رواية لقاء السحاب الفصل الرابع عشر14بقلم حياة محمد الجدوي
لقاء السحاب
حياة محمد الجدوى
الجزء ١٤
في اليوم التالي رن جرس الڤيلا رن متواصل وكأن إللى بره مصر يدخل بأى شكل ولأن الخدامين واخدين اجازه اليومين دول مفيش حد فتح الباب
لحد ما سمعت سميحه الصوت بعد فتره فلبست إسدال الصلاه والحجاب ونزلت بسرعه تفتح الباب وإتفاجات وهى شايفه ست في الخمسين من عمرها لابسه فستان ضيق وقصير وصابغه شعرها اصفر بتبص عليها باحتقار وقالت لها بسخرية: إنتى بقى تبقى العروسه الجديدة ؟
بصت لها من فوق لتحت وقالت :هو مال زوق عبد العزيز اتدحدر أوى كده
رفعت سميحه حاجب واحد وهى بتتأمل الست الغريبة إللى دخلت البيت بدون استئذان
الست : بتبصى لى كده ليه ولا مستغربه ليكى حق إنتى مش شايفه الفرق
سميحه بهدوء: لأ مابقتش استغرب من حاجه بس مش أعرف إنتى مين
الست: غريبه إزاى ما تعرفنيش ماسمعتيش عن سوسن أنا ابقى ضرتك ياعنيا
بصت لها سميحه بزهول وقالت: ضرتى إزاى ده عبد العزيز قال إنه مش متجوز
سوسن: أنا ابقى أم مراته ام إبنه ولا ماتعرفيش إنه كان متجوز قبلك
بصت لها سميحه وماردتش.
فإنتهزت سوسن الفرصه وقالت بشماته :أنا ابقى نمره ثلاثه إيه ماتعرفيش إنه كان متجوز قبلك تسعه وإنتى ماشاء الله نمره عشره
بصت لها سميحه بهدوء وقالت: لأ عارفه بس بيقولوا الناس مابتفتكرش غير الأول والأخير أما الباقي ده حشو في النص مالوش لازمه
سوسن بغيظ: لا والله
سميحه بدلع : وهى العشره وحشه حتى عشره دى خمستين في عين العدو ( وفردت كفوفها الاتنين في وش سوسن.
سوسن بغيظ : بتخمسى في وشى على إيه ده كلها شهرين هيزهق منك ويرميكى زى غيرك
(فإنفجرت سميحه بالضحك .)
سوسن بغيظ: إيه قلت حاجه تضحكك أوى كده
سميحه وهى لسه بتضحك: معلش والله أصلى إفتكرت فيلم الزوجه ال١٣ شويكار بتقول لشاديه إنتى رقم ١٣ هاهاهاهاها .
سوسن وهى على وشك الإنفجار: بكره اشوفك وإنتى بتعيطى لما يكلفك ويرميكى في الشارع
سميحه بروفان : إخص عليكى بقى بتفولى عليا يوم صباحيتى بدل ما تجيبى لى علبة شوكولاته ولا جاتوه شكلك بخيله
سوسن: إنتى إيه معندكيش دم مابتحسيش
نزل عبد العزيز على صوت سوسن فقال بدهشه: سوسن إيه إللى جابك
سوسن: ناموسيتك كحلى يا عاريس جيت اقول مبروك بس لما شفت العروسه رجعت في كلامى أصلى مستغربه زوقك بقى وحش اوي.
سميحه بسخريه: تصدق هى صح فعلا( وبصت على سوسن وكملت)زوقك كان وحش اوي شكل نظرك كان ضعيف بس الحمدلله إتحسن دلوقتي
عبد العزيز بغضب : أنا ما اسمحش لك تيجى تغلطى في مراتى يا سوسن
سوسن: شوف إنت إللى بدأت لما ...
قاطعتها سميحه: معلش ممكن نوفف وصلة الردح دى على ما أفهم بس الموضوع
(وجهت سؤالها لعبد العزيز):الهانم دى مين بالظبط
سوسن: قلت لك أنا ضرتك
عبد العزيز: والعيل الخرع إللى متجوزاه ده مش معتبراه راجل
سميحه بسخرية : لا لا لا يعنى جامعه بين زوجين دى جريمه أنا هبلغ الشرطه
سوسن: ماتمسك مراتك دى إللى هتودينا في داهيه
عبد العزيز بضيق: جايه ليه هنا يا سوسن وعايزه إيه
قعدت سوسن وحطت رجل على رجل وقالت: نتفاهم بس لوحدنا
نفخ عبد العزيز بضيق وقال لسميحه: ممكن تعملى لنا قهوه .
سميحه: بس إنت لسه مافطرتش
عبد العزيز: معلش على ما اشوف عايزه إيه بس
سميحه بتفهم: حاضر وإتجهت للمطبخ فقالت لها سوسن: قهوتى مظبوط أوعى تغلطى وتعمليها زياده ..
عبد العزيز بغضب: جايه ليه يا سوسن
سوسن: عايزه ارجع شقتى وترجع تدفع لى النفقه .
عبد العزيز: شقة مين يا أم شقه الشقه دى يجبها لك بسلامته والنفقه خلاص بح إنسى
سوسن: ليه مش كفايه أخدت منى الواد
عبد العزيز: على أساس فارق معاكى ده إنتى حتى ماسألتيش عنه
سوسن: مالكش دعوه بإبنى أنا وهو احرار ماتدخلش مابينا
( في نفس الوقت دخل عادل إللى اتفاجأ وقال: ماما بتعملى هنا إيه ؟
عبد العزيز:كويس إنك جيت شوف امك جايه ليه وعايزه إيه
سحبها عادل من إيدها وقال : تعالى يا ماما نتكلم
سوسن بغضب: سيبنى يا عادل لازم اتفاهم مع ابوك لازم يرجع يدينى فلوس أنا مش عارفه اعيش
عادل بضيق: يا ماما تعالى معايا وأنا هبعت لك من مرتبى
سوسن بغضب: مرتب إيه بلا واكسه هى دى فلوس الكام ملطوش إللى بتاخدوا مش مكفينك هيكفونى أنا لأ لازم يفوق لنفسه ويعرف إنك إبنه مش موظف عنده لازم يصرف عليك غصب عنه لازم يصرف عليك
اخدها عادل وخرج وصوتها لسه طالع فوقفت
سميحه جنب عبد العزيز وقالت: مشيت
تتنهد عبد العزيز وقال: أيوه اخدها عادل
هزت سميحه رأسها بتفهم
عبد العزيز: أنا آسف ماكنتش حابب أن ده يحصل في أول يوم لنا
هزت سميحه رأسها بتفهم وقالت: ولا يهمك
عبد العزيز: بجد هى فين القهوه
سميحه: قهوة إيه بس إحنا هنفطر الأول .
&&&&&&&&&&&&&&&&&&&
في المساء زارت عائلة كريم كلها عبد العزيز عشان يباركوا له وأول ما نزلت سميحه قامت ليليان تزغرط هى وامها
سميحه بضحك: بس بقى حسستونى إنى عروسه ماتكسفونيش بقى
ليليان: وأحلى عروسه يا ابله تعرفى أنا فرحانه اوي أوى عشان هتنضمى لشلتنا .
سميحه: شلتكوا
ناهد: بس يابت إهمدى هى قصدها هنشوف بعض كل اسبوع ونعزمك وتعزمينا زى العاده يعنى
سميحه: أه فهمت عزومه كل خميس دى
ناهد: هتحبيها أوى تصدقى كنت الأول بتضايق منها بس مع الوقت بقيت بحبها وخصوصا لمتنا مع بعض.
سميحه: ربنا يديم المعروف
قعد كريم وقال: شوفى يا ام سامح إنتى دلوقتي بقيتى مرات صاحبى واخويا ولكى عليا حق فلو احتاجتى أى حاجه أنا تحت أمرك ولو عبد العزيز زعلك في حاجه أنا إللى هقف له
عبد العزيز: إنت بتقولها عليا من دلوقتي وبعدين ماتخافش عليها دى بتاخد حقها تالت ومتلت .
كريم: برضوا لازم تعرف إنى معاها ومش هسيبها .
عبد العزيز لناهد: ماتحوشى جوزك بعيد عنا
ضحكت ناهد وقالت وأنا مالى أنا مابدخلش ماببنكم .
قامت سميحه وبعد شويه وقالت: وقالت: يالا يا جماعه اتفضلوا السفره جاهزه
ناهد : وليه مغلبه نفسك
سميحه: ولا علبه ولا حاجه أنا معملتش حاجه ده عبد العزيز وصى على الأكل ده من أكبر مطعم في البلد .وحلف عليا ما ادخلش المطبخ دلوقتي.اتفضلوا .
و بعد الأكل قام كريم وقاله: جاهز ولا بتقول عريس .
عبد العزيز: مين قالك ده أنا هنسفك تعال تعال
سميحه: على فين
هدير بضحك : دول هيقعدوا يلعبوا طاوله وسمعوا اغنيه لأم كلثوم وهينسجموا معاها كأنهم بيسمعوها لأول مره
عبد العزيز: ماتختارى لنا الاغنيه اللى هنسمعها يا سميحه
سميحه: بس كده من عنيا
وراحت عند البومات الاغانى واختارت اغنيه: (الحب كده)
قعدت ليليان جنب عمها وهو بيلعب وقالت: عمو حبيبى وقلبى وروحى
عبد العزيز: جيبي من الأخر يا لى لى
ليليان: بحبك وإنت فاهمنى بص يا حبيبي أنا عايزة منك طلبين إتنين عبد العزيز: قولى
ليليان: شوف يا حبيبي بما إن أنا لسه مخلصه ثانويه عامه وبقيت كبيرة فأنا عايزه اشتغل معاك في شركتك.
كريم: نعم
ليليان: فترة الاجازه على ما أعرف هدخل جامعة إيه وبعدين يابابا أنا عايزه اكتسب خبرة واعرف الدنيا ماشيه إزاى
عبد العزيز: تصدق البت دى بتتكلم صح أنا أحب البت الناصحه إللى بتفهم في كل حاجه وإللى عايزه تتعلم أنا موافق وهشغلك معايا من بكره
ليليان بفرحه: حبيبى ياعمى طيب اطلب بقى طلبى التانى
عبد العزيز: أطلبى بس ملتطوليش عشان أنا صبرى بدأ ينفذ
ليليان: هو طلب صغيور خالص أنا عايزة أخد اجازه اسبوع من الشغل
ضحك كريم وقال: شوفت اهى بوظت وجهة نظرك عنها وعايزه تبدأ شغلها بالأجازه
عبد العزيز: شكلى هرفدك قبل ما اشغلك
ليليان: أعرف بس أنا عايزة الأجازه في إيه
كريم: قولى يا فالحه
ليليان: إنت ناسى يا عمو إنك وعدتنى نروح مزرعه الفيوم في الأجازه
عبد العزيز: تصدقى يابت يا ليليان إنت أفكارك حلوه وخصوصا إننا في موسم صيد البط
ناهد: خلاص اتفقنا بس نخليها وقت تانى
عبد العزيز: ليه بس يا أم محمد
ناهد: يعنى عشان إنت و سميحه تروحوا شهر العسل وبعدها نبقى نروح
عبد العزيز: لأإحنا هنقعدويومين بس أنا كده كده مش فاضي عشان مشروع الكوبرى اللى هنقوم به وبعد ما يخلص ابقى أخد سميحه ونقعد براحتنا . ولا إنتى هتزعلى يا سميحه
سميحه بابتسامه: بالعكس ده أنا فرحانه جدا لأن وحشنى أوى جو العيله واللمه .
عبد العزيز: يبقى خلاص نروح يوم الخميس ونقعد يومين وبعدها مال عليها عبد العزيز وقال بهمس : حتى وهما معانا هتبقى لوحدنا برضوا
فإبتسمت سميحه بخجل .
قرب حمزه من عادل وقاله : بقولك ايه سيبك من العواجيز دول وتعال نلعب
عادل: مابعرفش العب طاوله
حمزه : طاوله إيه بس مامعكش شريط ڤيڤا ٢٠٢٥.
عادل: عندى
حمزه: حلو أوى تعال نلعب
ليليان: إحنا هنلعب دورى وأنا هلعب بإيطاليا.
هدير: وأنا كمان هلعب بفرنسا
محمد: يعنى أن هقعد اعمل ايه هلعب معاكوا
ليليان: بشرط الفريق الفايز هيحكم على الفرق الاخيره حكم
زينب: لا هنلعب كده مش لازم نفترق علينا
ليليان: يا جبانه عشان عارفه إنك هتخسرى
عادل: ماتخافيش أنا هغلب ومش هحكم عليك
ليليان: اتكلم على قدك ده أنا لو بلعب بأسمنت اسيوط وإنت بالبرازيل هغلبك برضوا
عادل: تغلبى مين بس اتكلمى على قدك
ليليان: طب خلف منى عشان أنا هدمرك
عادل بتحدى: هنشوف يالا قسموا الفرق وإجهزى عشان إنتى مش قد الحكم إللى هحكموا عليكى
&&&-&&&&&&&&&&&&
قربت إيناس منهم وقالت : الوقت إتأخر يا عمو وأنا هروح
عبد العزيز: لسه بدرى اقعدى كمان شويه
إيناس: لا يا عمو عشان العيال هتنام منى
عبد العزيز: طيب هستناكى إنتى وعرفان يوم الخميس
إيناس: معلش يا عمو مش هينفع نيجى
عبد العزيز: ليه يا إيناس هو إنتى لسه زعلانه
إيناس: لا مش زعلانه بس أنا عندى شغل في المعرض ومش هينفع أسيبوا
إتنهد كريم وقال : خلاص يا حبيبتي روحى .
وبعد ما مشيت قال عبد العزيز: مالها إيناس
كريم: لسه طارده عرفان من البيت.البت دى واجهه قلبى
عبد العزيز: سيبها يا كريم تعمل إللى عايزاه
كريم: اخاف تخرب بيتها
عبد العزيز: هيكون ده قرارها وبإختيارها بالرغم إنى حاسس إنها بتبنيه من أول وجديد
كريم: دى طارده جوزها من البيت وقاعده له في المعرض بتحاسبه على كل جنيه داخل وخارج
ضحك عبد العزيز وقال: أحسن خليها تعلمه الأدب الواد عرفان ده إبن حلال بس محتاج قرصة ودن عشان يتعدل
سكت الكل من صوت ليليان العالى وهى بتصريح وبتقول ( جووووووول)