رواية ضماد جرح الفصل الاول 1 بقلم نوسه حمد

كنت واقفه جنب الباب وبعاين للطلاب شايلين شنطهم وماشين المدرسه كنت بعاين ليهم ووشي ملان بسمه والماره كلهم بسلمو علي واكتر منظر هزاني ام سايقه بتها  وشايله ليها شنطتها ومودياها   المدرسه وابو سايق  ولدو المدرسه وصوتهم بفتح النفس ولبسهم جديد وشنطهم جديده  شكلو دا اول يوم دراسي فجاه طلعت مرت جيرانا استاذه انا م كنت شايفاها بس هي شافتني واني بعاين للاطفال وانا ما ماشه المدرسه قربت مني وبقت تتكلم معاي وانا منظر الطلاب مخليني م مركزه وعقلي فيهو الف كلام قالت لي نسيبه قلت ليها عليكم السلام دايره امي قالت لي لا لا انا ماشه المدرسه وواقفه من قبيل وبتكلم معاك وانتي بالك م معاي  انتي م ح تنزلي مدرسه قلت ليها لا لا امي قالت لي ماف مدرسه احرس البيت قالت لي كيف الكلام دا بتتكلم معاي كده جا ولدها طالع اكبر مني قال ليها انا ماشي اديني قروش الفطور فتحت شنطتها ادتو قروش الفطور انا بي برائتي قلت ليهو نزار انت بتقرا في كم قال لي انا في  ثامن قلت ليهو خلاص انت امش اقرا والعصر انا بنتظرك تجي تقريني قال لي انتي في سنه كم قلت ليهو م عارفه انا م حصل قريت امو قالت ليهو امش الجرس بضرب وقالت لي ادخلي قدامي دخلت وقلت لي امي استاذه فاطمه قالت داخله ليكم ابوي سمعني وقام دخل جوه 

امي وقفت علي حيله وبقت ترحب بي فاطمه قالت ليها انتي نسيبه دي مالا م بتقرا امي عاينت لي وحمرت لي وشها لمن انا خوفتا ودخلت جوه قالت ليها هي الجات قالت ليك تعالي حنسي امي توديني المدرسه صاح  قالت ليها بري والله يا ريا بتك خشمها م فتحتو بس شايفاها واقفه وتعاين للطلاب فرحانين باول يوم دراسي قلت النسالك منها دي بتك ربنا بسالك منها م تحرميها من التعليم قالت ليها خليني مع ربي انا ما بدخلا المدرسه انا شغاله البحرس البيت منو كان دخلتها المدرسه قالت ليها بيت شنو ربنا بسالك  انتي هسي شغاله لشنو كان م بتقري بتك قالت ليها شغاله عشان ناكل ونشرب والبيت القاعده فيهو دا ايجارو بالشي الفلاني والراجل زي م انتي شايفه معديها لي سكر بليل ولف بالنهار قالت ليها ماف شي جابرك تاجري ارجعي بلدكم واقعدي مع اهلك ولا شوفي زول من الحله يديك بيت وقري بتك دا الاهم امي بقت تكورك فيها قالت ليها م شغلتك بي انا اقري بتي ولا ما اقريها خليك في نفسك وفي حياتك قالت ليها معليش والله بس انا م نفسي بتك تشوف الاطفال ماشين المدرسة وهي حارسه البيت ومشيلاها  مسؤوليه  من هسي امي طردت الاستاذه وجات بي خرطوش المويه وقعت فيني ضرب لمن قربت اموت تحتها وابوي بدل يحجزني بعاين ليها وساكت وانا ابكي واكورك زول جاب خبري ماف قالت لي تعليم شنو الدايره تتعلمي قولي هسي قريتي دايرين يزيعوك انا تاني م اسمع اسم المدرسه دي في خشمك قلت ليها توبه والله م دايره اقرا يمه بس م تدقيني انا بخاف وكنت برجف من الخوف  

انا نسيبه امي ريا ابوي خالد  بت واحده عندهم ساكنين الخرطوم امي شغاله بس شغاله شنو م. بعرفها من قومتا لقيتا بتلبس من الصباح وبتطلع الشغل وبتحرسني البيت من عمري ٥سنه علمتني النظافه والغسيل اي زول يشوفني بقول لي امك حاقره بيك محرساك البيت  عمري الان ١٢ سنه  امي حارماني المرقه لانو  كل م اطلع معاها بقولو ليها بتك م بتشبهك بحس أمي بتضايق من الحاجه دي  وبتتعقد منها لدرجه اني بشيل المرايا بعاين لي شكلي بس فعلا انا م بشبه امي ولا بشبه ابوي امي بتقول لي تشبهي عماتك بيض وشعرن طوال  طبعا امي بتكره عماتي ما بتحبهم وابوي لمن امش ليهم اسبوع بتكون مشاكلاهو 

امي بعد دقتني قالت لي قومي جهزي لي ملابس الشغل وشيلي عده الشاي دي واجي القاك عملتي ليك عدس واوعك تكتري الملح بكشحو المره دي قلت ليها سمح يمه مشيت جهزت ليها ملابسها وبقيت انظف في البيت  وابوي راقد اعاين بعيونو بس لمن طلعت انا حسيت انو الهواء ضربنا كانها كانت ماسكه مننا الهواء انا متاكده ما ح يكون زول بي حالتي دي م بحب امو مرات كتيره بحاول اقنع نفسي عشان احبها بس م بقدر ابوي قال لي رادو ليك الله قلت ليهو كيف يعني قال لي ابتلاك بي ام زي دي الله يصبرك ي بتي لبس جلابيتو وطلع وكان بتنفس بي ضلعو زاد همي زياده  بعد فات قعدت جنب باب الشارع اعاين للناس وجات فسحه الفطور وضرب الجرس  اكتر حاجه في الدنيا بحب اسمها صوت الجرس  كنت بحب منظر الطلاب واقفين في باب المدرسه وبشيلو في الفطور كنت مستمتعه بي منظرهم اكتر منهم  بقيت قاعده لغايه ما جرس الفسحه ضرب ورجعو الفصول وفجاه عما الصمت المكان دخلت جوه عملت ملاح العدس ولقيت لي كسره بايته اكلت وغسلت العده وقفلت المطبخ حاولت انوم غلبني  وبقيت براي في البيت ابوي فات وين م بعرف في احداث مرت علي كتيره م فاهماها ولا قادره افهما شاغله بالي وتفكيري واليوم كلو بفكر فيها م لاقيه حل  سمعت جرس نهايه اليوم ضرب وجريت حفيانه طلعت الشارع واسال في البنات ادوكم شنو كانو بطلعو لي كراساتهم وانا الكاتبنو عربي ولا انجليزي ولا رياضيات ما فاهمه بالنسبه لي كتابتهم عباره عن شخابيط لاني م فاهماها و ريحه الكراسات والاقلام  كانت ريحه مميزه  مافارقت مخيلتي نفسي اعيش احساسها حقيقي   اي بت تجي ماره اسالها تفتح لي شنطتها وكانو مرتبين ومنظمين حتي في لبسهم وملابسهم والاسبورت كنت اموت واكون زيهم بس اعمل شنو نزار جا قال لي نسيبه ارح نقريك قلت ليهو ارح قال لي انتظري النغير ملابسي واجي  بقيت فرحانه قلت ليهو نزار بس انا م عندي كراس قال لي بجيب ليك كراس وقلم وبجي قلت ليهو سمح وبقيت انطط من الفرحه اخيرا ح يكون عندي كراس اخيرا ح اشخبط زي البنات نزار اتاخو لحقتو لقيت حبوبتو خاته ليهو اكل واياكل وهي قاعده جنبو فاتحه كراساتو وتقول ليهو شاطر ولدي وهي ياحليلا فاتحه الكراسه بالمقلوب قلت ليها حبوبه بمسكو كده م كده قالت لي انا شين خبرني بقيت اسال فيها بتعرف تقرا قالت لي بعرف اقرا قران بس وحافظه القران قلت ليها حبوبه انا م بعرف قريني قران قالت لي انتي م بتقري في المدرسه قلت ليها لا لا قالت لي مالك قلت ليها امي احمتني قالت لي امك بالحمه التقتلا قلت ليها امين عشان انا ارتاح منها واقرا نزار قال لي انتي بتكرهي امك قلت ليهو لا لا بس نفسي اقرا قال لي انا بعلمك امو جات لقتني قاعده معاهم لمن شفتها قلت ليها يا استاذه حبوبه قالت بتقريني القران ونزار بقريني قالت لي سمح وقالت لي نزار انا ما ناقصه مشاكل مع امها م تتاخر قلت ليها امي بتجي العصر بخلي يجي قبل تشوفو قالت لي سمح مشينا انا ونزار وقعدنا تحت الشجره ونزار بقا يكتب لي ويوري فيني في الحروف وما عذبتو في الشرح بفهم سريع قبل العصر قال لي انا ماش بعد كده امك بتجي قلت ليهو سمح مديت ليهو الكراس والقلم قال لي لا ديل حقاتك انا  عندي فرحت فرح شيلت الكراس دسيتو تحت سريري 

مرت الايام وانا نزار بجي يقريني مره عربي مره رياضيات مره انجليزي وحبوبه بتحفظني السور كنت مبسوطه وحاسه نفسي كاني في المدرسه كنت بحب شرح نزار شديد وجاب لي كتب اولي من المدرسه وجاب لي شنطه قديمه عندو ختيتها تحت سريري يوم نايمه واظنها امي تفتش لي حاجه لقت الشنطه وفتحتها وبقت تكورك قومتا مخلوعه قالت لي ديل جبتيهن من وين بقيت احكي ليها  دقتني وشالت الشنطه ختتا في نص الحوش وجابت الكبريت ولعت فيها وكانها ولعت في قلبي مافي الشنطه والكراسات  امي لبست توبا ومشت شاكلت نزار والشكله دورت امي صوتا في السماء  وجات قالت لي ابوي  انت م  راجل تخلي بتك اقريها الولد دا  البت دي نعرس ليها قبل ما تغلط  غلطه امها انا بقيت محتاره امها طيب انتي منو ……………….يتبع

                 الفصل الثاني من هنا 

لقراءة باقي الفصول اضغط هنا