رواية احلام ودموع الفصل الثامن عشر 18 بقلم ماريه عبدالله مسعود

رواية احلام ودموع الفصل الثامن عشر 18 بقلم ماريه عبدالله مسعود

القسوة ليست قوة

بل عجزٌ يتخفّى في هيئة صلابة..

الإنسان القاسي لا يملك شجاعة الاعتراف

ولا تجرؤ نفسه على الوقوف أمام أخطائه

فيختار أن يؤذي بدل أن يعتذر

وأن يهرب بدل أن يُصلح ما كسره

💔💔💔

الرحمة ليست ضعفًا

إنها أعلى درجات القوة الإنسانية،

أن ترى ألم غيرك فيوجعك،

وأن تخطئ فتعود لتُرمّم لا لتُكابر..

💔💔💔

أمّا من خلا قلبه من الرحمة،

فهو شخصٌ لا أمان له،

لأن من لا يراجع نفسه اليوم،

سيعيد الجرح غدًا دون أن يرمش له جفن..

💔💔💔💔

أبشع ما قد يواجهه الإنسان في حياته

ليس الفقد…

 بل القلوب التي لا تشعر،

والأشخاص الذين يمرّون فوق الأرواح

كأنها أرضٌ بلا أصحاب..

💔💔💔💔

فالإنسان بلا رحمة

ليس قويًا…

بل روحٌ فقيرة

 مهما بدا صلبًا من الخارج 

     💔💔💔💔          

سحر بنت المايقوما 💔

قلت حتى نفين كانت عايزه تنتقم وبتها طلعت ميته والسبب خالد ورياض

 وانا سرحانه جا وقف جنبي طارق قال لي تعالي نشوف باقي العروض اتحركت معاو وقفت اعاين التصاميم الفي العروض  كانت رهيبه قلت ياربي  بنقدر نفوز 

وانا واقفه اعاين جات وقفت جنبي نسيبه وقالت اكيد بنفوز 

صح انتي تعبتي عليهم ورياض كمان بس البفوز لينا نحنا انا وخالد وضحكت مدت لي ورقة قالت لي اتفضلي انتي مفصولة من الشركة الشركة استغنت عن خدماتك حظ أوفر في شركة تانية التفت عليه وانا مصدومة شلت الورقه كانت استقالة قالت لي وقعي عليه واتخارجي من حياتنا ماناقصني قرف 

قلت ليه انتي ماعندي اي حق تفصليني ضحكت قالت لي انتي ورياض ونفين برا الشركة وفاتت وقفت وانا مصدومة كيف كيف يعني انو انا ورياض ونفين برا الشركة هي بتتكلم كده وبي كل  ثقة 

  التفت  على صوت  لجنة الحكم كانت  عايزة تقول اسم الشركة الربحت كان في  واحد واقف في المنصه وشايل  ظرف في يدو فتحو وقال اسم الشركة الفايزة شركة فاشون لي الازياء والتصاميم كانت شركتنا رياض وقف جنبي التفت عليو كان لسه ظاهر عليو الضيق والحزن من كلام نفين 

 قال لي يلا عايزين نتحرك عشان  نستلم الكأس وقفو خالد ونسيبه خالد مد ورق لي رياض 

رياض من شاف الورق انصدم واتحرك على خالد مسكو من قميصو وكورك فيو بتين دا حصل انا ماوقعت على اوراق التنازل انت كيف جبت توقيعي على الورق دا وكان بكورك نسيبه قالت ليو انا الجبت توقيعك وماتسال كيف وضحكت المهم انو انت ماعندك اي سهم في الشركة 

 الشركة شركتنا انا وخالد والعرض عرضنا والفوز من نصيبنا  كششش ملك واتحركت مع خالد لي المنصة عشان يستلمو الكأس 

دموعي جرو  تعبي كلو راح على الفاضي وحتى تصاميمي التعبت فيهم انتسبو لي نسيبه وخالد 

رياض واقف مصدوم جات الشرطة قالت لينا الاتنين تجو معانا السجن رياض قال ليهم ليه قالو ليو خالد مقدم شكوة انو انتو سرقتو العرض حقو والتصاميم كمان 

  وانا واقفه مصدومة وقف جنبي قصي اتصل بي التلفون وقال نيفو حبيبتي وين انتي هلا ومد لي التلفون سمعت صوته وقالت ليو في البيت رفع التلفون وقال لي نفين عادي بتقدر تتدفع اي مبلغ نفين هنا الكل في الكل وبالنسبه لي العروض ماراح تفرق معها لانو هي يمااااا كانت بتكسب انتي الخسرتي اي حاجه حذرتك وقلت ليك قدمي استقالتك  وانتي ماسمعتي كلامي بزعلت عليك كتير يلا باي حبيبتي واتحرك فات

 الشرطة ساقتني ونحنا ماشين مع الشرطة 

علي وطارق وياسين بتكلمو معاي وانا في عالم تاني التفت على رياض الكان منزل راسو وقفنا جنب باب الشركة جات الصحفة وقفت كانو بحاول ياخدو مننا كلام الشرطة منعتهم واتحركنا على عربية الشرطة ركبنا 

بدل كان نطلع انا ورياض ومعان الكاس والصحافة تصور فينا ونحنا رافعين راسنا والكاس  طلعنا زي المجرمين ماقادرين  نرفع راسنا وصلنا القسم

رياض كان واقف ونهاي ما اتكلم   وانا ببكي وبرجف واقفين معاي طارق وياسين وعلي كان المبلغ كبير شديد انا أمكن عندي نص المبلغ رياض لما مشيت معاو المحامي حول لي مبلغ من تعويض الشركة السرقت تصاميمي في العرض الفات  انا خسرت اي حاجه وحتي المبلغ الكان عندي لازم ادفعو لي خالد ونسيبه عشان اطلع وما اظن اقدر اطلع لانو انا معاي نص المبلغ 

رياض كان واضح عليو منهار ونهاي ماقال حرف اصلآ من كلام نفين  وهو متغير ومكسور

 الشرطي سألو اذا بدفع التعويض  ولا لا وهو مارد  انا قلت ليو ممكن ادفع نص المبلغ قال لي نسأل أصحاب الحق  شال التلفون واتصل ومد لي سمعت صوت خالد يضحك قال لي سحوره ياسحوره وكان بضحك انا عايز المبلغ كامل وماينقص ولا جنيه 

قلت ليو طلعت  واحد تافه وحقير حسبي الله ونعم الوكيل فيك قال لي انا ولا رياض رياض قتل نورس حبيبتي مفترض اسبوع ونحنا نكون متزوجين هو قتلة وقتلني معها صح انتي ماعندك ذنب  بس وقفتي مع الطرف الغلط

 كان ممكن اخليك في  الشركة نمشي نستلم الكأس بس عشان رياض بحبك عايزه اكسرو وأخلي يعيش نفس الانا عاشتو  ولي اسه انا قاعد اعيش فيو 

ولسه ما خلصت اللعبة 

يلااااا عشان ما أطول عليك يا اما تدفعو المبلغ كامل يااما تنومو في السجن وقفل 

الضابط قال لي سمعتي قال شنو  يا المبلغ كامل يا تتسجنو

 علي قال لي طارق ممكن تأخذ سحر برا الضابط قال ليو كيف ياخذه برا انت قايل نفسك وين قال ليو انا بدفع المبلغ  وطلع التلفون

 انا كنت منهاره ماقادره اتكلم طارق قال لي سحر يلا اتحركت معاو 

علي دفع المبلغ وطلعنا قلت ليو رياض علي عاين فيني قال لي انتي امشي مع خالد وانا بجيبو معاي  التفت على رياض كان قاعد في الأرض في السجن وخاتي يدينو في راسو 

طارق قال لي يلا واتحركت معهم

وصلت الفندق طارق قال لي كلو بتعوض ياسحر خليك قويه ونحنا معاك وسندك حركت ليو راسي و اتحركت حرفيآ ماقادره اتكلم 

دخلت الغرفة وقفلت الباب قعدت في الأرض ابكي انا ذنبي شنو من وانا صغيره وانا شايلة ذنوب ماعندي دخل فيها واسه كمان لما جيت احقق حلمي شلت ذنب انتقام وما انتقام وانا ماعندي دخل فيو 

نمت في الأرض  وغمض عيوني حسيت دموعي نشفو من البكا  وحلقي اتقفل والعبره خنقتني

 تاني ماحسيت بي حاجة فتحت عيوني على صوت الباب البضرب وسامعه صوت علي افتحي ياسحر انتي كويسه ردي علي 

قمت وانا ماقادره افتح عيوني من الورم والصداع فتحت الباب قال لي انا لي ساعة اضرب في الباب

 قلت ليو كنت نايمة قال لي ادخل؟قلت ليو اتفضل كان شايل ليو كيس وجاب الطربيزه ومسكني من يدي قال لي اقعدي قعدت قال لي سحر كلو بتعوض شوفيي نحنا  من قمنا في الدنيا دي و هي كانت بتلعب بينا ماشفنا منها الا كل ألم ووجع 

دايمآ كنا منبوذين فيها وعشنا حياتنا مكسورين وموجوعين ماكان في البجي يطبط علينا لما كنا بنبكي 

ولا فيها البجي يخت يدو في راسنا لما نمرض ولا فيها  البفرح بفرحنا او يبكي لي وجعنا 

انا وطارق وياسين كنا عايشن في الشارع حياتنا كلها سرقة وشراب البشوفنا كان بجدعنا بي سفنجتو وينبزنا  ويقول لينا  أولا الحرام مليتو البلد الله ينتقم منكم 

نحنا كانو بدعو علينا في حاجه هم كانو السبب فيها 

كنا منبوذين من الدنيا ومن الناس   انتي دخلت حياتنا واتغيرنا انتي كنت اليد المدد لينا وقت كنا ضعاف ونحنا اسه  الأيادي البتتمد ليك في ضعفك وقوتك

 في فشلك ونجاحك

 سحر فشلك فشلي وحزنك حزني وجعك وجعي

 انتي لسه في أول المشور لسه عندك مشور طويل اكيد مابكون كلو نجاح في نجاح  ولا كلو فشل في فشل بكون في النجاح وفي الفشل النجاح بدفعك لي قدام والفشل بقويك 

 ماتضعفي من اول المشور 

حركت ليو راسي قال لي أمسحي دموعك دي و

يلا اكل ليك حاجه فتح الكيس وقال لي ماتكوني صايمة لانو انا بصوم  معاك وابتسم  عاينت فيو رفع حاجبو قلت ليو علي انا ماعايزه ماعندي نفس اكل  قال لي تمام وقام وانا بنتظرك لما تكوني عايزه وطلع 

قمت دخلت الحمام استحميت واتوضيت و صليت قلت ياربي الحصل مع رياض شنو شلت التلفون واتصلت كان في جرس انتظرت لما خلص مارد

 لبست لي عباية وطرحة طلعت لقيت علي جنب الغرفة قلت ليو لي واقف هنا قال لي منتظرك قلت ليو ما جادي انت 

 قرب مني وقال لي ماقادر اتحرك وانتي  كده سحر خايف عليك كتير والله مابقدر  امشي انوم وانتي حزينه كده شوفي عيونك كيف مورمه من البكا  والله بتوجع معاك 

قلت ليو مجنون اسه افرض انا ماطلعت من الغرفة قال لي بنتظر لما تطلعي قلت ليو  مانصيح ماتخاف ما بنتحر ولا بعمل حاجه في نفسي وانت قلت  نحنا متعودين على الوجع يعني عادي الليلة ببكي وبكرا بنسا اي حاجه وبواصل حياتي

قال لي طب ارح ناكل انا والله ميت من الجوع وعاين لي عاينت فيو وضحكت كان شكلو بضحك وهو بقول ميت من الجوع قلت ليو ارح وطلعنا 

قلت ليو علي بالنسبه لي القروش الدفعتها وقف قدامي وقال لي ولا كلمة الموضوع دا اتقفل ممكن مانفتحو

قلت ليو تت تت تمام حبيت اقفل الموضوع عشان مايزعل بس انا بعتبر القروش دين لانو عارفه انو  دا المبلغ الجمعو من شركة الاغاني وانا جيت بكل بساطة وشلتو منو كنت زعلانه عليو  قال لي سرحانه وين 

بتسرحي كتير خلاص قريب راسك دا بتملي شيب ابتسمت قلت ليو عندي ومليان ضحك وقال لي الشيب هيبة وبعدين ميج طبيعي ضحكت على كلامو 

وصلنا مطعم طلب الأكل قلت ليو طارق وياسين وين قال لي خليتهم في الفندق طارق نايم وياسين ماسك تلفونو 

قلت ليو ورياض كان بيأكل نزل الأكل من يدو وقال لي طلع من السجن قلت ليو انت دفعت ليو قال لي ممكن نقفل الموضوع

 سكت وقعدت اكل كل ما ارفع راسي بلاقي يعاين فيني

خلصنا اتحركنا الفندق قال لي اها بكرا نرجع قلت ليو اكيد ماعندي حاجه تاني هنا 

قال لي تمام يلا تصبحي على خير قلت ليو تلاقي الخير ودخلت الغرفة مسكت تلفوني واتردد اتصل بي رياض ولا لا قلت اتصل اشوفو عمل شنو اتصل برضو مارد ختيت التلفون 

 جاني اتصال رفعتو سريع كنت فاكره رياض بس ما كان رقمو رديت جاني صوت خالد قال لي مع انو كنت حابب تقعدو في السجن كم يوم ولا كم شهر بس طلع عندك زول بسندك علي طلع راجل حتى انو دفع المبلغ لي رياض قال لي ماعرفتي رياض قبل يطلع حصل ليو شنو قلت ليو حصل ليو شنو

 ضحك قال لي قلت لي العساكر عزو عزو جد وصورو فيديو انا حولتو ليك في الواتس

 اهاااا انا ونسيبه استلمنا الكأس ماعايزه تباركي لي قفلت التلفون في وشو واحد تافه وحقير 

فتحت الواتس وفتحت الفيديو كان رياض والعساكر يضربو فيو جسمو كلو دم طلعت من الغرفة وقفت جنب غرفة ناس علي ضربت الباب فتح لي طارق قلت ليو رياض وين كنت عايزه اسالو من علي سالتو من رياض قلت ليو اسفه بقققصد علي وين قال لي طلع قلت ليو وين قال لي ماعارف مسكت التلفون واتصلت عليو رد قلت ليو انت وين قال لي طلعت عندي مشوار عايز اخلصو قلت ليو رياض الشرطة ضربتو قال لي اي قلت ليو هو كيف قال لي مع انو ماعايز اقول ليك لانو تاني ماعايزك تعرف أي زول من الشركة دي ولا تربطك بيهم حاجه 

بس مادام سالتي

 تمام وانا بقول ليك  رياض بعد انتي مشيتي وانا دفعت القروش طلعو من السجن والضابط قال لي انتظر عندنا شوية إجراءات وساقو دخلو  غرفة 

انتظرت وبعد كم ساعة جابو وهو كلو دم سألت الحصل شنو الضابط قال لي مد يدو على شرطي ويلا ماتكتر كلامك سوقو واتحركو من هنا 

مسكت رياض واتحركت بيو المستشفى خليتو في المستشفى وجيت الفندق اطمن عليك 

واسه انا في المستشفى معاو وهو كويس قلت ليو اي مستشفى قال لي سحر انا موجود معاو ومستحيل اخلي  الا اطمن انو هو كويس امشي نومي و لي الصباح بنتكلم يلا سلام اتحركت الغرفة 

نمت في السرير حاولت انوم ماقدرت  الليل كلو اتقلب قريب لي الصبح حتي قدرت انوم صحيت بي صوت رسالة  في تلفوني رفعت التلفون كانت من رقم  رياض كاتب فيه انا منتظرك برا الفندق اطلعي ضروري 

وقفت جنب باب الفندق جاتني رسالة في التلفون  فتحتها وقال لي شايفك جاي عليك وقفت جنبي عربية وبعد مسافة حتى انفتح الباب طلع خالد وسحبني سريع لي العربية قال لي ماعايز اسمع صوتك كان شايل مسدس وخته في راسي قال لي ولا حرف انا قلت ليك استقيلي وانتي ما سمعتي الكلام قلت ليو كنت عايزه استقيل وانا بتمتم وارجف ووو انا شفت العقد قال لي كنتي تجي تكلميني

 كويس  انو ما استقلتي لانو انا عايز احرق قلب رياض بحبك صح  انا متاكد انو رياض بحبك

ساق العربية قلت ليو تلفون رياض عندك كيف ابتسم قال لي لما كنتو في القسم انا قلت لي الضابط جيب لي التلفون قال عايز اعمل شوية دراما على اكشن  مع  رياض يعني انتي بتكوني كبش الضحية وضحك

قال لي 

انتي سألتني عن نورس وانا حابب احكي ليك عنها قبل ما نصل 

 نورس بنت نفين وكانت حبيبتي كنا مقررين نتزوج رياض كان بحبها وهي ما بتحبو  كانت بتحبني كم مره حاول معها عشان تحبو وهي رفضت حبو 

بس هو ما استسلم حاول بكل الطرق عشان تحبو 

بتعرفي القلب ومايريد هي بتريدني هو بريده انا بريده رياض حاول يدخل في النص 

 انا كمان حاولت اخليك تحبيني عشان ادخل في النص بينك وبين رياض بس فشلت عشان قلبك مال لي رياض المهم رياض اتصل بيها قبل العرس بي اسبوع وقال ليه عايز اشوفك وهي وافقت بحكم رياض صديقنا 

وكانت زعلانه عليو عشان كان مكسور وحزين 

ركبت معاو العربية رياض وقف جنب البحر ونزل حاول يخليها تغير رأيها عشان العرس ومانجح

 انا اتصلت علي نسيبه و كلمتني نسيبه كانت صديقة نورس  ونورس حكت ليه انو هي مع رياض ووصفت ليه المكان

 انا ركبت عربتي واتحركت عليهم وصلتهم رياض كان بتكلم معها وبحاول يخليها ماتتزوجني 

وقفت  وقلت ليه اركبي في  العربية رياض مسكة من يدها ودخلها عربتو وقفل عليه الباب

 قال لي في حساب لازم نصفي

 هو فاكر انو انا  بلعب على نورس وانو انا مابحبها وخليتها تتعلق بي مامصدق انو هي مااختارتو واختارتني انا 

وانا وهو كنا بنضارب

العربية الفيها نورس  اتحركت على البحر ا ووقعت في البحر  جرينا عليها وحاولنا بس ماقدرنا ننقذه نورس مااااات مااااات رياض هو السبب كان بتكلم وبرجف مره  يكورك  ومره يبكي 

وصلنا البحر نزل من العربيه وقفت عربية نزل منها رياض ماكان قادر يمشي وشو كلو مشوه من الضرب   خالد قال ليو اووووو رياض شايف  الدنيا دواره كيف  انا كنت بحبها وهي بتحبني وانت جيت دمرت اي حاجه 

 في نفسي المكان دا انت شلت روحي وحياتي ونفسي الا انا كنت عايش بيو 

قعد يكورك  بتحب سحر بتحبها صح  قووول بتحبها وضحك وقال ليو 

يلا هي لازم تموت زي نورس رياض اتحرك على العربية وكان جاري مسكو خالد وضربو كانو بضاربو مسكت الباب كنت عايزه انزل وقفت نسيبه وشايله ليه عود في يدها  ضربتني في راسي وقعت في المقعد حق العربية دخلت  لي رجولي وقفلت باب العربية وركبت قالت لي الحلقة الناقصة انا كنت موجوده لما نورس ماتت وانا كنت صديقته ولا عامله نفسي صديقته دا كلو عشان خالد 

خالد لي انا وبس مستحيل اخلي لي وحده 

 لما رياض وخالد كانو بتشاكلو انا ركبت العربية الكانت فيها نورس وضربتة زي ما ضربتك وحركت مفتاح العربية خليتها تمشي على البحر شلت المفتاح ونزلت من العربية قفلت الباب 

 ونورس ياحرام ماتت في العربية  واسه انا عايزه انتهي منك زي نورس وبنفس الطريقة 

 لانو انتي واقفة في طريقي زي نورس مسكت مفتاح العربيه حاولت اشيلو منها ضربتني  تاني

 حركت مفتاح العربية والعربية اتحركت على  البحر و نزلت 

حاولت افتح الباب ماقدرت وحاولت اكسر قزاز الشبابيك ماقدرت قعدت اكورك واضرب في القزاز   كنت شايفه طشاش طشاش غمض عيوني وتاني فتحتها ختيت يدي في راسي وشي كان كلو دم غمض عيوني  شايفة انا قاعده في غرفة في الارض والدنيا ضلام كنت طفلة شايلة لعبة في يدي منتظره باب الغرفة يفتح منتظره يدي تتمد لي فتحت عيوني وقلت  اشهد ان لا اله الا الله وأشهد أن محمد رسول 

[لا تنبهر بكل ماتراه فبعض الماء سراب وبعض الأشخاص خراب وبعض الأقارب أغراب .]..يتبع

          الفصل التاسع عشر من هنا 

لقراءة باقي الفصول اضغط هنا