رواية خلف الابواب المغلقه الفصل الخامس عشر 15 بقلم مشاعر مبعثره
ي اختي الرجال ديل وااااحد ، ما تقولي لي بضمنو وما بعملا والله شيوخ عملوها ، اياك ثم اياك تضمني راجل .
: طيب اعمل شنو؟
: خليه يعرف انو انتي متاحه له .
قلعت عيوني ، قلت لها : عاوزاني اطلب منو شي ذي دا؟
: ما قلت اطلبي ، انتي ما تخليك مفتحه !! والفتي انتباهو بلبسك وجبهتك وكلامك ، انتي يا بنت حنه ما بتتحنني !! هو مانعك منها؟؟
: لا والله .
: معناها اتحنني وخليه يشوفك حلوة دائماً واتدلعي كدا واقعدي معاه براكم اتونسو .
: عادي بنقعد .
: وبتتونسو في شنو؟
: ونسه عامه ، عن الاولاد والحياة والحرب .
: اعوذ بالله .
: ليه بتستعيذي انا قلت حاجه غلط؟
: اسمعيني كويس ، اول قاعده ، انك لمن تنفردي به تنسي انو عندكم اولاد ، وتاني شي انتي اسي مالك ومال الحرب انتي يا ختي ماشه ترجعي تاني؟؟ ما خلاص دا بقى بيتك ، ومصيرك اتسطر هنا !! حاولو تتكلمو عن نفسكم انتو ، وتطلعو مشاوير مع بعض.
: مشاوير شنو انتي التانيه؟ نحن لاقين زمن؟ خليتيني اندم انو حكيت لك ، انا اصلا اتزوجتو عشان اولادي بس .
: بالله ، اسي بيني وبينك كدا ما قاعده تحسي بحاجه تجاهو؟؟
: طبعا هو زول نبيل ووقف معاي لمن كل الناس بقت علي ، ف اكيد بحترمو وبقدرو .
: انا ما بقصد كدا ، بالنسبه لشخصو هو كنزار !! مش ابو ليان ذي ما بتقولي ، ما قاعد يعجبك لمن تشوفيه؟ ما بتحسي بحاجه اتحركت جواك وتتلخبطي كدا؟ خليك من دا كلو ما حصل اتمنيتي انو يحضنك؟؟
قفلت اضاني وقعدت استغفر ، قالت لي : الشي دا ما عيب ولا حرام ، دا زوجك في حاجات كتيره المفروض تكوني بتحسيها معاه ، انا متأكدة انو بينك وبين نفسك متمنيه انك تعيشي معاه الحاجات دي.
انا طوالي غيرت الموضوع لانها اتمادت ، بس كنت بفكر فيه كل القالتو بحسو واكتر كمان ، ما عشان هو اي راجل وخلاص اتحركت فيني رغبة تجاهو ، لا !!! دي مشاعر عميقه وبحسها معاه هو خاصه ، بس ما عندي الشجاعه اعترف بالشي دا ولا حتى قدام نفسي ، اليوم داك بالذات ما كنت طبيعيه معاه وكل م اشوفو اتزكر الكلام دا لمن اخجل واهرب من نظراتو ، وهو كل شويه يسألني في حاجه؟ اقول له : لا.
مشيت اتحننت ذي ما قالت لي واتعمدت اني اقعد بدون طرحه واعاين له بقعر عيني ، هو زاتو قاعد يسترق نظرات ، حسيت انو بالجد كلام سميرة صح .
كنا قاعدين نحضر ، ومهيلم جاء يرضع !! عاوزه اقوم امشي به بس تاني قعدت ، كنت مستحضره كلام سميرة ولو اني خايفه اتجرأت ورضعتو في قدامو هو زاتو انخلع ، ما باقي له الا يقوم من قدامي ويحمحم كأنو بنبهني .
لين قالت له : في حاجه خانقاك يا بابا؟ قال لها : لالا ابدا .
انا ما عاينت له بس كنت متأكدة انو ركز معاي اتعاملت مع الموضوع كأنو عادي بس بتحاشى عيونو عشان ما يفضحوني .
لمن الاولاد نامو قعدنا مع بعض ، اتونسنا وهو كان بعاين لي جوا عيوني ، جهجهني شديد🙈
قمت ماشه قال لي : الحنه على يدك حلوة شديد .
: بالجد؟ عجبتك يعني؟
: ايوا .
مديت له يدي عشان يشوفا من قريب ، طوالي مسكا ما فكاها الا لمن مهيلم بكاء ، قلت له : تصبح على خير ومشيت.
سميره من الصباح تسأل فيني قلت لها : ما حصل اي شي وكلامك البتقوليه دا انا ما بقدر انفذو ، قالت لي : طيب انا عندي لك طريقه تانيه .
: شنو؟؟
: في قروب بتاع دكتوره اسمو (..............) بدخلك فيه وحاتستفيدي منها .
: دا فيه شنو كمان؟
: بعد اضيفك حاتفهمي بس اهم حاجه تقري البوستات وتعملي ذي ما بقولو ، واشتري من المنتجات بتاعتا والله تتظبطي خاصة الشعر واللون .
: كويس خلينا نشوف .
اول ما فتحت الفيسبوك لقيت الدعوه ، دخلت القروب لقيت صورة خلعتني قربت ارمي التلفون ، واتلفت يمين وشمال ما يكون في واحد من الاولاد حولي ، طلعت منها سرعه ، لقيت تاق من سميره في بوست عن المنتجات ، عجبني شديد ، دخلت لسميره خاص وقلت لها : يا بنت دي شنو الصور الهناي دي ، قعدت تضحك ورسلت لي : نحن كلنا نسوان مع بعضنا ومافي خجل ، انتي انسي الصور وركزي على المحتوى ، المهم بقيت اتابع القروب واقرا النصائح الفيه ولو انو الصور مرات صعبه ، والادمونات 🙈🙈🙈🙈
طلبت قروش من ابو البنات وانا خجلانه شديد قال لي : اي حاجه تحتاجيها اطلبي مني عادي دا حقك .
اداني اشتريت من منتجات الدكتوره لي وللبنات برضو للشعر .
بقيت ما بلبس الطرحه قدامو ، بقعد بالجلباب عادي اما هو ما بقدر يقول شي ، يوم جاء لقاني شايله التلفون وقاعده مركزة فيه شديد ، جاء وقف وراي وقال لي : بتعملي في شنو؟ من الخلعه قربت ارمي التلفون الا مسكو هو ، وشاف بوست صعب صعب 🙈🙈 انا الخجله قتلتني وغلبني البسويه ، هو زاتو انخلع ، مد لي التلفون ومشى ، انا لحقتو لجوا الغرفه .
قلت له : اسمعني .
: مالك؟
: انا ما عاوزاك تفهمني غلط .
: بالنسبة لشنو؟
: الشفتو اسي دا ، دا قروب نسائي عادي والله وياهو البطلب منو منتجاتي ، والبوست دا ما كنت بقراه والله .
: انتي بتبرري ليه؟ انا ما سألتك من شي .
طبعا ما قدرت افسر له ، وانا ما عندي تفسير اصلا ، ندمت على السبب الخلاني اسمع كلام سميرة وانحرج كدا قدامو . من يوما بطلت كل البعملو دا ، وحافظه حدودي معاه حتى اني بتجنب اتواجد معاه برانا ، وبلبس توبي او طرحتي زي زمان ، بس الحنه عادي ما وقفتا .
يوم جاء لقاني بكوي والوصله كل مره تجي واقعه لي قال لي
: تعالي اكوي جوا الغرفه .
بعد قمت ماشه تاني رجعت قلت له : لالا بكوي هنا .
: بس كدا صعب عليك ، اسمعي الكلام هناك البلك جنب السرير ومريح لك .
سكتت خليتو ، مشى جاب كرسي وجاء قعد معاي يونسني لمن خلصت ، وشال حقاتو دخلهم الدولاب ، انا مشيت انوم كنت تعبانه .
اتفقدت الاولاد كلهم الماراقد كويس صلحتو والفاتح غطيتو وحصنتهم ، بعداك ختيت راسي في المخده وقعدت اقراء سورة الملك ، فجاءة اسمع لك صوت حركه جاي من برا ، اتجاهلتو تاني اتكرر كم مره ، وشايفه ضؤ ، جسمي دا برد فجاءة وبقيت خايفه شديد ، قلت اكيد حرامي قمت براحه مشيت غرفة ابو البنات ، لقيتا فاتحه بس هو مافي !!........يتبع♥️