاك انا، ضحك! كتبت ليهو مروان طارق بالانجليزي، قال لي صاحبيني!، قولت ليهو طيب بس ما تزعجني! ،قال لي تمام، قولت ليهو تاني امك اتاخرت انا باخد غفوة هنا وما عايزة اي صوت ،قال لي هو انتي بتصحي يعني بالصوت ؟؟!، كلامو صاح ما قاعدة اصحى سرعة، ،حاولت اقاوم النعاس تاني ما قدرت وقررت اغمض عيوني وقولت في نفسي هي مشت تصنعها النظارة لو ما خجلانة امشي واصحي عمي اخر الليل دة كنت مشيت ودقيت غرفتها.
___________________________
بلسان مروان
عارف انو امي ما كانت عايزاها تمشي لانو النظارة ما قاعدة تخليها في غرفتها نهاي وهي في شنطتها المجدوعة في الطربيزة!، شلتها وهي بين مغمضة وصاحية! ورقدها وقولت ليها تصحبي على خير! يا كل خيري.
طلعت وانا مبسوط على الاقل هي في بيتي!، قعدت وقولت سريعة الرضا! وان دل يدل على اخلاقها العالية!، جات توتة وقالت لي الاخو السكير أخجل في زول بتجيبو مرتو من بيت د*عارة ،قولت ليها بت حسنك اسلوبك! ،قالت لي ملهى ليلى! طيب!، قولت ليها شقة شقة دي ،قالت لي والله كل المسميات بتصفها الا شقة! المهم عليك الله حافظ على بيتك وبطل قله ادب ومباريات شلتك الفارغة! ،قولت ليها تمام في اي أمور تانية يا اختي، قالت لي لا يا مروان +اول مرة تسمع كلامي يادوب حسيت انو عندي اخو زمان بس تجي تصرخ وما تعملي كدة وما تسوي كدة بس اسي بقيت تتونس زي البشر وحتى بتسمع نصائحي ،ما كنت قايله انو ممكن نصل مرحلة الأخ والأخت في يوم!، إبتسمت ليها وربت على راسها وقولت ليها اختي الصغيرة كبرت بدون ما احس وبقت تقول كلام زول عاقل! وفيلسوف!، ضحكت وقامت! وقالت لي عندي مذاكرة، قولت ليها امشي نومي الوقت متأخر!، قالت لي حا أسقط!.
فتحت تلفون هديل وبقيت افتش فيهو ما كان فيه شي مريب وشكيت في الموضوع وحسيت انو عندها تلفونين ما تلفون واحد!، بكرة بعرف اخر الموضوع شنو منها !!!.
دخلت جوة واطمنت انو هي لسه في الغرفة! ما نومت جنبها لانو حا تزعل فرشت في الأرض ورقدت!.
____________________________
بلسان عزة
لمن صحيت لصلاة الصبح! لقيتو نايم في الأرض صحيتو وقولت ليهو مروان قوم صلي انت مسحت ماضيك كلو امس ولازم تبدأ بداية جديدة يلا قوم صلي عشان الصلاة بتنهي عن الفحشاء والمنكر! وعشان هي عماد الدين، قام قولت ليهو من اليوم تلتزم بالصلاة الرسول صلى الله عليه وسلم "قال العهد الذي بيننا وبينهم الصلاة ،فمن تركها فقد كفر "فهمت معنى الحديث صاح وما عايز تفسير.
الصلاة ميزان الإيمان وتركها خطر كبير عليك يا مروان، الصلاة بتنهيك عن الحرام وبتذكي نفسك بيها، شوف بتتوضى في اليوم كم مرة! وبتقابل ربنا كم مرة في اليوم ،قوم اول شي اغتسل لتطهير نفسك من اي شي وتعال صلي ،وريتو طريقة الغسل الصحيح مشى وجاء وصلى! قلبي انشرح والله لمن شوفتو بركع لاول مرة!.
انا بقيت اصلي لمن انتهيت لقيتو راقد في المصلاية!، جيت عليهو وقولت ليهو مالك؟! ولا راقد بدون سبب ،قام وقال لي ماف حاجة شوية تكسر جسم ، قولت ليهو بكون من رقدة الأرض امشي نوم في السرير انا ما دايرة انوم تاني قال لي لا ما...، قاطعتو وقولت ليهو امشي انا عايزة اقرا قرآن! والله، قال لي تعالي اقريهو تحت راسي ،عاينت ليهو! رقد ووانا مشيت بالجهة التانية وبقيت اقرا بحس عالي وقفت في جزو من اية في سورة الشورى قال تعالى (الله لطيف بعبادة...)، قولت ليهو في تفسير القرطبي قال انو الله يرحم ما لا يرحم نفسة،يعني ربنا بعطف على عبادة ولو قصرو وهجرو أنفسهم وهذا من سعة رحمتة، ربنا بحسن للعبد وهو ما بدري، يعني يا مروان انت اسي بتكون كان جايك مصايب كتيرة بس ربنا نجاك منها لكن ما قدرت تشتعر لطف ربنا لانك بعيد منو، قال لي اي والله! كم مرة نجيت من أمور كتيرة من غير احس، قولت ليهو يلا تاني أشكر ربنا على نعمو! لانك بديت تشتعر قربو ،مسك يدي وقال لي الحمد لله على نعمة الهداية والحمد لله على الطريق الجديد البديتو والحمد لله انك مرتي والحمد لله انك في حياتي! والحمد لله الذي رزقني بك من جيث لا أدري، بقيت أعاين ليهو بزهول! وتاني تابعت قراية!، بقى يكح!، قال لي دي مويتك الامس يا عزة!، قولت ليهو مالك يعني هي كلها كحة!، قال لي ما اظن كحة بس ،لمست جبهتو كانت زي النار عملت ليهو مكمدات، قولت ليهو ابلع حبة البندول دة وبتبقي كويس ،قال لي بعرف علاج افضل من البندول!، قولت ليهو شنو؟!، سحبني وقال لي ضمة من عزة صباح ومساء! وضمة عن اللزوم، قولت ليهو دمك خفيف لكن ضحك و قال لي انتي السبب في حالتي فاستحملي!، قومت وقولت ليهو اقعد مؤدب عملت ليهو مكمدات وبقيت جنبو لمن نام ،طلعت وكلمت خالتو بمرضو ومشيت عشان اشوف عزام، لقيتو ماف في البيت!! جاني اتصال فجاءة من أسامة وقال لي تعالي نشوف الموقع قولت ليهو طيب حا اجي!!، مشيت وشوفتو قولت ليهو هنا حا نخت الرفوف وهنا نخت كم كنبه وهنا نفرش فرشات في الأرض!، المهم ظبطت الشغلة كلها وطلعت، قال لي اوضاعك كيف مع مروان قولت ليهو واقفة، قال لي نرفع قضية، قولت ليهو ما بقدر الا امي تصحصح!!!،وانا كدة اتصلت بي عبير وبتبكي قالت لي تعالي سوقيني من هنا!، انخلعت وقولت لأسامة ممكن توصلي مشينا ليهم لقيتها كلها مضربة قولت ليها دة منو العمل معاك كدة، قال لي دي بت خالو ، ،قولت ليها لشنو ؟؟!، قال لي ع.... ش... ا... ن ال... و... ل... د.. ال.. د.. ا... ي... ر... ا... ه.. و قال دايراني! كانت بتتهد وتتكلم! ،قولت ليها استغفر الله العظيم واتوب اليه يا بت انتي الولد بعرفك من وين اصلا، ما ردت مسكت يدها وقولت ليها جاوبي!!، قالت لي كل ما اجي ناس خالو بلاقيني والمرة الفاتت اعترض طريقي واعترف لي بحبو وهي غارت ودقتني ،اديتها كف وقولت ليها امورك دي ما عايزة تخليها، ما كفاية رسلتي صورك لمروان! اي زول يغش فيييك زمان مروان واسي دة، فكت يدي وقالت لي مروان ما غشاني انا الفرضت نفسي عليهو وهو ما لمسني نهاي لانو ما رضيت! بس بقى يطلع ويمشي معاي وتاني رسلت الصور وبقى يهددني بيهن ، المهم المرة دي الولد هو السعى لي ،اديتها كف وقولت ليها لو سعيتي ولا سعى واحد يا غبية، ياخ عايزة ترقديني مستشفى انا تعبت منك ومن امورك!، تعالي معاي ،أسامة قال لي اهدي وخليني اشوف الزول دة اول، سال عبير عن اسمو قالت ليهو مشى وجاء جارو وقال ليها اسي كان بتونس مع بت! في الشارع التاني شكلو غاش كل البنات هنا فتح تلفونو بالتهديد و وراها كل صور البنات حتن اقتنعت الولد خاف واعتذر ومشى كان يادوب في عمر ال21سنة، تاني قال ليها ظاهر انك صغيرة وما واعية يا عبير لسة، ما كل البقول ليك بحبك وعايزك مفروض تصدقية وتطيري بيهو السماء ،مشكلة الجيل دة انو بقى عاطفي وباعد عن الدين بصورة كبيرة لدرجة يبيح المحرمات بالحب! ،بقت تبكي!.
تابع وقالت اخت عزة انتي لسه بدري عليك!، الحب الحلال بجيك ما تتهوري وتعملي حاجات غلط!، قالت ليهو كل البنات الفي سني عندهم ليه انا ما عندي ناقصني شنو ؟؟!، يادوب حسيت انو عبير عايزة تتابع البنات وحاسه بفراغ عاطفي كبيير! لازم تشغل نفسها بالعبادة والعمل!،قولت لأسامة موش عايز بنات يحفظن القرآن عبير حا تكون أول واحدة في معهدك، قال لي طيب وانا عندي شغل ليها إضافي، ومنو تبطل مبارات الفارغة رأيك شنو يا عبير تشتغلي مديرة في معهد تحفيظ القرآن وتسجلي البنات البنضمن ،وعزة حا تنشر إلكترونيا لضمان دخول البنات ،قالت موافقة، شكرت أسامة لانو فهم ناقصها شنو! مرات بحسو انو بقرا أفكاري عديل الزول دة.
اتصلت بي من المستشفى وقالو انو امي صحت بكيت بكاء وضميت عبير وقولت ليها امي صحت!! عبير بقت تبكي!! مشينا وسلمنا عليها وبقينا نشم فيها وهي كانت بتبكي معانا كنا ماسكنها وما رضيانين نفكها ،بالمساء مروان رسل لي وقال الحمد لله على سلامة الوالدة قولت ليهو الله يسلمك وقولت ليهو بقيت كيف، قال لي حالتي سيئة بس لو جيتي لي بتحسن، قولت ليهو امي صحت يادوب وما بجيك اكيد، قولت ليها اجيك انا، قولت ليهو لا انت تعبان ما تجي وانا اسفة على الموية، قال لي ماف مشكلة ،قولت اتكلمت معاه كلامي هادي عشان كنت السبب في مرضو وحاسة بالذنب .
في اليوم التاني جاني مبلغ كبييير من الجمعية الخيرية هم زمان ادوني مليارين واسي الحمد لله فاعلين الخير تموهو لي، انا كعزة كنت شغالة بجمع منهم زمان واسي لجات ليهم وما خذلوني! وعرفت انو ديني أنهى خلاص! وحمدت ربنا انو حا اطلق من مروان السبب لي اذية جسدية ونفسية وبعد فترة إن شاء الله حا أكلم امي باي شي حصل لي طول ال3شهور .........