رواية خلف الابواب المغلقه الفصل العاشر 10 بقلم مشاعر مبعثره
بقيت ما فاهمه شي بالجد ، الزول دا اتزوجني بدافع الشفقه؟ ولا عشان اولادو؟ ولا لحاجه في نفسو؟!!!!!! ما قادره احدد ، في كل الحالات انا ما بقدر امنعو من اي شي ، وايا كان السبب الاتزوجني عشانو ، لازم انصاع له ، لانو في النهايه بقى اسمو زوجي وعندو حقوق مفروضه علي .
مشيت صليت العشاء نومت اولادي الاتنين ، الا مهيلم الصاحي ، طلعت به الصاله ، غلبني ، ما عارفه قلة الادب له شنو!!!؟ الا شايلاه كدا ، واخش وامرق به ، ابو ليان كان في غرفتو ، لمن شافني جاء طالع .
قال لي : مالو الولد دا الليله .
: ما بعرفو والله ابى ينوم بس .
شالو مني ، نزلو في الارض ، قعد يحبى وانا اجيه بجاي يمشي مني بجاي ويضحك.
: دا عاوز يلعب بس.
: لكن دا م وقت لعب الدنيا ليل والمفروض ينوم .
: خليه على راحتو.
: لالا اخليه شنو مافي زول فاضي له.
رفعتو من الارض وهو يلاوي فيني.
انت ما تتعب نفسك اسي برضعو وبنوم.
: في زول بغصبوه على النوم يا سمر؟؟ نزليه يلا.
نزلتو قام حبى لمن دخل غرفة ابو ليان لحقتو لجوا دخل لي تحت السرير وانا انادي فيه.
جاء ابو ليان يضحك قال لي : خليه.
اليوم داك عذبنا عذاب ، يجري هنا وهناك ، ونمسك فيه ويضحك ، شايفا لعبه ، لمن تعب ورقد في حضني ، عاوز يرضع .
رقدتو في السرير ورقدت جنبو ، وغطيتو بتوبي رضعتو بعداك نام .
كل م اجي ارفعو يصحى يبكي ابو ليان قال لي خليه ساي ، بدل يصحى يغلبك ، انتي زاتك بتكوني نعستي قال كدا ، وجاء قعد في السرير جنبي .
انا لحظتا ادركت انو عاوز حقو ، وما قادره اقول شي ، بس قاعده ومنزله راسي لتحت ، ضربات قلبي دي بقت مسموعه وجسمي هبط عديل .
قال لي : ارفعي راسك ، ما قدرت .
: سمر ارفعي راسك عايني لي .
: انت برضو يا ابو.....
نزار!!! قولي نزار ، نحن حاليا متزوجين ، ومافي داعي للألقاب ، والخجل الانتي فيه دا برضو مافي له لزوم .
انتي عندك تجربه سابقه ، وانا نفس الشي ، يعني نحن الاتنين مدركين لاهمية العقد البيننا دا ، انا زوج وانتي زوجه ، وكل واحد فينا عندو حقوق ، وعليه واجبات ، وانا والله بوعدك م اقصر ولا احرمك من اي حق ، وانتي كمان عندك واجبات فاهماني صح؟؟؟
ذادت دقات قلبي ، ونزلت راسي تاني ، مستسلمه له ، ولأي حاجه يعملا معاي ، لانو دا حقو كزوج ذي م قال .
ابتسم ومد يدو رفع راسي ونزل منو التوب .
ذادت دقات قلبي ونزلت راسي تاني ، مستسلمه له ولأي حاجه يعملا معاي ، لانو دا حقو كزوج ذي م قال .
ابتسم لي ومد يدو رفع راسي ونزل منو التوب قال لي : انتي ما ملزمه ب اي حاجه تجاهي !!!! وما تخافي طالما انتي قاعده هنا اخدي حريتك وراحتك ، انا اصلا عملت الخطوة دي بالذات عشان تكوني مرتاحه وما تضطري تحظري نفسك في البيت ، وتتواجدي في اماكن محدده او تتجنبي انك تختلي بي !!! لاي سبب ، حتى التوب المقيده نفسك به وشالي حركتك دا ترتاحي منو ، انتي في بيتك حرفيا وفعليا!!! ولك مطلق الحريه فيه.
ابتسم وكمل كلامو : ما تخافي مني ، م حأقرب منك ولا اعمل حاجه تضايقك لأي سبب من الاسباب ، لاني م اتزوجتك للسبب دا واضح يا سمر .
لمن قال كدا انا حسيت ب انو في حمل كبير انزاح من علي صدري ، فجاءة بقى وطن امن بالنسبه لي ، بعد كنت خايفه منو قدر بكلمات بسيطه يصهر كتلة الجليد البيننا دي.
قاطع سرحتي : ما تفكري كتير ، يلا امشي نومي مع اولادك لو مهيلم صحى انا بجيبو لك، بعد طلعت جيت راجعه قلت له البنات ما دخلو لي السرير🙈
: هههههه شفتي المكر؟ انا بدخلو لك.
: تقيل خليني اشيلو معاك.
: يا مرا ما بالغتي؟ كيف تقولي لي كدا!!! هم البنات كانو بشيلوه.
: الحكايه شنو؟ مره يا جارتي ومره ام هاني وسمر ، واسي يا مرا؟؟😅
: اييييوا مش مرتي؟
: شكلك بديت تستخدم اسلوب الاستبداد معاي بموجب العقد الموقع بيننا.
: ههههههه ما معقول كمية السينات الاستخدمتيها في الجمله دي 😅، صح نسيت انك استاذة لغة عربية.
: انا هنا عشان اصحح اخطائك اللغويه بس يا دكتور.
قعدنا نطق حنك ساعه لحدي ما دخل لي السرير وفرشو لي. نمت للصباح الا اتفجأت بمهيلم جنبي ، ما عارفه زاتو جابو متين!! قمت صليت ومشيت المطبخ ، لقيتو بعمل في الشاي صبحت عليه ومسكتو منو.
: امس نمت مرتاحه شديد من غلبة مهيلم ، بس ما يكون ازعجك؟
: هو قعد لكن؟؟😅 نص ساعه ما تماها ، من مشيتي صحى الا جبتو لك ، وكنتي ما شاء الله مستلمه السرير خفتك ترفسيه توقعيه😅.
: معقول انا ما صحيت دا كلو؟؟ لالا ما بصدق انا نومي خفيف شديد.
: لالا ظاهر ، هو انتي اترفعتي من مكانك واخدتي حقنه 💉 ما حسيتي بها تحسي بوجود مهيلم معاك في السرير؟ 😅😅
قلعت عيوني وقلت له : دا متين دا؟
: اول يوم تعارف نسيتي؟؟ يوم الموقف البايخ داك!!
ختيت يدي في صدري وقلت له بخلعه سجمي اديتني الحقنه يعني؟
: ايوا طبعا لو ما هي كان بتقومي يعني؟
انا طبعا خلاص عاوزه اموت، ما مصدقه اداني الحقنه في العضل!! 😱😱😱😱🙈🙈🙈🙈.
فضيحة السواد ، وانا قاعده الزمن دا كلو اتعامل معاه عادي .
انا اليوم كلو ما قدرت اعاين له ، مع انو الموضوع عدا عليه كتير ، واصلا عادي ، بس طبيعة علاقاتنا خلتو محرج بالنسبه لي.
: انتي م ناويه تحكي ل أهلك بعد دا؟
سكتت.
قال لي : ايا كانت ردة فعلهم لازم يعرفو ومنك انتي!! كيف تتزوجي وهم ما يعرفو؟ وشايفك ما متواصله معاهم نهائي ليه الجفاء د؟ مافي واحد منهم اتصل الفتره دي؟؟
: بتصلو ، ونحن متواصلين عادي .
: طيب ليه ما حكيتي لهم؟
: لاني م عاوزه زول يشفق علي ، ما عاوزه اسمع كلمات لوم وتوبيخ منهم ، ما عاوزاهم يقولو لي تعالي واقعد وسطهم بحالتي دي ، ما بتحمل كلمات تجريح من جدو ولا اشوف اهلي بتعرضو للشماته والتريقه عشاني انا ما بتحمل اكون صغيره قدام الناس خاصة اهلي .
: مافي زول ح يشمت فيك يا سمر ، دا واقع اتفرض على الناس كلها م انتي براك .
: بس ما كل الناس اتحدت وحاربت عشان تعيش مستقله.....يتبع♥️