رواية مسار اجباري الفصل الثاني والعشرون22بقلم منه محمد

حكيم رايح جاي في الغرفه بيفكر في كلام علا عن اطياف

ثريا دخلت وبصتله بتعجب : هو انت لسه منمتش

حكيم : ليه مقلتليش عن الشاب ده,  امور كتير بتحصل في البيت ,ومجاش ع بالك تبلغيني

ثريا: صدقني مكنتش اعرف ان علا بتحب امجد الا قريب , وانه كان معاها في نفس الكليه ولما عرفت كان خطب منال ,واحترت المفروض اعمل ايه, غير اني ابعدها عنه

حكيم : مهما كان الي حصل,  لازم اعرف منك ,انا هدخل في متاعب كتير

ثريا : تمام متقلقش علي علا هفهمها انه مش هينفع تتجوز امجد ,وهعرفها ان دي وجهه نظرك وهي هتفهم

حكيم: ليه كل مره تكون بنتي هي الضحيه

ثريا : مش فاهمه عايز تقول ايه

حكيم : مش هتفهمي

ثريا : لو عايزني اتكلم مع ام امجد واشوفه جابلها سيره ع علا او قالها عليها حاجه

حكيم  بتحذير صارم : متتصليش بحد فاهمه

ثريا : حاضر

...................قصص منه محمد كاتب...........

في الارض

عزيز : بلغت كل الغفر يخلوا كل المخازن

حكيم: وبالمره شوف حكايه المحصول لسه حسابه مجاش تابع السبب

عزيز :اطمن انا بنفسي هتابع وابلغلك اول باول

امير قرب وقال بهدوء:  السلامو عليكم

عزيز :وعليكم السلام

امير :عمي حكيم بكره فيه قاعده عرفي نحل مشكله بين اتنين متخانقين في البلد , هتروح معايا

حكيم رفض يبصله  وبص لعزيز وقال: عزيز شوف المشكله دي

امير : عمي عارف انك مش عايز تشوفني ومتعصب مني

حكيم: العصبيه دي للناس الضعيفه , وحكيم مش ضعيف

امير : عمري ما اعتبرتك ضعيف ابدا

 حكيم بصله بشموخ وقال: النسر بيخاف منه الضفدع الصغير ,  ولما بيتهزم بسيط قدامه  بيفرح اوي وفي حاله السعاده بينسي الشخص الي علمه وعطاله كل الحيل عشان يلعبها , وسابه يفوز عليه ,  بس  الضفدع في لحظه غفله  منه استغل ثقه الشخص الي علمه اصول اللعبه  وحاول يفوز عليه  ويفضل يلعبها لحد ما قلب التربيزه عليه

امير: انا عمري ما فكرت اهزمك , وعلاقتي معاك علاقه احترام وحب ,مش عشان يكون فيها هزيمه

حكيم بصله بغضب هادر وغادر من المكان بخطوات متعصبه

عزيز: امير متزعلش اخويا دلوقت زعلان منك ,مع الوقت زعله هيقل ,والامور هترجع لطبيعتها , لو كنت موجود مكنتش بنتي هتقف في وشه , ومكنتش انت هتتحمل غضبه منك

امير :عمي اطياف مش مسؤليتك دي مسؤليتي

عزيز  بسعاده :وانا مبسوط لانك قايم بشكل كويس بكل مسؤلياتك, ولعلمك نا عارف ان اطياف مكنتش هتلاقي شريك لحياتها افضل منك

............قصص منه محمد كاتب............

كان سايق عربيته ومره واحده اتحاصر واتاخد ولقاه نفسه في حته مقطوعه وناس حواليه 

امجد :  انتم مين , وليه خطفني انا بتكلم معاكم شكلكم اخدتوني بالغلط , انا مليش اي عداوه مع حد انتم سامعين الي بقوله

حكيم هنا ظهر ووراه رجالته وامجد قام  من مكانه وبصله بذهول و عنصر المفاجأة محفورة على ملامحه

حكيم  بامر: ليه واقف يا ولد اقعد

امجد بذهول: يعني دول تبعك , يعني انت الي جبتني هنا

حكيم:  ايوه فيه حاجه مهمه عايز اقولهالك

امجد اتكلم بعصبية:  ودي طريقه تتكلم بيها مع حد,  لو عايز تتكلم معايا تقولي وانا كنت بنفسي هجيلك,  لكن تخطفني كدا ليه

حكيم بنفس النرفزه:  دي طريقتي , طريقه حكيم عز الدين ودلوقت اسمع للي هسالهولك  وترد  وتجاوبني

امجد  عاقد حاجب ومكشر جدا:  عايز تسالني عن ايه

حكيم زقه في صدره  جامد: اقعد الاول , وقولي انت كنت مع علا بنتي في الكليه ,وكنتم اصدقاء

امجد: ايوه انا وعلا كنا في نفس الكليه وكنا اصدقاء كويسين جدا مع بعض

حكيم : وحبيتها وكنت عايز تتجوزها

امجد : ده كان قبل ما اخطب منال , اه كان عندي رغبه اتجوز علا بس هي كانت خايفه منك 

حكيم بفخر:  علا بنتي وعرفاني كويس وبتحترمني كتير, بس دلوقت جه الوقت اقوم بواجبي كاب,  الاوقات الي فاتت كانت مختلفه,  لو كانت علا جابت لي سيره عنك انك طالب ايدها كنت حطتها في ايدك وقطعتها ورميتها للكلاب , ودلوقت بسالك بنفسي انت لسه عايز تتجوزها

................قصص منه محمد كاتب...............

اطياف بتعدل هيئتها قدام المرايا: مكنتش عايز اخرج , بس امير صمم يعزمني

منال : ياستي ما تخرجي وانبسطي  , اقعدي معاه في جو رومانسي ولطيف

اطياف برفعه حاجب:  انتي طلعتي عارفه الجو والرومانسيه , انتي متاكده انك مروحتيش مع امجد 

منال ضحكت: لاء روحت بس هي مره , ووعدني هياخدني مره سينما , ومره مطعم , ومره الملاهي نتمرجح وناكل ايس كريم 

اطياف: هتعملوا كل ده في يوم واحد

منال: لاء طبعا تعرفي  انا كاتبه  انا هو رحله لمده اسبوع ,كل يوم  ياخدني في مكان شكل 

اطياف :واو اسبوع كامل مخططاله ويوم الجمعه

منال: لا هدي لـ امجد راحه فيه ,يعني لازم اراعي ظروفه

اطياف :ياسلام من دلوقت خايفه ع جيبه, انا مشفقه ع الراجل الغلبان

منال بنرفزه مضحكه:  ليه مشفقه عليه هو , اشفقي ع اختك

اسمهان دخلت بكاس عصير وهي مبتسمه وقالت: ايه الي حصل يا بنات ليه بتتخانقوا

منال : ماما اسمهان ازاي عرفتي اني عايزه ليمون

اطياف بسخريه  :هي عارفه انك تشربي البحر ع طول عطشانه

منال  مدت البوز شبرين: شايف الابله مسكاني تريقه من الصبح

اسمهان  بضحكه: حقها الحب يعمل اكتر من كده 

اطياف  اخدت الكاس وشربته كله ع بوء واحد وقالت لمنال :الباقي ليكي

منال  كرمشت وشها :وليه جايه ع نفسك

اسمهان :يله يا طفطف انزلي لجوزك

اطياف: طمنوني الاول شكلي طالع ازاي

اسمهان :ماشا الله حته من القمر

منال: اخر عسل

اطياف وهي بتجري ناحيه الباب  بسعاده كبيره :يله سلام يا حلوين

منال :ربنا يسعدها

اسمهان: ان شاء الله وعقبال لما ربنا يسعدك

منال: عايزه عصير

اسمهان:  عيوني حالا انزل اعملهولك

..........قصص منه محمد كاتب............

امير مسك ايدها بين ايديه وماشي مبسوط بيها وبصلها وابتسم ابتسامة هادية وهي ابتسمت له

ثريا :انتم خارجين ياولاد

امير حمحم :ايوه هاخد اطياف ونتعشا بره

ثريا بصتلها وقالت باعجاب : ماشاء الله طالعه جميله اوي يا اطياف , ربنا يحفظك من العين الوحشه

اطياف ابتسمت وقالت برقه :طول ما بتدعلنا يامراه عمي مفيش حاجه وحشه ممكن تحصلي

امير :يله بينا يا  اطياف

ثريا :امير

امير لفلها : نعم

ثريا :عايزك شويه

امير :اطياف استنيني في العربيه شويه وهحصلك

ثريا: امير انا فرحانه اوي وانا شيفاك مبسوط , انت تستاهل كل حاجه حلوه , خلقت مكان بحبك في قلوب الناس

امير: مراه عمي نامي , ومتسنناش هنرجع متأخر ( باس ايدها)

ثريا  طبطت عليه: ربنا يسعدك يابني

علا : ماما مش شايفه ان اطياف اخدت حريتها ع الاخير

ثريا: عايزه تقولي ايه يا علا

علا: اصل انا لما بقولك خارجه تفضلي تحققي سين وجيم معايا والمفرض اكون هنا قبل المغرب , بس هي ترجع نص الليل عادي  ,ووافقتي تروح

ثريا بحده : عشان هي خارجه مع جوزها , ترجع بدري متأخر هي مسؤله منه مش مسؤله مني , ولما تتجوزي ابقي اخرجي مع جوزك , وارجعي وقت ما تحبي , لا هيبقي ليا اعتراض ولا ليا سلطه ارفض

علا وهي قايمه بستياء : وده مش هيحصل ابدا , وانا عايشه في السجن ده

ثريا  هزت دماغها بضيق وقالت: وبعدين مع البت دي واخرتها

..................قصص منه محمد كاتب....................

علي الموبيل

علا: امجد مش هتاخد الفر صه دي مره تانيه,  بابا بنفسه واقف معانا , لازم تحسم امرنا بسرعه

امجد: انا مش قادر احسم اي حاجه,عمري ما حسيت بالانزعاج زي دلوقت, ليه عملتي كل ده

علا:اظن قلت لك قبل كده انا بحبك , وانت كمان بتحبني

امجد: انا هتجنن من الي انا فيه

علا: امجد انت ليه موتر نفسك , الوضع مش زي الاول , بابا معانا ولو خفت قبل كده عشان مكنش حد معايا ارجوك وافق وهنبقي سوي ,حاول تنهي الامر انت بس محتاج شويه شجاعه واعرف اي حاجه هتحصل هتبقي في صالحنا 

اطياف كانت جايه ووقفت وسمعت اخر المكالمه ولفت وقفت قدامها مباشره وربعت ايدها ع صدرها

علا اتوترت لما شافتها وقالت له: اقفل وهبقي اتصل بيك مره تانيه 

اطياف  فضلت واقفه مكانها تتفحص تعابير وشها بنظراتها الخبيرة 

علا: سألته :ليه جايه هنا

اطياف: مراه عمي طلبت مني اندهلك , عشان كدا جيت هنا

عللا: طيب  روحي وانا جايه

اطياف: علا كنتي بتكلمي مع مين,  اصلي سمعت اخر جزء  من كلامك , فيه حاجه, او انتي واقعه في مشكله

علا: اه فيه , ان انا قرفت  منك , انتي واختك

اطياف  بشك: حاسه انك بتحبي واحد صح كلامي ,وحاسه كمان انه مش مستعد للعلاقه,  لو حابه اتكلمي معايا , انتي عندي زي اختي منال نفس الغلاوه , وهبقي مبسوطه لو ساعدتك

علا: شكرا , وانا مش محتاجه اي مساعده منك 

اطياف لنفسها: بت خبيثه , ووراها سر لازم اعرفه

اما علا وهي داخله قابلته قدامها ووقفت تكلمه في زعل ابوها

امير: مفيش حاجه عشان تفهميها انا مش زعلان من عمي,  هو الي زعلان مني , وحاولت كذا مره اصالحه وهو رافض 

علا: حقه انت وقفت في وشه يا امير , ودي مش حاجه بسيطه امير انت عارف ومتأكد ان بابا بيحبك جدا, واهتم بيك وفضلك عليا رغم بنته الوحيده

امير: عارف كل ده امتي انكرته

علا: هو دلوقت محتاجلك , وانت الي زعلته عشان كدا لازم تراضيه وتقعنه بأي طريقه

امير: وهو بالشكل ده

علا: ايوه 

امير مشي خطوه وبعدها رجعلها: علا

علا بصتله: نعم

امير : متشكر 

...............................

امير خبط  ع الباب وقاله: ممكن ادخل

حكيم بغضب: ليه جاي هنا

امير بهدوء: عارف انك قلقان من الانتخابات

حكيم: هو انت جاي تتعاطف معايا , ولا اتعاطف معاك, ولا تكون جاي تشوفني مهزوم , مفكر ايه عمك كبر وبقي ضعيف , ومش هيقدر يعمل حاجه من غيرك

امير نخ قعد ع ركبته قدامه: انا الي ضعيف من غيرك,  عمي انا مليش قيمه ولا كيان من غيرك وانت عارف كده , الشبل في الغابه الي ملوش اب الحيوانات بتفترسه , عمي ارجوك اديني فرصه

حكيم: لحد امتي هتفضل قاعدراكع كده 

امير بنظره كلها توسل: لحد ما تسامحني وتغفرلي , هفضل قاعد تحت رجليك

حكيم: تمام سامحتك قوم بحس بالتوتر وانا شايفك قاعد كده

امير قام وقعد قدامه ع الكرسي وقاله: حتي يا عمي لو مش مهتم بالانتخابات  انا مهتم وسيب لي كل ده ,واسمحلي اشوف الوضع ماشي ازاي

حكيم: جميل فكرتك نسيت موضوع الانتخابات, ومبقاش يهمك

امير: ازاي يعني مهتمش,  ابدأ الحمله الانتخابيه من جديد , وانا هباشرها بنفسي

حكيم: بس اسمع خليك صارم مش طري , معرفش مين هيضربني في دهري , وبحلول المساء قطع كل لافتات وبوسترات حزب المعارضه نزلهم كلهم

امير: هيحصل ده بالظبط, وبالنسبه لصحتك راي خليك في البيت يوم ولا اسبوع استريح لحد ما تتحسن , متخرجش خالص الا بعد ما تتعافي نهائي , وانا ههتم بالباقي يله انا ماشي 

..........قصص منه محمد كاتب...............

لبست فستان مغري بألوان مزهزه فاقعه تخطف العين وفردت شعرها وحطت ميكب اوفر مبهرج جدا واحمر شفايف فاقع 

ثريا دخلت: ايه ده ياعلا

علا: ماما خوفتيني وحسيت اني بسرق

ثريا: الي جواه حرامي بيخاف , وبعدين ايه الفستان الي لبساه رايحه فين بالمنظر ده

علا: ربما يوم يتحقق حلم من احلامي , ويجي الامير ع حصانه

ثريا: حتي الوقاحه ليها حدود , قوليلي ليه ابوكي عازم امجد

علا رفعت كتافها : معرفش ليه عازمه ,هو مقليش حاجه

ثريا: يابت قولي الحقيقه لو حصل غلط اليوم الدنيا هتطربق علينا

علا ببرود: انتي بتشكي فيا من غير سبب , معرفش اوقات بحس انك مش امي , وبابا الي واقف معايا وبيرجعلي حقي , وبحمد ربنا ان فيه حد واقف معايا في البيت هنا

ثريا: لو معتبراني واحده غريبه مفيش داعي اتكلم , بس خففي الروح الي ع شفايفك لانه فاقع اوي

...........قصص منه محمد كاتب...........

في السرايا تحديدا ع السفره الكل موجود حتي امجد ووالدته

حكيم: انبسط من وجودك هنا لما اتصلت بيك , وقبلت عزومتي وحسيت بالسعاده

امجد: كان لازم اجي , حضرتك بنفسك اتصلت بيا و, انا مبسوط اننا كلنا متجمعين هنا

حكيم: انت بالنسبه لي شاب كويس جدا,  تعال ع طول واعتبر البيت بيتك , ولا اقولك سيب وظيفتك وتعال عيش هنا وساعدني في الشغل , امير ماسك كل الشغل ,وانت تيجي معاه ايدك بأيده

امجد: انا مبسوط في شغلي ومعنديش استعداد اسيبه

حكيم: يابني دي وظيفه بسيطه مرتبها ضئيل , لايمكن تعرف تفتح بيت وتكون اسره بالطريقه دي

امير: اه يا امجد ممكن تيجي تساعدني

مديحه: سيبوه هو مبسوط , وكل واحد بيشتغل في المكان الي يحبه , ومش مهم الفلوس اهم حاجه راحه البال , الفلوس امور فانيه

اطياف لماما امجد: طنط ايه رآيك الاكل عجبك ,اصل منال الي عملاه

اسمهان: اه منال واصرت تعمله كله بأيدها , واطياف ساعدتها بس , وانا كان نفسي بس البنات رفضوا احط ايدي

ام امجد مبتسمه:يعني يبقي البيت بيت ابوها وبناتنا يطردونا

اسمهان بضحكه : شوفتي الولاد وعمايلهم بس ع قلبنا زي العسل الحلو

ام امجد: ربنا يسعد كل الولايه

مديحه: امين

..............قصص منه محمد كاتب.............

امجد  قام يدخل الحمام وهو طالع لقاه الي بتخطفه وبتجري بيه في الجنينه

امجد: ايه الي بتعمليه ده , عايزه ايه ياعلا

علا وقفت قدامه: مش هسالك عن شعورك , لاني شايفه كل حاجه في نظره عنيك , الي عجزت شفايفك تقوله

امجد:  اه وانتي لبستي الالوان الملعله دي عن عمد , عشان مقدرش ارفع عيني عنك

علا: مش ده الي عوزته صدقني , بس انا قابلت الفارس الي كنت بحلم بيه واليوم ده مش ممكن يتنسي بالنسبه ليا ولبابا وهو مستني ردك وانا ,وصدقني كنت مرعوبه  خايفه لحد يخطفك مني وياخدك بعيد,  بس دلوقت قلبي مطمن ان مفيش غيري في قلبك

امجد: اسمعي

علا قطعته بسرعه وقالت:  انا داخله جوه دلوقت ومتقولش اي حاجه لاني عرفت وفهمت كل حاجه ,بس لو كنت هتقول حاجه متزعلنيش اتفضل قول زي مثلا لسه بتحبني , زي انك موافق ع ارتباطنا

امجد لسه هيرد تلفونه رن وعلا جريت من قدامه لما شافت اطياف رايحه عليهم

امجد حط الموبيل ع ودنه: مين,  اه قول , اه عندك محوط في الدرج , ايوه الشمال

اطياف: امجد

امجد: هتكلم معاك بعد شويه (بصلها) نعم يا اطياف

اطياف بصتله نظره شك وقالت بهدوء: والدتك عايزك

امجد ابتسملها: شكرا هعمل تلفون بسرعه وهدخلها

.............قصص منه محمد كاتب..............

رايح جاي في الجنينه وماسك الموبيل

امه: امجد هو انت بتفكر في علا

امجد اتوتر: لاْ يا ماما ليه افكر فيها

امه: الاحسن انك متفكرش فيها , وده عشان راحتنا كلنا , اظن عارف انا عطيت كلمه للامها وابوها وحددنا معاد فرحك انت ومنال , وهي الي هتبقي مراه ابني , بنت اخلاق وهاديه ومحترمه , وهي معجبتنيش لوحدي , انت كمان اعجبت بيها, اما البنات الي زي علا الي بتلعب ع كل الاوقات افتكر لما سابتك  في اصعب وقت لما كنت  فقير وظروفك الماديه مش احسن حاجه , هي ممكن تكون صاحبه لكن صعب تبقي زوجه تصون شرفك واسمك,  وانت اكتر واحد عارف هتخلي حياتك عامله ازاي ,  اما منال هتوهب لحياتك الاستقرار والسعاده  ويابني الحياه مش بتدي للانسان كل حاجه

امجد: يا ماما مش بفكر اعمل حاجه زي دي

امه: اسمع يابني المركب لما بتغرق بام وابنها الام بتعافر بكل قوتها عشان ننقذ ضناها من الغرق,  و  افتكر اني امك الي عايزلك دايما الخير , ودلوقت الي هتاخده وتعمل بيه هو  قراري بس الي هيتوافق عليه ويمشي

امجد من دون ادني تفكير دخل غير هدومه وركب عربيته وطار ع البلد لحكيم يحسم الامر

حكيم بعد ما سمع كلامه قال بمكر: يابني متوترش ,انا هتعامل مع كل الامور حتي عزيز لايملك الشجاعه يعمل اي حاجه,  ميقدرش حتي يقف قدامي,  ومجبور ينفذ اوامري

امجد وقف وقاله : الناس معاها حق الحب اعمي , مش بيخلينا نشوف اي حاجه, وجايز ده السبب الي مش بيخلينا نشوف العواصف وهي جايه علينا ,وهتلكنا هلك

حكيم: بنتي علا حبيتك ولو كانت الظروف مختلفه عمري ما كنت عطتهالك ابدا , ومكنتش هوافق ع جوازك منها بس دلوقت انا مجبور

امجد : وانا مش هنكر اني فعلا في يوم حبيتها , بس اسف مش هقدر حاليا اتجوزها

حكيم بشخط:  انت بتقول ايه يا ولد

امجد :كل الي قولته انا مدركه جدا , ده عشانك , وعشاني ,وعشان بنتك,  ده الافضل انا لايمكن اقهر قلب امي عشان بنتك وامي عايزه منال وانا مش هقدر اغضبها لمجرد رغبتي  ده الي جيت عشان ابلغهولك

حكيم: استني عندك مفكرني برخص بنتي , في الاول اتظاهرت انك واقع في حبها ودلوقت عايز تلعب وتتجوز بنت اخويا

امجد: مفيش حاجه من دي انت بتتكلم بشكل غلط

حكيم: انا عارف كويس الاشكال الي زيك , نفسك تجمع ثروه بأيدك , عايز تبقي غني بين يوم وليله

امجد صرخ في وشه بغضب جحيمي: انا مش هسمحلك تتهمني انا راضي بالي عندي ,وفخور بحياتي , وبحمد ربنا علي عشتي المتواضعه , ولو عايز تديني بنت اخوك فاضيه , انا معنديش مانع هاخدها بالهدمه الي عليها

حكيم: هتندم كتير انك اتكلمت معايا بالاسلوب ده , وانك رفضت بنتي ,وهديلك مثل شوفت وضع مديحه الي كانت قوتها تهد جبال  

امجد صراخ: بس لحد هنا وكفايه, انا معنديش استعداد اسمع كلمه كمان منك انت اكبر مني للسبب ده بحترمك , والاحسن لينا يفضل الاحترام متبادل بينا

حكيم تابعه وهو ماشي وقال بغضب وانتقام : وحياه امك لقهرها عليك 

...........قصص منه محمد كاتب..........

امير: مراه عمي حكيم عمي جه

ثريا بقلق: ايوه بس شكله ميطمنش متعصب ع اخره

امير: يبقي اكيد عرف

ثريا: عرف ايه

امير: لا ياحبيتي اقصد موضوع الانتخابات اكيد متوتر هشوفه

ثريا: ماشي يا بني ماشي

امير قرب عليه: عمي فيه اخبار مش ولابد واكيد حضرتك عرفت!

حكيم: لو فيه اخبار وحشه قولها

امير: المعارضين كثفوا حملاتهم الانتخابيه وشايف فرصه فوزنا ضعيفه, واحنا بدأنا حملتنا وكل ما بنحاول نقنع الناس يدونا اصواتهم بيرفضوا حتي يسمعولنا ,  والمعارضين بيقفلوا علينا كل الطرق لانهم بيوعده الناس عشان كدا احنا محتاجين نحل بالفعل مشاكلهم عشان ناخد اصواتهم بالرضا

حكيم: وانت لما توعد  هتاخد اصواتهم

امير فرك جبينه بتوتر: معرفش بس انا بحاول اعمل حاجه , وده الي لازم يتعمل  ع الاقل نحل  ابسط مشاكلهم , وبكدا ناخد تعاطف وحب الناس

حكيم: اجمعهم ناخد شويه تعاطف وناخد اصواتهم بالذكاء والحيله , ولو واحد مات هيحصل تعاطفهم من نفسه,  واحنا هنستفاد وهناخد اصواتهم

امير بعدم فهم: بتقول ايه ياعمي,  مين ده الي بتتكلم عنه

حكيم: كان هيكون واحد من البيت نسيبك الغالي امجد تخلص عليه بنفسك لامن شاف ولا من دري