طفل بريء يمشي ليلا والظلام حالك
يمشي وحيدا خائفا وضوء البدر ساطع
وحيد لا صديق له في أرض الرب ضائع
شجاع لا يهاب شيئا خلته كفارس
فلا مأوى يؤويه من ضرار البرد القارس
طفل يغطي جسمه بعض من القماش
أحلامه تبخرت مصيرها التلاشي
اليوم بارد والليل دامس ظلامه
والطفل شارد وقد تمزقت آلامه
صغير في نظير العمر عقله كبير
فأين من يحميه أو من البلوى يجير
فراشه التراب قد توسد الصخور
وكل من رآه لم يكن به فخورا
سألته ، أما من نور في الحياة
أما من بسمة قد تذهب المعاناة
أجابني بحسرة ودمعة سيالة
بنظرة حزينة فلتسمعوا ما قاله
💔💔💔💔💔
احمد انت سامع الصوت لا ماسامع صوت شنو ياامجد في صوت طفل ببكي دقيقة اقيف عشان تسمع اي اي ياحمد بس جاي من وين تعال تعال اظن جاي من هنا بسم الله الرحمن الرحيم الصوت جاي من حاوية الوسخ مايكون شيطان أمجد قال ليو شيطان شنو هو في غير الانسان شيطان عليك اللهه
كدي خليني اشوف وصل محل الحاويه ورفع ليو كرتونه وقال حسبي الله ونعم الوكيل حسبي الله ونعم الوكيل احمد قال ليو في شنو يازول أمجد رد ليو دا شافع جوه الكرتونه احمد اتصدم وقعد يحرك يدينو في بعض وقال حسبي الله ونعم الوكيل فعلا مافي شيطان غير الانسان اها يامجد نعمل شنو مع الكلمة دي جات وحده وقفت وتاني واحد وقف وتاني وحده المكان اتملا بي الناس القعدت تتحسبن وحده جات طلعت الشافع من الكرتونه كان صغير شديد ملفوف بي توب هزاز وسخان في وحده جرت دخلت بيته وجابت هدوم ليو نظفتو ولبستو وقالت دي بنت تبارك الرحمان منو القلبو قاسي يعمل كده وحدا رد ليه مااكيد بتكون بطريقة غير شرعية والناس قعدت تتحسبن والشافعة تبكي وحده قالت ليهم جاي النرضعه مع ولدي وشالته رضعته ونحنا واقفين واحد اتصل على ناس المايقوما وصلو شالو الشافع وفاتو
وقفت جنب المرايا اعاين في نفسي لوني الاسمر ووزني الاكتر من ١٥٠ عمري الكم ٢٠ ختيت يدي في وشي وقلت الشعراء والفنانين كلهم ماكانو بغنو لي اللون الاسمر طيب في الواقع لي منبوذ دايمآ الواقع مازي الخيال
الواقع صعب وصعب شديد اتحركت طلعت من الغرفة
وصلت الخرطوش وقعد ارش في الزهور بحب الزهور شديد بيتي كلو زهور وشجر
سمعت خالتو علوية تنادي ياسحر ياسحر ختيت الخرطوش في الشجره واتحركت على الحيطه رفعت لي صحن كان فيو عصيده وملاح قالت لي هاك ضوقي وإنشاء الله تعجبك
وقالت لي كنت جايبها ليك بي الباب بس عمك خالد قاعد وانتي عارفه الحاصل قلت ليه الله كريم وانتي ماقصرت ياخالتي عاينت لي بي حزن ونزلت شلت الصحن واتحركت على الغرفه وقعدت اكل بتذكر كنت جاريه العب مع الشفع في المايقوما جات ماما حليمه جريت عليه وقفت جنبها قلت ليه ماما حليمة يعني شنو أسرة وصحي الشفع ديل كلهم ما اخواني قالت لي اخوانك وانا امك قلت ليه طيب ليه كل مره لما يجو ناس توقفونا بي الصف ويختارو مننا واحد ويسوقو معهم قالت لي سحر كلامك كتير وانا اسه مصدعة امشي العبي مع الشفع جريت العب جا واحد كان شايل معو ملابس وألعاب وألوان ودفاتر وقعد يوزع لينا طلع لي فستان بي اللون البرتقالي ودفتر واقلام والوان ولعبة عروس جريت جري دخلت جوه وقعد في السرير ختيت الفستان في السرير وقعدت ارسم فيو ورسمت العروس ولونتهم جريت شلت الدفتر وقعدت انادي ماما حليمة شوفي رسمت شنو رفعت الدفتر وانخلعت قالت لي انتي رسمتي ديل قلت ليه اي مدت الدفتر. لي ماما سعديه قالت ليه شوفي عليك الله مشاء الله تبارك الرحمان شافت قالت ليه مشاء الله دي موهوبه بي الفطره سبحان الله ماما حليمه قالت ليه مهو الله بشيل حاجه من زول وبعوضو بي حاجه تانيه قالت لي عندك مستقبل ياسحر مشاء الله وانا فرحت جريت شلت الدفتر واي حاجه بشوفه برسمه واكتر حاجه بحب ارسم الملابس والشعر والعيون كنت اليوم كلو برسم دخلت المدرسه وكنت شاطره شديد واي مسابقه في الرسم بجي المركز الاول عندي جوائز كتيره شديد حتى الاساذه مرات بطلبو مني تصاميم ورسومات لي المدرسة
الايام بتمشي وانا كنت فاكره انو الناس كلهم كده بعيشو زي ما نحنا عيشين ماعارفه بكون في بيت وفي أهل وفي اسرة
السنه والبعده والبعده لما عمري حصل ال ١٤ سنه حتى عرفت انو نحنا ماعندنا أهل وانو نحنا اولاد المايقوما وانو اي واحد جا من شارع او حاوية او اهلو جابو
نحنا اولاد حرام زي مابقول عننا الناس
كان عندي اسأله كتيره بس منو البجاوب ومنو البسمع ومنو البفهم
مشيت مكتب ماما حليمه دقيت الباب ودخلت قعدت وانا خايفه احرك في يدي وبرجف قلت ليه وانا بتمتم ماما ممماما حليمة انتو لقيتوني ولا جابوني اهلي طلعت النظاره وصلحت قعدته قالت لي شوفي يابتي مادام عايزه تعرفي انا بحكي ليك وحكت لي انو لقوني في حاوية وانا بسمع فيه دموعي الكانو بجروو وخشمي الكان برجف مع كل دمعه وقلبي الكان عايز يطلع من مكانو من الوجع
طلعت منها وانا جاريه كلامها كان بتردد في راسي كنت بتمنا تقول لي جابوك اهلك وفاتو على الاقل كنت بحاول اعرف هم منو واسه بعد عرفت انو كنت مجدوعه في حاوية اتبخرت كل احلامي وقعدت ادعي الله ينتقم منكم ليه نحنا ذنبنا شنو تجيبونا في الدنيا وتجدعوني اتحركت دخلت الغرفة الكانت مليانه بي البنات الفي عمري البضحك بضحك والببكي ببكي والبتونس بتونس طلعت دفتري وقعدت ارسم
وصلت الثانوي كنت ماشه المدرسه ومعاي كم وحده شايفه اولاد قاعدين جنب حاوية الوسخ ويفتشو فيها لما عاينت فيهم عرفتهم ديل كانو معانا في المايقوما واحد شايل سجاير والتاني يفتش في الحاوية واحد شايل كيس فيو قوارير وواحد خاتي حاجه في يدو ويشم فيه اظن هروبو من المايقوما اعمارهم كانت ١٦ و١٧ و١٨ عاينت فيهم مسافه وتحركت
انتو عارفين انو نحنا يومي بندعي عليكم في كل خطوه من حياتنا بندعي الله ينتقم منكم
بسبب اغلاطكم نحنا بندفع التمن الواحد منكم بنت ولا ولد بجري ورا رغباتو وبعد يغلط بحاول يخفي الفضيحه بغلط اكبر من غلطو
كنت سرحان في الاولاد سامعه واحد ماشي ليو مع واحد قال ليو شوف اولاد الحرام ديل عليك الله الواحد لو مات ما أكان احسن ملو البلد وسخ وعفن
لما سمعت قعدت اضحك مهو صح اولاد حرام والكلمة دي بنسمعه كتير ولا بتاثر فيني لانو نحنا اصلا كده بندفع التمن على حاجه ماعندنا فيه ذنب
واسه الكلمة دي لو سمعه واحد عندو أهل و أسرة كان فات رفع قضية عديل وكان العالم كلو وقف معاو ونحنا كل دقيقه وكل ثانيه بنسمعها
كان نفسي اعرف يعني شنو اسره يعني شنو ام ابو اخوان اخوات اعمام عمات ....الخ
كان نفسي اعرف بس ماجربت الشعور دا عشان اعرف ومهما شرحو لي مابقدر افهمو واو اتخيلو لانو انا ماعشتو عشان اقدر اتخيلو
انا عايشه بي اسم اختارو لي
اسمي واسم ابوي وامي كلو وهم ومزيف
وصلت المدرسه دخلت اليوم انتها رجعت دار الايتام
دخلت مافي زول بسألك يومك كيف أدوك شنو عندك. ماده صعبة عايزه يشرحوها ليك ادخلي غيري هدومك تعالي اكلي ليك حاجه وارتاحي دا كلو مافي
الايام بتمشي بعد الثانويحات منظمة اتبرعت لي العايزين يتزوجو وعملو عرس جماعي مافيو اي اهل غير المنظمة المتكفلة والناس الموجوده في دار الايتام
والمصوريني البنشرو اسم المنظمة واسم الدار عشان تجيهم القروش انا كان عندي حلم انو اكمل الدراسة وادخل كلية الازياء والتصميم وفعلا دخلت و اتخرجت وعملت الخمة وبعدها اجرت لي بيت وقعدت فيو وياهو بيتي الاسه كنت فرحانه ومبسوطة انو خلاص الدنيا حتضحك لي وامشي اقدم في اي شركة ازياء يقبلوني واصمم التصاميم الخاصه بي وتشتهر وافتح دار ازياء ويكون عندي شركة وعربية ولو الله اراد اتزوج بس ياحلم مااتحقق كلو اتبخر
كنت بطلع يومي وانا شايلة شهادة الجامعة وشايله شهادات المعاهده وشهادة الخدمه وشايلة أحلامي وطموحي ومتحمسه شديد بس اي شركاء امشي ليه كانت بتعاين لي المظهر وانا كنت ماجميلة سمينه شديد وزني اكتر من ١٠٠ لوني الاسمر
واظن الشركات عندها المظهر والجمال اهم شي وخاصة شركات الازياء
طيب لو كان كده فعلآ انو الجمال والمظهر اهم ليه رب العالمين ماخلقنا كلنا جميلين ليه الناس دايمآ بختو عليك الذنب في اي حاجه حتى في الحاجه البتكون من عند رب العالمين وانت ماعندك فيه يد ليه واااقعنا قاسي كده
وقفت في المرايا واعاين في نفسي امشي واجي حاولت كتير انقص من وزني بس انا زي ما انا حاولت اغير لوني كنت بشتري كريم ورا كريم واليوم البكون ماعندي قروش برجع زي ما انا سمره
بتذكر اول مقابلة لي كنت شايلة الشهاده واحلامي وطموحي كنت متحمسه شديد دخلت قعدت لقيت البنات اللبس كيف والشكل كيف والأولاد كمان وانا لابسه عباية وطرحه عاديه نظيفه ومرتبه كنت واثقه من نفسي شديد لما جا دوري دخلت المكتب كانت وحده قاعده مشاء الله جميلة شديد من شافتني قلبت وشها سلمت عليه مديت ليه الشهاده ودفتر الفيو رسوماتي وتصاميمي ولا عاينت ليو زي الناس عاينت لي من فوق لي تحت و قالت لي بنتصل عليك وياهو اي شركه امشي ليه من يعينو فيني خلاص تاتي مابركزو لي الشهادة ولا الدفتر طلعت افتش لي شغل غير الشغل بي الشهاده ولقيت في مطعم بلدي كنت بعمل الاكل البلدي بشتغل في الأسبوع ٥ ايام واليومين بقعد الف الشركات كل ما اشوف شركه عامله معاينه بجري عليه
الدنيا صعبه شديد من غير حنان الأم دعم الاب كتف الأخ. طمأنينة الاسره...[تركتموني وحدي من فضلكم ذروني
وواصلوا حياتكم ببسمة من دوني
ألم تروا براءة تريد أن تطير؟
ألم تروا وجها غدا عبوسا قمطريرا؟
ولن ألومكم فربما هذا ابتلائي
إن لم تروني حيا ،سأكتب رثائي].....يتبع