رواية خلف الابواب المغلقه الفصل الحادي عشر 11 بقلم مشاعر مبعثره
سمر ، دا واقع اتفرض على الناس كلها م انتي براك .
: بس ما كل الناس اتحدت وحاربت عشان تعيش مستقله ، انا ما كنت برضا حتى اسمع شكوى من زول ما حصل وقفت مع زول ولا استقبلت زول في بيتي بكره يجيني ضيف بكره.... بكره انو نمط حياتي يتغير ، بكره حاجات كتيره انا لو زول من البعرفوني شافني في الوضع دا ممكن اموت بعد الكبرياء الكنت فيه.
: قلتيها بنفسك كنتي وانتي حاليا متزوجه على سنة الله ورسوله ، ما عملتي حاجه عيب ولا حرام ، وعايشه في بيت زوجك البقدر يستخف بك منو؟
: حايقولو احتميت بك .
: سمر دا البتفكري فيه انتي وما كل الناس بتفكر بنفس طريقتك ، اخدي الامور ببساطه عشان ترتاحي وما تتحاملي على نفسك وتضعفيها.
هزيت راسي ، مد لي التلفون وقال لي : يلا اتصلي ب امك احكي لها
: بحكي لها مرة تانيه.
كالعاده اتهربت منو ومشيت.
المهم نحنا حياتنا بقت حلوة شديد ومتناغمه والبنات بقو ينادوني ماما واولادي بقولو له بابا يعني اسره بكل تفاصيلا بالنهار!!! ولمن يجي الليل كل شي بتغير انا بمشي انوم مع الاولاد في غرفه وهو في غرفتو ، غير كدا بكون طبيعيه شديد معاه عادي نقعد الاتنين مع بعض ونتناقش انا بكون ماخده راحتي وما خايفه ، من جهة مطمنه اني مع راجلي ، ومن جهة تانيه مطمنه له هو زاتو ، لانو م حايلمسني وهو زاتو ما حصل عاين لي بطريقه غلط ، وفي المقابل انا فاهمه حتة انو راجل دي ، وفي عمر الشباب كمان وعندو غرايز انا ما بحاول استفزا بأي شكل ، بلبس توبي او جلباب طويل مع طرحه.
عم الاولاد بجي طوالي زيارات وعامل جو حلو.
وانا كمان بقيت على تواصل مع سميرة جارتي وعرفتني على واحده تانيه نازحه زيي ، قاعده مع قرايبا طيبه شديد بقينا متداخلين مع بعض ، اما سميرة دي قريبه لي شديد لدرجة بحكي لها كل شي يحصل معاي .
يلا حبوبة البنات جاتنا ، وانا كنت خايفه شديد من جيتا دي وردة فعلها ، هو قبل ما يمشي يجيبا من الميناء جمعنا في مكان واحد وقال لينا : شفتو الاندومي القاعدين تعملوها بالحله دي ممنوعه! لمن حبوبه تخلص زيارتا دا لو ما عاوزنها توبخكم مفهوم؟؟
هزينا رؤسنا كلنا قال لينا : وممنوع تخلوها تقعد براها لازم على الاقل اتنين يقعدو معاها ويونسوها غير كدا مافي شي وما حاتضايقكم ليان انتي عارفه طبعا يا بابا.
: ايوا عارفه ما تخاف علينا يلا ما تتأخر عليها
انا مشيت شيكت على المطبخ وظبطت البيت ملايات جديده طبعا وعطور وبخور ورشينا الحوش.
اول ما جات البنات مشو حضنوها مهيلم كان في الارض يكابس شافتو
دا منو الحلو دا
جرا منها لمن خجلني لحقتو وشالتو يبكي ساي قلت لها معليش عشان اول مره يشوفك بس مشيت سلمت عليها وشلت منها مهيلم ونادي الاولاد كانو في التلفزيون
ما شاء الله عندك ثلاثه؟؟
: ايوا يا خالتو .
: ربنا يخليهم لك.
مهيلم كان بعاين لها بطرف عينو وهو في حضني ومن تعاين له يتخبى ضحكنا شديد قمت اخت الاكل هو اتعلق بي ويعاين لها
كرعلي بقيت حبوبه البتخوف الشفع😅 ابو ليان قال لها بكون فاكرك بتقرصي .
: ليه حبوبتو التانيه كانت بتقرصو ولا شنو
قعدو يضحكو وانا سكت ساي ابو ليان شال مني الولد وليان جات تساعدني ختينا الاكل وطبعا انا ختيت لاولادي براهم عشان ما يخمجو قدام المرا وقلت لهم : اكلو اخوكم .
لكن هو يقعد ب أدب؟؟؟ لا طبعا كل شويه يجي علينا ويوسخ نفسو الا نمسك فيه ، انا قمت وقلت لهم خلاص انا بأكلو ابو ليان قال لي انتي شاغله نفسك به اكتر من اللزوم وحاجه ما اكلتيها تعالي اكلي وخلي الاولاد في حالهم امو قالت لينا وانتو ليه اصلا فاصلنهم مننا تعرفوهم بياكلو ولالا كيف قلت لها ما بعرفو ياكلو وغلبتهم كتيره خليهم براهم : لالا كيفن عاد تعالو هنا
: يا خالتو.............
قاطعتني : ويتعلمو الاكل كيف كدا لالا يا بنتي لازم ياكلو في قدامك وتشوفيهم عشان توريهم طريقة الاكل الصح وتشوفي البياكل منو ومنو المابياكل كلنا ربينا بالطريقه دي ليان قالت لها كنا بناكل مع بعض بس ماما سمر قالت الليله ياكلو براهم عشان ما يفضحونا معاك😅
ابوها قعد يضحك وانا انحرجت عاينت لي وقالت لي : بس انا ما ضيفه ولا غريبه يا بنتي جيبيهم لي هنا جنبي.
: بالجد حايتعبوك .
: انا متعوده على الشي دا ربيت ابوهم واخوانو والبنيات ديل قامت على حيلا نادتهم وجابت صحنهم الخمجوه داك واكلت فيه معاهم وانا خايفه المرا دي شدة ما حنونه بتأكلهم اي واحد في خشمو ومهيلم لمن شاف الموضوع عجبو جاء قرب منها وثبت في اخوانو لمن وقف وفتح لها خشمو هو زاتو ضحكنا ضحك قالت له وحلاتي هاك ادتو
اكل ومشي منها بقى كل شويه يمشي ويجي لها
قالت له ها يلا تعال قلت لها ما بمشي لسه
طبعا صحتو اتصلحت من جينا البيت دا وبقى قدر عمرو قالت لي المفروض يمشي بعد دا قلت لها حاولنا كتير معاه بس طوالي بقعد ويحبى : خلو علي انا والله امشي لكم في ايامي القاعداها دي
قعدت تحكي لينا عن طفولة اولادا وابو ليان خاصة خجلتو شديد لمن هرب للمطبخ يشوف الشاي انا لحقتو ومسكتو منو
: سمر .
: ايوا .
: انا بعتزر على الموقف المحرج الختيتك فيه قدام امي .
: موقف شنو .
: بخصوص اكل الاطفال كنت عارف انها حاتعمل كدا بس خفت اقول لك خليهم ياكلو معانا تقومي تفرضي عليهم شروط صعبه وانضباط ما يقدور ياخدو راحتهم في الاكل ابتسمت وقلت له : ولا يهمك عادي وبالمناسبة امك دي عندها قلب طيب شديد.
: زيك مع الابتسامه دي.
: شنو
شكلا الجمله طلعت منو عفوا او كان حاسيها حك راسو وقال لي : مش الابتسامه صدقه؟
: ايوا.
بقيت سامعه صوت مهيلم جريت عليه ما يعمل مصيبه يخسرني محبة نسيبتي🙈😅 مشيت لقيتا شايلاه وهو بصارع جيت اشيلو منها قالت لي خليه
هو لمن ما لقى مفر منها قلع النظاره من وشا وقعد يعاين لها ويضحك انا لحقت النظاره ما تنكسر وقعدت اتعزر اما هي قالت له شكلي ما عجبك ولا شنو تضحك علي بقت تعمل له حركات بوشا وهو يضحك ويقرقر بصوت ليان قالت لينا معناها كانت مشكلتو مع النظاره.......يتبع♥️