رواية احلام ودموع الفصل الثالث 3 بقلم ماريه عبدالله مسعود
نحنا لا نسامحكم حتى يكون لنا عند الله لقاء💔
قال صلى الله عليه وسلم: «لاتزال أمتي بخير ما لم يفش فيهم ولد الزنا، فإذا فشا فيهم ولد الزنا؛ فأوشك أن يعمهم الله بعذاب» [قال الألباني حسن لغيره]. عن النبي صلى الله عليه وسلم قال: «إذا ظهر الزنا والربا في قرية؛ فقد أحلوا بأنفسهم عذاب الله»
سحر (بنت المايقوما💔 )
قعدت اكل في العيشه الناشفه واشرب في الشاي وانا مع الذكريات الكلها وجع وانا ماعندي ذنب فيها
نزلت الكباية واتجهت على المطبخ كان عندي شطة وبامية قاعده انشف فيهم شلتهم وجبت المدق قعدت أدق فيهم رمضان قرب انا بنشف الباميه والشطة لي رمضان وبعدين ببعيهم
وبحمر البصلة لي النسوان بي القروش طبعآ خالتو علوية بتجيب لي الزبائن الله يديه العافية
وبجيب الطماطم بختها في التلاجه عندي تلاجة اشتريتها مستعملة بخلي الطمام لما تكتر بعمله صلصة وببعيها لي النسوان
وانا أدق في البامية والشطة الباب ضرب قمت فتحتو كانت خالتو علوية شايله ليه بصل وزيت قالت لي هاك اول زبون شلتهم منها قلت ليه اتفضلي دخلت قفلت الباب جريت السرير تحت الشجره وجبت الصينه والسكين وجبت ليها شاي وقعدت اقطع في البصل وهي معاي نتونس ونضحك مخففه علي كتير قعدت اتذكر في رمضان لما كنت في دار الايتام لما يجو ناس المنظمة ويجيبو حاجات رمضان كنا بنجري ونعاين فيهم كنا بنشوفهم حاجه عظيمة زي الابطال بعد مايدخلو الحاجات يتصورو معانا ولا لما يجو الناس البتتبرع لي الدار بقعدو يتصورو معنا كنا مشهورين زي الممثلين
العالم كلو بتصور معانا عشان ينشرو الصور وتجيهم القروش البستفيدو منها بعد مايجيبو لينا شوية حاجات وحتى ونحنا في وضعنا دا البشر بستفيدو مننا قعدت اضحك وانا اقطع في البصل دموعي البتنزل مع قطيع البصل ومع الذكريات
الضحكة البتجي مع الذكريات المؤلمة بتكون شفايفك البتضحك لكن قلبك جوه بكون ببكي من ألم الذكريات والوجع 💔
خالتو علوية قالت لي عاد مابسالك مره تتونسي ومره تسكتي وتسرحي وبعدين تضحك التجاني الماحي قريب من هنا ضحكت من كلامه قلت في سري من المايقوما لي التجاني الماحي ههههه
خلصنا قالت لي اها انا طالعة قلت ليه اقعدي افطري معاي قالت لي عمك خالد بعد كده بجي لي الفطور وطلعت قعدت اضحك انا أعزم فيه وانا ماعندي حاجه اكله اتحركت استحميت وغيرت وطلعت وانا طالعة لقيت سيد البيت واقف قال لي رسلتي قروش الإيجار زي ماهي وانا قلت ليك الاجار زاد
قلت ليو من الشهر الجايه انشاء الله
خالد راجل علوية كان عايز يدخل البيت من شافنا جا وقال لي سيد البيت عاين هنا البنت دي تطلعه وانا بجيب ليك ناس يأجرو البيت
سيد البيت قال ليو واطلعه لي قال ليو دي وحده لا معروف ليه اصل ولا فصل وانا ماعايز تكون جنبنا سيد البيت قال ليو انت شفت منها حاجه كعبة ولا شفت رجال داخلين عليه
راجل علوية قال ليو يعني انتظر لما اشوف اسمع هنا انا بشوف ليك ناس يازول والبنتي دي ماتقعد تاني لينا في البيت دا واتحرك فات وانا واقفه اسمع ودموع محبوسه في عيوني اتحركت على المواصلات والعبره خانقني
وصلت عافرت زي كل مره وبعد تعب حتى ركبت وركبت شماعة واقفه في ولدين قاعدين واحد قال لي التاني ماتقوم ليه ياخي التاني رد ليو خليها تنزل الدهوني شوية عاملة زي الفيل وقعدو يضحكو ويتكلمو كلام كلو كعب وانا واقفه ودموعي النازله الكل شوية امسحه طقطقت لي الكمساري ونزلت وصلت المطعم زهجانه وقافله معاي سلمت على خالتو سارة وقعدت اقطع في البصلة قالت لي الليلة مالك ساكته قلت ليه عندي شوية صداع المهم خلصت من الاكل
مدت لي بصل وزيت قالت لي حمريه و انشاء الله جبتي لي الشطة والويكه والصلصه قلت ليه جبتهم طلعتهم ليه من الشنطة
مدت لي القروش قلت ليها مابينا حلفت الا اشيلها شلتها واتحركت على السوق طبعآ السوق كلو رجال وبتسمع مابتسمع تنمر على كلام مانافع
انا بستغرب فيه معقول الرجال دي ماعندهم امهات اخوات زوجات..الخ قعدت استغفر اشتريت حاجاتي وركبت الموصلات قعدت جنب الشباك وقعدت اتذكر ايام رمضان في دار الايتام بنقعد نفرش الفرشات وبننتظر الاكل البجيني من المنظمات كانو بوزعو لينا الاكل ونحنا بناكل ونضحك وهم يصورو فيني حياتنا كانت كلها تصوير في تصوير بعد نخلص بنقعد نصلي ونتونس ونضحك ايام كانت حلوة على الاقل كان فيه صوت ونسه وضحك ولعب مازي البيت الاسه قاعده فيو مهجور مافيو غير صوت انفاسي وحركة رجولي طقطقت لي الكمساري ونزلت وصلت الحي القاعدة فيو وانا ماشه شايفه واحد كده معانا في الحي بيتهم قريب من بيتنا راجل عمرو اكتر من ٥٠ من شافني جا علي قال لي بدل قاعده براك كده شوفي ليك راجل وانا موجود الليلة بعقد عليك
التفت عليو قلت ليو ياعمي بنات بناتك قدري واتحركت وانا جواي اكوراك يااااخي خلوني ياخي ركزو في حياتكم وخخلوني اركز في حياتي
وصلت البيت ودخلت استحميت وصليت اكلت حاجه ولعت الكانون وقعدت احمر في البصله القطعتها مع خالتو علوية
خلصت صليت العشاء ونمت مع الذكريات وصحيت بي نفس الكابوس الطفلة القاعدة في الضلام ماسكة العروسه منتظره الايد البتتمد ليه صليت شربت لي شاي سامعه الباب يضرب مشيت فتحتو كان خالد راجل علوية ومعاو راجل ومره جو يشوفو البيت عشان ياجرو خشمي مافتحتو حتى لو فتحتو اقول شنو ماعندي غير كلمة حسبي الله ونعم الوكيل اتحركت وقعدت لي في سرير وهم دخلو وتاني طلعو وسامعة الراجل يقول لي عمو خالد ياخي البيت تعبان ومنتهي عديل دا مابيت الواحد يسكن فيو طلعو وقفلت الباب
جريت لي طربيزه وجبت البصلة حقت خالتو سارة وقعدت اقطع فيها بتذكر لما كنا في الدار وجو مره ناس منظمة في واحد ماحبيتت نظراتو ولما جاتو الفرصه قرب مني وانا كنت بقوم فيو كنت طفلة عمري ١٢ سنه كان راجل كبير أمكن انا في عمر اولاد اولادو ختيت السكين و ختيت يدي في وشي وقعدت ابكي قمت استغفرالله وقعدت اقطع في البصل تاني جاتني الذكريات مهو طول ما انا براي الذكريات مابتفارقني الذكريات زي ضلي محل ما اقعد بتقد معاي ومحل ما امشي بتمشي معاي
بتذكر مره وحده بعد ما حصل ليه أغتصاب ما اتحملت دخلت في حالات انهيار عصبي وفي النهاية انتحرت صحينا الصباح على صوت كوراك كانت قاطعة شريان يدها والدم مغرق السرير
طبعآ اتكتمو على الموضوع عشان مايعمل ليهم مشاكل
وبتذكر لما يجو ناس عشان يتبنو واحد مننا يقعدو يعزلو فينا زي لما تمشي السوق وتعزل ليك طماطم
نحنا زي البضايع الفي السوق الماشي والجاي يشتري فيني وكلو بسبب غلطة منكم نحنا قاعدين ندفع في تمنه واظن لما نموت نحنا بنقعد ندفع في التمن
التمن غالي شديد طفولة كلها وجع والم
ااااخ من الذكريات اخ بس لو بقدر امسحه اصلا مافيه ام ولا ابو ولا اخوان ولا هل لو اتمسحت مابتفرق لانو ماعندي فيها أي سند مافيه غير الألم والوجع انتهيت من تقطيع البصل وايدي كلها جروح من السكين كنت مع أي ذكره بصحا وانا مجروحه من السكين ولعت الكانون وقعدت احمر في البصل
بتذكر مره طلعنا المدرسه ونحنا راجعين لقينا ولد عمرو مابفوت ١٣ سنه واقع في الارض وطالع من خشمو زبد والناس واقفه تعاين فيو لما مديت راسي وشفتو كان لابس لبس مقطع عرفتو من اولاد الشوراع ولا اولاد المايقوما اظن هرب من المايقوما واختار يعيش في الشارع واظن كان بتعاطه مخدرات
مهو أي واحد فيني ممكن يختار طريقو مافي البكون واقف فوق راسك عندنا الحرية البتكون حلم السجين الدخل السجن بعد ما قتل ليو زول هههه
وانا اعاين في الولد وبرجف حالاتو تقطع القلب مافي زول عايز يقرب منو كل زول مع خيالو البقول بركه المات وريح نفسو والبقول دا ووسخ بركة المات والبقول يحليو صغير مابستاهل ووالبقول حسبي الله في الاهل البعملو في لدهم كده والبقول تلاقيو ود حرام مجدوع ماعندو اهل
لما جات عربية رفعتو اتحركت على الدار دخلت مسكت الدفتر وقعدت ارسم وانا ابكي
انتهيت من البصلة كوركت لي خالتو علوية رفعت ليه البصلة مدت لي القروش قالت لي نسيت اديك ليها مع البصلة شلتها واتحركت صليت ونمت صحيت الصباح وطلعت افتش شغل في الشركات وطبعا زي كل مره برجع وانا معاي أحلامي المحطمة وقلبي الموجوع والعبره الواقفة في نص حلقي لا عايزه تنزل مع الدموع ولا عايزه تنبلع
العبره الواقفة وقافله حلقي💔
ابكي على شنو الوجع الفي ذكريات الطفولة ولا اسه في موضوع البيت الممكن اطلع منو في اي لحظه ولا عن حلمي الكل يوم قاعد يتحطم جريت نفس اااااااهاااااا وااااهااا واستغفرت الله ودخلت البيت...يتبع