رواية خلف الابواب المغلقه السابع والعشرون 27 والثامن والعشرون 28 بقلم مشاعر مبعثره
27
لكن تعالو شوفو الفضيحه والمشكله القامت بينها وبين جارتا النازحه !!!! .
طلع المكيف حقها هي زااااتا !!! وبالأماره اولادا مخربشين فيه اسمائهم بورا 🙊 كانت فضيحه كبيره شديد ، وسميره دي دخلت في اظافرا ، وديك قالت لها : مكيفي ما بخليه لك لو على القروش الدفعتيها لبتاع الدفار انا بديك لها .
سميره خجلت وادتو لها ساي ، اما قروشا الله يعوضا بس .
من اليوم داك تابت ، وبقت سبب في توبة نسوان كتار في الحي من شراء الحاجات المسروقه ، لانو فضيحه بالجد يجي الواحد يلقى حاجتو المابتغباه في بيتك وانت مشتريها من حرامي !!.
حتى بتاع الدفار نزار بلغ فيه اظن عرف تاني ما شفنا وشو .
سميره بقت صحبه هي وامي ، عندهم نفس العقليه !! وبقو في حالة تداخل ، والاتنين بزنو على راسي بخصوص مرقت نزار الكتيره وتلفوناتو السريه ، والله شككوني زاتو بس ما حصل بينت لهم ولا له !!!!
يوم تلفونو دق وهو في الحمام ، انا كنت في السرير قريبه منو .
قمت وعاينت فيه لقيتو مسجل بعلامة صح خضراء بس ✅ !!!!!
طوالي خطفتو فتحت ، جاني صوت مرا !!!!!! 😱😱😱😱
انخلعت وهو جاء مارق قبل يخلص حمامو ، اتوتر لمن شافني شايله التلفون ، قلت له : فتحت و مافي زول برد .
خطفو من يدي ودخل به الحمام ، اجي؟؟؟؟؟!!!!!!
اول ما طلع من الحمام لبس وقال لي : انا طالع .
قلت له : وين؟؟
قال لي : ماشي المستشفى .
انا ولا سألتو تاني لكن زعلت زعل ، ودخلني الشك ، طوالي لبست توبي وطلعت وراه بحزر ، ما ركب اي مواصلات !!! وماشي برجولو ساي وقف في الدكان عبى الاكياس ، وماسك الشارع ماااشي جاه تلفون وقف في العمود رد ، انا اتخبيت وسمعتو بتكلم .
: ايوا انا جاي عليك ما تخافي خلاص ، والبنت خليها نايمه !!!!!!!
انا انصدت لحظتا ! لمن قعدت في الارض ، والله راسي دا بقى لافي عديل وما شايفه كويس ، وفي راسي مليون فكره وسؤال .
شايل اكياس في يدو ماشي لها !!! وبقول جاي عليك ما تخافي؟ وخلي البنت تنوم !! عرس فيني يعني وعندو بنت؟ ولا اساسا هو متزوج من قبل يعرفني طيب مخبي ليه؟
ما قادره حتى افكر !!!
هو اتحرك بعد قفل منها وانا تبعتو لمن لف
شايل اكياس في يدو ماشي لها وبقول : جاي عليك ما تخافي؟ وخلي البنت تنوم؟ عرس فيني يعني وعندو بنت؟ ولا اساسا هو متزوج من قبل يعرفني طيب مخبي ليه؟
ما قادره حتى افكر!!!
هو اتحرك بعد قفل منها وانا تبعتو لمن لف ، وشفتو داخل على المدرسه الورا بيتنا .
كانو في ناس قاعدين برا قروب كدا ، سلم عليهم ما عارفه بقولو في شنو وخايفه اتقدم اكتر يشوفني ، فجاءة سمعت صوت وراي
: يا اخت؟
: بسم الله الرحمن الرحيم
لقيتا مرا ، قالت لي : انتي ماشه للدكتور صح؟؟
: دكتور شنو؟
: القاعد يجي بليل يتفقد الناس !!
قلت لها : لالا ما بعرفو .
: دا ي اختي واحد من اولاد الحلال قاعد يجي يتفقدنا الله يديه العافيه.
: ومن متين الكلام دا؟
: قبل فتره كدا ، يوما ودينا لينا مرا كبيره المستشفى تعبانه وما كان عندها قروش ، والله رفضو يستلموها ولا دخلونا زاتو وكتير بتحصل ، لكن الدكتور دا جاء استلما وفحص لها الله يديه العافيه ، واشترى العلاج حتى لمن خرجوها بقى يجي يطمن عليها ، ويجيب لها الفواكه ، كان كل مره بلقى حاله فبقى كل يوم يجي يطمن على كل الناس عندو الجهاز حق الضغط بجي به وسماعه وكم جهاز كدا بفحص بهم الدم والبول العندو حاجه خفيفه بجيب له الدواء والتعبان بنقلو
المستشفى ويساهم في العلاج والله حبوب الضغط والسكري دي كانت معدومه عديل بس هو وفرا لينا ، مش بس كدا ، الراجل دا مستحيل يجي بيدو فاضيه ، ويوزع علينا المساعدات بدون فرز ، دا ما دكتور والله دا ملاك رحمه ، والله انا لحدي اللحظة ما عارفه اسمو لأنو ما بقولو ، وشكلو ما عاوز الناس تعرفو .
انا دمعتي قربت تجري لحظتا ، وفي نفسي قلت لها : والله هو ملاك رحمه غمرتنا كلنا .
قلت لها : اسي يعني هو جاء يتفقدكم؟؟
قالت لي : جاء من قبيل بس سمعت قالو في طفله تعبانه عمل لها عمليه قبل فتره امكن جاء عشانا ، قلت امشي اودي له ولدي بكح من امس ويقيس لي الضغط .
: الف سلامه عليك وربنا يديك العافيه انتي وولدك ، خلاص امشي م اعطلك .
انا رجعت البيت عشان ما يحس بي ولا يعرف اني تبعتو..
انتظرتو اول ما جاء راجع حضنتو وقلت له : نزار انا بحبك شديد .
قال لي : م انا عارف وبحبك اكتر 😉 .
قلت له : لا انا اكتر انت احسن راجل في الدنيا دي .
: بتتوحمي ولا شنو انتي؟ 😉
: لالا وحم شنو؟ ، انا اسفه لاني صرخت فيك اليوم داك .
: ياتو يوم؟
لمن قلت لك عامل نفسك عظيم وبتساعد الناس ، انت ما عامل نفسك انت اصلا كدا .
: لا عظيم ولا شي انا انسان عادي .
: انا عرفت انك قاعد تمشي تساعد الناس في المدرسه !!
هو انخلع شديد وبعد عني
: القال لك الكلام دا منو؟
: انت البتخبي ليه؟ عمل الخير بخبوه كمان؟ انت ما قاعد تعمل حاجه غلط ؛ عشان تتخبى كدا وتديني احساس الزول البغلط .
: سمر وطي صوتك ولو سمحتي ما عاوز زول يعرف .
: بس ليه؟ المفروض تتكلم عشان الناس كلها تعرف وتدعي لك .
: انتي ما قريتي الايآتُ بتاعة الصدقه؟؟ ﻗﺎﻝ ﺗﻌﺎﻟﻰ: ﴿ ﺇِﻥْ ﺗُﺒْﺪُﻭﺍ ﺍﻟﺼَّﺪَﻗَﺎﺕِ ﻓَﻨِﻌِﻤَّﺎ ﻫِﻲَ ﻭَﺇِﻥْ ﺗُﺨْﻔُﻮﻫَﺎ ﻭَﺗُﺆْﺗُﻮﻫَﺎ ﺍﻟْﻔُﻘَﺮَﺍﺀَ ﻓَﻬُﻮَ
ﺧَﻴْﺮٌ ﻟَﻜُﻢْ ﻭَﻳُﻜَﻔِّﺮُ ﻋَﻨْﻜُﻢْ ﻣِﻦْ ﺳَﻴِّﺌَﺎﺗِﻜُﻢْ ﻭَﺍﻟﻠَّﻪُ ﺑِﻤَﺎ ﺗَﻌْﻤَﻠُﻮﻥَ ﺧَﺒِﻴﺮٌ ٢٧١ ﴾
ربنا فضل الصدقه الفي الخفاء ، وخصاها بالتكفير عن الذنوب.
و الرسول صلى الله عليه وسلم :
: عليه الصلاة والسلام.
: قال في الحديث : « ﺳﺒﻌﺔ
ﻳﻈﻠﻬﻢ ﺍﻟﻠﻪ ﺗﺤﺖ ﻇﻞ ﻋﺮﺷﻪ ﻳﻮﻡ ﻻ ﻇﻞ ﺇﻻ ﻇﻠﻪ ». ﻭﻣﻦ ﻫﺆﻻﺀ ﺍﻟﺴﺒﻌﺔ: « ﻭﺭﺟﻞ
ﺗﺼﺪﻕ ﺑﺼﺪﻗﺔ ﻓﺄﺧﻔﺎﻫﺎ ﺣﺘﻰ ﻻ ﺗﻌﻠﻢ ﺷﻤﺎﻟﻪ ﻣﺎ ﺃﻧﻔﻘﺖ ﻳﻤﻴﻨﻪ ».
يعني المفروض انو الواحد يحاول قدر الامكان يخفي الموضوع حتى من اقرب الناس ، لاحظي حتى لا تعلم شماله ما أنفقت يمينه.........يتبع♥️
28
قلته ليهو : ربنا يجزيك كل خير يا نزار ، اصلا بسبب الصدقات واعمال الخير البتعملا دي ربنا موفقك ومسدد خطاك.
: الحمدلله ، والله ما طالب حاجه غير الحياة المستورة ، ونفضل مع بعض كدا وفي صحه وعافيه .
: ان شاء الله يارب.
: اهم شي الموضوع يفضل سر بيننا يا سمر ما تحكي لزول حتى في البيت هنا ما تجيبي سيره .
: تمام وانت برضو خليني اساعد بالاكل ، ممكن نعملو في البيت هنا كتير ونوديه لهم ، بشوف الجيران برضو لو عندهم باقي اكل ولا ملابس ما قاعدين يستخدموها نساعدهم بها .
: ايوا دي فكره كويسه.
: وكمان العدة يا نزار ، الناس ديل بحتاجو عده يشتغلو بها انا بستأذنك اديهم من الحاجات الزايده عندنا وما قاعدين نستخدما .
: تستأذني لشنو دا ما بيتك يا سمر؟؟ اتصرفي بالطريقه البتريحك ، واهم حاجه تزورو الناس ديل ، وتتفقدوهم اتونسو معاهم ساي حسسوهم بالانس والتضامن .
: انا زاتي عشت نفس الظروف وحاسه ب الحاسنو واكتر ربنا يقدرنا يا نزار .
: امين .
الصباح امي جات تستفسر شكلا شافتني لمن طلعت وراه امس قلت لها : مشى المستشفى ونسى حاجات مهمه لحقتها له ، ما صدقت طبعا بس م اشتغلت بها كتير🙊 لحدي ما كملت زيارتا ومشت .
بقيت في حالة تواصل دائم معاها هي وابوي واخواني ، وحتى الجيران الما كنت مهتمه بالحصل معاهم ، في السافرو بعيد واللسه قاعدين ، عندنا جارنا دا بيتو اتقصف هو واولادو كلهم استشهدو ، الحي بقى ما فيه غير بعض الرجال المصرين يحرسو البيوت والعفش حتى في الظروف الصعبه دي .
انا عرضت على سميرة فكرة نزار ديك ، ولانو هي بتعرف الناس اكتر مني ؛ اتواصلت معاهم ، وفي ناس رحبو بالفكره وبدينا البرنامج دا ، وكل اسبوع بنمشي بنتونس معاهم واتعرفنا عليهم وهم بقو يجونا كمان ، بس ولا واحده فيهم عارفه انو انا زوجة الدكتور القاعد يجي المساء ، ليان زاتا قاعده تمشي معانا ، وتتصور مع الناس وترسل الصور لصحباتا ، تنشرهم وتختهم استوريهات يعني عاده الموضوع متعه ، بس اتسبب لها ولينا في مشكله كبيره .
يوم جاء ابوها زعلان شديد ، وعلى غير العاده سلم بس ودخل الغرفه ناداها ، انا ما حبيت اتدخل بس كنت سامعه صوتو عالي اول مره اسمعو بنهرا ، وطلعت من عندو بتبكي ناديتا ما ردت علي وجرت غرفتا مشيت لنزار
قلت له : الحاصل شنو؟
اشر لي بيدو ، كان بتكلم بالتلفون وانا قاعده منتظراه يخلص بس قام طالع الا لحقتو في الباب
: الحاصل شنو يا نزار ماشي وين؟
: سمر انا ممكن اتأخر اقفلو الابواب كويس ونومو ما تنتظروني .
: طيب انت ماشي وين نزار نزار...
طلع خلاني ولا حتى رد ، مشيت ل ليان ، كانت بتبكي والاولاد متلمين فيها حتى مهيلم ، قلت لهم : يطلعو يخلوني معاها .
: في شنو يا بنتي؟
: مافي شي .
: لا في ، هداك ابوك طلع مستعجل وما قال لي شي ، انتو بتخوفوني كدا ، الحاصل بينكم شنو وريني؟ عارفه ابوك مشى وين؟
: ما بعرف والله يا ماما ، هو بس زعلان مني عشان بتصور مع الناس وانشر الصور ، شاكلني للسبب دا وقال لي انتي لو عاوزه تتصدقي عشان الناس تشكرك تاني ما تعملي كدا .
: ابوك كلامو صح يا ليان ، والا يكون عملك اتحول ل رياء !! نحن ما بنتصدق عشان نتباهى بين الناس !!! او نرفع من نفسنا ، لا !!!! لازم يكون غرضك المساعده وربنا هو البرفعك بالعمل دا ويكافئك عليه ، ﻗﺎﻝ ﺭﺳﻮﻝ ﺍﻟﻠﻪ ﺻﻠﻰ ﺍﻟﻠﻪ ﻋﻠﻴﻪ ﻭﺳﻠﻢ ( ﻛُﻞُّ ﺍﻣْﺮِﺉٍ ﻓﻲ ﻇِﻞِّ ﺻَﺪَﻗَﺘِﻪِ ﺣَﺘَّﻰ ﻳُﻔْﺼَﻞَ ﺑَﻴْﻦَ الناس ) .
: بابا زاتو قال كدا ، بس عنفني شديد .
: خلاص ما تبكي ، هو اكيد ما قصدو يزعلك ، لمن يجي تعتزري منو وتتصالحو .
انا بالي كان مشغول ، طلعتو دي ما ساي ، واصلا دا ما سبب يخليه يشاكل البنت كدا ، دا ما طبعو ، كان ممكن يتكلم معاها ب اسلوب احسن .
انتظرتو وهو اتأخر شديد ، اتصلت به ما برد ، لقريب الصبح حتى رجع لي ، رديت له بلهفه ، صوتو كان تعبان .
قال لي : انا بخير ما تخافي ، وبعتزر لاني طلعت بالطريقه دي .
: انت وين يا نزار والحاصل شنو؟
: والله مشكله كبيره ، تتزكري المرا الفي المدرسه؟ المشيت اشوف بنتها يوم تبعتيني داك .
: ايوا مالا؟
: طلعت مطلقه وداخله محاكم مع راجلا يلا هو ما كان عارف انها قاعده في المدرسة ، اول ما طلعت من الخرطوم وجات هنا ، قعدت في بيت الأسره ، بس اتملى ب اخوانا واخواتا واولادهم والبيت ضيق وما بتقعد ، قامت طلعت هي واخوها ب اولادهم قعدو في المدرسه ، و لأنو مافي تواصل يزكر بينها وبين طليقا ما عرف انها قاعده في المدرسه .
انا قلبي قعد يدق واتزكرت حكايتي ، لمن سكت وهو شغال لي الو... انتي معاي؟؟ قلت له : ايوا معاك كمل .
: يلا الراجل دا شاف صورة البنت في واحد من القروبات ، طلعت ليان متصورة معاها ورافعه الصورة في صفحتها وانتي عارفه الناس بتداول الصور الذي دي ، المهم الراجل عرف انو زوجتو دي هنا ووضعا صعب لدرجة انها عايشه على الصدقه طوالي جاء واخد البنت ، هي كانت فاكراه عاوز يخليها عندو كم يوم بس طلع بجهز لها في ورقا وعاوز يسفرا معاه مصر !!!
ختيت يدي في صدري بخلعه ، وقلت له : ما بصدق وانت عرفت كيف ؟
قال لي : المرا جاتني في المستشفى تبكي وحكت لي ، ما عرفت زاتو اعمل شنو؟ والمشكله انو الغلط من ليان بنتي وانا بتحمل المسؤوليه كامله .
: اها عملت شنو؟
: سألت عن الزول دا وطلع زميل دراسه سابق لإبراهيم اخوي ، وعندو رقمو ، اتصل لينا به عادي وسألو وين اراضيك ، قال في الباقير ، ابراهيم قال له : وانا طالع من الخرطوم وما لاقي مكان امشي له قال له : تعال حبابك
: اها والحصل شنو
: ركبنا انا وابراهيم واخو المرا ومشينا عليه ، اسي قاعدين معاه
: وعاوزين تقنعوه يرجع البنت لأمها يعني؟؟
: ان شاء الله يقتنع شايفو متعقد شديد من حكاية قعاد المدرسه دي لأنو من وصلنا اشتبك مع اخوها بعد تعب هديناهم ، الواضح انو المشكله بينهم كبيره وهم قبل اليوم مانعنو يشوف بنتو او حتى يصرف عليها ، انا اتصلت اطمنك بس ، وعشان تعرفو اني سافرت ، اعفي لاني طلعت بالطريقه دي ، بس والله كنت حاسي بذنب......يتبع♥️