رواية عيلة البتران الفصل الرابع4بقلم عبد الفتاح عبد العزيز
روحت ناحية الصالة بره لقيت عماتي التلاته واقفين في دايرة وجدتي عاطياني ضهرها وشايله كريمة وهي لسه طفلة على ايدها وبتقرب بيها عليهم
لغاية ما وقفت في وسطهم وبدأوا التلاته يمدوا ايدهم على اختهم
بس كانوا بيخدوا من جسمها وياكلوا
الدم كان بينزل على بوقهم وجلابيتهم
صرخت فالتفتوا كلهم ناحيتي
كانت عيونهم ممسوحه وبيضا
وجدتي كانت عينها عادية لكن كانت مبتسمة ابتسامة مرعبة
جات ناحيتي وقربت مني
مدت ايدها مسكت ايدي
ولما جات تقرب بيا على بناتها التلاته
لقيت ابويا ظهر في النص
قالي بصوت غليظ
ــ انا هربت بيكي منهم، ايه اللي رجعك هنا
لسه رايحه أصرخ واقوله ان ماما السبب، لقيت صوت ماما ظهر وعماله تقول
ــ اصحي يا نور، اصحي يا نور
قمت منفوضة من مكاني وانا بنهج
ــ كان كابوس يا ماما، كان كابوس
كنت بقولها وانا عماله اتلفت على عمتي اجلال جنبي ع السرير
لقيت ماما بتسأل
ــ بتدوري على ايه
= عمتي اجلال كانت بايته معايا هنا في سريري وجابتلي صور العيلة وقالتلي ان كان ليهم اخت اسمها كريمة ماتت وهي صغيرة، وف الكابوس شوفت جدي بيسلمها لناس وشوشهم مش باينة في نفق ضلمة ، بعدها شوفت عماتي التلاته بياكلوها
ــ عمتك اجلال دخلت هنا ازاي
=كان معاها مفتاح لشقتنا
ــ يا بنتي انا بقفل بالترباس قبل ما ادخل انام ازاي هتكون دخلت
= امال اللي كانت معايا كانت مين
ــ اهدي يا نور، انتي شكلك بيجيلك تهيؤات عشان تغيير المكان وكدة
ــ بقلك جات وقعدت معايا وبعدها نزلت تحت جابت الصور انا مش بكدب عليكي ،، ماما انا هقوم الم هدومي ولازم نمشي من هنا
=يا نور افهمي بقا، انت ابوكي ميت مديون، احنا ماحيلتناش أي حاجه، وكان شرط جدتك عشان تسد دينه ان احنا نرجع نعيش هنا معاها، انتي بس اقرأي أذكار وصلي وانتي هتبقي زي الفل، البيت بس جديد عليكي ولسه ماتأقلمتيش معاه
هديت شويه ورديت
ــ طب قالتلك هتسد الديون دي امتى
= قالت مع ايجار الأرض الجاي
ــ طب ودا امتى
= ممكن شهر ولا شهرين
ــ طيب انا هصبر الشهرين دول وبعدها مش هقعد هنا يوم واحد
=خلاص يا حبيبتي ماشي، يلا الفجر بيأذن قومي اتوضي وصلي
الصبح صحيت نزلت على تحت مع انها مش عادتي اني انزل كدة ، دخلت لقيت جدتي قاعدة وعماتي التلاته، سألت عمتي اجلال
=هو انتي يا عمتي ماطلعتيش عندنا فوق امبارح
بصيت لي باستغراب
ــ انا ، لا لا لا، ماطلعتش ، لا لا ، ماطلعتش
لقيت جدتي بتبسملي وتقول
= وايه اللي هيطلعها بس عندك
ــ طب يا جدة، هو انا كان ليا عمة اسمها كريمة
لقيتها عقدت حواجبها وردت
=كريمة مين، انا ماعرفش حد بالاسم دا
ــ ولا في صور ليكي مع جدي وفيها اربع بنات
=شفتي الصورة دي فين؟
ــ لقيتها وسط الكتب
=لو في صورة كدة تبقا حد من قرايبنا كان بيصور بنته معانا
ضحكت ضحكة باهته وكملت
=هو انا هتوه عن عيالي
فضلت ساكته وبدأت اتفرج ع التليفزيون معاهم، مافيش شوية وماما نزلت، قالت انها لقتني نزلت فنزلت هي كمان، جدتي رحبت بيها وقالتلها انها عاوزانا ننزل كل يوم، وقامت معاها للمطبخ، فضلت قاعده شوية وسط عماتي التلاته، حسيت انهم فعلا أطفال، وغير التلاته اللي شوفتهم سواء ف البلكونة او اوضة المكتب او حتى اللي طلعت فوق عندي توريني الصور، أو انا اللي بيحصلي تهيؤات، لغاية ما جا ف بالي أروح أوضة المكتب تاني، روحت هناك وبدأت احاول افتح الدرجين اللي مقفولين بقفل تحت، فضلت أشد فيهم جامد لغاية ما اتفسخت المفصلة والدرج اتفتح، وانا وقعت قاعدة كدة ع الارض
ببص في الدرجين لقيت مجلد كبير ، وشوية ورق وشوية كتب تانية،
كان المجلد أكتر حاجه تلفت النظر فتحته ف لقيت مكتوب في أول صفحة بحبر أحمر وبحروف متقطعة
أ ص و ل ا ل ن د ر ف ي ج ل ب ا ل ب ر أ
ع ز ا ئ م د ق ب ا ب ا ل أ س ا فل
لسه بفتح أول صفحة لقيت مكتوب
إذا ظهرت لك الأحرف بانتظام فانت لنا وإن واصلت صرت منا، واذا لم تستجب صرت علينا
بعدها بسطرين فاضيين مكتوب
الآن صرت منا أو علينا
لسه كنت هقلب الصفحة فسمعت صوت عماتي التلاته ظهر فجأة
قالوا في نفس واحد
ــ شاطرة يا نور
التفتت ورايا برعب لقيت اجلال قالت للاتنين التانيين
ــ ايوة سيبوها تعرف الحقيقة
بثينة من على كرسيها ردت
ــ ايوة لازم تعرفها
أما عمتي صفاء فقالت
ــ كانت هربت أحسن
باب الأوضة كنت سايباه مفتوح المرة دي، بصيت منه على المضيفة بره كانوا عماتي التلاته الحقيقيين قاعدين هناك
برقت عينيا وجيت أصرخ لقيت عمتي إجلال حطت ايدها على بوقي وقالت في ودني
=إحنا وانتي في مركب واحدة، بس العهد اللي علينا ما نقولك سر،
لقيت عمتي صفاء قربت مني وقالت
ــ والسر كله فيكي وفي ابوكي من قبلك، بيه بدأ وبيكي يتختم
ساعتها سمعت صوت امي بتنده، يا نور روحتي فين
الغريب انهم ماختفوش
فضلت واقفه مبرقه فيهم لغاية ما ماما جات
=انتي بتعملي ايه عندك يا بنتي
برقت ناحيتهم ورديت
ــ انتي مش شايفاهم
=شايفه مين
وقتها لقيتهم بيطلعوا من باب الأوضة واحده ورا التانية وكل نسخه منهم راحت قعدت جنب الحقيقية من عماتي التلاته، ومافيش لحظات واختفوا
ــ ماما في حاجه غلط بتحصل، في حاجه غلط ف البيت دا
=قومي بس تعالي معايا عندي اخبار حلوة
شدتني من ايدي قومتني وراحت بيا عند جدتي في المطبخ
اول ما وصلنا هناك لقيتها بتقول بفرحة
ــ جدتك عاوزاكي تعمليلها خدمة ومنين ما هتخلصيها هتديلك مكافأة كبيرة أوي، هتكتبلك فدان أرض باسمك
رديت ببرود
=وايه هي الخدمة دي
ــ هتقريلها كتاب جدك
=انهو كتاب
لقيت جدتي ابتسمت وقالت
ــ اللي اختار يظهرلك حروفه يا بنت ابني يا غالية