من اللحظة ديك انا حملت نفسي مسؤوليه ، ومسؤوليه كبيره كمان ، لأنو البنات ديل يتيمات ام ، ووكلوني على حياتهم بحب شديد لازم ابزل مجهود اكبر ، ومأخيب ظنهم وثقتهم العمياء.فيني .
بعد شويه الباب دق ، ودخلو نسوان الجيران ما عارفه العزمهم منو جو داخلين يباركو لي 🙈 .
ابو ليان كان جايب بلح وحلاوة ، نادى بناتو يوزعوهم للناس ومشى السوق اشترى خروف 🐏 وجاب خضار ضبحو .
والنسوان مشو جابو الحلل والصحانه ، عملو وجبة غداء على قدرنا الرجال صينيتين ونحن واحده كفتنا وعملنا واحده صغيره للأطفال .
بعداك قامو ليان ولين غسلو العده انا جيت اقعد قالو لي لالا يدك ما تمديها على الشغل .
ابو ليان جاء وقف قدام الباب بتاع الصاله ، سلم وعاوز يناديني ، بعد فتح خشمو عاوز يقول ي جارتي ، اتزكر انو ما جايه ، سمر برضو اتحرج يقولا قدام النسوان وم شايف واحده من البنات حوليه ، قام قعد ينادي ي ام هاني !!!!
انا بعد مسافه استوعبت اني المقصودة ، والنسوان يتغامزن . مشيت له لقيت معاه راجل قال لي : دا ابراهيم اخوي جاي يبارك لك عشان ماشي .
كان شاب كدا وفيه ملامح منو ، سلم علي وبارك لي ، بعداك مشى مع اخوه ، وانا دخلت ، طبعا النسوان ما قعدن كتير قبل العصر مشن كلهن ، الا واحده اسما سميرة ، اتعرفت علي ووصفت لي بيتا طلعت زوله ظريفه ، اتونست معاي شويه ومشت هي زاتا ، بعداك البيت فضى علينا انا قعدت اساعد في البنات ، ختينا باقي الاكل واللحم في التلاجه ، ورصينا العده. اما الجابوها الجارات مشت ليان مع اختا رجعتهم وكنسنا المطبخ ، ونظمنا البيت .كان المغرب جاء خلاص وابو ليان جاء داخل اتوضا وطلع مع الرجال الكانو معاه ، مشو الجامع و نحن بعد صلينا رقدنا شويه في الحوش كان بارد وفيه سراير ومرشوش انا قربت انوم .
الباب دق ، هاني مشى فتح ، لقاه ابو ليان ، استقلبو بحضن كبير وباس راسو ، شالو جاء داخل به سلم علينا وقال لينا : كيف قيلتو؟ وكيف مع التعب؟ المهم بقى يتونس معانا وهو شايل مهيلم .
ليان قالت للأولاد : تعالو نحضر التلفزيون جوا ، لين قالت لها : بس انا ما عاوزه احضر ، خلينا مع بابا ، قامت قرصتا وادتا نظره ، امكن فهمت عليها ، ساقو شادن وهاني ودخلو جوا ، خلونا برانا في الحوش ، وانا ما عارفه اعمل ولا اقول شنو .
مهيلم قعد يبكي ، جاء جابو لي ، وقعد جنبي في السرير ، وترني زياده ، كان في صمت رهيب بتتخللو عبارات مهيلم الما مفهومه ، وصوت لعبو ، قعد يجرجر لي في التوب ، طوالي نزلتو وقفتو بالسرير.
ابو ليان قال لي : المفروض يمشي بعد دا.
: فعلا اولادي كلهم بمشو ٩ شهور ، الا هو .
: عشان قوم الاسنان بدري .
: اي والله ، الا أذيني بالعض ، مفكره افطمو .
بعد قلت كدا خجلت وسكتت🤐
قال لي : سمر .
قلت له : ايوا.
مد لي يدو وقال لي : مبروك العقد .
انا نزلت راسي ومديت يدي بارده وترجف صافحتو وقلت له : الله يبارك فيك .
: ربنا يجعل لنا البركه في خطواتنا الجايه ويخلي لينا اولادنا .
: اللهم امين.
ما عاوزه تتصلي ب اهلك؟
: لبعدين .
: خايفه من ردة فعلهم؟؟
: م مسألة خوف بس حاسه اني ما جاهزه ، اصلا م حايهتمو ، خليك منهم انت حكيت لأهلك؟؟
: طبعا وكانو عاوزين يباركو لك بالتلفون بس الشبكه كعبه وامي احتمال تجي في الايام الجايه دي .
انا اتوترت وخفت شديد لمن قال كدا ، قعد يضحك فيني وقال لي : ما تخافي امي ما نسيبه شريره ابدا بعد تلاقيها ح تحبيها .
: ان شاء الله .
: طبعا قبيل م قدرت اكل كويس ، من كترة الدخله والمرقه وجيب داك وارفع داك ، قومي ي ام هاني جهزي لي حاجه سريعه كدا .
قمت في عجله ، وقلت له : حاضر .
مسك الولد وضحك
قال لي : كأنك ما صدقتي تقومي؟ براحه ما تقعي.
: لالا ما كدا .
: عارفك بتحبي تقدمي وبتفرحي بالشي دا ، يلا ما تتأخري علي.
قمت بسرعه ، حضرت له اكل قدرو ، في صينيه ، وعملت له عصير ، وطلعت مويه في حفاظه وكبايه ، وهو يعاين لي ساااي!!!!
ختيت الحاجات دي قدامو ، ومشيت جبت الإبريق عاوزه اغسل له ، مسكو مني .
ما تعملي كدا .
: ليه؟
: قاعده تحسسيني انو انا عملت معروف عشانك وانتي بتشكريني عليه ، يا بنت الناس انتي بقيتي زوجتي ، ودا بيتك ، نحن كلنا ضيوف ، عندك اتصرفي على الاساس دا.
: انت ما فهمتني.
: فاهمك.
: لا!! لو سمحت خليني اكمل ، انا م اتصرفت ذي ما بتقول ، دي عادة عندي وجزء من طبيعتي ، احترام الزوج دا واجب وشايفه انو العملتو دا من واجباتي .
قال لي بصوت مبحوح : كنتي بتعمليها مع طليقك؟
هزيت راسي
قال لي : ما يستاهل ، كنتي جوهرتو والحمدلله انو ضيعك عشان القاك انا!
انا خجلت خجله ، تان م اتكلمت معاه ، طبعا مهيلم خمجان خلاص ، وما ريحو في الاكل ، قمت اشيلو منو ، وهو بقول لي : خليه ، وداك يقالع قلت له : هو ما عاوز ياكل بغلبك بس.
قال لي : خليه يا سمر .
: لالا والله ما بخليه يزعجك.
مع حركتي دي ، لقيت انو فجاءة حصل تلامس جسمي لمن كش وبعدت عنو .
قال لي : خليه خلاص.
نزلت راسي وقلت له : خلاص انا امشي اشوف الشاي .
دخلت المطبخ وتاني ما طلعت منو ، حتى لمن عملت الشاي خليت لين توديه له ، وتجيب الصينيه حاولت م اصادفو نهائي اليوم داك .
بليل البنات ظبطو الغرفه ، ودخلو سرير واحد لمن استغربت!!
وسامعه صوتهم برا لين قالت لاختا : يعني ما ندخل سرير لخالتو سمر؟
: لالا الليله هي حاتنوم مع بابا .
: ليه تنوم معاه هو وتخلينا نحن؟
: عشان هم متزوجين ، مالك ما متزكره زمان ماما كانت بتنوم مع بابا في غرفتو؟
: صح ، بس ليه الكبار ينومو مع بعض ، ويخلونا نحن برانا؟
: بطلي اسئلة وخلينا ندخل ، وتاني يا لين ممنوع تدخلي غرفتهم الا بعد تستأذنياو هم ينادوك .
: هو بابا قال لك كدا؟
: لا ، دي حبوبه ، قبيل لمن اتصلت ، يلا خلينا نمشي ننوم انا تعبانه شديد جسمي ، كلو بوجعني .
انا لمن سمعت كلامهم دا اتوترت ، وخفت شديد ، بقيت ما فاهمه شي بالجد ، الزول دا اتزوج.....يتبع♥️