رواية احلام ودموع الفصل الثاني عشر 12 بقلم ماريه عبدالله مسعود

رواية احلام ودموع الفصل الثاني عشر 12 بقلم ماريه عبدالله مسعود

مره واحده بالعمر 

ستعشق أحدهم بجنون

بغباء بلا تحفظ ستفعل أشياء كثيرة

لم تكن تتخيل أبداً بأنك قادر  على فعلها مرة واحده بالعمر

ستغمض عينيك وتعطل عقلك عن التفكير وترتكب حماقات سخيفة لا تخطُر على البال

مرة واحدة بالعمر ستشعر بأن لكلمة أحبك مذاقا آخر وبعدها

سيكون أعظم دروسك بالحياه💔

سحر بنت المايقوما 🤍

قالت لي بنتها الكبيره طبعآ حملت من ود جيرانهم بي الحرام وحصلت شكلة كبيره بين خالد راجل علوية وبين الجيران والولد  

رفض يتزوجها قال ليهم بنتكم لو محترمة او نافعة  وبنت ناس بتسلم نفسها لي وانا مابتزوج وحده لافة ساي 

وقالو هرب من البيت وخالد يومي عامل مشكلة مع أهل الولد

 وعلوية حالته صعبه والعجب خالد والبنت علوية سفرته لي اختها في مدينة تانيه لانو خالد حالف يضبحة قلت ليه لا حولا ولاقوة الابالله ربنا يكون في عونهم مايستاهلو والله قالت لي بعد الفضحية العمل فيك خالد وقال انو انتي بنت شوارع وبنت مامعروف ليك اصل قلت ليه حتى لو قال انا اتوجعت ليهم والله ولي بنتو ربنا يكون معها قالت لي والله يحليك مسكينة وخالد ياريت لو ماطلعك من البيت سكنتي جنبهم سنتين وماشافو منك ولا شفنا منك إلا خير خالد فات جاب الاذى لي بيتو قلت ليه ربنا أراد كده وحاولت اختصره 

 اختصرتها في الكلام وقلت ليه اتفضلي قالت لي مستعجله وفاتت دخلت وانا افكر في خالتو علوية بتكون اسه كيف يحليله مابتستاهل وانا من يوم شفت نظرات بنتها وحراكتها مع الولد قلت الله يستر بس الحمد لله قدر الله وماشاء فعل الله يغفر ليها ويغفر لي الولد وإنشاء الله تكون عرفت غلطتة وماتمشي تغلط تاني وتجدع الولد او تمشي تنزلو

دخلت البيت وكنت تعبانه شديد لقيت ياسين نايم دخلت عملت لي عصير وشلت ليو 

 عملت الغدا وبعدين قعدت انظف في البيت بكرا  العيد جو علي وطارق شايلين معهم حلاوة وبلح وجوز هند وسمس

 وجردل فيو خبيز شلت منهم ختيت ليهم الغدا وعملت شاي وختيت من الخبيز رجعت ظبط البلح بي جوز الهند والسمسم 

شلت ملابسهم الجديده كنت عايزه اغسله علي قال لي خليها انا بغسله  قلت ليو خلاص بساعدك وقعدنا نغسل هو يغني وانا اسمع فو قلت ليو علي حلمك شنو انت قال لي انتي وضحك ضحكت معاو قلت ليو جد قال لي جده قلت ليو غياظ قال لي بعرف ما حاجه جديده 

 غسلنا وشلت الملابس كويتها وانجدعت نمت كنت تعبانه صحيت على صوت الاذان وبعدو تكبير العيد بكيت بكا 

مع كل تكبيره كنت ببكي وبردد كان نفسي احضر العيد في بيت يكون فيو ام وابو واخوان واخوات واهل طلعت نظفت وبخرت وعملت الشاي جا علي شال مني الخرطوش وقعد يرش في الحوش ويكبر وانا اعاين فيو هو يعين ويضحك ويغمز لي 

 وطارق شال الشاي واتحرك على العريشه قعدنا نشرب ونتونس ونحكي ايام العيد كنا بنعمل في شنو

 لبسو وطلعو الصلاة لبست لي عباية وطرحة وشلت لي مصلاية ومشيت صليت كان صوت   الأطفال البلعبو  وصوت التكبير  حكاية تانية

 طلعت لي قروش وزعتها لي الأطفال

 قبل ما ادخل البيت مشيت دخلت لي الجيران واتحركت لي خالتو علوية وقفت جنب الباب ومتردد ادخل ولا لا رفعت يدي لي الباب وتاني اترجعت واتحركت انفتح الباب وكان خالد قال لي اتفضلي وسلم علي سلام حار كان منزل راسو وتحس بيو مكسور شديد بنتو  كسرتو حسبي الله على كل وحده بتكسر اهله 

قال لي اعفي لي يابتي وكان ببكي  انا فضحتك قدام الناس وماسترتك واسه انا بنتي فضحتني  والله اخد حقك مني

 وطرتك وانتي بنت وما راعيت لي ظروفك وانو انتي براك مامعاك زول وين بتمشي وين بتقعدي 

 الله عاقبني

 كنتي جنبنا ونحنا  ماشفنا منك إلا كل خير  عليك الله اعفي لي 

قلت ليو عافيه ليك وماشايله في قلبي وربنا يصبركم ويهدي بنتك ويغفر ليه 

وباركت ليو العيد قال لي اتفضلي دخلت لقيت خالتو علوية حالته صعبه بكت معي بكا وقالت لي بنتي انا فضحتنا ولتخت بي شرفنا الارض 

قعدت اصبر فيه 

طلعت منهم واتحركت البيت باركت لي على وياسين وطارق علي كان شايل العاب نارية ويضرب فيها مع الأطفال قعد اعاين فيو واضحك جا علي وقال لي الا تلعبي مد لي الألعاب ولعتها وجدعها فيو وهو كان واقف وبضحك مازح نهاي جريت عليو قلت ليو ابعد وانفحرت فينا انا قعدت اكورك هو وقف يعاين فيني ويضحك قعدت اضرب فيو وهو قام جرى 

دخلت وانا اضحك علي مجنون ياخي 

 اتصلت علي نفين قالت لي عندنا حفلة بمناسبة العيد في بيت رياض

قالت لي معزومة طبعآ قلت ليه تمام بجي 

علي جا داخل وجايب ليو خروف وقال عايز يضبحو قلت ليو تمام ضبحو وقعدنا نقطع في اللحم علي يشيل في الدم ويمسحو في وشي زهجت منو زهج خلصنا جبت الكانون ياسين وطارق ظبطو شيه ومراره وقعدنا نأكل 

 شلت من اللحم وزعتو لي الجيران علي شال كم صحن شيه قال لي في اولاد في الشارع عايز اشيل ليهم قلت ليو جدآ طلع فات بعد خلصنا غسلو معاي العده قلت ليهم عايزه امشي ابارك العيد لي يقين قالو لي معاك يازوله وطلعنا وصلنا لقينا يقين مشاء الله تلعب مع الأطفال باركنا ليه العيد ودخلنا سلمنا على امها وابوها امها قالت لي ماشين المنتزة الا تمشو معنا وطلعنا كان يوم رهيب علي قعد يغني وديل يشيلو معاو وياسين يصور 

 رجعنا مع العصر

 اتصلت  نفين قالت لي الحفلة من الساعة ٢ ليه ماجيتي وين انتي  قلت ليه انشغلت ونسيت بجي عليكم بعد شوية

دخلت البيت ودخلت غرفتي قلت البس شنو كنت متردده البس فستان وعمري ما لبستو ولا عباية وطرحه وقفت جنب الدولاب وقعدت اعاين قلت  فستان انا مابرتاح فيو طلعت لي عبايه بي العنابي وطرحة عنابية اطرافه بي الفضي ودهليز فضي عملت شادو بي البني خفيف وعدلت حواجبي وعملت روج بي الكبدي عاينت في المرايا لوني اسمر عيوني عسليه حواجبي غزيره رموشي طويله شديد عيوني كبار وزني نقص شديد حبيت شكلي مقبولة 

وصلت بيت رياض ودخلت لقيت عالم ودنيا البنات ديل وحده لابسه طرحة مافي كلهم لابس عريان الشعر كيف والفساتين كيف كانو انا مافي السودان 

 والحديقة مصممة بطريقه رهيبه في طاولات وكراسي  شايفه نفين لابسه ليه فستان بي الأسود قاعده في طاولة ومعها قصي وخالد وارام

 و شايفه رياض قاعد في طاولة مع نسيبه ومعهم كم بنت وولد اتحركت على نفين

 نفين قالت لي ايش هاد الجمال قالت لي زوقك راقي أرام قالت حبيت الاستايل سلمت عليهم وباركت ليهم العيد  وقعدت 

خالد قال لي مزه عيون الغزال وسمار الليل مارديت ليو قال لي الناس بتقول شكرآ ورفع حاجبو قلت ليو شكرآ وقعدت اتونس مع نفين الاغاني اتغيرت لي اغاني  رقص وكل الشباب قام يصفر 

 نفين مسكت قصي وقامت

 أرام قالت لي خالد يلا نرقص قام معها 

قعدت اعاين فيهم رياض كان قاعد في الطاولة ونسيبه ترقص ليه مع واحد عاين فيني ورفع يدو رفعت ليو يدي وابتسمت جا واحد قال لي ممكن ترقصي معاي قلت ليو اسفه ماعايزه قام قعد قال لي انتي عارفه انو انتي حبه نادره العباية والطرحة والون الاسمر والعيون العسلية انتي  نادره في زمن كلو متصنع قلت ليو اهااا شكرآ رفع يدو ومدها لي قال لي اسمي سيف قبل ما امد يدي رياض مده يدو وسلم عليو قال ليو تسمح لي اخذ سحر دقيقة وعاين فيني وقال لي  سحر ممكن دقيقة اتحركت معاو قال لي ماتقعدي براك حتيجيك عروض لي الرقص عاين فيني ورفع حاجبو 

قال لي تعالي اقعدي هنا وقعت معاو كنت بعاين لي نفين وقصي واضحك نفين وقصي برقصو بطريقة مضحكة والعجب قصي رياض قال لي ضحكت التفت عليو سريع  ونطط عيوني قال لي شينه وضحك 

ابتسمت قلت ليو عارفة 

قال لي بتشبهي البحر صافيه وواضحه شديد من برا بس من جوه انتي عميقة عميقة قلت ليو اها يامحلل الشخصيات ضحك اول مره اشوف رياض بضحك اول مره اشوفو بي قميص من غير بدلة

 قال جد والله شخصتك حلوة ومرحه وفيك حياه اوع تفقدي الشغف والحياه الفيك 

كنت بعاين فيو  وسرحانه هو بتكلم جات نسيبه وقالت ليو رياض يلا نرقص بي دلع مسكتو من يدو وقامت وانا قعدت اعاين فيهم

نسيبه ترقص وتضحك ورياض كان هادي وملامحو باردة قعدت اعاين فيهم رفع راسو وعاين لي حركت عيوني منهم سريع جات نفين قالت لي تعالي ارقصي معاي اتحركت معها كنت بصفق وبتحرك مابعرف ارقص ولا متعوده على الرقص 

 جا خالد وقف جنبي وكان لابس تيشيرت كحلي وبنطلون اسود مفلفل شعرو لابس خواتم وسلسل على شكل جمجمة قال لي مابتعرفي ترقصي وضحك قال لي عاين الحركات دي واعملي زيها ضحكت قلت ليو مابعرف قال لي بتعرفي وقعد يعمل في الحركات وانا اضحك قام شال المايك وقعد يغني صوتو مابطال جا وقف جنبي ووغنية لما شفتها قلبي دق تلات دقات  وغمز لي وضحك

 انا اتحركت ورجعت قعدت في الطاولة واعاين فيهم يرقصو ويغنو نيفين جات قالت لي يلا ناكل شي انا جوعانه واتحركت معها جا نفس عارض الازياء سلم على نفين ومد لي يدو قال لي سحر كيفك نفين قالت ليو مانسيتها قال ليه كيف بقدر انسا عيون الغزال قال لي ممكن ترقصي معاي نفين قالت لي يلا كنت عايزه اتهرب بس مالقيت طريقة واتحركت معاو كنت بصفق وهو برقص وبضحك وانا بتهرب من نظراتو قرب مني قال لي من يوم شفتك وانتي ما طلعتي من بالي زحيت منو 

قلت ليو والمطلوب قال لي نظره من عيونك بتكفي

 جا رياض وقف قال ليو ممكن ارقص معها الشاب قال ليو اتفضل وقف رياض قال لي شايف كل  الانظار عليك 

 رفعت عيوني لقيتو بعاين فيني من غير ما انتبه سرحت فيو وهو مركز مع عيوني كنا بنرقص واي واحد بعاين في التاني انا نسيت الموسيقا والناس وحتى انا وين كنت مركزه في عيونو 

جات نسيبه قالت لي الأغنية خلصت على فكره انا اتوترت واتحركت كنت مصدومة ليه سرحت كده اخ دا شنو البحصل لي دا اتحركت سريع وطلعت من الحفلة 

 ركبت المواصلات  وانا سرحانه وصلت البيت حتى ماقلت لي نفين  انا ماشه البيت ا ف اف اف 

تاني اعاين في وش رياض كيف دخلت لقيت ديل مافيشين  استحميت وغيرت صليت واكلت لي حاجه ونمت في السرير وانا اتخيل في عيون رياض ابتسمت وقلت معقول دا الحب البحكو عنو غمض عيوني وتاني ماحسيت بي حاجه صحيت الصباح على اتصال من رياض قال لي تعالي البيت عشان التصاميم عملت الشاي لي ناس  علي كانو نايمين ختيت ليهم الشاي في السيرمس وكبيت ليهم خبيز وطلعت وصلت بيت رياض دخلت لقيتو قاعد في الحديقة ويشرب في شاي لابس ليو تيشرت بي الأسود سلمت عليو عزمني شاي قلت ليو شربت قال لي عايزه ترفضي عزومتي قلت ليو مابحب اشرب الشاي مرتين واتحركت كنت خجلانه منو شديد  اتحركت لقيت البنات شغالات قعدت اشتغل معهم خلصنا وطلعت لقيتو طالع قال لي اركبي اوصلك قلت ليو شكرآ بمشي بي المواصلات قال لي تمام برحتك واتحرك ركب عربتو وانا طلعت وقفت في المواصلات ماكان في عربية وانا واقفه جا وقف جنبي قال لي عنيده اسه لو ركبتي كنتي وصلتي ارح اركبي اتحركت ركبت كنت ساكته وهو كمان قعدت اوصف ليو في البيت ولا كان شغال بي قلت ليو شارع البيت ما

 قبل ما اكمل كلامي عاين لي وابتسم قال لي عارف وممكن تسكتي انا عازمك فطور وصلنا مطعم ودخلنا طلب الاكل جات وحده سلمت عليو و قعدت كانو بتونسو وانا بعين فيهم رفعت يدي من الاكل وهو كل شوية بعاين وبرفع حاجبو 

لما شايفه الونسه طولت قمت قلت لي رياض يسلمو على الفطور عايزه اتحرك قال لي دقيقه انا طالع كمان البنت قامت قالت ليو وصلني معاك  وطلعنا

 انا من المطعم شفت لي ركشه ركبتها واتحركت ولا عاينت فيهم وصلت البيت عملت الغدا ودخلت الغرفة احضر في برامج العيد 

اليوم انتها صحيت الصباح وطلعت الشركاء حيت ادخل لقيت أرام جنب الباب سلمت علي وقعدت تتونس معاي وتضحك قالت لي كنت شايفاك مغروره وشايفه نفسك كنت غلطانه طلعتي ظريفه اسفه عشان اتعاملت معاك كده مدت يدها قالت لي صحبات مديت يدي ونحنا واقفين جات نسيبه سلمت علينا قالت لينا وانا كمان عايزه اكون صحبه  ومدت يدها مديت يدي دخلنا كنت مستغربه في التغير 

وصلنا نفين قالت لي هربتي من الحفلة ليه وضحكت قلت ليه كنت مصدعة جا رياض سلم علينا ووقف كان لابس بدلة ومدخل يدينو في جيب البنطلون ونحنا وقفين جا خالد كنا بنتكلم عن العرض وانو قرب رياض عاين فيني مسااااافه وانا عاينت فيو خالد مسك رياض من كتفو وقال ليو رياض نحنا كنا بنقول في شنو ومع ضحكه رياض قال لي وهو بتمتم اها اها عندي شغل في المكتب واتحرك

 أرام قالت لي اها يا سحوره المره دي حتعملي في العرض شنو اكيد عندك افكار زي المره الفاتت نسيبه قالت ليه اكيد وعايزين نعرف خالد رفع حاجبو وعاين فيني قلت ليهم ماعندي اي افكار والمره الفاتت كانت صدفه ما اكتر خالد قال لي انا عايز اتكلم معاك في موضوع ممكن قلت ليو اتفضل قال لي لا بعد نطلع من الشركة قلت ليو تمام واي زول اتحرك لي شغلو قعدت خالد جا وقعد في الكرسي الجنبي وقال لي ما قادر انتظر لي بعدين ما بقدر اركز في الشغل الا احكي ليك انو انا .....[.‏لا تتوقّع أن تعيشَ حياةً إيجابية وأنت ترافقُ أشخاصاً سلبيّين]...يتبع

            الفصل الثالث عشر من هنا

لقراءة باقي الفصول اضغط هنا