رواية خلف الابواب المغلقه الفصل الثامن 8 بقلم مشاعر مبعثره
عاوز يتكلم قلت له : عارفاك راجل شريف وغرضك المساعدة، بس في النهايه انت راجل وانا مرا ، ما من محارمك، فما ممكن نعيش تحت سقف واحد ، لانو حرام ودي ما حاجه بنغيرا بطيب اخلاقنا واحترامنا لبعض.
نزل راسو وقال : لي كلامك صح .
: معناها يا جاري ما تمنعني، انا بشكرك جزيل الشكر وبتمنى يدوم التواصل بيننا.
: حاتمشي وين.
: اي مكان ارض الله واسعه.
اتحركت من قدامو كم خطوة ، لمن وصلت الباب جاني صوتو مبحوح
: سمر!!
اتلفت عليه وقلت له : ايوا
قال لي : نحن ممكن نعيش مع بعض.
دخلت حواجبي في بعض وقلت له : كيف نعيش مع بعض ونحن مافي علاقه بيننا؟
قال لي : اعقد عليك وتبقي زوجتي!!! في الحاله دي نحن ممكن نعيش كلنا مع بعض من غير م زول يتدخل فينا .
قلعت عيوني وقلت له بخلعه : عاوزتتزوجني؟؟!!!!!!!
: ايوا اتزوجك ، وبكدا نعيش مع بعض ونربي اولادنا سوا .
: بس انت ما مجبور تعمل كدا ، الزواج دا ما حاجه ساهله ، يعني بالمنطق كدا ؛ عاوز تتزوج واحده بس عشان توفر لها ولاولادا السكن؟
قام على حيلو وقال لي : ما بس كدا يا سمر ، نحن في الفتره دي ارتبطنا ببعض شديد ، واولادنا زاتهم بقو ذي الاخوان ، ما ملاحظه؟ والله قبيل لمن شربنا الشاي حسيت بجو الاسره وكان شعور حلو خلاص اتمنيتو يدوم علينا .
: انا اسفه ما بقدر اتزوج للسبب دا ، خاصة بعد تجربتي الفاشله ، م حاخلي الحاجه تبقيني مرت الاب الظالمه .
: بس نحن محتاجنك!!!
قلعت عيوني
قال لي : بقصد انو بناتي محتاجنك ، والله ليان قبل كدا قالتا لي ، انت ما تتزوج خالتو سمر وتخليها تجي تسكن معانا هي واولادا ، ما تفتكري انك الوحيده المحتاجه لينا ، نحن اشد حوجه منك لك والله ، عشاني فكري واطمني م حايتغير شي انتي حاتفضلي ذي م انتي ، العقد دا بس حاجه نثبت بها للناس انو حياتنا مع بعض دي ما حرام .
: انا ما عارفه اقول لك شنو .
: فكري على مهلك وانا معاك في اي قرار .
طلعت من عندو ملخبطه شديد ، جاتني لين قالت لي عليك الله وافقي اتزوجي بابا واقعدو معانا نحن اتعودنا عليكم
: لين .
ضمتني عليها وقالت لي عليك الله عليك الله وهي مغمضه عيونا بعمق ، جات ليان برضو ضمتني .
عاينت على اولادي ، هاني وشادن وحتى مهيلم ، هم ماستعادتو النشاط الا هنا ، والحياة رجعت لهم مع الناس ديل
ارتبطو بهم ،و انا متأكدة انهم ح يعيشو مبسوطين في البيت دا ، وانا لو اخدتهم بعيد منو ، بكون ببهدلهم م اكتر ، وما معروف نصادف شنو في طريقنا ، قعدت اليوم كلو افكر ما دخلت حاجه لبطني ، ولا جاني نوم لبليل ، متردده شديد خايفه اكون بغلط ، وفي نفس الوقت خايفه من الحياة برا بعد كل العانيتو دا ، وكل م اتزكر اولادي وهم ببكو من الجوع . ومهيلم يفتش في قطرة حليب تصل جوفو م يلقى ، عقلي وضميري بقولو لي وافقي ، بس القلب متردد ، بسبب الجرح الما شفى .
طلعت برا لقيتو راقد ومتغطي ، بس شايفه ضو تلفونو .
: احم احم
قام مخلوع .
قال لي : خير يا سمر فيك حاجه؟؟
هزيت راسي .
قال لي : مالك ما نمتي لحدي اسي؟
قلت له : انا موافقه!!!!
سكت مسافه وقال لي : متأكده؟؟
: ايوا ، انا فكرت كتير ، واكيد موافقه اتزوجك .
: طيب معناها اتصلي ب أهلك احكي لهم .
: احكي لهم ليه؟ هم بعاد اصلا ، وما ح يقدرو يجو .
: حتى لو ما جو ، لازم يعرفو ، اصلا انتي محتاجه لوكيل من اهلك .
: بوكل اي زول ما قصه .
: يا بنت الناس دا كلام شنو؟ عاوزه تتزوجي بدون موافقة اهلك؟
سكت
قال لي : ما صح تعملي كد............
قاطعتو : دا شرطي ، انا ما جاهله ، وقراري في يدي ، لو موافق ، والا خليني امشي في حالي .
طبعا هو اتحير ، وقدر م حاول معاي رفضت ، لأني عارفة ردة فعل اهلي ، او بالأحرى خايفه منها ، لأني للمرة التانيه بتخطاهم .
في النهايه هو اضطر يستجيب لرغبتي ، قلت له : ما عاوزه اي شي ، لو سمحت خلينا نعقد وبس ، وياريت بسرعه عشان انا ما بقدر اتحمل الوضع دا اكتر .
: تمام .
: وانت ح تعمل شنو؟؟
: انا زيك اهلي بعاد ح اتصل احكي لهم بس ، وعندي اخوي بجي يحضر هو ساكن هنا في بيت عزابه .
: تمام .
اصبح الصباح وقمنا بالعادي ، بس هو ما مشى الشعل ، قعد لمن فطر وطلع ، جاء بعد كم ساعه ، دق الباب مشت ليان فتحت له وجاتني جاريه .
: خالتو سمر ، بابا جاء ومعاه رجال كتار.
انا انخلعت قلت لها شنو؟؟ : والله العظيم رجال الحي كلهم قاعدين .
هو دخلهم الديوان وجانا قلت له : الحاصل شنو؟
قال لي : حانعقد جيبي رقمك الوطني ولا البطاقه القوميه وتعالي .
انا قربت انشل لمن قال كدا ، وركبي دي بقت تضرب في بعض والقلب شغال .
كان شايل كيس في يدو مداه لي و قال لي : جبت لك كم حاجه البسي منهم وتعالي .
: بس مافي داعي والله .
: اسمعي الكلام يا مرا ، انتي بعد شويه حاتكوني زوجتي خليك مطيعه .
قالا بشقاوة كدا خلى قلبي تذيد دقاتو .
طبعا اتوترت شديد ما كنت فاكره الموضوع صعب كدا 🙈، مع اني م اول مره اتزوج بس الرهبه الحسيتا والخوف الدخلني ، في زواجي الاول ما حصل امكن عشان براي .
لبست ومشيت سلمت عليهم وكلت واحد من الجيران وعاوزه امشي .
قال لي : انا عاوزك تقعدي وتحضري العقد!!
: ضروري يعني؟
: لا بس حابي انك تتواجدي وتشهدي عقدك .
خت لي كرسي طرف قعدت فيه وبدت مراسم العقد .
انا كنت متوتره شديد ، ومنزله راسي لتحت وانا سامعه المأذون بعلني زوجة له ، سمعت اسمو لأول مره « نزار » ، سلموني القسيمه في يدي ، وقروش ما بعرفا كم ، قالو المهر وقعدو يباركو لينا ، انا طوالي دخلت جوا ، لقيت ليان ولين ببكو عديل ، لمن استغربت فيهم ، جو حضنوني الاتنين انا زاتي ما قدرت م ابكي معاهم ، امكن اتزكرو امهم المرحومه ، وامكن مبسوطين ، ليان باستني في خدي وقالت لي الف مبروك يا خالتو سمر .
: الله يبارك فيك .
من اللحظة ديك انا حملت نفسي مسؤوليه ، ومسؤوليه كبيره كمان ، لأنو البنات ديل يتيمات ام ، ووكلوني على حياتهم بحب شديد لازم ابزل مجهود اكبر ، ومأخيب ظنهم وثقتهم العمياء.فيني.....يتبع♥