امي قالت لي ابوي البت دي نشوف ليها راجل نعرسها ليهو عشان م تغلط غلطه امها انا بقيت محتاره وبعاين لي امي وقلت ليها غلطه امي طيب انتي شنو عاينت لي. وما ردت علي ابوي لحقها قال ليها عرس شنو البت قاصر وبعدين شايفه جاها عريس ورفضتو قالت ليهو شوف واحد من اولاد اخوك يتزوجا ويسترا قال ليها اولاد اخوي ما بقبلو بيها ولا زول من اهلي بقبل بيها وانتي عارفه بسببها اهلي محاربني وفشنو انتي هسي يا ريا البت عملت شنو لمن تعملي كده قالت ليهو كمان بتسال البت القرايه دايره بيها شنو كفايه اني مستحملاها وم تكتر كلامك يا تربي بتك يا تعرس ليها يا افوت اخلي ليكم البيت دا ولبست توبا وطلعت ابوي بقا سرحان جيت قلت ليهو ابوي انا منو وانت منو ودي منو قال لي كيف الكلام دا انا ابوك ودي امك فشنو قلت ليهو ابوي انا م طفله انا بقيت بفهم وسمعت امي قالت ليك عرس ليها م تغلط غلطه امها تقصدني انا بالكلام طيب امي منو قال لي لا لا نحنا م بنتكلم عنك دا موضوع بيني وبين امك وما تزعلي من امك بس امك خايفه عليك المدارس كعبه وفيها قله الادب ومختلطه اولاد وبنات قلت ليهو ابوي انا بعرف وسمعت المذيعه في التلفزيون اليوم داك بتقول كلام حلو قال لي كلام شنو قلت ليهو قالت عيب البت تتكلم مع ولد وعيب تخلي زول يلمسها حتي لو عمها لو جدها ولا بتاع الدكان ابوي انا مره بتاع الدكان عاوز يلمسني بس قلت ليهو عيب بكلم ابوي ابوي بقا محتار وبعاين لي قلت ليهو يابا انا والله بفهم وبعرف اي شي وحتي لو المدرسه كعبه انا ما بكون زيهم ابوي ضماني عليهو وقال لي بتي فالحه اول مره اشوف ابوي دمعتو نزلت قلت ليهو يابا معليش انا زعلتك قال لي لا لا دي دموع الفرح خلاص كبرتي ي نسيبه وبقيتي تعرفي طبعا انا حسيت بي فرحه جواي مجرد م ابوي قال لي الكلام دا قال لي م تزعلي من امك قلبها ابيض انتي هسي نومي وانا بوعدك السنه دي خليها بس السنه الجايه بدخلك المدرسه قلت ليهو صحي ي ابوي قال لي بأذن الله انتي بس اسمعي كلام امك وهسي لمن تجي قولي ليها انا م دايره اقرا قلت ليهو سمح بنتكلم كده امي جات داخله وصاره لينا وشها مشيت قربت منها قلت ليها يمه انا اسفه تاني م بعمل كده قالت لي خلاص امشي نومي امي م حنينه زي ابوي مشيت رقدتا وبقيت اتزكر في كلام ابوي لمن حكيت ليهو الحاجه السمعتها من التلفزيون وكان مبسوط وانا كنت طايره من الفرح عشان ابوي انبسط مني
مرت الايام وانا اموت وادخل المدرسه وامي مصره انها تحرمني وما كده حرمتني من الطلعه نزار بقا لمن يشوفني في الشارع بدخل بيتهم كنت بمش لي حبوبتهم تقريني قران عشان اتعلم الصلاه بس امي ضربتني وتاني بقيت م بطلع
ومرت الايام والسنه عدت والسنه التانيه بدت كنت بحسب ليها بالدقائق عشان ابوي وعدني بس للاسف لمن قلت ليهو انت وعدتني قال لي لا حاجه م عايزاها امك انا م بعملها يوم كان صعب علي اكتر حاجه زعلت فيها ابوي الاخلف وعدو لي اليوم كلو ابكي وخلاص قنعت من القرايه رغم انو كانت عندي رغبه شديده في التعليم بس الحمد لله قسمتي انو اهلي ما بحبو التعليم بقيت افتح القنوات التعليميه واستفدت منها شديد واتعلمت كيف اتوضا وكيف اصلي وكان نفسي اكون عندي كراس وقلم عشان اكتب فيهم بس خايفه من امي واكتفيت بي اني اتعلم عن بعد وكنت مبسوطه شديد وكنت بقول لي ابوي انت ليه. م بتصلي م كان برد علي وكان قلبي بتقطع وشايفاهم م بصلو وامي مره سالتها قالت لي لو جبتي سيره الكلام دا بدقك انتي م بتوريني اصلي ولا ما اصلي
صحيت الصباح وكنت حاسه بمغص وكنت تعبانه شديد قومتا مجبوره اجهز لي امي ملابسها وأنظف عشان م تدقني بس كنت م قادره اقوم وحسيت اني م طبيعيه وحتي جسمي فيهو تغيرات والف سؤال بدور في راسي وما لاقيه ليهو اجابه لمن الالم زاد علي مشيت لي استاذه فاطمه وكنت ببكي شديد قالت لي مالك فشنو ما يكون زول لمسك قلت ليها لا لا يا استاذه بس انا حاصله علي حاجه غريبه وانا خايفه اكلم امي وابوي قعدت تضحك قلت ليها تضحكي لي قالت لي شوفي ي نوسه الحاجه العندك دي يعني انتي بقيتي كبيره ومامنها خوف ودا طبيعي بجي لكل بت كنت خايفه بس كلامها طمن قلبي وقالت لي تعملي كده وكده وكده وبعد كده تعملي حسابك من البيت م تطلعي وبقت تدي فيني في نصايح قلت ليها يا استاذه كل البنات زيي قالت لي اي طبيعي م تخافي مشيت بيتنا ولي سوء حظي لقيت امي جات ومن شافتني بقت تكورك قالت لي كنتي وين وبتعملي فشنو ودا شنو الفي ملابسك دا وبقت تضرب فيني وانا بحاول افهم فيها وكرهتها من قلبي وعلي حالتي العلي ح اموت من وجع القلب ابوي جا داخل قالت ليهو بتك دي بقت م نافعه وانا عارفاها ح تطلع زيها لو كسرت رقبتك م كل مره تقعد تدس في الكلام البت دي يا تطلع انت يا اطلع انا ابوي جا قال لي مالك عملتي شنو خجلت اتكلم معاهو وزهجت منهم طلعت رقدت تحت الشجره زول اشتغل بي ماف وامي قفلت الباب ونومتا للصباح في الارض وامي عاقبتني اشد العقاب مشيت كلمت استاذه فاطمه قالت لي اهلك ديل والله لو جايبنك بالحرام م بعاملوك المعامله دي انتي م عندك خالات ولا عمات اسالو منك قلت ليها امي مشاكله خالاتي وعماتي ولا بتجيب سيرتهم قالت لي انتي بعد كده بقيتي كبيره مفترض يحترموك موش يهينوك ويزلوك وانتي بت بريئه اتمنيتك تكوني بتي قلت ليها الحمد لله بس وريني اعمل شنو قالت لي بري انا م عندي فيك شغله لا بقول ليك اعملي لا بقول ليك م تعملي تقومي تمشي تكلمي علي امك المجنونه دي تتجنن فيني المره الفاتت شكلتنا وصلوها ليها وراجلي قال لي نزار اوعك تسلم علي البت دي انا م ناقص فضايح عشان كده ي بتي تستحملي ديل اهلك وحرين فيك مشيت منها مكسوره يعني عشان هم اهلي يعاملوني المعامله دي انا متاكده ماف ام بتعامل بتها زي م بتعاملني امي حتي في اليوم المفترض تحتويني فيهو وتفهمني التغيير الحصل لي وتطمن قلبي مش تدقني وتتهمني وتقول كلام انا م قادره افهمو
يوم سمعتها بتتككلم مع صاحبتها واظنها قالت ليها عايزة بتك تشتغل معاي تساعدني طوالي امي بليل كلمت ابوي انو ح تشغلني ابوي قال ليها خلاص البتشوفي وانا م سالتني مفترض تسالني انا بس انا كلامي م مهم الصباح قالت لي البسي ارح معاي لبست ومشيت معاها اتصلن علي صاحبتها قالت ليها جايبه ليك بتي تعالي لي بره مشينا مكان كده راقي وسمح والبيوت فيهو سمحه شديد جات طالعه مره سمحه ولابسه دهب وظاهر في وشها العز قالت ليها الا تتفضلي امي قالت ليها عندي شغل اها جبتها ليك وكانن بقولن في كلام نصو فهمتو ونصو م فهمتو امي عايزه تفوتني قعدت ابكي بس هرشتني ودخلت مع المره البيت بيت قصر لا عرفت نفسي بحلم لا عرفت حقيقه بقيت اعاين وم فاهمه شي قالت لي ادخلي غيري ملابسك دي شينه البسي ملابس نانا ونانا دي شنو م فهمتها دخلت حسب كلامها وملابس نانا يفتحن النفس انا بقين مخلوعه قلت اخيرا ربنا استجاب لي دعواتي لبست ملابس نانا وكنت تعبانه تعب نومتا نومه من غير م اشعر قومتا مخلوعه لقيت المكان سمح وهادي قلت ي ربي انا وين وم مستوعبه اي شي مشيت فتحت الباب لقيت لي ناس قاعدين في سفره وبياكلو في اكل انا اول مره في حياتي اشوفو فجاه عيني تقع في المره صاحبت امي اتزكرت امي قلت ليها انا ماشه البيت قالت لي لا لا انا محتاجه تساعديني جايين ضيوف تعالي اتعشي معانا قلت ليها لا لا شكرا ليكم وكنت جيعانه جوع بس نفسي عزيزه رفضت الاكل ودخلت جات لاحقاني قالت لي قومي انتي ح تقعدي جيعانه كده وانتي ح تقعدي معانا كتير ح تقعدي جيعانه كده حنستني في النهايه مشيت والقاعدين كتار م عرفتهم ناس البيت ولا اغراب بس بتونسو في ونسه كلها سياسه وقروش وسفر ونسه اول مره اسمعها وكنت جيعانه باكل وم بتكلم المره اسمها مياده قالت لي جيعانه حبيبتي قلت ليها م اكلت من الصباح قالت لي انفعك حبيبتي حسيت بيهم بعاينو لي ولي طريقه اكلي خجلت قومتا في ولد قعد يرطن لي وانا حرف واحد فهمتو ماف مياده بقت ترطن معاهو رطانه لا عرفتها انجليزي لا عرفتها فرنسي لا عرفتها لهجه قبيله بقيت اتكلم مع نفسي امي بتعرف الناس ديل من وين وديل جنسهم شنو سودانيين ولا اجانب وامي جابتني ليهم لشنو وقلبي بقا يدق ونهاي م اطمئنيت للوضع والله يستر …….يتبع