الفصل الثاني 2
بقلم رشا منصور
دكتور ممدوح.....
مقتنعتش بكلام الدكتور صبري خصوصاً أنه مش بيجي المستشفى يوميا وكمان بيمشي قبل العصر وأحياناً الظهر كمان لو كان صحيح مصدق أنها تخاريف ليه مش بيقعد ل بالليل علشان كده بصيت له وقولتله
ايه رأيك يا دكتور بما أنك تعرف البلد هنا نتمشي بالليل وتعرفني ع الشوارع والطرق والمحلات
دكتور صبري.....
ايه بالليل لأ لأ مش هينفع وكمان المحلات بتكون مقفوله وأنا عندى العيادة بتاعتي في بلد قريبه من هنا علشان كده مش بكون هنا بالليل يلا اسيبك بقي علشان متأخرش
دكتور ممدوح....
نبره صوته كانت واضحة جدا أنه بيحاول يخرج من الموقف بأى شكل وانه بيكدب وزى ما يكون خايف
علشان كدا قررت اسأل الممرض بعد ما اخلص شغلي
وفعلاً بعد ما انتهيت من الكشف آخر مريض كانت الساعه لسه واحدة الظهر خدت محمد الممرض ع جنب وقولت له ايه حكايه النداهه دى
بصلي وقالي ما بلاش يا دكتور ربنا يجعل كلامنا خفيف عليها بس أنت مين اللي قالك
قولت له أنا مش مقتنع بكل ده اكيد في سبب علمي للي بيحصل ده بصراحه كدا أنا شكك أنه هيطلع زى الأفلام العربي بتاعة زمان وان في قطا'ع طرق ولا تجار المخد'رات هما اللى مدخلين الوهم في دماغكم علشان يعملوا أعمالهم المشبو'هة من غير ما حد يعرف ولو حد شافهم بيرموا في الترعه ويقولوا النداهه وطبعاً لأن مافيش ستات هنا بتخرج بالليل يبقي الرجاله بس اللى بيحصل فيها كدا وانتوا صدقتوا أن النداهه اللى بتعمل كده
محمد الممرض .... هههههه خيالك واسع أوى يا دكتور ممدوح البلد هنا كلنا عارفين بعض واغني واحد هنا هو حضرة العمده أدهم السعدني وهو عنده حنطور وزريبه مواشي وأرض زراعية
وبقيت البلد اللى شغال حلاق ولا حداد أو نجار أو فلاح والبيوت هنا جمب بعض ومتجوزين من بعض علشان كده تلاقي كل أهل البلد عارفين الصغير والكبير يبقي اللى بتقول عليهم دول هيعشوا فين بينا من غير ما نعرفهم ولا حتى هيسرقوا مننا إيه
دكتور ممدوح.....
ع العموم الأيام جايه كتير وأنا لسه قدامي سنتين ومش همشي من هنا قبل ما أعرف اصل الحكايه دي
وقررت أنى اتغدي وانام علشان أسهر بالليل
وفعلاً صحيت على رنه المنبه الساعه 8 بالليل وعملت ليا كوبايه شاى وطفيت النور وقعدت في الشباك ابص ع الترعه وفضلت لحد الساعه ما جت 11 وزهقت مافيش حاجه ظهرت قولت ياتريتني كنت قعدت اراجع في كتبي شويه وبعدين ببص لقيت حد قاعد على طرف الترعه بس الدنيا ضلمه مش شايف كويس اذا كان راجل ولا ست
بصراحه عاوز أنزل لكن مخبيش عليكم خايف يكون فعلاً في عصا'به ويطلعوا عليا وانا لوحدى
أنا هفضل أراقب من غير ما اعمل صوت يمكن اقدر افهم حاجه
ولقيت اللى قاعد ده مش بيتحرك خالص لحد ما الساعه جت 2 بعد نص الليل وأنا تعبت من القاعدة ومحتاج أنام الشغل هنا بيبتدي من 6 الصبح
محستش بنفسي إلا وأنا نايم وفجأة حسيت أن في حد بيحط ايده ع كتفي وبيقولى اصحي نام في سريرك
في البداية افتكرت أنه أبويا ما أنا لسه مش متعود على المكان وبعدين افتكرت أنى لوحدى في الاستراحه فتحت عيني فجأة وقومت مخضوض ملقتش أى حد في الاوضه
بس وأنا بحاول أقوم من الكرسي شوفت اللى كان قاعد عند الترعه بيبص عليا ولأن الفجر كان قرب والقمر كان بدر اخدت بالي أنه شاب
قولت في بالي الله يسامحك شكلك قاعد تصطاد طول الليل وأنا اللى افتكرتك النداهه اللى بيقولوا عليها
قومت نمت شويه وبعدين صحيت صليت وجهزت ونزلت تحت وأول ما نزلت شوفت عم بدوى جايب فطار للموظفين قولت له هو في محلات فاتحه بدري كدا قالي هنا من بعد صلاة الفجر الكل بيقعد اجبلك أكل
قولت له لأ أنا محتاج اخرج اعرف المكان واجيب بنفسي
عم بدوي ......
طيب يا دكتور أنا جاى معاك أحسن تتوه في السكه
وخرجنا فعلاً ولقيت مافيش محلات هنا كل واحد قاعد وقدامه فرشه وحاطط عليها خضار أو فاكهه واللى قاعد وبيعمل طعميه وبطاطس وقفت علشان اشتري الراجل بصلي كدا قالي أنت مش من بلدنا أنت مين
عم بدوي.....
ده الدكتور ممدوح دكتور المستشفى الجديد اللى جه من البندر اعرف شكله بقي
وده يا دكتور عمك حافظ أحسن واحد بتاع طمعيه في البلد لأن مافيش غيره أصلا 😂
عم حافظ....
نورت بلدنا يا دكتور اتفضل احلي طعميه وبطاطس وع حسابي المره دي
دكتور ممدوح تشكر يا راجل يا طيب يدوم الكرم
عم حافظ....
اوعي يابني تخرج بالليل وبالذات المستشفى قدام الترعه ربنا يحفظك وترجع ل أهلك بالسلامه
دكتور ممدوح....
بس أنا مش بصدق في الحاجات دي يا عم حافظ
عم حافظ.....
هتعمل زى دكتور صبرى كان زيك كدا لحد ما جري له اللى خلاه يصدق وبقي يحرم يمشي بالليل تاني
دكتور ممدوح..... 😲
هو إيه اللى حصل معاه
عم حافظ.... لأ يابني ربنا يجعل كلامنا خفيف عليهم تبقي اسألوا بنفسك
دكتور ممدوح..... زادت علامات الحيرة والفضول اكتر من الأول
عم بدوي..... يلا يا دكتور الحق اوصلك المستشفى في شغل كتير
ومشيت مع عم بدوى ولما وصلنا الترعه خدت بالي أن في شجرة كبيرة جدورها واصله لطرف الترعه إزاى مشوفتهاش امبارح دى كبيرة وطويله أوى ولقيت زى قوالب طوب محطوطة مكان ما كان الشاب قاعد بالليل فأفتكرته وقررت لما أشوفه تاني أعرف منه هو مين وبيعمل ايه هنا بالليل يمكن الاقي عنده إجابة لكل اسئلتي دى .....