رواية ضماد جرح الفصل الخامس 5 بقلم نوسه حمد
امي قالت لي بكره جايين ناس العريس واهلو يتمو الخطوبه قلت ليها يمه انا م عايزه اتزوج عليك الله خليني هي وابوي شاكلوني حسيت انهم عايزين يتخلصو مني وتاني يوم اهل العريس جو كانو اربعه رجال افتكرت انو ديل ابوهو واجدادو بس اكتشفت العريس واحد من الرجال الاربعه ديل واكبر من ابوي بي الف مره لمن شفتو جاني انهيار وهو م مصدق انو عايز يزوجني قالو لي نخليكم مع بعض عايز يشوفك شوفه شرعيه في وشو م قدرت اعاين وكل م يتكلم انا بنضرس منو قلت ليهو انا م موافقه وما عايزه اتزوج ممكن تخليني في حالي قال لي كيف الكلام دا انا اهلك ادوني كلمه زمان ودفعت فيك مال وقوله خير تجي تقولي م عايزاني وبقا جايط ابوي جا قال ليهو فشنو قال ليهم بتكم م عايزاني وانتو غاشني وزمني دا كلو شهريا ارسل ليها في مصروفها والمال الدفعتو بعد اكلتني وبي قروشي بقت زول تجي ترفضني انا بقيت م قادره افهم دا منو وشهريا كيف برسل لي مصروف والبشيلو منو ؟؟؟ابوي طلعني منو وبقا يهدي فيهو قبل م يطلع قال ليهم انا بديها اسبوع بس تنحبس بكره برسل ليكم حبستها والعرس طوالي وفات انا بقيت ابكي قلت ليهم بعتوني بالقروش وكيف شهريا تشيلو من الراجل دا مصروف انا لو كان خاطبني شهريا م كان قبلت منو مصاريف ابوي بقا م برد وامي مسكتني قالت لي اسمعي هنا انتي لازم تتزوجي م صدقنا لقينا راجل رضا بيك كلام امي صدمني قلت ليها يمه انتي ليه كلامك جارح انا مالي عيبي شنو عشان تشوفي لي راجل قدر جدي وكمان بتقولي لي بركه اللقينا راجل رضا بيك اقسم بالله لو حملت وولدت بالحرام م تسمي بدني بالكلام دا انتي ام عليك الله انا والله لو وافقت عليهو عشان امشي منك وارتاح كفايه حياه زله مدام انتو م عايزيني والدني ليه امي قالت لي الولدك منو ابوي طوالي بقا يكورك فيها يا ريا صمي خشمك دا خلي البت ترتاح وما تكتري كلامك قالت ليهو اسكت كده لمن تحمل بالحرام وتلد ليك اعرف تاني اتصرف قلت ليها شكرا يمه تربيتك لو حملت ولا ما حملت ومابقول ليك تربيتك لانك م ربيتيني التربيه دي كيف هي ما رضاعه وسنتين م واعيه ليك لا لا التربيه دي بعد اوعا توريني الصاح من الغلط وتفهميني الحياه دي بس انا ربيت نفسي بنفسي ح اكون البت الوحيده الربت نفسها بنفسها قالت لي ياهو دا الفضل بركه اللميتك من الشوارع قلت ليها ياتو شارع اللميتيني منو ابوي جا وقف ليها في وشها واداها كف لاول مره والشكله دورت طلعت منهم بره وبقيت ابكي معقوله البحصل دا معقوله امي تكون بالقساويه دي انا عملت ليها شنو ماعذبتا عشان تعذبني كده وليه ابوي ساكت واديتي لراجل اكبر منو راجل مشتريني بالقروش يعني م ح يحترمني ح يزلني ويهيني مابقروشو من حقو يعمل العاوزو واطلع من زله واهانه واقع في رحمه راجل ياربي تغير قدري انا م كويسه اتزكرت فادي وكلامو لي وكل م ازهج وابكي كل يوم بمر علي اقسا من القبلو وصابره وساكته وبعاين بعيوني اصعب شي ف الدنيا تقع تحت رحمت امك وابوك قدر م فهمتهم اني م عندي استعداد اتزوج رفضو الاسبوع تما وحبسوني ودموعي مغرقاني وجا اليوم الملعون يوم زواجي والحله كلها فرحانه لي الا انا والعرس والجوطه انا عباره عن دميه احركو فيها يمين تمش شمال تمش ودوني الكوفير من دخلت لمن طلعت ابكي البت اللبستني قالت لي عيونك فيهم حزن اتزوجتي عن حب ولا ولد اهلك قعدت اضحك قلت ليها حب وولد اهلي ابدا والله ولا واحد انا اتزوجت راجل عجوز قالت لي كيف انتي جميله تبارك الله كيف تتزوجي راجل كبير قلت ليها قسمتي كده اعمل شنو البت اتاثرت لي ولمن جا يسوقني كل الناس انخلعت انا بس اعاين وابكي عاوز امسكني من يدي قلت ليهو خلي اليوم دا يعدي علي خير تلمسني اقسم بالله اطعن نفسي بسكين واريحك عشان منظرنا قدام الناس اتفاداني قال لي بعرف انظمك كيف قلت ليهو م فارقه بس اياك تلمسني خالتو مياده وفاتن وفديه وفادي جو اول م شفت فادي وانا لابسه توب الجرتق ابتسمت واتخيلت راجلي هو وهو بقا م قادر يعاين لي انا كان نفسي اموت واتكلم معاهو وقلت ح اتهور واقول لي فاتن عايزه اتكلم مع فادي قبل يطلعو لانو ح تكون اخر مره اشوف فيها فادي م عارفه الراجل دا ح يوديني وين يا قتلني يا قتلتو المهم العرس تما علي خير قلت ليهم م ماشه معاهو الليله خليهو يجيني بكره امي شاكلتني قلت ليها م ماشه تعبانه ودا اخر كلام عندي وبقيت اكرها هي وابوي قبلت العرس دا عشان امشي منهم وحلفت تاني م اعتب عتبت بيتهم المهم قلت لي فاتن ممكن طلب قالت لي عيوني ليك يا عروسنا قلت ليها عايزه فادي قالت لي نوسه انتي بتحبي فادي م رديت عليها قلت ليها عايزه اوصيهو ممكن قالت لي طيب طلعت مني ونادتو لي فادي بقا م قادر يعاين لي قال لي نوسه ليه وافقتي ليه تعرسي الراجل الكبير دا فشنو ودا منو الاجبرك دا قلت ليهو لو رديت علي اسئلتك دي كلها ماف فايده بعد خلاص انا اتزوجت قلت ليهو قسمتي اصلا الغلابه قسمتهم كده اتاثر شديد قلت ليهو فادي عايزه اقول ليك حاجه قال لي قولي انا سامعك قلت ليهو بحبك فادي بقا يعاين لي وانا دموعي نازله غلبو البقولو قال لي نوسه م عارف احساسي بالتحديد اتجاهك شنو بس م ح انساك نهاي وشايفه الساعه الاهديتيني ليها من يوم لبستها م طلعتها بنوم بيها وبقوم بيها. م هاين علي اطلعها خلي بالك من نفسك يا نوسه انتي طيبه ما ح اقابل بت بطيبتك في حاجات ح تحصل بسببك وعايز اقول ليك انا سندك لو احتجتي لي وحبي زوجك وانسيني يا نوسه قلت ليهو لا م ح احبو لاني كلمتو قلت ليهو انا م عايزاك واتزوجني غصب يتحمل نتايح غلطو ح اسسفو التراب عشان تاني م يفكر يظلم بت قدر بنات اولادو قال لي لا ي نوسه ح تتبهدلي قلت ليها ابشرك انا من هسي اتبهدلت خلي الناقصه تتم وحسبي الله ونعم الوكيل فيهم ومعليش اعفي لي في كلمتي القلتها ليك انا جد مشاعري متلخبطه قال لي وانا كمان من يوم عرفتك مشاعري اتلخبطت مع حبيبتي وهي حست بالتغيير الحصل لي وشبه علاقتنا اتوترت بس م ح اخرب حياتك نوسه ربنا يسعدك ويهنيك يلا سلام انا ح ارجع لانو عندي امتحانات ودعني وفات انا قفلت علي الغرفه وبكيت قدرتي ونومتا بي مكياجي وكل الناس محتاره فيني الخلاني اقبل بالعريس دا شنو الصباح صحيت بصوت امي قالت لي قومي امشي الجيران عشان عاوزين نعمل كرامه والضيوف ح ننزلهم هناك جات بت اهلي ساقتني بيت ناس استاذه فاطمه نزار لاقاني في وشي حسيت نظراتو لي غريبه بعد بت اهلي طلعت وامو مشت بيتنا جاني داخل وانا كنت البس قال لي نوسه مبروك قلت ليهو تبارك لي شنو يا نزار انت مفتكرني موافقه عليهو قال لي عارف ي نوسه سمعت كلامكم مره وانا قلبي بتقطع قلت ليهو ما مشكله ي نزار انا قسمتي كده ربنا كريم قال لي نوسه البسي عبايتك وارح نهرب بقيت مخلوعه وبعاين ليهو قلت ليهو نزار نهرب شنو معقوله قال لي نوسه انا بحبك وانتي اول حب في حياتي كان نفسي اكمل تعليمي واجي اسوقك من بيتكم انا بقيت ابكي وهو زاتو يبكي قال لي نوسه م تبكي طاوعيني ارح نهرب انا مستعد اشيلك في راسي ولا اخليك تتهاني وتنزلي عشان راجل عندو قروش اهلك يجدعوك ليهو قلت ليهو نزار انت ذنبك شنو قال لي ذنبي اني حبيتك قلت ليهو م ينفع بعد اتزوجت انت م واعي للبتقولو هسي دا قال لي لا انا واعي ي نوسه وعارف بقول فشنو بس انتي اسمعي كلامي والله يا نوسه انا اكون ليك سند واب واخ وما احوجك لحاجه قلت ليهو نزار انت واحد عند امك وانا شفت امك تعبت فيك قدر شنو وعايزه تفرح بيك اجي انا بسبب حظي اخليك تهرب لا مستحيل يا نزار انا بتمني اسمع عنك كل خير ولا تتعذب في حياتك بسببي قال لي امي م ح تزعل لمن تعرف اني بحبك لانها بتحبك وشايفاك مظلومه نفسها تعمل حاجه عشانك بس للاسف م كملت كلامي معاهو بت اهلي قالت لي العريس جا وعايز يجي يسوقك لبستني التوب وقلت ليها اوعك تمكيجيني عايزني كده اهلا م عايزني يطلقني اهلي عرفو اني بقيت متحايله بي الطلاق ونهاي م قاعدين يسالوني عشان م اخزلهم وجات لحظه الوداع لا ودعت امي لا ابوي وهم زاتهم م شغالين بي العريس ساقني ومشينا بيتو طوالي طبعا في تفاصيل كتيره م عارفاها متزوج م متزوج سالتو قال لي اولاد اولادي متزوجين ومرتي متوفيه عايز اتزوج بت صغيره تهتم بي وتدلعني قلت ليهو اخترت غلط انا الاتنين م بعملن قال لي كيف الكلام دا قلت ليهو كده م خليتو تما كلامو دخل لي شنطتي غرفه النوم وقال لي اتفضلي دخلت استحميت ولقيتو ماف قفلت الباب علي بالمفتاح ونومتا نومه وهو داير يكسر الباب م فتحتو ليهو الا الصباح طوالي اداني امي بالتلفون بقت تنبز وتشتم فيني وانا مبتسمه بس لازم اجلطهم كلهم كنت مستمتعه اني رفعت ضغطهم وخشمي م فتحتو مع امي خليتا ردحت لي وقفلت الخط في وشها قلت ليهو ما تبقا زي الشافع اي شي تشكيني لي امي قال لي انتي ح تعذبيني معاك قلت ليهو دا نصيبك كده تستحمل قال لي قومي اعملي لي فطور انا عندي سكري وجاب ليهو كيس ملان ادويه قال لي التلفون دا جبتو ليك عشان تعملي منبه وتنبهيني للادويه دي انا م بتزكر اخدهم وصحتي ادهورت بسبب عدم اخد العلاج انتي خلي بالك من صحتي بي قلبي قلت كمان ممرضه اشتغل ومسك التلفون وظبط المنبه علي علاجاتو وقال لي انا نومي تقيل صحيني مواعيد حقنه الانسولين ومواعيد شنو وشنو قلت ليهو طيب نام هو وصوت شخريهو في السماء انا قعدت ف الكرسي وبقيت اندب في حظي وشيلت التلفون لاول مره م بعرف بستخدمو كيف قلت لازم زول يعلمني استخدمو كيف التلفون كل ساعه يضرب منبه حقنه السكري حبوب الضغط حبوب السيوله حبوب شنو وشنو جاني اكتئاب اكتر من الاكتئاب العندي عديت شهر بالطريقه دي قلت ليهو وديني اهلي رفض قال لي انا اهلك قلت ليهو انا مخنوقه حنستو واترجيتو وداني بيتنا وم كنت مشتاقه ليهم بس م عندي قبله اقبل عليها غيرهم بعد فات مني امي قالت لي كيف مع راجلك قلت ليها راجلي ولا العنايه المكثفه ياخ م خفتو فيني الله تعرسوني لراجل من الموت باقي ليهو جمعه قالت لي يسمع منك ربنا عشان تورثي العز الهو فيهو قلت ليها يعني انتي عايزاني ادمر حياتي بسبب القروش ياخ حرام عليكم زعلت منهم زعل وبقيت اتناقش مع ابوي وامي زعلت من كلامي قالت لي عشان اكون معاك واضحه لا انا امك لا دا ابوك انتي بت حرام ………..يتبع