رواية نسخه مشوهه الفصل الرابع والعشرون24بقلم حميده عبد الحميد
أول ماقالت لي امي اسمها روان جا في بالي اختي سدرة رفعت راسها وعاينت ليها هنا ركزت في ملامحها اكتر هو صح انا ما ح اعرف ملامح سدرة عشان كان عمرها شهور واكيد حاليا اتغيرت بس الشافعه دي فيها شبه كبير مننا وخصوصا انا كت تايه بين الحقيقه والكذبه معقولة تكون دي صدفه أو شي تاني!! ٠٠ ولي هي جات اختارتني من بين كل الناس ال هنا عشان م انا اوديها لي امها إبتسمت بلطف وقلت ليها ابوك اسمو منو؟ عاينت لي بنفس الملامح الطفولية وقالت لي ابوي اسمو أنس هنا سكت مسافه واتذكرت انو البت الاسمها روان والوصوفوها لي زوجها اسمو عثمان اتنهدت بيأس وم ظنيت ح القى سدرة تاني احسن اطلع من الوهم ال انا عايش فيو دا قمت على حيلي ومسكت يد البت وقلت ليها ح نمشي أقرب مركز شرطة اكيد أهلك ح يكونو فاتحين فيك بلاغ قالت لي لا ي عمو وديني لي ماما بس قلت ليها بس انا م بعرف أمك وين لكن لمن نمشي المركز امك ح تجي هناك وتسوقك، بدت تبكي اكتر قلت ليها طيب ح نمشي لي ماما فرحت شديد ومسكت يدي بقوة وقالت لي ارح طيب كنت مجبور اكذب عليها واصلا انا ح اوديها القسم ، طلعنا ب ورا المطار لانو انا بعرف طريق مختصر ممكن يوصلنا لي أقرب قسم شرطه، كان في عاصفه هوائية شديدة ، وقفت مسافه وبعد م هدأت اتحركنا تاني الشافعه كانت مبسوطه شديد وقفتني وقالت لي انت عارف ي عمو إبتسمت وقلت ليها اها٠٠٠ قالت لي بس انا ابوي الحقيقي اسمو عثمان وابوي دا قعد يشاكل ماما ويقول ليها انتي جايه من دال الايتام. وقفت وحسيت بضربات قلبي ف اضاني، قلت ليها شنو؟ قالت لي شنو؟؟ قلت ليها قلت ليها امك جايه من وين؟ قالت لي دال الايتام هنا عرفت انو قصدها دار الايتام ، ضربات قلبي زادت اكتر رجعت وسالتها بتردد تاني وقلت ليها وابوك اسمو منو؟ قالت لي ابوي اسمو عثمان بس ابوي التاني اسمو انس وبابا انس ودانا بيتو عشان ابوي عثمان ضردنا انا وماما من بيتو،من دون َ م أشعر م لقيت نفسي الا وانا بضمها على دي هي زانا بت اختي، م كنت مصدق كنت تايه وافكاري مشتته سبحان الله محسن الصدف، ضحكت وقالت لي مالك ي عمو قلت ليها انا م عمك انا خالك يحبيبتي سرحت مسافه وقالت لي خالي كيف لكن؟!! قلت ليها ماف زمن لازم امشي بيك قسم الشرطه عشان اختي تظهر مسكت يدها وعايزين نمشي بس من بعيد لمحت أصوات جابها الهوا وقفت على حيلي َوحاولت احدد مصدرها جاي من وين لحدي م وقعت عيني على منطقه شبه مهجورة اتحركت بخطوات كلها حذر عدن جات جاريه ب وراي قلت ليها اقيفي هنا مسكت يدي وقالت لي لا انا ماشه معاك ي عمو بخاف اكون براي، قلت ليها طيب مسكت يدها ومشينا مسافه ومن بعيد لمحت اتنين بت واقفين ومحاوطنهم كم شاب الشافعه صرخت وقالت ديك ياها ماما ي عمو وبقت تأشر عليها وفي نفس اللحظه كانت بتنُط من الفرحه ٠٠٠ قلت ليها ياتا امك لانو كانو اتنين وحدة لابسه عبايه بتروليه ووحدة لابسه عبايه سودا قالت لي اللابسه عبايه سودا ي عمو وفكت يدي وعايزة تجري ليها بس مسكتها وسحبتها على وقلت ليها اقيفي هنا اوع تتحركي انا ح اجيب ليك ماما واجي إبتسمت قالت لي طيب، اتقدمت لي جوا ، وهنا الرؤية اتضحت لي اكتر عاينت للبت مسافه وحسيت بشعور غريب حقيقه الدم م بيروح معقولة دي اختي وهنا طق عيني وقعت على العلامه الفي يدها، حسيت بقلبي ح يقيف كان احساس مختلط معقولة اتسهلت لي بالسرعة دي يعني انا حاليا واقف وقدامي اختي، اختي الفقدها قبل كم وعشرين سنة والكانت شافعة صغيرة وعمرها لا يتجاوز ٥شهور وحاليا هي واقفه قدامي وبت فتاة غمض عيوني بعدم تصديق ورجعت فتحتهم تاني، وعرفت انو هم واقعين ف مشكلة وماعارف الناس ديل عايزين منهم شنو ومتاكد م ح أقدر اوجهم براي لانو هم اكتر مني حاولت اشغل مخي وافكر ف حل مناسب، كان ف واحد واقف قدامهم وشكلو ما ناوي ليهم خير لحدي َماجاتني فكرة ظابطه طوالي دخلت ووقفت ف النص كلهم اتلفتو على والشر باين ف ملامح كل واحد فيهم، دخلت يدي في جيبي ووقفت بكل صرامه
عاينت ليهم واحد واحد بنظرات اكعب من حقتهم، لحدي م جا واحد وقف قدامي فتح خشمو وقال ٠٠
انت منو كمان؟
رفعت حاجبي بتحدي وقلت ليو
معاك سيف من جهاز. الأمن والمخابرات ٠٠٠
رفع حاجبو بعدم تصديق وقال لي
شنو؟
خليت ملامحي تكون جادة اكتر وطلعت تلفوني من جيبي وقلت ليو٠٠
سيف من جهاز الأمن والمخابرات وببشركم المكان دا مُحاوط ب كاميرات المراقبه واقل غلط منكم ح تمشو في ستين الف داهيه وعشان نكون حلوين مع بعض احسن تتخارجو من هنا سريع ٠٠ شكلهم صدقو كلامي وبقو يعاينو لي بعض لحدي م اشر ليهم الشاب الكان واقف قدام البنات وقال٠٠٠ ارحكم ي شباب، انسحبَو واحد واحد وفاتو من قدامي ٠٠٠طوالي اتلفت وعاينت اتجاه البنات كانو م مصدقين الحصل، اتقدَمت كم خطوة لحدي م وقفت قدام اختي،٠٠٠رجعت حركة لورا وكأنها كانت خايفه مني ، ماقدرت اسيطر على نفسي ووقتي دموعي جات جاريه، بتها جاتها بكل لهفة وحضنتها
كنت بعاين ليهم من سُكات والعبارات واقفه لي في حلقي كُنت مشتت وماقادر أعبر عن مدى فرحتي بيهم ، رفعت نظرها وقالت لي شكرا ليك ي اخ وشكلو انت القيت بتي عدن قلت ليها بصوت ملان شوق وحنيه وخوف في نفس الوقت ٠٠٠.سدرة!!! عاينت ب استغراب وقالت لي سدرة منَو؟ قلت ليها انتي، ابتسمت ابتسامه خفيفه وقالت لي معليش بس انا م اسمي سدرة اسمي روان هنا البت المعاها شكلها ذكيه وشافت الشبه ، قالت لي انت اخو روان؟ هزيت راسي وقلت ليها اي انا اخو سدرة، ابتسمت وقالت لي شكيت انو انت اخوها لانو الشبه واضح وعمرو الدم ما ح يودر، رجعت وعاين لي اختي وقلت ليها سدرة انا اخوك سيف وانتي اختي سدرة كانت شبه مصدومه وما مصدقه بدت تتمتم وتقطع ف الحروف وقالت اخوي؟؟ كيف يعني انت اخوي بس؟ ضحكت وقلت ليها انا اخوك ي سدرة اخوك المشتاق لي شوفتك من سنين واعفي لي عشان انتي عشتي حياة صعبة زي دي واعفي لي عشان انا ما قدرت القاك الا بعد زمن وبعد كبرتي. أنا اسف على كل لحظة قاسيه عشتيها في حياتك، رجعت خطوة لورا وبقت تبكي ب أعلى صوت ليها وهي بترد في العبارة دي لا انا ما مصدقاك انا ماعندي اهل انا م عندي زول٠٠٠
مشيت عليها وقلت ليها لاا انتي عندك أهل ي سدرة فتحت عيونها وقالت لي وانا كيف ح اعرف انت اخوي قلت ليها ثواني، طلعت تلفوني ودخلت الاستوديو، دخلت ف البوم كنت محتفظ فيو من زمان وفيو صورتنا انا وهي وامي لمن ولدتها صورتنا َ مع بعض رفعت التلفون ووجهتو قصاد نظرها خطفت التلفون من يدي وعاينت للصورة مسافه وقالت صح دي انا قلت ليها طيب ممكن اضمك ي اختي؟ جات بخطوات كلها خوف ضميتها على وكنت م مصدق احساس انو بعد سنين الليله انا مع اختي احساس اشبه بالحلم ٠٠٠ بكت كتير وعاتبتني أكتر، م عرفت اقول ليها شي غير اعفي لي وسامحيني يغلاي ٠٠٠٠ ٠٠ بعد عناق وشوق طويل رجعت وسلمت عدن تاني وقلت ليها انا خالك اخو امك فرحت شديد وقالت لي انت خالي قلت ليها اي ومستحيل اخليكم تاني اختي قالت لي بس انا ي سيف اسمي روان حاليا قلت ليها مامشكلة بس اسمك الحقيقي سدرة البت المعاها ابتسمت وقالت اسم سدرة حلو بس نحنا اتعودنا على روان قلت ليهم ماف مشكلة. وانتو قعد تعملو هنا شنو قالت لي كنا قعد نفتش في عدن قلت ليها طيب والناس ديل عايزين منكم شنو؟ سكتت مسافه وتاني اتكلمت وبدت تحكي لي ف الحاجات الحصلت ليهم وانو في وحدة اسمها رغدة وأهلها ناوين يقتلو روان، قلت ليها طيب نشوف هسي ح يعملوا شنو هم فاكرين سدرة م وراها زول بس حاليا معاها اخوها وسندها وح اخليهم يندمو على الشي العملوا فيها قالت لي انت م تعمل اي شي ي سيف وكفايه انو انت لقيت اختك بعد زمن طويل قلت ليها بس قبل نسافر ابو ظبي ح اندمهم قالت لي شنو ابو ظبي؟ قلت ليها اي ح اسوق سدرة وعدن وح نسافر مع بعض وح اطلع ليهم الجوازات واكمل ليهم كل الإجراءات، عاينت لي سدرة بكل حزن وقالت ليها روان ح تفارقنا! ابتسمت وقالت ليها مستحيل ياحميده وبعدين نسيتي انو انس طلب يدي، قلت ليها شنو شنو؟ قالت لي اي ي سيف انا ح اتزوج قلت ليها بس ٠٠٠قطعت كلامي و قالت لي انا وافقت خلاص قلت ليها تمام نشوف الموضوع دا لي بكرة وارح هسي من هنا رفعت عدن وطلعنا برا
ف جانب اخر٠٠٠
حاسي نفسي ح اجن عديل من تصرفات حميده ٠٠ وشكلو ح ارتكب جريمه ف سامي لو م عمل حسابو، مشيت المستشفى ولقيتها فاضيه لا فيها انس ولا فيها آدم بس حسب كلام انس انو حميده وروان قاعدين مع امو مشيت للدكتور وسألتو قال لي والله م عارف فاتو وين لكن آخر مرة كانو قاعدين هنا ٠٠ قلت ليو تمام طلعت تلفوني ولقيت كم مكالمة من حميده وشكلو تلفوني كان ف صامت بس موضوع انو تركب راس وم تشتغل ب كلامي ، الموضوع دا مزعلني شديد ولازم اكون صارم معاها اكتر طلعت من المستشفى واتصلت لي انس لحظات بس وفتح الخط ٠٠
ي انس البنات ديل مافيشات ف المستشفى!!
كيف يعني انا قلت ليهم م يطلعو؟
بس طلعواا
احتمال ماشين يفتشو عدن
تمام تمام ي انس ح امشي واشوفهم فاتو وين
عديله ي أمجد
قفلت الخط ورجعت التلفون ف جيبي ضغط على راسي بقوة وحرفيا انا ح أجن من تصرفات حميده البخليها تتطلع زي الوقت دا شنو؟ لالا تمام نشوف ركوب راسها دا حدو وين، مشيت على العربيه ركبت واتحركت على الظلط ومشيت دغري ٠٠٠
ف جانب اخر ٠٠٠
سماح
نعم ي شيخه
طبعا انتي ماشا تبارك الله تجويدك ممتاز جدا وانا مفكرة امسكك حلقة تاج الوقار
بس ي شيخه انا شايفه نفسي انو انا ماقدر المسؤولية دي لسه
بإذن الله انتي قدرها ونص
طيب ي شيخه ربنا يسهل.
اللهم امين ٠٠
ي شيخه بلقى ي لي دكان فاتح؟ عشان عايزة اشتري بعض المستلزمات ٠٠
اي في الدكان القريب من العمارة حقتنا وهو على بعد شارع من هنا. وسوقي معاك وحدة من البنات خلي تمشي معاك
لالا م عايزة ازعجهم وهم بعدين ف الحلقه ح امشي سريع واجي
طيب اعملي حسابك ي بتي
حاضر ٠٠
ف الطريق٠٠٠
عم بلال ٠٠٠٠٠واخير عرفت انت وين وبكده بقدر اقول أسرة آل حسن انتهت٠٠٠ وبمجرد َ م استلم الورق ح اطلعهم واحد واحد من بيوت ابوي ومشاريع ابوي واي حاجه بتخص ابوي مشيت حسب الوصف الوصفو لي يعقوب لحدي م لقيت نفسي واقف قدام البيت من بعيد لمحت يعقوب شكلو كان منتظرني جا وسلم على قلت ليو اها وين البيت قال لي ارح آمنت العربية واتحركنا، مشينا بيت بلال وقفنا قدامو و يعقوب رفع يدو وطرق الباب بخفه بعد دقيقه بالضبط سمعنا كركبه ف الباب لحدي م اتفتح وشكلو دا عم بلال زاتو قلت ليو السلام عليكم قال لينا وعليكم السلام قلت ليو كيف حالك قال لي الحمدلله، خير ف شنو!! يعقوب قال ليو معقوله م عرفتني يا عم بلال انا يعقوب ولد حمزة جاركم ابتسم وقال ليو ايوا معليش م ركزت ونظري شويه ضعيف ف الظلام واتفضلوا جوا فتح لينا الباب ودخلنا. قعدنا انا ويعقوب في كنبه وحدة وهو قعد ف الكنبه التانيه اتنهدت وقلت ليو معاك سامي ي عم بلال قال لي سامي منو؟ قلت ليو سامي ولد الفاروق الكان جاك قبل كم سنة وأداك الورق سرح مسافه وقال ماشاءالله انت ولدو إذن ود عمك أداك الورق خلاص، استغربت وقلت ليو ود عمي؟ قال لي اي ود عمك واسمو آدم طوالي قمت على حيلي وقلت ليو آدم؟؟ يعني افهم انت اديت الورق لي آدم؟ هو برضو قام وشكلو انصدم شويه قال لي اي أمس جاني ولد اسمو آدم وقال هو ود عمك وقال ح يديك الورق من دون م أشعر فتحت الباب وطلعت وكل لوحات الغضب سيطرت على بصيرتي اتعمت كُليآ ركبت العربية ودورت با أقصى سرعة. آدم يشيل ورق ابوي ب ياتو حق؟؟ ولسه كمان ما جا واداني ليو تماممممم ي آدم عبدالمنعم براك جبت الكتاحه لي نفسك واتحمل الشي ال ح يحصل ليك،. مشيت اول قسم شرطه بس م لقيتو هناك وانا م عندي رقمو، قررت امشي على بيتي واشيل تلفوني التاني ودا فيو رقم واحد اسمو سمؤول واكيد ح يعرف مكان آدم وين في أقل من دقايق وصلت نزلت بسرعه وجريت على البيت فتشت تلفوني التاني لحدي م لقيتو ف الدرج طلعتو وفتشت الرقم لحدي م لقيتو لزيتو ف تلفوني التاني وطلعتو من جيبي، اتصلت لي سمؤول وف نفس اللحظة جريت على العربيه بس فجأة حسيت بحاجه ماسكه نفسي ، اتنهدت وحاولت اتوازن وبديت اشوف حاجات غريبه ومن ضمنهم؛ شفت ثعبان منظرو قبيح شديد، رجعت خطوة ل ورا وكان في حاجه بتقول لي قوم جاري٠٠٠