رواية خلف الابواب المغلقه الفصل الخامس والعشرون 25 والسادس والعشرون 26 بقلم مشاعر مبعثره
25
لالا دا الجواك يا بنتي !! والبتفكري فيه ، ما مشكله قولي امي كعبه بس دي الحقيقه انا بقولا لك والله المرا دي بكرا تعرس راجلك وبتشوفي .
: يا امي لو عندي خاطر عندك ما تدخلي، وما تتكلمي مع نزار ولا تزعلي المرا دي لحدي ما تمشي ، ماشي حبيبتي؟
: اقول شنو عاد انتي اصلك عنيده وراسك قوي .
امي مع انها وعدتني ما تسألا بس ما عملت كدا دائما تجدع لها كلام وتحاول تبعدا عننا وشالا حركتا في البيت وانا ما عطاني اتجيهي ، وحتى نزار ما ريحتو طلعاتو الكتيره ديك حرمتو لها الا بتسحب ذي الحرامي .
كمان قاعده في الصاله النهار كلو كاميرات مراقبه بس 😂
يوم لقيت عرفه في المطبخ بتنضف وترتب لزمن متأخر والتوب عامل لها ربكه ومقيد حركتا اتزكرت نفسي زمان لمن ضحكت
قالت لي : مالك؟
قلت لها : اتزكرت موقف بس حصل لي في المطبخ زمان ، كفاك بعد دا امشي نومي بكرا بنساعدك نحن .
: لالا عاوزه اصحى الصباح القى المكان مرتب عشان اقدر اشتغل .
: قاعده تبزلي مجهود كبير عشانا مع انو المفروض انك ضيفتنا وواجب نريحك ، لو سمحتي امشي نومي وارتاحي .
: والله البعملو دا ولا حاجه ، وبعدين مافي مرا ضيفه ولا ما كدا؟؟
: اعفي لي كلمة طلعت بالغلط ، البيت بيتك يا عرفه
: هههههه عارفاك ما بتقصدي .
: خلاص طلعي التوب دا عشان ما يقيدك ، نزار ما بطلع تاني .
هي طوالي طلعتو وقعدت بالجلباب .
انا كنت عاوزه اعمل نسكافي لنزار ، لمن شافتني ماشه على البوتجاز حلفت ستين يمين تعملو لي ، بس انا رفضت ، اصلا عارفاه بحبو بطريقه معينه والا بلبن حليب ، ختيت اللبن يغلي وقعدت جنبها .
بقينا نتونس عن الرجال وأمورهم ونضحك ، قاطعنا صوت مهيلم كالعاده ، قالت لي : امشي على ولدك انا بعملو ولمن اخلصو بناديك توديه ، لالا انا جايه اسي ما تتعبي نفسك .
مشيت لمهيلم وهي قامت تعمل النسكافيه .
نزار كان في الغرفه وبدا يغفى زاتو بس جاه تلفون
طوالي قام على طولو ، لبس وجاء مارق كان سامع صوت الحركه في المطبخ افتكرني انا ، لاني مشيت اعمل له النسكافي ، قام دخل بدون ما يعمل صوت ، هي كانت مديه وشها للبتوجاز
: حبيبتي انا طالع خل............
قبل يكمل جملتو شافا وهي زاتا اتلفتت عليه ، من شدة ما انخلع ما قدر يعتزر زاتو ، بس اكتفى بإنو يكسر عينو ويطلع
امي شافتو طالع من المطبخ ، سلم عليها وقال : لها انا طالع جيت اكلم سمر افتكرتا في المطبخ : سمر في الغرفه : خلاص كلميها لأني مستعجل .
هي طوالي داهمت عرفه في المطبخ ، ولقتا بتلبس في التوب ، عاينت لها بطريقه اخير منها الضرب والإهانه ، وديك طوالي فهمت قالت لها : انا كنت شغاله ووو...... هو افتكرني سمر عش....
امي قاطعتا : وانتي شغل شنو بليل دا متين قاعده تساهري في الشغل؟؟؟ انتي عارفه البيت دا فيه راجل؟؟ ، اسي ما شايفانا كلنا بنتلم جوا من يجي العشاء عشان نخلي الراجل ياخد راحتو مع مرتو : انا انا والله : انتي كنتي قاعده بدون توب كمان .
انا جيت على اصواتهم العاليه وبسأل ، ما قادرة افهم شي عرفه صوتا ضعيف شديد قدام صوت امي .
قالت لي : انا اسفه يا سمر ، زوجك جاء داخل وافتكرني انتي...
امي قالت لي : لقاها قاعده ماخده راحتا بدون توب ما غلط الكلام دا
قلت لها : انا القلت لها تطلعو عشان تاخد راحتا ونزار فعلا ما بطلع تاني .
: لالا غلطانه اظنك ، هداك طلع اسي ، بعد دخل لعرفه المطبخ .
عرفه عاوزه تتكلم قلت لها : ويعني شنو لقاها ؟ دا سؤ فهم بس ما تكبرو المواضيع وتسمعو الاولاد .
عرفه دي قعدت تعتزر وتبرر وعاوزه تبكي عديل
هي من نوع الناس البسيطين شديد وعلى نياتهم حتى في التعامل ، خلت كل شي ومشت الغرفه ، عاوزه الحقا امي مسكتني من يدي .
قالت لي : انا قلت لك شنو؟ هدي بدت حركاتا ، والله يا سمر احسن لك تمشي المرا دي من بيتك ، لأنها خلاص لفتت انتباهو.
: دا كلام شنو ي امي؟ ما صح منك والله ، اسي زعلتيها ،وبعدين نزار دا انا واثقه فيه اكتر من نفسي .
: انتي ما بتتوبي من الرجال اصلك !!! الا تتكرر معاك نفس الحركه وتطلقي تاني .
: انتي جاده بتشبهي نزار بالتافه داك؟ استغفر الله العظيم
: يا بنت انا شفتو بعيوني طالع من عندها ، وهي بتلبس في التوب.
: ويعني شنو؟؟ ، اسي ما قلتي قال لك افتكرا انا؟ ، واصلا لو ما كان عارفني مشيت المطبخ ما كان دخلو كدا ، او بالاحرى ما كان دخلو اصلا .
: اها وهي الخلاها تقعد في المطبخ للزمن دا شنو؟ فسريها لي
: شغاله ي امي الله ، يرضي عليك ما تدخلي نفسك في كلام ذي دا !!! لأنو حرام ، ومن الكبائر قذف المحصنات ، غير كدا المرا متزوجه حتى لو مشتكيه راجلا هي لسه على زمتو .
: هه والكان مصاحبا طليقك ديك ما كانت متزوجه؟؟؟
انا لحظتا حرارتي وصلت لأقصى ارتفاع ، وقربت انفعل فيها ذي زمان بس اتزكرت كلام نزار والايه الكريمه ، غمضت عيوني وقعدت اتنفس بصوت مسموع لحدي ما هديت شويه ، قلت لها : انا م اتطلقت بسبب مرا ، علاقتنا كانت منتهيه اساسا ، وواقفه على شعرا رفيعه انقطعت بسهوله ، بس نزار دا حاجه تانيه ، لوتعرفي كمية الاحترام والتقدير الخاتيه لك والمكانك المديك لها ما بتقولي عنو كدا ، لو سمحتي ما تحسسيه بإنك شاكه فيه لو سمحتي ي امي.
: خلاص سكتنا ، اصلا هم ما بعملوها واضحه كدا قدام الناس ، لكن ممكن يعملوها برا عادي ، اسي شوفيه طلع بدون حتى ما يعبرك والله اعلم مشى وين وبعمل شنو .
: اسي ما قلتي كلمك؟
: قال قولي لها!!! مش كان المفروض يمشي يكلمك بنفسو؟؟؟ ولا بعيده يعني الغرفه لمن ما قادر يصلك فيها؟
: استغفرآلَلَهّ العظيم ي امي ، انتي عاوزه تجننيني صح؟؟ عاوزاني اموت بضغط ولا سكري؟؟؟
: لالا سلامتك عاد انا خشمي قفلتو ، انتي حره بس بعدين ما تقولي انا ما نبهتك .
مشيت لقيت عرفه بتبكي وعاوزه تمشي والله بعد تعب حنستا واقنعتا تقعد لمن اهلا يجو .
اما امي بعد الموقف دا بقت حاكاها معاها شديد مانعاها تطلع من الغرفه طالما نزار قاعد ، وهو زاتو بقى يعمل حسابو شديد....يتبع♥
26
مشيت لقيت عرفه بتبكي وعاوزه تمشي والله بعد تعب حنستا واقنعتا تقعد لمن اهلا يجو .
اما امي بعد الموقف دا بقت حاكاها معاها شديد مانعاها تطلع من الغرفه طالما نزار قاعد ، وهو زاتو بقى يعمل حسابو شديد لو عاوز يطلع من الغرفه ساي بتصل بي يقول لي امان؟؟؟😅😅
طبعا يوم الخميس دا نحن عندنا سهره خاصه وبنجهز له فيلم ظااابط وبوشار ومقرمشات
عرفه يا عرفه ، امشي يا بنتي نادي خالتك عرفه تاكل معانا بوشار .
امي قالت لي : خليها نايمه انا باكل معاها بعدين ، امشي انتي وراجلك اكلو في غرفتكم واقعدو مع بعض شويه .
: ي امي نحن اصلا بنقعد هنا كلنا بناكل البوشار ونحضر مع الاولاد .
: معناها تغيروها الحركه دي ، الراجل بقضي نص يومو برا شايفاه ، ياها الكم ساعه البقعدا دي تعدوها مع الاولاد؟ عشان كدا نافر منك وبطلع برا كتير والله تلقيه لما له في واحده .
قلعت عيوني وقلت لها : ي امي وطي صوتك عليك الله لو واحده من البنات سمعتك تقول عليك شنو؟ نزار دا زول محترم والبتفكري فيه دا كلو اوهام وبعدين هو بحب اولادو .
: ما غيرو كان محترم وبحب اولادو الحصل شنو؟؟
طبعا هي بتلمح لي وقصدا طليقي عارفه السيره دي بتعصبني ، وفعلا كنت على وشك الانفعال بس ضبطت نفسي وسكت منها
مشيت لعرفه جوا وقلت لها تجي ، قالت لي : لالا باكل منو بعدين
: طيب والفيلم تحضريه متين؟ تعالي ساي .
: بصراحه يا سمر امك ما حابه قعادي ، وانا ما بلوما لأني تقلت عليكم شديد بس......
قاطعتها : اوعا اسمعك تقولي كلمة تقلت عليكم دي ، ونزار زاتو ح يزعل كدا ، انتي مننا وفينا لو ما وقفنا معاك اسي فايدة الجيرة شنو؟ والله لو تقعدي العمر كلو انا ما بتضايق منك .
ولو على امي انا بتكلم معاها ، شايفاها عاصره عليك .
: لالا عليك الله ، انتي لو اتكلمتي الموضوع بكبر وهي ح تكرهني اكتر وبحصل شرخ بينك وبينها انتو من جديد متصالحين ، انا ما عندي مشكله اسي صدقيني بتحمل كلها فترة ما تصعبيها علي انتي برضو .
: خلاص يا عرفه على راحتك ، لكن اكل براك مافي !! وعندك حاجه عاوزه تعمليها تطلعي طوالي ما غرضك بزول ، غير كدا انا بحترم خصوصيتك .
: كتر خيرك يا سمر .
طلعت لهم برا وقبل اقعد نزار اتصل بي ، مشيت له الغرفه
قلت له : خير يا ابوليان؟ ومالك ما جيت لحدي اسي .
: والله يا سمر دا السبب الناديتك عشانو ، اسي لو طلعت عشان اقعد معاكم والدتك بتقوم وتدخل جوا وكمان تنادي الاولاد وانا ما بقدر اقول شي لاني محترم حكاية انها ممكن بتخجل من وجودي ، بس والله اشتقت للقعده معاكم .
اخدت نفس وقلت له : ما قصة خجل منك ، انا السبب في الحاجه دي !! هي غرضا انو نكون مع بعض ومن قبيل بتقول لي امشي اقعدي مع راجلك .
: بس ليه ما وضحتي لها انو نحن حابين نكون معاهم .
: قلت والله يا نزار ، بس هي وجهة نظرا غير ، شايفا انو كدا انا بنفرك مني ومن البيت والاولاد ، امي اصلا كدا ودي طبائعا انا بعرفا كويس وللسبب دا اختلفنا كم مره زمان .
واتشاكلت مع طليقي برضو لاسباب ذي دي ، وشك دائم فيه بس الفرق انو شكها طلع في محلو ، واتوالت المشاكل بيننا لمن طلقني وطفش .
: ههههههههه يعني هي خايفه انو اطلقك؟
: شايف الموضوع تافه كيف؟ .
: عيب ما تقولي كدا خلاص خلينا نسايرا .
: انا زاتي قلت كدا على الاقل فترة قعادا .
مشيت جبت البوشار ونحن حضرنا من اللابتوب بتاعو وهم برا حتى انها نادت عرفه وياريت لو ما عملت كدا 🤦🏻♀️
في قدام الاولاد قالت لها : خلاص تعالي مارقه اقعدي معانا الراجل ما جاي !!!
عرفه اتحسست شديد وفي ليلها اتصلت ب أهلا واستعجلتهم لمن جو و ساقوها عاد بكينا معاها بكاء لمن جات تمشي !!! الا امي المبسوطه .
راجلا طبعا كان لسه محبوس وهي طلبت منو الطلاق ، قعد يقل ادبو ورافض يطلقا ابوها دا قرب يضربو .
هي اصلا كانت فاتحه فيه بلاغ ، ومشينا كلنا شهدنا معاها على انو قاعد يضربا وما مره ولا اتنين .
نزار دا طبعا شاف بعيونو وشهادتو هي الخدمتا اكتر ودانتو ف انجبر يطلقا ب الأضافه لقضيتي انا اتحاكم بالسجن والغرامه وعرفه كملت اجراءتا وسافرت مع ابوها مصر .
طبعا سميره كانت مسافره لمناسبه الفتره ديك ، وفاتتا كل الاحداث ، الا لمن جات سمعت من الناس ، وعرفت ب اجهاضي جاتني وشغلتا لي تشغيله جد .
: يا مرا يا كذابه يا قادره شغاله لي مافي شي بيننا وما بقرب مني وبتاع ، لمن حملتي منو😏 ولو م الاجهاض دا ما كان انكشفتي😏
: انتي ما بتفوتي حاجه يا مرا؟ 🙈
: لالا ما بفوت والله ، وتاني ما بصدقك مهما قلتي اصلكن قادرات خلاص يا نسوان الخرطوم ، والله حقو افعلو لك هاشتاق النازحه الحامل !!😅😅😅
: اجي؟ ما لي حملت بالحرام؟ ما عرست .
: ما دا ياهو زاتو الكلام لميتن في رجال الاقاليم شلب.
: بري يا ختي انا ما شلبتو ، وارمل الحمدلله ولا ضره ولا وجع راس .
: والله انتي فتحتي الطريق بس ، وتاني ووووب علين رجالنا ديل الا نحبسهم في البيوت من النازحات .
قعدنا نمهزل ونضحك في الموضوع .
قالت لي : عموما ربنا يعوضك ي اختي ، وتتهني ان شاء الله مع راجلك .
: امين يا سميره .
: صحي زكرتيني في راجل بجيب عده بالدفار واثاث ، والله يا سمر شدة ما رخاص الا ما يكون عندك قرش في يدك بس ، بكرا جاي خلينا نمشي عليه .
: بس ما يكون من سوق دقلو؟
: بري ي اختي وبعدين قولي منو ، نحن ذنبنا شنو؟ مالنا نحن السرقنا؟ نحن لقينا بضاعه معروضه واشترينا بحقنا يتحاسب السرق .
: لا يا سميرة 🤚🏻عندكم نفس الذنب !! لأنكم اشتريتو منو وانتو عارفنو حرامي .
: امكن ما حرامي !!!! ، هو زاتو مشتريهم .
: طيب ليه ما ببيع بسعر السوق؟ اي حاجه يا سميره لقيتي سعرا قاسم النص واقل دي مسروقه !!! كان الكترونيات كان عده كان غيرا انا غايتو وريتك وانتي حره.
هي طبعا ولا اشتغلت بكلامي مشت اشترت عدة كتيره وكمان لقت لها مكيف نسمه متحرك رخيييص همله جابتو .
لكن تعالو شوفو الفضيحه والمشكله القامت بينها وبين جارتا النازحه !!! ......يتبع♥