شلت الصحن المطبخ غسلتو وقطعت لي فواكة ومشيت على الحيطه ناديت ياخلتو علوية ردت لي رفعت ليه الصحن قلت ليه مشاء الله رهيبه تسلم يدك ويديك العافية قالت الله يسلمك يابتي اتحركت جريت لي سرير في ضل الشجره مسكت تلفوني ابحث عن شركات الازياء واذا في معاينات ولا لا
البيت كان هادي شديد مافي غير صوت الشجره البحركه الهواء وصوت الطيور الفي الشجره قفلت التلفون واعاين في الفراغ وفي حياتي معقولة بموت كده وحتى لو مت في زول بعرفني ولا بفقدني البغسلني والبكفني منو
ياربي امي وابوي عايشين
وانا كنت بطريقة غير شرعية ولا اهلي ماكانو عندهم قروش وجدعوني كنت دايمآ بحاول اخت عذر واقول انو اهلي كانو ماعندهم قروش وجدعوني احسن من اكون جاية بطريقة غير شرعية نزلت مني دمعه مسحته بتذكر لما عرفت من ماما حليمة انو لقوني في حاوية الوسخ تاني نزلت دمعه ودمعتين وتلاته معقول انا وسخ معقول انا من وسخ الدنيا رجعت تأني لي ماما حليمة قلت ليه عايزه اعرف المكان الجدعوني فيو قالت لي سحر لو عرفتي بتستفيد شنو انسي الماضي يابتي وكملي حياتك قلت ليه انا عايزه اعرف مجرد فضول ما اكتر رفضت تكلمني كنت محل ماتكون بمشي اسأله في النهايه زهجت وكلمتني
بتذكر بعد ما طلعت من المدرسة اتجهت لي المكان ما كان بعيد بي المواصلات ساعة ونص وصلت المكان حسب وصفها قالت لي الحاوية كانت جنب الجامع. لانو هي جات واستلمتني وقفت جنب المكان بس الحاوية كانت مافي لانو من لقوني لي اسه فات عليهم ١٤ سنه وقفت اعاين في المكان واتلفت قلت احتمال الجدعني جا كم مره عشان يطمن علي قعدت مسافه
وكأني منتظره زول يجي يقيف هنا في النهاية اتحركت ورجعت وانا مكسوره وموجوعة الغلط البتعملو انتو أمكن بمروو الزمن تنسو وامكن تتزوجو وتعيشو حياتكم بس نحنا بكون معانا وما بتنسي ولا بموت بكون في القلب والعقل
وصلت دخلت انجدعت في السرير وانا خاليه من اي تفكير او خيال شلت الدفتر وقعدت ارسم من اليوم داك وانا كنت كل فترة برجع لي مكان الحاويه بقعد فيه مسافه وبتحرك
صحيت من سرحتي على صوت الأذان قمت من السرير وعاينت لي الزهور وابتسمت مشيت صليت ورجعت مسكت تلفوني مافي غير صوت انفاسي وصوت الاشعارات البتنزل في تلفوني من الفيس ومواقع التواصل قمت لبست لي عباية وطرحة شلت شنطتي قفلت الباب وطلعت عايزه اتحرك كده سمعت صوت
الواحده تكون قاعده براها وماعارفين ليه لا اصل ولا فصل بنات آخر زمن التفت لقيتو راجل خالتو علوية مارديت عليو واتحركت قال لي انا لو ما طلعتك من البيت دا مابرتاح عندي اولاد وبنات وخايفه عليهم منك أمكن عامله ليك مصيبه وهاربه من أهلك مهو خلقتك دي خلقت زول عامل مصايب واتحرك فات انا اتعودت على كلامو وماقاعده ارد ليو عشان خالتو علوية
اتحركت ركبت المواصلات قعدت جنب شاب من شافني قال البلد دي مابتمشي لي قدام مادام فيه بنات بياكلو الأخضر واليابس وضحك مااشتغلت بي كلامو عادي بسمع كميه من الكلام والتنمر بقيت مابحس ولا بشعر
العربيه اتحركت طقطقت لي الكمساري مديت ليو القروش و اتحركت على المطعم دخلت لقيت خالتو ساره تجهز عشان تعوس الكسره سلمت عليها واتحركت جبت البصل وقعدت احش فيو ودموعي النازله من البصل وكلام خالد راجل خالتو علوية وكلام الشاب الفي المواصلات
خالتو ساره بتشتغل معاي عندها ٥اولاد وراجله شغال شغل اليوم بي اليوم وهي بتساعد فيو وياهو انا معها ماسكه الاكل وهي الكسرة بنقعد نتونس ونضحك خلصت وطلعت فتحت تلفوني كان في معاينه لي شركة حفظت المنشور واتحركت البيت حولت قروش اجار البيت وصلت مع أذان المغرب دخلت
استحميت وصليت ماكان عندي نفس لي الاكل قعدت في المصلاية مسكت المصحف واقرا دموعي النازلة مع أي ايه قفلتو وقمت شغلت التلفزيون وشغلت فيلم كوميدي وقعدت احضر
قفلت التلفزيون ختيت راسي في السرير وقعدت اتذكر كان معانا في دار الايتام وحده جميلة شديد مشاء الله وكنا اطفال كانت حلبية وشعره طويل مره جات أسرة واظن الله ماقسم ليهم الولادة جو ساقوها قعدت معهم ٣سنوات جابوها راجعة قالو انو الله رزقهم طفل جات حزينه وكئيبة بدل كان فقد واحد بقى ليه فقدين ليه البشر قلوبهم سودا أمكن الله رزقهم عشان اتبنوها سبحان الله الانسان دايمآ جحود البنت كانت شهور وهي حزينه دخلت في حالة نفسيه عديل و مره وحده رجعوها بعد ما حصل ليه أغتصاب وحالات وحالات كتيره شديد على ظلم الدنيا لينا كان في ظلم من البشر انا بعد شفت الحصل بقيت لما تجي اسره انا مابطلع نهاي لانو ماعايزه تاني اعيش حياه مامعروف مصيره شنو واخت احتمال أمكن تنجح ويحبوني وامكن تفشل وتكون النهاية حزينه
مع ذكرياتي اتذكرت لما جيت اجر لي بيت فتشت كتير وعشان انا بنت ومامعاي زول كانو برفضو ياجرو لي بعد تعب حتى لقيت البيت دا وكان من سنتين سيد البيت كان محتاج لي القروش والبيت حالتو بطاله الغرفه واقعه والمطبخ صعب شديد حمام بلدي من غير باب
واجارو كان غالي بس قلت بقعد فيو وتاني لو الله سهله واشتغلت بشوف واحد احسن كان لما يكون الخريف بنقل حاجاتي المطبخ الغرفه فوق كلها واقعه وبتصب الخريف كلو بكون قاعده في المطبخ
و المطبخ فوق مشمع وبرضو بصب بس احسن من الغرفة
لما جيت اول يوم خالد راجل علوية عمل مشكلة طويله عريضه عشان انا بنت براي وماعارفين عني اي حاجه لما خالتو علوية اتكلمت معاو وقالت ليو ماعندك شغله بها قال ليه بقطع رجلك لو عتبت بابه او خليتها تجي بيتي ومااشوف بناتي معاها خالتو علوية قالت ليو كويس بس كانت بتجي بي الدس و بناته كانت بتحاول تبعدهم مني وانا مازعلانه مهو عندها حق
بتذكر جات سألتني من اهلي وانا مابقدر اكذب عليها لو قلت ليه امي. وابوي متوفين اكيد بتقول لي باقي اهلك فحكيت ليه طوالي انو انا من اولاد المايقوما في الأول حسيت بيها كشت مني بس تاني رجعت طبيعة ومختصراني شديد مابتدخل بيتي الا لي الضرورة ومابترضا ادخل عليه علاقتنا بي الحيطه بترفع لي حاجه وبرد ليه انا بي حاجه وباقي الجيران نفس الشي زول دخل علي مافي من غير الهمس البسمعو لما اكون ماشه ولا النظرات البتكون علي نحنا محل مانمشي بنكون منبوذين الدنيا اتبرت مننا زي ما أهلنا اتبرو مننا
مع ذكرياتي نمت وكانت كل احلامي كوابيس طفله قاعدة في مكان كلو ظلام مافيو نور وشايلة ليه عروسه وحاضنها مافي اي يد اتمدت ليه عشان تطلع من الضلام مافي حتى صوت يقول ليه ماتخافي نحنا سندك ومعاك مافي اي خطوات تسمعه عشان تحس بي الأمان طفلة قاعده وخايفه في الضلام منتظره اليد البتمسكه وتقومه لي النور
صحيت وانا مخلوعة قمت اتسوكت وصليت وقفت في المرايا وشي الاسمر الباهات حجمي العملاق البشوفني بقول عندي كم و٤٠ ما كم و٢٠ ختيت زحيت من المرايا طلعت المطبخ عملت لي شاي قعدت اشرب فيو واراقب في الزهور
قمت جريت الخرطوش وسقيت الزهور رشيت الحوش قفلت الماسوره اتحركت غرفتي طلعت لي عبايه وطرحه لبستهم رفعت الشهادة والدفتر واتحركت طلعت لقيت سيد البيت في وشي قال لي كيفك ياسحوره قلت ليو الحمد الله كويسه قال لي عايز تزيدي لي الاجار ويعاين فيني نظراتو كانت نهاي ماطبيعة نظرات كلها طمع
شعر جلدي قام من نظراتو قلت ليو وانا اتمتم تتت تمام انشاء الله واتحركت منو سريع ماعايزه اقيف معاو اظن افتكرني عشان براي انو انا من النوع داك وانا متحركه على المواصلات لسه بتخيل فيو و برجف من نظراتو وطريقة كلامو
بعد تعب حتى ركبت كانت المواصلات زحمة شديده عافرت عشان اركب الطرحة كانت بي جها وشعري بي جها والشنطة دي حسيت بيه اتقطعت من الدفير قعد في مقعد قعد جنبي راجل كبير بكون عمرو في الخمسينات وانا اعدل في شعري تحت الطرحه وعدلت عبايتي والشنطة ولفيت الطرحة كان احس بي الراجل وحركاتو زحيت منو واتصلقت مع الشباك اتحرك علي ماعرفت كيف ادافع عن نفسي كنت برجف ومخنوقه شديد التفت عليو قلت ليو ياخال ممكن تبعد شوية ولا اشتغل بي ولسه مواصل دموعي نزلت دمعه ورا دمعه ليه الدنيا كده اسه بسبب الحاجات دي انا والف ولد وبنت مجدعين في الشوارع في دار الايتام طقطقت لي الكمساري وقمت سريع مديت ليو القروش وانا برجف ونزلت وقفت وماعرفه كيف اكمل المكان الفيو الشركة بعيد شويه عايزه ليو اقل شي نص ساعة بي العربيه
فتحت شنطتي وحسبت القروش المعاي قلت لو اجرت ركشه تاني بكون ما معاي غير قروش المواصلات لي الرجعة يعني باقي اليوم أمكن اقعدو من غير اكل قلت اتوكل اشوف ركشه أمكن الله كاتب لي الشغل دا وقفت لي ركشه وركبت وصلت الشركة حاولت ارتب من شكلي بعد ما نفضت العباية وتمرت الاسبورات وعدلت الطرحه دخلت قعدت في الرسبشن معاي كم بنت ومنتظرين بعد. مادخلو كم وحده قمت ودخلت ضربت الباب قال لي اتفضلو لقيتو شاب في ٣٠ سلمت وقعدت مديت اوراقي عاين فيني وضحك قال لي اسه انتي بي شكلك دا بتفهمي في الموضه
ولا عاين لي الأوراق انتي اول شي حاولي غيري من نفسك وبعدين تعالي غيري في الموضة وضح قال لي اتفضل معندناش شغل شلت أوراقي واتحركت كمية الوجع والانكسار لو نزلت الف دمعه مااظن بخفف لي الوجع والكلام القالو طلعت من الشركة من الحرقه مشيت بي رجولي ساعتين وانا ماشه مع كل خطوه انا بحس لي الخذلان والتعب والكسره والوجع شايفه في اطفال قاعدين يشحدو لابسين مقطع عاينت فيهم قلت الحمد لله على النعمة الفيه
اتحرك عليهم طلعت القروش الفي شنطي ومديتها ليهم واتحركت وصلت البيت وانا ارجف من المشوار جدعت الشنطة والشهادة وقعدت في الارض ابكي ماعارفه ابكي من شنو ولا شنو استغفرت الله وقمت دخلت استحميت وغيرت وصليت الضهر كنت جيعانه مافضل لي ولا قرش عشان اشتري حاجه اكله قمت دخلت المطبخ لقيت لي عيشه ناشفه وعملت لي كباية شاي وقعدت اشرب واكل في العيشه الناشفه [
ععقيمان تبنوا طفل من دار الأيتام وعندما رزقهم الله بطفل اعادوا اليتيم إلى دار الأيتام و عانى الطفل من الفقد مرتين💔].....يتبع