رواية من العتمة إلى قلبي الفصل الحادي عشر 11 بقلم ال زهراء
بعد اسبوع كدة جو الشرطة وواحد فيهم قال لازم تمشي معانا في واحد اسمو حاتم المنصور مشتكي عليك ،امي انخلعت ونططت عيونها وقالت لي عملت ليهو شنو!، وبالنسبه لعزة كانت ماسكة امي وبتقول ليها يا خالتو ما تقلقي لسه ما فهمنا الحاصل!، احتمال سوء فهم!، انا مشيت معاهم هي كانت مصرة تجي معاي بس انا قولت ليها ما تمشي وصلت ولقيتو قاعد هو ومعاه أخوة ،قعدت وخلفت رجل على التانية وقولت ليهو عملتو أكبر غلط في حياتكم! انا بطلع من هنا بس انتو تمشو مني وين، قال لي بتحترم نفسك ولا اوريك!، قولت ليهو تعال يا حبوب تعال ووريني عايز تعمل لي شنو؟!، هو انت لو بتعمل بتشكتي، عاينت للشرطي لقيتو اسعد الزمان كان غضبان شديد وعرفتو انو جا يوقعني في مصيبة وما حا أفلت منها بسهولة!، قال لي اسعد اتكلم! شنو السبب الخلاك تضرب حاتم وتفقدو الوعي اسبوع!!!، ضحكت وقولت ليهو اسبوع بسسس دا انا قايلو حا يقعد سنة بعد ضربي دة ،المهم يا جنابو اسعد انا ما ضربتو الا لانو انتهك عرضي وشاف شي ما مفروض يشوفو! غيري!، عزة منقبة وما مفروض كان ما يكون يشوف صورها ! +هكر التلفون ودي جريمة تانية من جرامو وانا عشان بحب اني اخد حقي بيدي من غير ما اعتمد على الشرطة فكسرت راسو بس هو عشان ود ميكي جاء ببكي لاخوهو واشتكاني لكن زي ما قولت ليهم انا ما بقعد في السجن وبلقى طريقة اطلع بس الا كان يحفرو حفرة ويدسو فيها مني !، جنابو اسعد قال لي ديل كلهم ما مبببرر للعنف! ،قولت ليهو والله دة اناا كدة! ما بخلي حقي بس لو شايف عنف تمام!، عاينت لحاتم وقولت ليهو إن شاء الله بس تكون نسيت صورتها عشان ما افجر ليك دماغك المرة الجاية!، قال لي جنابو اسعد انت هنا في مركز شرطة وكونك تهدد في المدعي بمثابة جريمة تانية ،قولت ليهو يا عمو انا زول دغرييي! وانت عارفني والا اذكرك باخر محادثة بينا! ،اتوتر توتر شديد ووشو دة اتغييير وقال لي حا نطالب بتوقيفك والمحكمة هي البثبت التهمة ،قولت ليهو طيب يا عمو اخبار زينب شنو ؟؟!، في اللحظة دي جاني حس عزة وهي بتقول مروان!!!، التفت وانصدمت وسكتا! قعدت وقالت لي لازم اي مكان تمشي ليهو يحصل فيهو توتر، مش موضوع وانتهى المرة الفاتت ما كفاك، اتخيل انو دة ابوك قدامك لو في واحد قال ليهو كدة بترضى، الراجل دة ربنا نجاهو عايز تاني تعمل ليهو جلطة قايل ما عندو غير زينب اولاد معتمدين عليهو،حراااااام علييك! البتعمل فيه حرام والله ،ما عارفة انت من اي طينة! مبالغة زول سيء شديد!، وتاني عاينت لجنابو وعاينت لي وقالت ليهو انا اسفة جداً بالنيابة عن زوجي!، قال ليها زوجك اتزوجتة كيف!، قالت ليه قصة طويله!، وتاني عاينت لي وقالت لي مروان لو سمحت اعتذر منو على كل حاجة مع على الليله بس،ضحكت وقولت ليها انااا اعتذر!، قامت وقربت وقالت لي اي انت منو الاسمو مروان في الغرفة دي كلها غيرك!، ضحكت ضحكة عاليه، قالت لي بغضب مروان اعتذر احسن ليك، قولت ليها ولو ما اعتذرت يا مرتي!، اتنهدت شديد وعاينت لي بنظرة حارة!،وتاني جاها اتصال كان مكتوب أسامة ردت قالت ليهو ايوا حا اجي إن شاء الله بس دقيقين، عاينت ليها قولت لبيها ود ****داير منك شنو!!، قال لي حسن اسلوبك اول واعتذر من جنابو اسعد وبكلمك! قولت في نفسي انا الأسد تبقييني عزة كدة!، وكمان لا اعتذر قدام حاتم وأخوه بس عشان اعرف هههه مستحيييل يبقوني ما راجل، قولت ليها لاا، قالت لي طيب مع السلامة ،كانت ماشة شعوري الداخلي القال لي امشي اقتل أسامة كان اقوى من اي شعور في اللحظة دي!، قولت ليها من غير احس عزة تعالي! عاينت لجنابو وقولت ليهو اسف شديد انا ما كان اذكر ليك قصة قديمة، واسف المرة الفاتت اني اهنتك قدام زملائك! ،عاين لي شديد وما قال شي!، عزة قالت ليهو ما قولت ليك يا عمو في يوم بجيبو ليك يعتذر وهدا اعتذر ،وبتك تابت بالسبب دة وعرفت غلطتها فسامحو يا عمو الله يرضى عليك حق ربنا ممكن يغفر ويعفو عندو لو تاب المؤمن، بس حق المؤمن الا يرضى المؤمن من أخيه المؤمن!! ،قال ليها عزة بتي انتي إنسانة صالحة وكونك تقعي مع واحد زي دة اكيد في حكمة ويادوب عرفتها اسي!، انا مسامحو دنيا وآخرة! ،إن شاء الله ربنا يهدية ويغفر ليه ويرشدو للطريق الصاح، بقييت ساكت وبعاين لعزة المصرة انو يسامحني! ،ما عارف ليه هي عايزة تنقذني وانا ما عايز انقذ نفسي! ،هدييت وعاينت لعمو واعتذرت بصدق المرة دي وكنت جاد! حتى هو اتفجأ.
عزة قعدت وتاني عاينت لجنابو اسعد وقالت ليهو القضية شنو ؟؟!، قال ليها، هي عاينت لي وكانت منهجمة شديد ومصدومة، قولت ليها ما تنصدمي الموضوع كان فييك وما بسكت هو وريان كان عايزين يشوهو سمعتك ،قالت لي من منو يا ترى ما منك، انت شافع اعرف وانا معتبرني زي لعبة عندك، عشان كدة كل الناس ديل اعتبروني كدة!، انا اعمل شنو اسي بعد صوري انكشفت لولد ورينيي!!!؟، ياخ انا لو هواء جاء قوي بخاف يترفع جزو من نقابي واسي بكل بساطة صوري بقت تمشي للأولاد ولا كمان كانت عايز تنتشر وبسببك ،ياخ انا كرهتك وكرهت العيشة معاك وكرهت اصحابك الزيك الما رضيانين يخلوني في حالي!، ذنبي الوحيد انو اشكتيت عليك بس عشان هنت اختي!، صاح اختي غلطت بس انت زاتك غلطت! وعارف الحاجة دي!، المهم انا اصلا بتكلم مع منو!، انت عمرك ما بتبقى زول ولا حا تتغييير المرة الجاية لو شوفت صوري في مكان حا تشوف عزة تانية!، طلعت وانا حاولت الحقها بس الشرطة قبضوني عشان القضية لسه ما انتهت، المهم بعد جرجرة وكلام فارغ الاخو سحب الشكوة ووافق انو اديهو قروش.
مرقت ووقولت حا افتش ليها.
_______________________
بلسان عزة
طلعت وانا غصبانة شديد اتصلت بي ميمونة طبعا ميمونة ما عارفة حاجة عن شذى وأسامة ولا حتى عن اني بعرفو من وين عشان ما عايزة تدخل في مشاكل مع الشله، وحتى هي لمن سالتني قولت ليها صدفة بس وما حددتا حاجة تانية وحاسة بيها زي الزعلت مني!، بس بعد عرفت انو اتزوجت مروان رجعت طبيعيه!، المهم ميمونة قالت لي منتظرك انا وأسامة استغربت لانو بس أسامة العايز يقابلني عشان يديني حاجات جابهن للمبادرة، قولت ليها جاية مشيت ليها لقيتها معاهو قال لي حاجات المبادرة معاي! إن شاء الله يفيدنكم، قولت ليهو الملابس كويسة وكونو تتوزع في دور المايقوما فدي حاجة عظيمة ممو قالت لي دي صدقة لشذى الله يرحمها!، هو أسامة عرف كيف؟!، عاينت ليها وقولت ليها شحدتو وضحكت! ،أسامة كم مرة نبهني اني ما اجيب سيرة لممو!، أسامة قال لي ممو ممكن تخليني برانا، عاينت ليهو وقالت لي ليه؟؟، قال ليها يا زولة ما تحشري نخرتك دي في كل حاجة امشي الداخليه طويييل ،قالت لي أسامة انت طاردني ،قال ليها اي زعلت وقالت لينا كلاب يلا انا زاتي ما عايزة اسمع كلامكم، مشت قال لي ممو اصلا بتحب تعرف أي حاجة المهم يا عزة شذى في يوم قالت لي نفسها انو يكون عندها مركز تحفيظ تحفظ فيهو الناس بالمجان وانا فكرت اعملو باسمها، فعليك الله ساعديني!، قولت ليهو جزيت خيراً يا أسامة طوااالي ،قال لي دة قليل في حقها هي ما قصرت معاي ،قولت ليهو اي والله +لاقتك وين شذى نفسي اعرف، قال لي لاقتني في ندوة !، وتاني لاقاتي كترت مرة في مناقشة مرة في حلقة مرة في محاضرة دينية! وكلو كان عاملتهم ابوها وانا كنت من اشد المعجبين بيهو ،وتاني حسيت انو افكارنا زي بعض وبقدر اتناقش معاها وقولت اخطبها وكلمت ابوها وهي كانت موافقة وحصل الحادث وكل احلامنا مع بعض اتدمرت وكرهت اي شي بعدها، ما كنت داير اجي السودان نهاي بس كلو من اختها القالت لي ساهم معانا في المبادرة دي وكون جزو منها جيت وقابلتها وادتني رقمك واتشجعت يادوب قبل فترة واتكلمت معاك!، نسيت اي كلمة قالها وبالجد كنت دايرة اسالو سؤال واحد بس جاء في بالي بسبب كلامو وبسبب ملامحو الاتغيرت لمن كان بقول فيهو... قولت ليهو انت يا أسامة كويس؟!، عاين لي شديد وقال لي اي!، قولت ليهو متأكد باين عليك ما كويس !، ما شايف نفسك وانت بتقول كرهت اي حاجة !، معقول يا أسامة حتى حياتك كرهتها ؟؟!،قال لي انتي بتحللي من راسك!، رجعت راسي لوراء وقولت ليهو انا اسفة! انا اسفة! يبدو اني هولت الموضوع شذى شهيدة باذنة تعالى! ،انت حاول تعيش باقي حياتك يا يا أسامة ما شرط تنساها بس اقدر كمل حياتك بالطريقة الصاح! عشان نفسك!، وما عشان زول تاني،ربنا بسالنا من عمرنا افنيناه في شنو!؟، وأنت لو حياتك اتوقفت عليها! حا تكون مشكلة! كبيرة ،انت زول مؤمن بالقضاء والقدر صاح طيب ليه بتعمل كدة!، قال لي ما عارفة حاجة انتي فأحسن ما تفتحي الموضوع تاني وانا عايش حياتي وما واقف عليها !، قولت ليهو عايش بس ما حاس بطعم ليها ! صاح!، اتنهدت وقال لي عزة خلصينا من الموضوع دة!، وخليني في موضوع المركز انا برسل ليك تاني تفاصيل عنو لمن القى مكان!، قام وقال لي لو سمحتي خلي الموضوع دة سر بينا ،قولت ليهو تمام.
_______________________
بلسان أسامة
هي كانت عايزة لي الخير بس وعايزة تثبت للناس انو زول بقدر وما ناقصني حاجة!، بس انا فهمتها غلط وهي ما ببررت لي وقالت لي اصحابك قالو فيك وفيك وانا عايزاك تثبت انك قدرها لأنها ما طبعها تخرب وتنقل كلام ! بس للاسف بدل افهمها واظن فيها خير، قولت ليها كلام يسم البدن وما لقيييت تاني فرصة اعتذر منها، وماتت وهي زعلانة مني!.
عزة عرفت انو انا بكرة نفسي وعرفت انو ما كويس! البت دي فيها مستوى فهم عجيب ودة محيرني،اتصلت بي ميمونة وقالت لي انا لسه ما رجعت الداخلية لو انتهيت تعال رجعني جيت ورجعتها قال لي في الطريق بتحب منو، قولت ليها بت نهاي ما حا تكون لي ،قالت لي عزة صاح لأنها بقت متزوجة!، عاينت ليها وقولت ليها ممو ما اسمع منك كلام زي دة تاني!، عزة وانا ماف بينا علاقة!، قالت لي فيي وانا متأكدة نزلني!، قولت ليها افهم انك زعلانة، عاينت لي وقالت لي أسامة انا كنت مفكرة انك محترمني ومقدرني عشان... ََ،وتاني سكتت ،قولت ليها عشان شنو وريني!، قالت لي وقف العربية أسامة والا بنط منها ،وقفتها قالت لي انسى عزة مروان ما بخليها ليك!، استغفرت شديد وقولت ليها يا بت الناس ما تعملي لينا سمع! خليني انا ما خايفة على صاحبتك، قالت لي ما خايفة!، دخلت وبقييت احك في راسي وقررت اقعد فترة هنا افتش مكان للمركز.
_________________________________
بلسان عزة
لمن عاينت لتلفوني لقيت الف مكالمة عديل لمروان!، قررت ما ارد والبحصل يحصل مشيت المستشفى لأمي وبقيت قاعدة معاها عبير جات وقالت لي لسع في حالتها بتصحى متين ، قولت ليها ربنا كريم إن شاء الله حا تقوم،بقت تبكي وقالت حا تتحملي مروان كيف للوقت داك، قولت ليها ما تخافي علي وخليك معاها انا والله لو ما اتهددت كنت ببيت معاك، قالت لي عارفة المهم صحة امي يا عزة صاح لازم نتحمل، قولت ليها ايوا.
رجعت البيت ودخلت الغرفة مروان ما كان في استحميت وغيرت وبقيت قاعدة جاءني داخل وقال لي كنتي معاه طول الفترة دي،عاينت ليهو وما رديت، قال لي وهو بصرخ لسانك دة انقطع اتكلمي ،ما رديت قرب وقال لي احسن ليك اتكلمي، رقدت واتغطيت منو ،قال لي عزة اتكلمي!!!، ما اشتغلت بيهو؟؟!، قعد تحت راسي وقال لي انتي ما وعدتيني انو تتكلمي بعد اعتذرت للراجل عايزة تخلفي بوعدك ،فتحت البطانية وقولت ليهو أسامة كان دايرني في شغل مبادرة بس وتاني مشيت شوفت امي كدة ارتحت، غمضت عيوني بقى يمرر باصابعو في شعري وقرب من اضاني وقال لي بهمس ما بحب يا عزة شغلك بسبب مقابلاتك للرجال ديل... انا بكره فكرة انك مع راجل والله!!!، انخلعت منو والله وبقييت اعاين فيه ومهجومة قولت ليهو انا ما زيك ما حصل كان عندي ارتباط مع رجال ولا حا يحصل !!، مسك خدي وقال لي عارف بس دة شعور خارج ارادتي! ،يمكن عشان انتي ملفتة بسبب انو جواك نضيف ونقية وبتدخلي القلب !، بلعت ريقي وقولت يا رب مالو دا تأثير السجن!!، بقيت اعاين فيه وهو يعاين فيني تاني شال يدي وباسها وقال لي انتي الماسه زي ما قالت امي بحق وحقيقة يا عزة!، نطتت فيهو عيوني بقى يضحك وقام وقال لي تأني مره ردي على مكالمتي!، قولت بسم الله الرحمن الرحمن يلا اختفى دة ما مروان اي ما مروان ، ضحك ضحك وقرب وقال لي دة مروان بس مروان الحاير بيهو الدليل والما قادر يحدد هدفو شنو بسببك،قومت وقولت ليهو ما فهمت! وضح اكتر!، قال لي لمن افهم نفسي اول بوضح ليك تمام!!!، قولت ليهو ونفسك دي بتفهما كيف إن شاء الله؟؟!، قرب وحضني وقال لي بقربك!!!،بعدت منو وقولت ليهو لو سمحت ما تقرب علي! والمرة الفاتت نفس الطريقة!، قال لي وانتي ناسيه يوم قربتي مني...، مسكت خشمو وقولت ليهو هس اسكت انا كنت ما بي واعي، بس انت اسي بوعيييك!، قال لي انتي مرتي ومن حقي أقرب منك، قام وهو بصفر، قولت في نفسي دة جنا رسمي لازم احترس منو اخير يضربني مما يقرب مني.
_____________________________
بلسان مروان
البيت بوجود عزة بقى فيهو روح! ابوي بهنا ينادى عزة بتي اعملي لي جبنة اصلو جبنتك ليها طعم خاص وبتذكرني بايامي زمان ،وامي بهناك يا عزة تعالى ضوقيها وشوفيها ناقصة ملح ولا لاا وتوته يا عزة ألنقاب دة مالو ما بتعدل، كل البيييت يومي عزة عزة عزة وانا بالجد ما لاقي فرصة معاها!!، توته مرات بتجي وتقول لي انت كلك غلط والصاح الوحيد العملتو في حياتك عزة.
!لو واحدة تانيه كانت شالت منهم موقف بعد عرسوني ليها وهم عارفين انا شنو بس عاملتهم بحنيييه وطيبة وحتى بعد ابوي رفض يساعدها ما اساءت ليهو ولا قلت ادبها،وانا بفكر جاتني رساله من ريان مكتوب فيها اتزوجتني اتزوجتني ما اتزوجتني بكلم ابوك عن علاقتنا وبوريهو اي حاجة اعرف، جدعت التلفون وقولت في نفسي واحدة مجنونة بس التتجرأ وتمشي ليهو عشان اوريها،اعرس ليها شنو ؟؟؟!، هي ما مصدقة نفسها زولة باعت نفسها لي اضمنها كيييف ؟؟!، ولا كمان ما محترمة أهلها.
عزة جات وقالت لي ماشه الجامعة ،طبعاً انا عشان اصالحها في موضوع الصور قررت أنو اسمح ليها تمشي الجامعة بدون نقاشات، قولت ليها عايزة توصيله، قالت لي لا بس احتمال اتأخر، قولت ليها لشنو ؟!، قالت لي عندنا سمنار، قولت ليها طيب مدت ليها قروش وقولت ليها امي ماف عشان تديك ،قالت لي انا ما حصل شلت من امك قروش، قولت ليها بتتصرفي من وين؟! ، قالت لي شغاله في مكتبه ومديرة صفحة الكترونيه في الفيس ، قومت وقولت ليها ما بسمح ليك تشتغلي، قالت لي انا ما حا استمع ليك!! الشغل ما عيب بعلم الاعتماد على النفس وانا شايفة انك زاتك تجرب تشتغل على الاقل ما تقعد تحبسني أربعة وعشرين ساعة، قولت ليها كل امورو جايطة شغلي ،قربت وقالت لي أسعى والامور بتصلح، ماف حاجة بتجيك وانت نايم، سمعت نصحتها ومشيت جمعت الناس كلهم واعتذرت عن تقصيري وطلبت انو يساعدوني نطلع المكتب من الأزمة.
_____________________________
بلسان عزة
مشيت الجامعة ومنها قررت امشي اشوف امي وانا ماشة بالركشة لمحت هديل مع زياد في موضع مخجل عديل ،جيت وسحبتها من يدها قدامو وقولت ليها لو سمعت تاني قابلتي الولد دة والله العظيم حا اكلم عليييك اخوك وبراك عارفة دة معانتو شنو ،بقت تتبكى وترجف وقالت لي حا يقتلني عليك الله استريني!!، الله يرضى عليك دنيا وآخرة، قولت ليها أحلفي انك ما بتلاقيهو تاني، حلفت.
بعد كذة يوم اتفجاءت باتصال مروان بي وطلبو لحضوري فجاءة لمن وصلت لقيت انو البيت مقلوب راس على عقب ومروان هايج شديد وماسك التلفون بتاع هديل وعرقو بارزات من الغضب جاء وضربني كف وقال لي تودي اختي لشقة عشان بتكرهيها وما طايقاها يا عديمة الشرف،مسسسك يدي وسحبني بدون حتى افهم الحاصل دفرني لمن وقعني في الأرض جو غرفتنا وقال لي لا أكل ولا شراب ماف ليك من الليله إلا بمزاجي وابقي مرة عتبي خطوة برة البيت عشان اخليك معاقة طول عمرك، مشى بعد مسافة جات امو فتحت وهي بتبكي قالت لي امشي من هنا يا بتي خلاص تعبتي دة ما تصلح كان يسمع منك ، انا واثقة انك ما عندك أمور زي دي، قولت ليها مهددني بأمي وعمو رفض يساعدني ما بقدر امشي لو طلعت من ICU بتموت ،قالت لي انا امك بتكفل بامرها ما تخافي وما بخليه يهددك بيها تاني ، انا زمان قولت بتغيير عشان انتي في حياتو، بس هو بقتلك بالطريقة دي.
امشي لحتة واقعدي كم يوم ما يعرفك فيها مدة أطلقوا منك ،حضنتها وبقيت ابكي مسافة وقولت ليها شكراً امي، بكت لمن قولت ليها كدة وشكلها عرفت انو يادوب اعتبرتها زي امي، ودتني بالباب الخلفي وقالت لي ودعتك الله،اتصلت بممو وكلمتها ............
اللهم صل على محمد عدد ما ذكره الذاكرين وغفل عن ذكره الغافلين..❤
______________________________
أُرِيدُ أَنْ أَخْتَفِي دُونَ أَنْ أَتْرُكَ تَفَاصِيلَ دَفْنٍ وَمَشَاعِرَ فِرَاقٍ وَرَائِي، أَخْتَفِي وَكَأَنَّنِي لَمْ أَكُنْ يَوْمًا