رواية عيلة البتران الفصل العاشر10بقلم عبد الفتاح عبد العزيز
كنت فاكرة ان كدة خلاص اخد كام نقطة دم مقابل الخادم او الخدمة، وكنت لسه هقفل الكتاب لكن اتضح ان كل اللي فات دا كان المقدمة وطلبي أنا، لإن مجرد ما كنت هقفل الكتاب لقيت ظهر في نص السطر اللي تحته
المقابل
مبيت في عراء بفلاة ليلة بلا قمر، والرأس ناحية بولاريس والقدم ناحية سهيل، ومقدم القربى صفاء
خلصت قراية الجملة وانا مبرقة عينيا
بصيت لجدتي وقلت
ــ هي الحكاية ماكانتش تضحية بكريمة وخلاص، انتوا عملتوا ايه تاني
ردت بخوف
=ماعملناش أي حاجه، هو جدك اللي عمل انا ماعرفش أي حاجه ماعرفش غير حكاية كريمة وبس
صرخت فيها
ــ انتي عارفة كل حاجه وكنتي مشاركة في كل حاجة انا مش عيلة هتضحكي عليها انا بشوف الكدب والصدق في عينيكي زي ما بشوف الشمس
بصتلي بخوف وسكتت فكملت
ــ انا مش عارفه دلوقتي اعمل ايه ولا اهرب فين ولا اهرب على مين، حتى ابويا اخدتوه، وبدل ما اهرب ليه بقيت بدور عليه، انتوا مش عملتوا لعنة دا انتوا اللي لعنة
فضلت باصالي باستغراب وساكته فخدت نفس طويل وسألت
ــ طب وايه الكلام دا اللي مكتوب في الاخر
= عاوز صفاء تبات عريانة في الخلا، يعني فوق السطوح مثلا وراسها ناحية نجمة اسمها بولاريس ورجليها ناحية نجم اسمه سهيل
ــ طب وبعدين، وبعد كل دا ايه وبعد ما ننفذ طلباته
= هنوصل لاخر صفحة في الكتاب، وساعتها ممكن تقدري انتي تحلي اللعنة وزي ما استدعيناه زمان وماعرفناش نصرفه من وقتها تقدري انتي تصرفيه
ــ ودا ازاي؟
= في اخر صفحة في الكتاب هتطلبي فك الوصل وهيطلب في المقابل طلب وهننفذه فتتفك لعنته...
ــ طب وجدي ماصرفوش ليه
= عشان جدك لما استدعاه طلب حاجه كبيرة وهي الولد وقدم قصادها البنت، لكن جدك ماجاش عند اخر الكتاب وصرفه لا دا الحكاية حلت في عينيه، ماكانش ظهر أثر اللعنة في عيالي ولا في بيتنا ، قرا الكتاب مرات كتير وكل مدى كل ما طلبات الخادم السفلي ما كانت بتعلى لغاية ما حملت في أبوكي وولدته ومن بعد ما وصل بدأت تظهر اللعنة في بيتنا وعيالنا فقرر جدك يحل اللعنة عند اخر الكتاب لكن الاوان كان فات، لانه وقتها طلب دم الولد نفسه، طلب دم ابوكي نفسه، وجدك رفض، فطلب دم حد من دمه، يعني طلب دم حد من خلفة ابوكي وساعتها تتحل اللعنة ويرجع عيالي ويعيش ابوكي، وجدك وافق وكمل ال ١٧ سنة يخدم الخادم والخادم يخدمه لغاية ما جوّز أبوكي وانتي جيتي
ــ يعني انا اللي كان المفروض يتضحى بيا،انا النص التاني
شاورت براسها بمعنى الموافقة فكملت
= طيب وبابا ماتأثرش ليه زيكم
ــ عشان ابوكي منهم
عقدت حواجبي ورديت
ــ يعني ايه منهم
= يعني شاركوا فيه، بيعتبروه ابنهم ومنهم، آذاهم ليه محدود ، عشان كدة قدر يهرب من البيت الملعون دا
ــ وايه اللي رجعه للبيت وايه اللي خفاه، الفلوس؟
=لا
ــ أمال؟
=انتي
ــ انا
= ايوة انتي
ــ ازاي
=انتي الطلب اللي ماتنفذش، القطعة الناقصة، لا اللي اتقالت في وشه، لا اللي لو كانت اه كان هيرجع الأشباه لأرض الأسافل ويتحل الخادم، وفضل الخادم وراكي لكن ابوكي كان بيحميكي، أبوكي شواف طبيعي من غير عهود ولا كتب ولا اتفاقات، لكن لما بقيتي بنت وجالك الطمس الموضوع اتغير خالص، وبقا ابوكي كإنه في حرب في دفاعه عنك واخر ما غلب طلب يصارع الخادم حمحميم نفسه على روحك
ــ يصارعه ازاي
= ابوكي يعرف حاجات بالفطرة كدة انا ماعرفهاش ، بس اللي عرفته منه انه صراع أرواح في نفس المقبرة اللي استدعوه منها، وليلتها ابوكي جالي واخد الكتاب، وراح المقبرة، وهناك صارع حمحميم، ولو كان غلبه كان هيدفن الكتاب في مكانه ويرجع يظهر مكانه عضم كريمة، ولو اتغلب ابوكي فمش هيرجع ويرجع شبيهه لوحده، شبيهه اللي قعد كام يوم ومثل انه مات ودفنتوه انما ابوكي ماحدش يعرفله مكان
سكت لحظات بعدها بصيتلها ورديت
=وانتي جبتيني ليه, عشان تقدميني للخادم بايديكي
بصتلي بصة غريبة اول مره اشوفها منها، بصة خوف على غيظ على رغبة في الخلاص بعدها ردت
ــ جبتك عشان واحدة تموت والباقي يعيشوا
= وماقتلتينيش ليه
ــ ماكانش ينفع، طلبك ماعدش الموت، كان الموت زمان قبل ما تتمي السنتين لكن بعد ما تمتيهم بقا طلب وماتنفذش لغاية ما بقيتي صبية، وساعتها بقا طلبك انك تكوني بتاعته
ــ بتاعته ازاي
= دي ماعرفهاش لكن طلبك انك تقري الكتاب
ـــ والكتاب دا بيخلص في أد ايه
= لفتين قمر
ــ وف اخره هيطلب طلب لو نفذته هيتحل عننا ولا دي كذبة منك وكنتي بتنفذي طلبه وخلاص
=مش قلتي بتقري كذبي وصدقي، يبقا اكيد عارفه ان انا مش بكدب عليكي، هو طلبك للكتاب، واما يغلبك وتبقي بتاعته بطريقة انا مش عارفاها، او تغلبيه انتي وفي الحالتين خلاص كدة كدة هتتحل لعنة عيالي مع اخر صفحة في الكتاب
ــ بما فيهم بابا
شاورت براسها بمعني الموافقة فزغرتلها فرجعت شاورت بمعنى النفي وفي الاخر ردت
= والله ما اعرف بخصوص ابوكي، ما هو ابني زيهم بس هو اللي كان منشف راسه
منشف راسه عشان مايضحيش بيا صح
شاورت براسها فكملت
=بس انا عندي سؤال
ــ ايه هو
=لما انتي باب كل دا، اشمعنى انتي ماتلعنتيش
ــ عشان انا
= انتي ايه
ــ عشان انا امي جابتني كدة
شاورت براسي كدة وانا ببصلها بقرف ورجعت قلت
=طيب انا ماليش دعوة باللي هتعمليه في صفاء بنتك، وماليش دعوة ايه اللي ممكن يحصل لو جيت في يوم وماقدرتش انفذ او بطلت قراية لأي سبب من الاسباب، انا هقرى لغاية ما قدرتي تجيبني ووقت قدرتي مش هتجبني هقف وهقولك سلام
ضحكت بصوت وقالت
=كان من بدري، ماهو دخول الحمام مش زي خروجه
ابتسمت بغيظ جوايا ورديت
ــ هتشوفي
قمت ساعتها طلعت لصالة شقتها
كانوا عيالها التلاته لسه على وضعهم ع الكنبة
لقيتها راحت ناحية صفاء وأخدت ايدها لكن انا سيبتهم وطلعت شقتنا
كانت ماما قاعدة منتظراني
لكن انا ماحكيتش في اي حاجه
وهي نفسها زي ما تكون ماكانتش قادرة تسمع حاجه
دخلنا ننام سوى في أوضتي
لكن مافيش دقايق
وسمعت صوت هبد فوق سقف بيتنا
هبد جامد كإن في حد بيرزع فوق السطوح
بعدها سمعنا صوت صفاء بتصرخ
كانت بتصرخ كإن حبال صوتها هتتقطع
فضلت تصرخ لغاية لما جات لحظة مابقيتش قادرة استحمل
قمت منفوضة من سريري وطلعت جري للسطح
لكن أول ما وصلت جسمي كله اتسمر من الصدمة