رواية نسخه مشوهه الفصل الخامس والعشرون25بقلم حميده عبد الحميد
حاولت اتوازن وبديت اشوف حاجات غريبه ومن ضمنهم شفت ثعبان منظرو قبيح شديد رجعت خطوة ل ورا وكان في حاجه بتقول لي قوم جاري، كان شعور غريب والدنيا كانت لافه بي لف مسكت مِقبض يد العربية ووقفت لحظه حاولت استوعب بس م قدرت، وكانو في حاجه كانت مسيطرة على مسكت راسي وبركت رجولي في الأرض وبقيت اصرخ بأعلى صوت وفي نفس الزمن بقيت اكفت في نفسي بطريقه مجنونه، ووصلت معاي لدرجة كنت عايز اضرب راسي ب حجر او بي أي شي وماعارف دا شنو الشي الا انا فيهو، لحدي م شفت بت من بعيد جات جاريه على وقفت وقالت لي خير، رفعت راسي وانا ضاغط عليه بنفس القوة ، كانت نفس البت الصادفتها الصباح، حولت نظري منها وبديت اضرب راسي ف الارض ٠٠٠ انسحبت من قدامي وبعد مسافه جات راجعه وقفت قدامي وقالت فتشت لي ناس عشان يسعفوك بس م لقيت وانا م عارفه حيكم دا مهجور كدا ليه والناس م بتطلع من البيوت، قلت ليها زحي من هنا ي بت الناس لانو حاسي نفسي ح اقتلك، رجعت كم خطوة ل ورا ووقفت ع مسافه وبدت تقرأ في سورة من القرآن بس ماعارف سورة شنو دي، حسيت بالنار ماشه ف جسمي وبديت اشوف طشاش طشاش وتاني م حسيت بنفسي ٠٠٠٠ بعد ساعتين بالضبط صحيت ولقيت نفسي راقد جنب العربيه قمت مخلوع وقعدت ضغط ع راسي رحاولت استوعب حصل لي شنو بالضبط، لحدي م سمعت صوت حنين وهو بيقول، حمدلله على السلامه اتلفت على يميني وكانت نفس البت قلت ليها انتي؟ قالت لي كيف بقيت؟ قلت ليها حمدلله بس ف شنو؟ ولي انا هنا وانتي زاتك منو؟ ابتسمت ابتسامه خفيفه وكانت داسه حاجه ف طرف طرحتها وقالت لي انت كنت مستحضر بس الحمدلله قدرت اسيطر. على الوضع وقريت ليك شويه ايات وانت حاليا كويس بس انا عايزة اقول ليك حاجه راجع علاقتك مع ربك وحاسب نفسك وشوف هل انت مقصر في صلاتك أو لا، ومدت لي كتاب صغير شديد عاينت للكتاب وقلت ليها دا شنو قالت لي دا كتاب اسمو حُصن المسلم إطلع عليه وح يفيدك ان شاء الله مديت يدي وشلتو منها وهي قامت قبل تمشي قلت ليها للان م جاوبتيني انتي منو؟ قالت لي انا سماح قلت ليها شكرا ليك اتلفتت وفاتت، رفعت الكتاب وعاينت ليو مسافه وكان مكتوب فيو حُصن المسلم حسيت ب احساس غريب شلتو ودخلتو في جيبي وقمت من الأرض وقلت ف سري مستحضر؟؟ م اشتغلت بالموضوع كتير فتحت باب العربيه وطلعت قارورة مويه صحه غسلت وشي وشربت الباقي وركبت، تلفوني كان مجدوع ف الارض رفعتو ولقيت نفسي كنت متصل لي سموؤل، وشكلو فتح الخط وقت كنت م واعي بنفسي رجعت واتصلت ليو تاني ودورت ٠٠٠ دخل الجرس الأول والثاني والثالث حتى فتح الخط٠٠
_مساء الخير يا سموؤل
=ياهلا مساء النور منو معاي؟
_معاك سامي ٠٠
=سامي الفاروق؟
=اي اي
_اخبارك ي فردة وين الحي بيك ي إنسان؟ ٠٠
=الحمدلله ي سمؤول كويس م علي عوجه بس عايز منك تعرف لي وين ممكن القى آدم
_آدم عبد المنعم؟
=ياهو زاتو
_والله هسي دي كان معاي ف القسم وحاليا طلع على اتجاه السوق هناك
=السوق الكبير؟
_اي
=طيب م عندك فكرة ممكن القاهو وين هناك بالضبط؟
_والله ي سامي هو اكتر شي قعد يمشي ل واحد اسمو مؤيد عندو كافيه
=تمام جزاك الله خير
_العفو ي غالي ٠٠٠
قفلت الخط ولفيت ع اتجاه السوق ، والغضب الشايلو ف قلبي م ح يهدأ الا بشوفة آدم، لازم اشوفو واشوف فهمو شنو ويا انا ويا هوو ٠٠٠
دقايق بس ووصلت السوق٠٠ بديت اسأل من كافيه مؤيد لحدي م لقيت واحد وصفو لي وصف دقيق، شكرتو واتوجهت على حسب الوصف ومن بعيد لمحة اتنين تاشتر حقات حكومه ومن بينهم لمحت آدم واقف مع واحد من العساكر وقعد يتكلم معاهو نزلت من العربيه ومشيت عليه اول م شافني جا على وقفت قدامو ٠٠ قلت ليو بنبرة حادة
ب ياتو حق تشيل أوراق ابوي؟ وانت منو زاتك!؟
عاين لي بنظرات هادئة جدا ومرر اصبعو ف حاجبو وقال ٠٠
عشان نت سفيه وم ينفع اديك الورق دا٠٠
كلامو دا خلاني اغضب اكتر من اول وافقد اعصابي ٠٠٠
قلت ليو سفيه!!
انا سفيه؟؟
قال لي
اي سفيه وطايش وم عارف نفسك قعد تعمل ف شنو حاليا ، نظري وقع ف حديدة كبيرة طوالي مشيت عليها ورفعتها جيت عشان اضربو بيها بس هو سبقني وآمن سلاحو وقال لي٠٠
انا م عايز أدخل معاك ف نقاش ي سامي بس حاليا انت عايز تعتدي عليي ومن حقي ادافع عن نفسي وصدقني طلقه وحده بس بوديك ٠٠٠ ضحكت وقلت ليو م راجل لو م ضربتني ي آدم ٠٠
أصحابو اتلمو فيني وواحد منهم مسك الحديدة من يدي وقال ٠٠٠
جنابو آدم انسان حقيقي وانا م عارف مشكلتك معاهو شنو بالضبط بس انا شايف انت وهو لازم تقعدو في طاولة واحدة وتحلو مشكلتكم دفترو وقلت ليو ماف مشكلة ح تتحلى وهو لازم يديني ورقي ويتحاسب على خيانتو ٠٠٠
آدم قال لي جدا ح اديك ورقك بس ممكن نتكلم ٠٠
قلت ليو شوف ي آدم عشان انا م اقتلك أو انت تقتلني احسن تديني ورقي من دون أي كلام كتير قال لي ي جن انت م بتفهم ليه؟؟ يعني كيف بس اديك الورق وانت ب حالتك دي؟
انفعلت فيو وقلت ليو
حالتي؟؟ لي شايفني مجنون مثلا؟
قال لي بهدؤ
ممكن تسمع كلامي ي سامي٠٠٠
دخلت يدي في جيبي وقلت ليو جدا بسمعك ونشوف داير تتكلم تقول شنو ٠٠٠
أشر لي على اتنين كرسي قصاد بعض
َمشيت وقعدت ف واحد وهو جا وجرا الكرسي التاني ، قعد وقال ٠٠٠
شوف ي سامي انا وانت وامجد وانس هدفنا واحد وانت بعد م اختفيت بفترة انا برضو اختفيت زيك والسبب هو أسرة آل حسن والحقد ال انا شايلو اتجاه الأسرة دي اكعب من حقك وانا بسببهم طفشت وامي فقدت بصرها وحاليا هي ف المستشفى بين الحياة والموت وانا متأكد برضو انو هم عملوا حاجه لي ابوي وانت عارف انا طفشوني ليه عشان كنت عارف انو الأملاك دي كلها تابعه للفاروق وزي م قلت ليك انا َ م عندي اي عدواة اتجاهك ويمكن انت عشت طفولة قاسيه بس لا انا ولا امجد ولا انس لينا علاقه بالشي العشتو انت وفي النهايه نحنا كنا كلنا صغار وانت م عندك اي حق تلوم واحد فينا ٠٠
. ضحكت وقلت ليو بس كنتو واعين صخ وانا م بهمني انت حصل ليك شنو ف الماضي ٠٠
سكت وتاني اتكلم بهدؤ اكتر من اللازم وقال ٠٠
أول شي يا سامي نحنا م اولاد عم ولا في صلة قرابة بيناتنا ٠٠٠
ضحكت وقلت ليو انت جنيت ولا شنو؟
قال لي نصيح٠٠٠ ودي الحقيقه وانت الحفيد الوحيد ل حسن وجدك حسن م عندو ولد.غير ابوك الفاروق والباقين كلهم جو من الميتم وبدأ يحكي لي في قصة الدجال وحاجات كتيرة كنت م عارفها٠٠٠
قمت من الكرسي وبقيت اضحك زي المجنون ٠٠٠
قلت ليو انت مستوعب نفسك قعد تقول في شنو؟
. قال لي انت الان عرفت كل الحقيقه وانا عارف انو انت حاليا حاقد علينا اكتر من اول بس برضو عرفت السبب الحقيقي المات فيو ابوك وعرفت انو انت عايش ف وهم. انو أهلك ظلموك واعمامك ظلموك بس الحقيقه ديل م أهلك ٠٠٠
قعدت ف الكرسي تاني وانتقامي زاد اكتر من اول قلت ليو ومرتضي دا القاهو وين؟
قال لي انا حاليا عامل حملة شاملة وبإذن الله ح يتلقى ولقينا اكتر من ٥دجال وكلهم اتصفو وبإذن الله ح نلقى راس الكبائر دا قلت ليو انا ح اقتلو براي وبعدين بلحقو الملقطين ديلك
قال لي افهم انو عقلك جا خلاص؟
قلت ليو بس للان حقدي اتجاهك انت وأمجد َ وانس م انتها
قال لي تمام إن شاء الله َ م ينتهي وهاك دي الأوراق٠٠٠
شلتها منو وقبل امشي قلت ليو
احتمال القى السفاح دا قبلك وصدقني ح اطبق فيو نظريه عمرو م شافاها
قام من الكرسي وقال لي تكون زاتو خدمتنا م انو م ظنيت ح تلقى قدامنا وفات من قدامي
مشيت على العربية وختيت الورق ، طلعت تلفوني واتصلت للمحامي وطلبت منو يسحب اي شي قاعد مع الناس ديل ومن هنا ح ابدا انتقامي ٠٠ ركبت واتحركت على البيت ٠٠٠ وصلت وكرشت العربية نزلت وقبل افتح باب العمارة اتذكرت الحاجات الكانت بتحصل لي وهنا عرفت انو هم ليهم سبب فيها وشكلهم ناوين يجننوني بس انا ح اجننهم قبل م هم يجننوني فتحت الباب ودخلت، جوا طلعت السيوتر وجدعتو ف السرير وانا قعد ف الكرسي طلعت الكتاب الادتني ليو البت من. جيبي وبقيت اعاين فيو مسافه فتحتو وكان فيو أذكار وادعية كتيرة بديت اقرا فيها ويمكن دي اول مرة ف حياتي اقرا حاجات زي دي م عارف بس حسيت ب شعور غريب يمكن حلو ويمكن لا ٠٠٠ وكل ما بمر بذكر بحس بنفسي مضايق هل انا مصاب بي مس أو حاجه زي ي ربي؟ قفلت الكتاب وسندت راسي ف حافه الكرسي وجا ف. بالي شخصيتها تاني ، ما عارف بس تصرفها كان محترم جدا وم قادر م افكر في الشي العملتوا قبيل ٠٠ غمض عيوني وحاولت انوم ٠٠٠
ف جانب اخر ٠٠
بعد م ظهر اخو روان عرفت انو حياتها ح تتغير وشديد كمان وهي عانت كتير في حياتها وصبرت صبر جليل، وشفت مدى حب اخوها ليها كان مامصدق انو لقاها ، استغفرت ودعيت انو حياة روان تعيش باقي عمرها مبسوطه هي وعدن ، شعرت بنغمة تلفوني اتحسست جيب العباية بيدي وفعلا كان دا أمجد المتصل لقيت منو قريب ٦مكالمة ولحقتو ف اخر وحدة اول م فتحت الخط قال لي وين انتي؟
قلت ليو ف الشارع
قال لي شنووو؟
قلت ليو قصدي ليك ف الطريق ٠٠
قال لي حميده ٠٠٠
نعم
انتي عارفه صح؟
اي عارفه انو انت زعلان مني وانا عارفه انو انا غلطانه
قال لي حلو تمام يعني
عارفه غلطك ولسه مواصله فيهو ٠
قلت ليو نحنا جنب المطار ممكن تجي لينا قال لي اصلا انا على الجهات دي دقايق بس و ح اوصلكم ٠٠ وقفل الخط.، نزلت التلفون من اضاني اتنهدت وندحت على ناس روان طولي وقفوا روان قالت لي خير قلت ليها هسي انتو ماشين وين؟ قالت سيف قال ح يودينا بيتو قلت ليها انتو امشو انا ح انتظر امجد هنا قالت لي لالا وانتي برضو ارح معانا سحبتها بالجنبه وقلت ليها شوفي ي روان انا م بقدر امشي معاكم تمام سيف اخوكي بس َ م اخوي انا ويعتبر اجنبي بالنسبه لي ونحنا مسلمين ولينا حدودنا ولازم نحترمها ونحترم شرع الله ابتسمت وقالت لي فهمت قصدك بس ح نقيف معاك لمن أمجد يجي وبعدين نحنا ح نمشي قلت ليها طيب وقفنا وسيف كان مشغول مع عدن وهو بيلعب معاها. بعد ٩دقيقه شفت أمجد من بعيد جاي علينا، وصلنا ونزل اول عاين لي اخو روان مسافه ومن ثم عاين لي وقال دا منو؟
قلت ليو دا اخو روان عاين لي ب استفهام نظام انتي قعد تقولي في شنو اتنهدت وقلت ليو دا سيف ويمكن اسم شكرتهم ف أبوظبي يكون مره عليك و اسمها آل مجد إبتسم وقال فعلا مره على وَمعقوله ديل اهل روان يعني قلت ليو اي سيف انتبه ل وجود أمجد جا عليه سلمو سلام حار أمجد قال ليو بعرف اسم شركتكم وانا سعيد جدا انو انت لقيت اختك إبتسم وقال ليو تسلم ياخ، وكمان عرفت اختي عانت قدر شنو قال ليو الحمدلله هسي انت جيت واكيد ح تعوضها عن كل شي قال ليو من دون أي شك، أمجد قال ليو ماشي وين؟ ممكن استضيفكم في بتي قال ليو لا انا أجرن قريب من هنا وقربت اوصل قال ليو لالا تمام ودعت روان وقلت ليها اتصلي لي انس وكلمي قالت لي ان شاء الله ح اتصل ليو برقم سيف وفاتو ٠٠٠
فضلنا انا وامجد
ربع يدينو وكل ملامح وشو اتحولت لي جديه ٠٠قال لي
اها ي استاذة؟
قلت ليو انا غلطانه وانا بعتذر
قال لي شوفي ي حميده ركوب الراس م بينفع وانا لمن بمنعك من حاجه بكون عارف عواقبها شنو وانتو كائنات لطيفه وبتغلبكم العاطفه لدرجة انو ممكن تاخدو قرارات غلط وهسي الطلعكم زي الوقت دا شنو وانتي عارفه انو البلد م امان ؟ وكمان انتو بنات وبراكم ، سكته وم اتكلمت ٠٠واصل ف كلامو وقال ٠٠
هسي لا قدر الله لو حصلت ليك حاجه انا ح أواصل باقي حياتي كيف أو اعيش بدونك كيف؟ مرات الإنسان يفكر ف الناس الحوالينه حتى بعدين يتجنن وانتي الفترة الأخيرة دي شغاله معاي عناد جد وانا للان ماسك نفسي عشان م ازعلك لانو لو انتي زعلتي انا برضو ح ازعل ومزاجي ح يتعكر اكتر من ما هو مُعكر قلت ليو بعتذر قال لي مامشكلة بس من هنا ول قدام تسمعي الكلام هزيت راسي من سكات فتح باب العربيه وقال لي اركبي، ركبت وهو مشي على الجهة التانيه ركب واتحركنا مسافة الطريق كنت ساكته وهو كذلك بعد صمت دام لحظات اتلفت على وقال لي ساكته مالك قلت ليو اقول شنَو
قال لي ااا اي شي قلت ليو انت اهبل ضحك وقال لي عرفتك حتقولي كدا ابتسمت وقلت ليو يعني اتصالحنا خلاص؟ قال لي لسه م قررت بس ممكن تقولي اتصالحنا ضحكت وقلت ليو اصلك م بتزعل مني ولو زعلت بتكون لحظات بس قال لي عارفه م بزعل منك فعشان كدا قلتي اطلع زيتو للمسكين دا قلت ليو م تتحسس بس، عاين لي بطرف عينو وصادف تلفونو رنه رفعو ومرر نظرو ف الشاشه وقال دا آدم فتح الاسبكير وخت التلفون ٠٠
_ي هلا آدم
=وين انت يا أمجد؟
_ف الطريق
=اسمعني عرفت مكان مرتضى وين
=ااانسيت اكلمك انو هو ف بيت أنس
لا قصدي ليك قدرنا نحدد مكانو وين بالضبط الناس ديل كانو شغالين كواديك قويه لدرجة عربات الشرطه م قادرة تداهم حيّهم ف حاليا انا اتصلت لي انس وقلت ليو يعمل حسابو وقال لي هو حاليا ماشي هناك وعندي صحبي واحد اسمو سموؤل وشكلو عامل صُحبه مع سامي ونسيت احكي ليك انو الليله سامي عرف الحقيقه كلها
أمجد وقف٠٠٠ وقال ليو
عرف نحنا م اولاد عم يعني؟
قال ليو
اي واديتو الورق ي أمجد واتكلمت معاهو كتير ووريتو الحقيقه وحسيتو اقتنع. المهم نرجع للمهم طبعا سموؤل عرف انو نحنا عرفنا مكان مرتضى وشكلو اتصل لي سامي وكلمو وسامي حاليا ماشي هناك وانا والله م بضمن ليك ٠٠الناس ديل وانس متجنن زيادة عن اللزوم المهم لو انت قريب اطلع بهناك طوالي وانا برضو جاي ومعاي كم عربيه
قال ليو يعني الليله ي جاطت ي اتصلحت؟ قال ليو بالضبط ي أمجد لانو قرفنا وزهجنا خلاص والراجل دا شغال لي ناس كتيرة وضررو وصل بعيد قال ليو تمام ي آدم الليله نخت النقاط ف الحروف وانا زاتو زهجت من الوضع دا. وداير اسوق مرتي بعدا واقطع وشي من البلد دي
قال ليو تمام نتلاقه هناك
قفل الخط وكسر خلفي قلت ليو ف شنو يا أمجد قال لي ناس آدم ح يداهمو حلتنا وسامي وانس ماشين عليها قلت ليو ونحنا برضو ح نمشي؟ قال لي لأ ح امشي براي وانتي ح اوديك بيت خالتي قلت ليو طيب تمام
وصلني بيت خالتو وفات ٠٠ دخلت جوا وسلمت عليهم واعصابي بايظه للنهايه ٠٠٠
ف الطريق ٠٠٠
طبعا بعد م اتكلمت مع آدم اتصلت لي سموؤل وحيكت ليو بكل شي وا اول م وصلت البيت وقررت انوم سموؤل اتصل لي وحكي لي انو الخايب داك اتلقى النوم طار من عيوني قمت على حيلي وطلعت على طول. ونار الانتقام كل مرة ماشه تزيد اكتر واحساس الليله ح أواجه اول عدو لي ابوي ٠٠٠ وما ح اخلي آدم يشيل مني فرصة انو انتقم من الراجل دا براي ٠٠٠ دُست بنزين وانا حاسي ب الانتصار خلاص احساس انو ح اخلص المجتمع من أحقر انسان على وجه الكرة الأرضية وصلت في أقل من نص ساعة ولقيت آدم سبقني كان موزع العاسكر في كل مكان ف الحي بالاضافه لي أمجد وأنس م عارفهم ديل جو متين.،. جريت عليهم ومن بعيد لمحت كم نفر طالعين من بيت أنس تقريبا٠٠ وهم ماسكين واحد وأظن دا هو زاتو الدجال، كان مُكلبش، بس ملامحو كانت م غريبه على كأنو شفتها في شخص تاني طلعت سكيني ومشيت عليه ٠٠٠