رواية نسخه مشوهه الفصل الثالث3بقلم حميده عبد الحميد
عاين ليها بنظرات باردة جدا وقال ليها دي ضيفه وح تبيت معانا هي وبتها الليله ٠٠٠ ربعت يدينا فوق بعض ورفعت نظرها مني ووجهتو قصادو وقالت ليو ٠٠
ضيفة؟؟ كيف يعني ضيفه ممكن توضح لي اكتر،؟ قال ليها بالله عليك ي رغدة م تكتري كلامك معاي وأظن كلامي واضح قلت ليك ضيفه والموضوع انتهى إنفصمت فيو وقالت ليو انت جايب بت غريبه ف ببيتي وفوق دا كلو تقول لي ضيفه وماعايز تفهمني اي شي؟ رد ليها بنفس البرود وقال ليها طيب دي وحدة عابرت سبيل وقلت بدل تبيت ف الشارع احسن تجي وتبيت مع امي عندك مشكلة تاني؟ اكتفت ب انو تعاين ليو بنظرات حادة ومنها عاينت اتجاه الطفله الصغيرة وقالت ليها ارح ي غفران عشان تنومي بعد دا مسكت يدها بس البت نفضتها منها وقالت ليها عايزة اقعد مع بابا.رفعت صوتها فيها وبنبرة حادة قالت ليها ي بت غفران امشي قدامي عشان م اديك كف، هنا قلبي عمل شح معقوله بتتعامل مع بتها كدا وهي لسه صغيرة وف عمر زي دا ؟ ابوها ادخل وقال ليها خليها معاي قالت ليو لأ م عايزاها تتعلم السهر احسن تنوم دنقر ف بتو وقال ليها بابا يلا امشي مع ماما وبكرة الصباح لو ربنا حيانا بوديك مكان سمح ابتسمت ابتسامة طفولية وقالت ليو حاضر مسكت يد امها وقبل يتحركو امها عاينت لي مسافه حتى مشت ، أنس شال نفس عميق وقال لي اسف عشان حصل موقف زي دا قدامك ع العموم اتفضلي جوا ح اعرفك ب امي، ونسيت اقول ليك انو انا متزوج وعندي بت قدر بتك عدن ويلي هي غفران وشفتيها هسي وانا بحبها شديد وبنسبة لي امي انا ولدها الوحيد وابوي اتوفى ليو ٥سنة وامي قاعدة معاي وللأسف فقدت نظرها قبل سنة ونص قلت ليو ربنا يرحم ابوك ويغفر ليو ويدي امك الصبر قال لي امين يارب ورجع مسك يد عدن وقال لينا ارح اتحركنا وبقينا ماشين صراحه البيت كان كبير شديد ركبنا السلم وبقينا ماشين لحدي م وقفنا قدام باب خشبي لونو بني فاتح رفع يدو وطرقو طرقات خفيفه، سمعنا صوت هادئ كانو جاي من الزمن الجميل ، كان صوت مرا ف نهاية ال٨٠تقريبا قالت اتفضل! دفر الباب ودخل اول واحد اتلفت على وقال لي اتفضلي اتحركت ودخلت ب وراو وصراحه انصدمت من جمال الغرفه كانت اكتر من حلوه فيها جلسة كراسي راقيه واتنين سرير قُصاد بعض وب الإضافة ل رُكن الصلاة والمكتبة الكانت ملانة كُتب دينيه، وبعض من الزهور البسيطه الكانت ع طرف الشُباك وجنبها في طربيزة خشبية وفوق عليها رادي شغال على إذاعة ام درمان وجك قزاز ملان موية وكباية على نفس ملامح الجك كانت قاعدة ف الكُرسي وماسكة سبحتها مشي عليها ومسك يدها وطبع فيها قبلة خفيفه وقال ليها الغالية كيف امسيتي ابتسمت وقالت ليو بعد شوفتك دي ي ولدي الحمدلله امسيت طيبه قال ليها حمدلله اتحرك من جمبها وإتوجه على الدولاب فتح الدرج الأول وطلع أدوية بعثرا ف الطاوله وطلع نوع معين من الادويه جا راجع وطلع حبه وحده و ملى الكباية موية وقال ليها هاك دا العلاج ي يمه زمنو جا خلاص قالت ليو حاضر ي ولدي شالتهم وبعلت الحبه وقبل تناولو الكُبايه قالت ليو حاسه ب وجود ناس معاك ي انس قال ليها اي ي امي ديل ضيوف ابتسمت وقالت ليو حباب الضيوف عاين قصاد عدن وقال ليها تعالي سلمي حبوبه فكت يدي وجرت عليها مسكت يدها وعملت نفس حركة انس وقالت ليها كيفك ي حبوبه.، سبحان الله الشافع بقلد وبمشي على الحاجه الشافها قدامو وعدن قلدت أنس ، ام أنس ضحكت وقالت ليها م شاء الله ماشاءالله طفله واتحسست عدن ب يدينها الاتنين لحدي م سلمتها بالاحضان، عدن فرحت شديد وقالت ليها حبوبه لي انتي لابسة نظارات ف عيونك ابتسمت ابتسامة رضي وقالت ليها حبوبة ماقعد تشوف عشان كدا هي لابسه نظارات عدن رفعت يدينا ف وشها واتحسست خدودا وبكل حنيه قالت ليها معليش ي حبوبه ربنا لو بحب زول ح يبتلي وانتي ربنا بحببببك كتير وكتير شديد كمان ام أنس رجعت وحضنتها تاني وقالت ليها الله أكبر م شاء الله اللهم بارك، صراحه اتفاجات من كلام عدن استغربت شديد و جابت الكلام دا من وين حاولت اتذكر اذا يوم من الايام قلت كلام زي دا قدامها، حتى انس كان مستغرب شديد اتلفت على وقال لي نعم التربية ي روان، ورجع عاين لي امو وقال ليها دي عدن ي امي ومعاها امها اسمها روان عابرين سبيل وقلت استضيفم معاي وح يقعدو معاك الليله والناس بالناس ي امي ابتسمت وقالت ليو خير م فعلت ي ولدي اتحركت من مكاني وجيت سلمت عليها وقلت ليها كيفك حالك يا خالتي قالت لي الحمدلله في زحمة من النعم كيف انتي قلت ليها طيبه الحمد لله، انس قال لي طيب انا ح استأذن منكم واذا عايزين اي حاجه م تترددي تكلميني أو تكلمي امي قلت ليو انت قدمت لينا خدمة كبيرة فما ظنيت ح نحتاج حاجه تانيه بعد كدا قال لي طيب تمام و قام من الكرسي طلع وقفل الباب وراو، أم انس قالت لي ممكن تسنديني ي بتي عايزة امشي على السرير قلت ليها حاضر مسكت يدها ووديتا لحدي السرير قعدت وقالت لي شكلك طيبه شديد وبت ناس قلت ليها والله ي خالتي انا يتيمه وم عندي أهل اتحسرت شديد وقالت لي كيف يعني؟ هنا طوالي لقيت نفسي بحكي ليها قصة حياتي كلها ، بعد م خلصت من كلامي دموعها جرو وقالت لي سبحان الله ي بتي الدنيا دي فيها مأسي كتيرة ربنا يجبر ب خاطرك وهسي ح تمشي وين قلت ليها الله كريم علينا قالت لي اقعدي معاي هنا انتي وبتك اصلا انا علي طول بكون براي وربنا يبارك ف ولدي انس ماقصر معاي و م خلاني براي قلت ليها م بقدر قالت لي فكري ف كلامي انتي بس قلت ليها مستحيل ي خالتي قالت لي طيب تمام اذا انتي مُصرة بس انا ارتحت ليك شديد وحبيت بتك من اول لِقاء وانا عندي حفيدتي بت ولدي امها م بتخليها تجيني هنا، و امها كعبة شديد ونهائي ماقعد تحترمني و هي بت عمو لي أنس بت لئيمة خلاص و ماعندها أدب نهائي، سكته مسافة واتذكرت تصرفها قبل شويه مع انس وظاهر عليها لئيمة قلت ليها م تشيلي هم ف قلبك وهي ح تلقى جزاها و المفروض كان تختك ف خانة امها والكبير دا كبير وواجب علينا نحترمو، قالت لي الحمدلله على كل حال، رفعت نظري وعاينت للساعة الكانت مُعلقة ف جدار الحيطه كانت عاملة وحدة ونص عاينت لي أم انس وقلت ليها وين ممكن اقدر اتوضا عايزة اصلي قيام الليل قالت لي شايفه الباب الخلفي دا قلت ليها اي قالت لي بس افتحي وبتلقي زقاق طويل فيو كم وضايه قلت ليها طيب عاينت لي عدن لقيتها راقدة ف السرير ونايمه نوم عميق مسكينه الليله تعبت شديد، مشيت ع الباب وطلعت كان عبارة عن حوش صغير وفيو زهور كتيره
مشيت ع الوضايه وفتحت الماسورة وبقيت اتوضا حسيت ب صوت خفيف جاي من الناحيه التانيه للزقاق خلصت وضو وقفلت الماسورة الفضول خلاني امشي على اتجاه الصوت دا واعرف جاي من وين، اتحركت بخطوات بطيئة جدا وبقيت ماشه على أقل من محلي لحدي م حددت مكان الصوت وقفت ع طرف الحيطه وعاينت بطرف عيني شفت زوجة أنس واقفه وواقف معاها ولد ف نفس عُمر أنس أو أقل تقريبا، كان بتكلم معاها وظاهر عليو منزعج جدآ لحدي م قال ليها ح تتطلقي من انس متين مثلا؟ المفروض موش الاسبوع دا تكونو اطلقتو؟ قالت ليو افهمني ي يا احمد انا قلت ليك لمن ابوي يسافر بعدين ح اطلق ومنها نعرس انا وانت وانت عارف ابوي م ح يسمح لي اطلق ولو أطلقت ح يرجعني تاني قال ليها بس م ظنيت عمي ح يعمل حاجه زي دي ، وقفت مسافه وانا مصدومة من الكلام السمعتو دا وشكلو دا ولد عمها وبرضو ود عمو لي انس.، معقولة ف ناس زي ديل ؟ رجع وقال ليها طيب وب نسبة لي غفران٠٠٠ وقبل يتم كلامو طوالي قالت ليو اسكت وشكلها حست بي وجودي طوالي جريت على غرفة ام انس فتحت الباب بقوة ودخلت وقفلتو سريع ووقفت مسافة وانا متكية ف الباب وسرحت ف اخر عبارة قالها وغفران ٠٠٠٠!! معقولة غفران بتو وما بت أنس ٠٠؟