رواية خلف الابواب المغلقه الثالث والعشرون 23 والرابع والعشرون 24 بقلم مشاعر مبعثره
23
فتحت الباب وكانت المفاجأة !! 😱😱😱😱انا حسيت بهبوط عديل كدا لمن شفتا ، وعاوزه اجري بس ، من الموقف دا ،
عاجلتني وجرتني من يدي ، ضمتني على صدرا وهي بتبكي وتقول بنتي !! وانا بردد في نفسي
: امي !!!
اخر حاجه كنت اتوقعا اني اشوف امي بعد الشهور دي، امكن تميت اكتر من سنه عديل ما شفتا، قعدت ابكي بكاء وهي زاتا ما هدأت .
قالت لي : كدا يا بنتي تخاصمي امك وتقطعي الخبر؟ حتى ما قلتي لي انك اتزوجتي بس اتفجأ ب انك حملتي واجهضتي!! ما حرام عليك البتعمليه فيني دا؟ والله ربنا يحاسبك على الجرح السببتيه لي .
: حقك علي ي امي ، انا اسفه والله العظيم كنت ناويه احكي لك بس خفت من ردة فعلك انتي و...... ، ابوي كيف ي امي؟ م جاء معاك؟؟؟
: ابوك خليه ساي هو التاني، زعلانه منو اكتر منك عارف وساكت.
: واااي انا، ابوي عارف؟
: ما دا الشي التعبو زاتو .
عاوزه اتكلم قالت لي : ما تخافي عليه صحتو كويسه ، لو كانت في حاجه متعباه فهي قلبو الملهوف عليك وما قادر يتكلم معاك ولا يعرف عنك شي، يخسي عليك يا سمر والله ما قادره اسامحك، لو ما كنت امك والله م اعاين في وشك .
قعدت ابوس يدها وابكي : لالا عليك الله ما تقولي كدا يما😭😭
تاني حضنتني ورجعت تبكي ، على اصواتنا جو الاولاد ، هاني طلع متزكرا ، جاء جاري لها
: حبوبه حبوبه ، وحضنا ، بس شادن نستا .
قامت حضنتهم الاتنين وبقت تبوس فيهم ، وعرفه والبنات جو.
انا كنت لسه مصدومه! ما قدرت حتى اعرفهم على بعض بس قعدت في السرير البرا .
ليان قالت لهاني : دي حبوبتك؟
امي قالت لها : ايوا انا ام سمر يا بنتي، انتي اكيد ليان .
قالت لها : ايوا .
مسكتا حضنتا هي ولين ، طبعا الفتره دي كلها هي م انتبهت لوجود عرفه!!! الا لمن قالت لها : اتفضلي لجوا يا خالتي .
امي عاينت لها من فوق لتحت وظهر عليها الانزعاج قالت ل ليان : يعني انتو امكم عايشه ؟
: لالا يا حبوبه امي متوفيه من زمان .
عاينت على عرفه ، ليان قالت لها : دي خالتو عرفه جارتنا وقاعده معانا الفتره دي، عرفه جات سلمت عليها بحراره وامي بارده معاها ، عاينت لي وهي رافعه حواجبا .
المهم دخلنا كلنا جوا بعد انا طلعت من وضع الصدمه، وبعد السلام والعصير والمجاملات نزار جاء وسلم على امي بدون مصافحه ، وقال لها : قيلتي كيف؟ وكيف مع تعب السفر؟؟
قلت له : انت بتعرف امي؟؟
قال لي : اليوم اتعرفنا .
امي قالت لي : هو الجاء استقبلني في الميناء وركبني العربيه الجابتني هنا ، راجلك بقى احسن منك والله لو ما كلامو ما كان عاينت في وشك!! ياخ تتزوجي براك كدا زي الماعندك أهل؟
عاينت لنزار جاء قعد جنبي وقال لي : اسف لاني اتصرفت بدون علمك !! بس اضطريت اعمل كدا ، انا كان مستحيل اعقد عليك بدون علم اهلك ، عشان كدا شلت رقم ابوك من تلفونك واتصلت حكيت له يوم العقد الصباح قبل اطلع ، كان زعلان شديد وقال لي : دي م أول مره تتخطانا ، قبلها اجبرتنا نزوجا لواحد ما نافع رماها ذي « الكلبه 💔 » واسي خجلانه تتكلم !!!
قلت له : الفات دا انتهى خلاص ، وشرحت له ظروفنا وطلبت موافقتو ، لأنو الزواج ما كان ح يتم اصلا بدون موافقتو
الرسول صلى الله عليه وسلم .
: عليه الصلاة والسلام .
: قال : « ﻻ ﻧﻜﺎﺡ ﺇﻻ ﺑﻮﻟﻰ ﻭﺷﺎﻫﺪﻯ ﻋﺪﻝ » والا الزواج حايكون باطل برضو لقوله صلى الله ﻋﻠﻴﻪ ﻭﺳﻠﻢ : « ﺃﻳﻤﺎ ﺍﻣﺮﺃﺓ ﻧﻜﺤﺖ ﺑﺪﻭﻥ ﺇﺫﻥ ﻭﻟﻴﻬﺎ ﻓﻨﻜﺎﺣﻬﺎ ﺑﺎﻃﻞ »
ابوك هو العين لك الوكيل !! قال لي : اعقد بس البنت دي تاني انت المسؤول الوحيد عنها ، وما عاوز اعرف اي حاجه عنها ، وحتى والدتك ما حكى لها !! اكتفى ب إنو يقوم بدورو كأب لك .
ردة فعلو كانت عنيفه شديد ، وما قبل يرضى عنك رغم المبررات القدمتا له ، عشان كدا ما حكيت لك وفضلت انو انتي تحكي له بنفسك امكن يسامحك ، بس رفضتي ، وبعد الحادث الحصل لك دا حسيت انو لازم ارجع احاول ، عساه يشفع لك .
اتصلت به ، ولمن عرف انك تعبانه خاف عليك شديد ، حتى انو حكى لامك وسمح لها تجي تزورك !! هو الاداني رقما اتواصلت معاها لمن ركبت ، بس برضو زعلان .
انا افتكرتك مخبيه عنهم موضوع الزواج بس ، اصلو ما اتوقعت تكوني مقاطعاهم كدا .
سكتت🤐
امي قالت له : والله سمر بنتي ، لكن قلبا كعب .
قلت لها بغضب : تاني ي امي ح نرجع للمواويل دي؟
: هدي سكت ، نسوي شنو عاد؟؟!! ، اولادنا وبقينا مجبورين ننكسر لهم .
نزار ناداني بالجنبه كدا ونهرني : اوعا تتكلمي مع امك بالطريقه دي؟ انتي ما واعيه ولا شنو؟ المفروض انك ام زيك وبتقدري شعورا ، اسي تقبلي واحد من اولادك يتكلم معاك كدا؟
: انت ما عارف حاجه عن البيننا .
: ولا بهمني اصلا بكفي انها امك !! لو كافره عديل تحترميها ، على الاقل قدام الناس !! انا ما بتحمل اشوف حاجه ذي دي .
نزلت راسي وسكت ، قام حضني حضني !!
قال لي : يا سمر يا حبيبتي انا ما عاوزك تزعلي ، ولانك بتهميني ما بتحمل اشوفك في الغلط واسكت ، عقوق الوالدين دي من الكباير وبتدخلك النار ، شايف الناس بقت بتستهونا ياخ ربنا سبحانه وتعالى قال : (( وَقَضَى رَبُّكَ أَلَّا تَعْبُدُوا إِلَّا إِيَّاهُ وَبِالْوَالِدَيْنِ إِحْسَانًا إِمَّا يَبْلُغَنَّ عِنْدَكَ الْكِبَرَ أَحَدُهُمَا أَوْ كِلاهُمَا فَلا تَقُلْ لَهُمَا أُفٍّ وَلا تَنْهَرْهُمَا وَقُلْ لَهُمَا قَوْلًا كَرِيمًا وَاخْفِضْ لَهُمَا جَنَاحَ الذُّلِّ مِنَ الرَّحْمَةِ وَقُلْ رَّبِّ ارْحَمْهُمَا كَمَا رَبَّيَانِي صَغِيرًا ))
نزلت راسي قال لي : اها مالك؟ سمر انتي ما كدا !!! ، ما تنغشي بعادات المجتمع الضاله واستهتارهم بالتعاليم الدينيه والاداب ، خاصة في الامور الكبيره دي ، والله بنوعج شديد لمن اشوف زول بتزهج ويتنهر في والديه ، ولا يصرخ عليهم ويقول لهم كلام كعب ، والحاجه دي بقت منتشره شديد ، والاسواء انو عادنها عادي ، لانو غالبا الاهل بنكسرو لهم في حين انو التصرفات دي بتزعلهم شديد ، حتى لو ما اظهرو قدام الناس ، وانتي ادرى يعني شنو ام !! لأنك انتي كمان ام..........يتبع♥️
#خلف_الأبواب_المغلقه_24
بقلمي : مشاعر_مبعثره
ربنا سبحانه وتعالى قال : (( وَقَضَى رَبُّكَ أَلَّا تَعْبُدُوا إِلَّا إِيَّاهُ وَبِالْوَالِدَيْنِ إِحْسَانًا إِمَّا يَبْلُغَنَّ عِنْدَكَ الْكِبَرَ أَحَدُهُمَا أَوْ كِلاهُمَا فَلا تَقُلْ لَهُمَا أُفٍّ وَلا تَنْهَرْهُمَا وَقُلْ لَهُمَا قَوْلًا كَرِيمًا وَاخْفِضْ لَهُمَا جَنَاحَ الذُّلِّ مِنَ الرَّحْمَةِ وَقُلْ رَّبِّ ارْحَمْهُمَا كَمَا رَبَّيَانِي صَغِيرًا ))
نزلت راسي قال لي : اها مالك؟ سمر انتي ما كدا !!! ، ما تنغشي بعادات المجتمع الضاله واستهتارهم بالتعاليم الدينيه والاداب ، خاصة في الامور الكبيره دي ، والله بنوعج شديد لمن اشوف زول بتزهج ويتنهر في والديه ، ولا يصرخ عليهم ويقول لهم كلام كعب ، والحاجه دي بقت منتشره شديد ، والاسواء انو عادنها عادي ، لانو غالبا الاهل بنكسرو لهم في حين انو التصرفات دي بتزعلهم شديد ، حتى لو ما اظهرو قدام الناس ، وانتي ادرى يعني شنو ام !! لأنك انتي كمان ام ، والرسول صلى الله عليه وسلم .
: عليه الصلاة والسلام .
: وصى عليها ، وقال امك ثلاثه مرات في الحديث الغني عن التعريف ، ديل الجنه تحت اقدامهم يا سمر .
: كلامك صح يا نزار .
: وبعدين انتي اعترفتي لي بانك المقصره والغلطانه ،وخجلانه منهم وما عاوزه تحمليهم مسؤوليتك ولا تنكسري قدامهم ، اسي شوفي امك انكسرت عشانك كيف؟
: انا ح اعتزر لها واصالحا ما تخاف .
: وتتصلي ب أبوك دا ضروري لانو اكيد قلقان حاليا وما قادر يتصل ويسأل ، اتصلي بالإيمو واعتزري له لمن يسامحك ، اسي هو نسى كل العملتيه وخايف عليك عشان أجهضتي ، دي فرصتك الوحيده عشان تكسبي رضاه وتستدري عطفو .
:حاضر اسي بتصل .
عاوز يمشي ، ناديتو : نزار !!
: نعم .
: بشكرك من قلبي والله ❤ ممنونه لك لانك عملت كدا ، دي اكتر خطوة كنت خايفه منها مواجهة اهلي بعد الزواج ، وانت سهلتا علي وقمت بالخطوة الاولى قبل حتى م انا أعرف .
: دا واجبي م اكتر يلا ما تتاخري عليها .
: حاضر حبيبي .
: وتعالي اتغدي معاي عشان.......
: حاضر حبيبي ولا يهمك🥰
طبعا عارفاه بخجل ، وكمان ما بحب يقيد الناس بوجودو ، اصلا من عرفه جات وهو حركتو محدوده في البيت ، وبياكل براه عشان هي تاخد راحتا واسي امي .
ختو الغداء وانا اكلت معاه ، بعد الاكل اتصلت ب ابوي !!! كان عندو نفس الكبرياء الفيني ، سمعني كلام خلاني ابكي عديل قعدت في الارض على ركبتي ، ولو كان قدامي كان بست رجولو ، هو زاتو عيونو كان فيها دموع لمن شاف حالتي قال لي : قومي يا بنتي انتي لسه تعبانه.
: عليك الله سامحني ي ابوي ، انا عارفه اني ما كنت بنت باره لك ابدا ومن زمان بزعلك ، وعشان خفت من زعلك دا ما قدرت اواجهك .
: الحصل حصل وانا مهما قلت وعملت ، ما حايتغير شي ، بما انك اخترتي الراجل دا ربنا يسترك معاه ، امسكي بيتك واولادك وابعدي من الاغلاط الكنتي بتعمليها زمان فهمتيني؟؟
: فهمت ي ابوي .
: الراجل دا بالذات لو ضيعتيه والله تاني اقنعي من نفسك .
امكن دا الخيار الوحيد الصاح في حياتك كلها ، وانتي ادرى الناس بخياراتك التانيه .
رجعت تاني ابكي الا نزار بقى يهديني ، ابوي زاتو برد مني وقال لي : خلاص ما تبكي .
: الا تسامحني ي ابوي 😢 .
: خلاص مسامحك لو بتريحك الكلمه دي ، بس تاني اوعا تكرري عمله ذي دي .
:حاضر .
: وأول م الاوضاع تتصلح تجي مع راجلك واولادك ، تزورونا وتعرفينا عليه .
: حاضر والله بجي وبقعد معاكم لمن تزهجو مني .
: الله يرضى عليك .
يااااه لي كم سنه ما سمعت الجمله دي !!! بعد المكالمه دي انا حسيت براحه كبيرة ، واتخطيت هاجس المواجهة الكنت خايفه منو ، نزار قعد معاي شويه كدا جاه تلفون طلع وامي جاتني قعدنا انا وهي في الغرفه .
قالت لي : دي منو كمان المرا القاعده معاكم وماخده راحتا دي؟
: دي جارتنا زوجها كان بضربا و......
حكيت لها القصه كلها قالت لي : سجمك !!!! وطوالي جابا قعدا في بيتك وانتي ساكته؟
: يعني عاوزانا نخليها تقعد في الشارع؟ .
: لالا عاد لحدي هنا كفايه ، انتو قمتو بالواجب خليها تمشي تتلما على اهلا .
: اهلا في مصر .
: والله تتصرف ما عندها اخوان ولا قرايب؟
: ما قلت لك......
قاطعتني : هديك المدرسه خليها تمشي تقعد هناك مع النازحين ، هنا دا بيت اسره وعلى قدركم ، هي مرا صغيره وانتي راجلك قاعد ، تضمنيها من وين؟
: استغفر الله يا امي ، ما تقولي كدا المرا بسيطه ومسكينه ، ونزار انتي هدي عرفتيه ، شايفه انو ممكن يعمل كدا؟
: والله الرجال ما عندهم ضمان !
: لالا الا نزار !! ياخ دا حفظ نفسو وعصما من الغلط 5 سنوات ، الحي كلو يشهد على اخلاقو .
: اها خلينا نقيف في اخلاقو دي !!! لو قام قرر يعرس المرا دي عشان ما تتشرد ذي ما عمل معاك تقولي شنو؟؟
انخلعت وقلعت عيوني قلت لها : امي دا كلام شنو؟.
: اوعك تستبعدي ، مالك ما عرسك لمن لقاك في الشارع عشان تلقي مكان تقعدي فيه انتي واولادك؟ افرضي عرسا هي زاتا فيك عشان يلما وتقدر تقعد في البيت براحتا تقولي شنو؟ ولا بتقدري تمنعيه؟؟
: لا طبعا مستحيل نزار يعمل كدا لأن................
كنت عاوزه اقول لها لأنو بحبني بس خجلت ، قلت لها : هو لو بفكر بالطريقه دي كان عرس مية نازحه .
قالت لي : انتو بس الصادفتوه حبيبتي ، والنسوان مكارات انتي لسه في جهلك الزمان ، وما بتعرفي حركات النسوان والسهوكه دي ، لكن بركه ال الله جابني !!!! انا بتفاهم معاه .
قمت على حيلي قلت لها : لا ي امي كفايه لحدي هنا 🤚🏻دي جنس الطريقه الخربتي لي بها بيتي اول مره !!! عليك الله ما تدخلي تاني .
: انا يا سمر خربت بيتك؟😧 كتر خيرك والله 😞💔 .
عاوزه تبكي الا اعتزرت لها وحنستا .
قلت له : والله العظيم ما قصدي كدا ي امي ، بس انفعلت زياده .
: لالا دا الجواك يا بنتي !! والبتفكري فيه ، ما مشكله قولي امي كعبه بس دي الحقيقه انا بقولا لك والله المرا دي بكرا تعرس راجلك وبتشوفي.......يتبع♥️