رواية من العتمة إلى قلبي الفصل الرابع عشر 14 بقلم ال زهراء
مسكت امي من يدها وقررت ما اسال هديل اسي وقولت ليها لو جاوبتي على سؤالي ما بسأل هديل!!؟، عزة مرتيي وين؟؟؟، قالت لي مع صاحبتها في قرية...، قولت ليها صاحبتها اسمها منو ؟!، قالت لي ميمونة،طوالي بعدت َقالت لي ولدي سامحني عليك الله ،ما رديت وقولت لهديل امشي اجيب مرتي واجي اادبك ولو لقيتك ماف في البيت حا تكوني حفرتي قبرك بيدك وانا حذرتك ،شلت التلفون منها وقولت ليها تلفونك دة معاي بعد كدة ماف ليك اي تلفون نشوف ود الح*ر*ام البتتكلمي معاه منو ،طلعت وجدعت التلفون في العربية وقولت اكيد حا يتصل ولو اتصل حا يكون عندي معاه تصرف تاني.
المسافة بين الخرطوم للقرية كانت زي 5ساعات عديييل، كنت تعبان بس لازم اشوفها واعتذر ليها!.
وصلت القرية وصفو لي بيت ميمونة وطوالي مشيت ليهم دقييت الباب فتحت لي ميمونة!، سلمت وقولت ليها عزة قاعدة!؟، عاينت لي بتعابير زول فرحان وقالت لي اتفضل جوة قاعدة!، دخلت ولقيييت انو قاعدة في الغرفة مع بت تانية وبتتونس وتضحك! ،مما شافتني وشها انقلب 180درجة ،ميمونة قالت لاختها ورح نخليهم براهم دة زوجها ،مشت وانا جيت عليها، قالت لي بحس بارد الله يرضى عليك ما تعمل لي فضايح وامشي بيتك! ،انا ما وديت اختك لشقة و اصلا انا ما بعرف عن أمور زي دي في حياتي ومستحيل اودي بت شقة لراجل ،انا حافظة كتاب القرآن ومطبقاهو ومستحيل افكر انو ااذي بني آدم.... فانت لو عايز تصدق صدق ولو وما عايز رجاء خاص ما تعمل لي فضائح القرية صغيرة وكل الناس بعرفوني فيها، شوفت يدها ملفوفة! ومورمة!، قربت وهي كانت نظرتها لي ثابتة بس كانت بتقول لي عليك الله يا مروان ما تضربني! بس عشان الناس البرة ديل لو ضربتني بجنك وبضرخن فيك وهن نسوان في حالهن ما عايزة يسمعو أصواتهم الجيران وتحصل شمشرة وكلامات فارغة بسببي ،وصلتها ولسه هي بتتكلم ختيت يدي في خشمها وقولت ليها اسمعيني اول ووقفي كلام انا ما جيت اضربك ولا جيت اهينك ولا جيت عشان اعمل مشاكل انا جيت بس ارجعك! فاهدي شوية!، انا عرفت غلطتي ومتاسف شديد على كل الحصل!، ما كان أشك فيييك! انا اسف يلا حا ازح يدي من خشمك وبتمنى ما تصرخي +وريني ليه يدك مورمة!، زحيتها بقت تعاين لي وما جاوبت!، قعدت جنبها في السرير وشلت اليد وقولت ليها وريني الحاصل ليك شنو؟!، بعدتها وقالت لي ما عندك شغلة لو متأسف طلقني انا كرهتك وما عايزة اعيش معاك باي صورة، رجاءا طلقني ،مسكت يدها بالقوة وفكيت الضمادة! ،كان في آثار سنون صغار!، قولت ليها دا ثعبان ولا شنو ؟!، قالت لي اي وما تسالني أسئلة كتيرة لانو ما حا ارد ليك،قولت ليها طيب نتفاهم في البيت ولا اوريك نمشي المستشفى اول!، عاينت لي وقالت لي ما ماشة لاي مكان بس دايراك تطلقني!، مسكت يدها وقولت ليها طلاق ما بطلق يلا جهزي الشنطة وخليني نمشي ،قالت لي ما حا امشي ماف شي جابرني امي واتكفلت بيها خالتو ثريا!، قولت ليها انتي لسه على عصمتي! فحا تمشي معاي!، قالت لي لاااا بقول ليك ما ماشة، قولت ليها لو مشيتي انا ما بضغط عليك في اي شي وبديك حريتك التامة ،قالت لي حريتي بس بالطلاق غير كدة كلام جرايد، حاوطها بيدي برفق وقولت ليها ما بطلقك! انا ما حا اخليك،حاولت تفكني منها قولت ليها انا أقوى منك، قالت لي ياخ بعد مني ما تلمسني!، زحيت براحة وقولت ليها طيب زي ما عايزة!، طلعت برة ميمونة قالت لي إن شاء الله قدرت تحل الخلاف قولت ليها لا رفضت انا بمشي وبلف وبجيها تاني.
مشيت بعد فترة اتصلت بي وقالت لي تعال سوقني!! جيتها لقييت جهزت حاجاتها وكانت عيونها حمر شديد وزي الكانت بتبكي، قالت لي ممكن بس امشي أودع ناس خالتو نجاة قولت ممكن قالت لي تمشي معاي طيب، استغربت وقولت ليها ماف مشكلة مشينا سلمت عليها عزة قالت ليها راجلي جاء يشوفني حلينا مشاكلنا! ويا خالتو وكل الفي بالك ما صاح والله العظيم ما كنت مفكرة انو تقذفوني بالشكل دة بس ماف مشكلة عند الله تجتمع الخصوم، وحقي باخدو منكن يوم القيامة، المرة كانت تعاين ليها وبعد قالت ليها الكلام دة وشها لمن صفر!، كانت عايزة تتكلم وأسامة جاء وانصدم لمن شافني قال ليها المخليك قاعدة جنب الحيوان دة شنو امشي ناس ميمونة وانا حا اتكلم معاه، قامت وقالت ليهو لا انا ما عايزاك تتدخل ،قال ليها عايزاني اخليه يسوقك عشان ياذيك انتي عارفة ما راجل!، دايرة تبقيني زيو! اسمعيني هنا امشي ناس ميمونة!، وخليني انا اشوفو فهمو شنو الزول دة، كنت محترم نفسي غضباً عني قدام عزة بس والله لو كانت عزة ماف كنت وريتو!، مسكت يدها وقولت ليها نمشي!؟، عاينت لي وقالت لي ايوا وتاني عاينت لأسامة وقالت ليهو شكراً ليك انت اعتبرتني زي اختك وانا بعتز انو عندي آخو زيك والله، انا مروان اعتذر لي عشان كدة حا امشي معاه برضاي وما تخاف علي انا قدر نفسي وما بتحصل لي شي ولا مروان تاني حا يزعلني هو وعدني!، موش يا مروان، قولت ليها اي نمشي طيب عن اذنكم يا خالتو!، أسامة كان عايز بتكلم بس امو مسكت يدو نظام اسكت!، طلعنا ومشيت ودعت خالتو ام ميمونة وقولت ليها شكرا عشان اهتميتو بعزة!، طلعنا قولت ليها دقيقة عملت ملطف هواء لانو شربت السجاير وما عايز تتضايق فتحت ليها الباب، طلعت كانت ساكتة وباين عليها زعلانة ،ركبت سماعتها وبقت تسمع في قران!، بعدها طلعت السماعات وغمضت عيونها ،قولت ليها عزة ممكن تقلعي ألنقاب انا عملت القزاز مظلل عشان تاخدي راحتك ماف زول بشوفك من برة!، عاينت لي وقلعتو!، كان وشها كئيب شديد! ،وعيونها مورمة من البكاء!، غمضت تاني عيونها.
ما عارف الحصل شنو بعد مشيت وما عارف اذا انا سبب بكاءها ولا زول تاني ،بس قولت هي ما بتبكي مني!، ما حصل بكت مني اكيد في سبب تاني ،وكلام خالتو القالتو ليها افهم منو شنو ؟؟!، انا ما قادر اسالها وما حاس انو ممكن تجاوبني اسي!،قالت لي فجاءة وقف العربية عايزة استفرغ وقفتها نزلت وانا نزلت وراها بقت تستفرغ وانا مشيت جبت ليها الموية كانت بتتنفس بصعوبة والعبرة كانت خانقاها! وشكلها كان بوحي انو متحملة عدم البكاء بس متأكد انو ممكن تنفجر في اي لحظة!.
كان نفسي اواسيها قربت منها وضميتها علي وقولت ليها بغض النظر عن الحصل ابكي قدامي عادي وما تخافي مني!، انا ما حا أعمل شي ولا حا اضحك عليك والله فاطمني من الناحية دي!، زعلك دة ما مأثر عليك براك والله انا جواي موجوع وما قادر اتحمل شوفتك وانتي زعلانة وكاتمة، لو بس بعرف الزعلك منو ؟!، والله ما اخليه!، انا اتهمت نفسي ما اكذب عليك بس انتي ما قاعدة تزعلي مني لانك ما معتبراني حاجة مهمة بس اكيد الزعلانة منو للدرجة دي زول مهم في حياتك!، وانا بغار منو وبكرهو في نفس الوقت عشان اذاك!، وعشان انتي بفرق معاك!، بقت تبكي!! وما حاولت تبعدني منها ضميتها اكتر وقولت ليها ابكي لمن تحسي انك مرتاحة! ،ملت لي قميصي دموع وعرفت انو الموضوع كبيرة وسبب ليها صدمة نفسية!، بس لو اعرف الزول الاتجرا يهبش مرة مروان طارق منو!، بعدت وقلبي وجعني على حالتها الكانت سيئة لو بامكاني كان نقلت الزعل لي والله ،مسكت يدها وبوستهن وقولت ليها انا اسف على اي شي واسف على الزول الزعلك ولو صادفتو بيوم حا اقتلو اكيد عشان بكاك وورم ليك عيونك الحلوات ديل!، ما ردت لي وطلعت وهي ساكتة! ،شربت موية وقالت لي كنت دايماً بدعي انو ربنا يبعد مني الناس السيئة و اكشف حقيقتهم وربنا استجاب لي الليله ما كنت قايله انو ممكن تتبلا علي ولا كنت قايله انو هي ممكن تكرهني الكره دة ما كانت صاحبتي بس كانت اختي حبيبتي بير أسراري! وسندي كانت احلى حاجة حصلت لي في الجامعة، بس انخذلت بيها وانكسرت كسرة عمري ، ما كنت قايله انو ممكن تفكر فيني التفكير الشين والله ولا قايلاها انو ممكن تقول ليك كلام كعب لدرجة تخليني انفر منها واكرهها ،انا ما حصل زول قال لي كلام شين زي دة انا ذنبي الوحيد ثقتي الكبيرة بيها والتوقعات الخاتها ليها ما كنت أتوقع منها انو مستحيل تزعلني كان على الاقل ما بنصدم بيها، انا...، العبرة تاني وقفت ليها في حلقها والدموع نزلن منها!!، ما كنت داير اعرف التفاصيل ولا اعرف اسمها اسي لانو بالجد كنت قتلت البكتها بالطريقة دي ،وقفت العربيه وقولت ليها عزة عايني لي انتي بت شجاعة وما حصل استلمتي لاي حاجة كلامها خليهو دافع ليك عشان تتقدمي اكتر في حياتك!، انتي ما من النوع البضعف والبقعد يتبكى وحقك دايماً بتاخدية بيدك! ،قالت لي اي بس دي قريبة مني قريبة لدرجة انو ما قادرة اتجاوز الحاصل، قولت ليها بتقدري بس انتي اهدي!، قربت منها ومسحت ليها دموعها قالت لي بعد ما قولت ليك ما تلمسني انا ما عايزة اي تعامل معاك! ما تنسى انك عدوي!، انت زاتك ضربتني واهنتني! اهانة عمري ما بنساها!، أتراجعت سريع وما حبيت اقول اي شي، انا والله عملت حاجات كتيرة في حقها وما اظن تنساهن لي طول حياتها بس ما بخليها نهاي.
لمن وصلنا قالت لي نزلني هنا لو سمحت!، عاينت ليها وقولت ليها وين ماشة، قالت لي بيتنا ماشة وين يعني! وورقة الطلاق تصلني هناك ،قولت ليها انا كنت قايل انو بعد رضيتي تمشي معاي...، قاطعتني وقالت لي اضطريت اكذب!، ما كان في حل تاني!، ما عايزة عيشة الناس تتغلغل بسببي! ،المهم يا مروان ما عايزة اشوفك تاني في حياتي كلها!، وولو سمحت لو لاقيتك في الطريق ما تسلم علي!، اعتبرنا غريبييين! ،يلا وقف العربية!، قولت ليها طريق بيتكم ما بهنا صاح حا اوصلك طيب ،سكتت وقالت لي تمام ما فرقت!، وصلتها نزلت!، نزلت معاها عاينت لي وقالت لي ماش معاي وين انت؟!، قولت ليها ما من حقي اقعد مع نسابتي؟؟، قالت لي شوف ليك شغلة تانية قايل انو بخليك تقعد مع عبير في نفس البيت البت براها خايفة منك!، قولت ليها عبير دي موش مشت لبيت خالها وقعدت هناك ليها اسبوع، قالت لي عرفت كيف، قولت ليها من اخوك انا متواصل معاه اخوك بقى بشتغل!، صباح ومساء عشان ما يحوج عبير!، واكيد عبير ما بتقعد براها في البيت ،قالت لي هو ما بشتغل لعبير هو بشتغل عشان ياخد السم دة اعرف+ هو كان بشيل من امي القروش بالقوة ومرات بخلينا جيعانين بس عشان مخدراتو ديل واي كلمة قالها ليك غلط،قولت ليها انا بحل ليك مشاكلو، قالت لي انتو سبب مشاكلو شكلو باراكم ،قولت ليها انا ما بعرفو اخوك صاحب زياد بس!، وهو بعرفني معرفة سطحية! ،وانا زاتي ما بشجع المخد*رات ولا بتعاطاها!، ضحكت وقالت لي ماشاء الله تبارك الله دا هي الحاجة الوحيدة الما بتشجعها كويس جدا!، ما عرفت اقول كلمة لأنها كنت حاس بالاحراج ! ،بقت ماشة وانا متابعها فتحت الباب وقالت لي حدك هنا معليش! جيب الشنط، ما رضيت اديهن ليها ،قلعهن مني قلع! ،وقفلت الباب!.
رجعت البيت عشان اسوي اموري مع هديل لقييت انو حابسه نفسها في الغرفة وامي كانت بهناك شغاله ليها افتحي البا ب وما تزعليني منك، قولت ليها امي زحي ديل حركات استهبال جديدة بس انا بعرف اتعامل معاها، ابوي دلعها دلع زايد لحدو! ،وانا بادبها وين المفتاح الاحتياطي، قالت لي ما لقيتو+جبت عزة، عاينت ليها وقولت ليها اي، مشيت افتش قريب الساعة للمفتاح وما لقيتو قولت ليها طيب نكسر الباب مالو بتصلح عادي!، الباب كان من قزاز!، كسرتو بشاكوش وفتحتو! من جوة!، دخلت ليها لقيتها متكومة وبترجف من الخوف!، كنت ماسك الشاكوش في يدي وقولت اضربها بيهو في راسها عشان يتعدل وتعرف تاني تكذب ولا تتكلم مع الاولاد ولو ما انعدل برتكب فيها جريمة وارتاح منها وانسجن فيها ،جيت عليها وهي كانت بترتعش من الخوف!، قولت ليها كان تفكري قبل ما تعملي عملتك! انو لو انا عرفت الحا يحصل ليك شنو ؟؟؟، بس لانك غبية ما فكرتي كنت بزح راسها بيدي واجيبو وانا بقول في الكلام دة رفعت الشاكوش وكنت جاد اني عايز اكسر راسها!، بس وقفني صوت عزة وهي بتقول دا شنو البتعمل فيهو دة!؟!، جات وقلعت مني الشاكوش وعاينت لي وقالت لي مروان تصرفك دة ما بزيد الامور الا تعقيد عايز تعمل للبت عاهة! ،قولت ليها اطلعي من هنا يا عزة انا حاليا ما فاضي خلينا اخو واخت برانا ،قالت لي اضربني اول حتن تمشي ليها اصلك انت جاري في دمك ضرب النسوان! ،بقيت ماش وجاي في الغرفة!، وبهبش في لحيتي! ،الموقف كان صعب شديد بقيت محتار بين الرغبة في كسب ثقة عزة وفي كسر راس اختي!، قعدت وبقييت اهز قي رجولي من الغضب!، جات وربتت على راسي وقالت لي عاين لي هنا، عاينت قالت لي انا زعلانة منها بس ما بديك الحق تعنف اختك! اتفاهم معاها بالتي هي أحسن ووريها انو تصرفها غلط ،بس لو طوالي لجأت للضرب دة بنفرها منك وحا تعمل اغلاط أكبر شدت على شعري زيادة وقالت لي فهمت!، ما رديت زادت الشد وقالت لي فهمت مروان!!!، هزيت ليها راسي باي، قالت لي كويس والليله تمشي تقص شعرك كتر ما تربيهو!، عاينت ليها وقولت ليها لا ، قالت لي لاا تمام كويس يا مروان اعمل البريحك، مشت لهديل وقالت ليها مهما انتي بتكرهيني ما مفروض تكذبي في حاجات زي ديل ما خايفة على نفسك طيب؟؟، خليني انا واعرفي انو انا اصلا اخوك ما لاقيه منو الاحترام وانتي عارفة الحاجة دي وما كنتي تكلفي نفسك لانو بيك وبدونك هو قاعد يضرب وما حصل صدقني في حاجة ومارقني اكعب واحدة بس انا ما عايزة اي تقييم منو ولا منك فبتمني انو تاني ما القاك في وشي ولا اشوفك في حياتي وانا مسامحاك بس إن شاء الله ربنا يغفر ليك.
اتنهدت وتابعت خالتو هي الطلبت مني اجي اوقف مروان وكان ما سمعت بكائها وحسها التعبان ما كنت جيت والله ليكم.
عاينت لي وقالت لي بتمنى تكون فهمت الكلام وما تاذي اختك مرة تانية.
طلعت وانا لحقتها قولت ليها اقعدي، قالت لي لاا ولا دقيقة ما بقعدها، قولت ليها طيب اوصلك، قالت لي لا وما اسمع انك ضربت هديل، توتة جات في اللحظة دي وحضنت عزة وقالت ليها البيت فاضي من دونك وموحش والله، صوت تلاوتك هو البحيهو ،قالت ليها يا عمري يا توتة إن شاء الله تنوري انتي بتلاوتك ! كيف مع الامتحانات، قالت ليها مبالغة فظيعات شديد،قالت ليها ما تخافي بس ووكلي امرك ربنا وإن شاء الله محلولة طلعه توتة ضربتني وقالت لي اتلحلل شويه هو قايل لو ضيعتها من يدك حا تلقى زيها.
عملت زي ما قالت لي ومشيت قصيت شعري، قالت لي بتاع الصالون شكلك خلاص ما داير تربي شعرك، قولت ليهو المدام صعبة!، ضحك وقال لي ما بتحب شعرك الكتير، قولت ليهو اي بتحس بي شماسي شماسي ،ضحك وقال ليهو الله يعينك.
طلعت ومشيت بيتها عرفت انو ما حا تفتح لي الباب فتلبت بالحيطة زي الحرامي مشيت باتجاة غرفة كدة وفتحتها براحة لقيتها نايمة قولت هي بعد نومها التقيل دة شجاعة وقاعدة براها ،قربت منها وبقيت اعاين في يدها الورم خفى بس لسه ما راح!!، رقدت جنبها وختيت يدي تحت راسها وحضنتها علي قولت حا تقتلني بس ماف مشكلة!، ختت يدها فيني بعفوية وشدت على قميصي،شكلها فاكراني امها.
انا بس داير اقضي معاها وقت لاني مشتاق ليها، بوستها من انفها وقولت في نفسي البت دي عملت لي شنو وبقيت ما شايف واحدة غيرها، تفاصيلها كنت بشوفهن عاديات شديد بس اسي سمرتها مع ملامحها بتخلي قلبي يدق وبتخلي لساني يتربط ،انا مروان ماف بت قبل كدة عملت لي الشي دة !!، لمست شامتها بيدي وقولت ليها حتى شامتك دي محفورة فيني يا ست قلبي. غمضت عيوني وصحيت بصراخها العالي ،قومت وقولت ليها في شنو، قالت لي تقول لي في شنو؟؟ جيت بوين وكيف والسمح ليك منو تنوم جنبي، قولت ليها جيت تليب السمح لي يا عسلي انو انا زوجك وطبيعي انوم معاك في نفس السرير!، يلا انا بقوم اعمل قهوة وانتي في المدة دي حاولي لملمي شعرك المكنكوش دة!!، قالت لي منكوش!!!! انا تقول لي شعرك منكوش اعرف انو عمري شعري ما اتنكش؟ ؟؟،قربت ونكشتو ليها وقولت ليها كدة بقى منكوش حدرت لي وقعدت وانا طوالي مشيت اعمل القهوة بعد فترة سمعت صوت كواريك وصريخ وكان صوت عزام اخوها!!!، مشيت ولقيت انو هو ماسك يدها بالقوة وهنا الدم فأر في عروقي مسكتو وضربتو لمن أغمى عليهو وما استوعبت الا لمن عزة دفرتني و قالت لي بغضب اطلع من هنا يا وحش .......................َ.َ
اللهم صل على محمد عدد ما ذكره الذاكرين وغفل عن ذكره الغالين